حب في الثانوية

chapitre 83

غدوة الصباح نضت على صوتوا وهو يحكي بالتلفون في البالكون وقفت نمشي بالشوية باه ما يفيقش حابة نسمع مع من قاعد يحكي وقفت بعيد شوي نسمع فيه يقول لازم في اقرب وقت ، من بعد سكت شوي ومن بعد قال بالاحد ان شاء الله كيما تفاهمنا اوكي . مفهمتش بزاف من هدرتوا بصح توسوست وش هي لي لازم في اقرب وقت رجعت لبلاصتي باه ميفقش دخل قتلوا صباح الخير وين كنت قالي كنت في البالكون نتكيف وقتاه نضتي .قتللوا هدا وين نضت ، تفكرت بلي غدوة عيد ميلادي، فرحت نفضت الافكار وتوسويس  كل من راسي و  قدمت فوق سرير وتحضنتوا قتلوا دومي حبي غدوة وش ؟؟؟؟؟قالي غدوة السبت علاه راكي تسقسي  . قتلوا لا  افهمني قصدي قداه في الشهر غدوة ؟؟؟ قالي 4 علاه .قتلوا اففففف ميفكرك بوالوا هاد النهار  4 افريل ، صرات فيه حاجة مهمة ؟؟؟؟ قالي لا ياك مش عيد الحب ههههههه ولا عيد زواجنا ؟؟؟.قتلوا  اففففف يخي صامط نوض نوض طلعتلي الدم لراسي . ضحك قالي وشبيك نايضة متحلفة ليوم غير الخير . قتلوا والوا اديني عند ماما نقعد عندها شوي . قالي اوكي وجدي روحك نديك عندها لعشية نجيبك .
رحت عند ماما قعدت عندها حتا لليل من بعد روحت للدار تعيشت وديراكت عطيتها برقدة مفقتش حتى الصباح . غير فتحت عينيا جا في بالي بلي ليوم عيد ميلادي يااااااا شحال فرحانة راح يولي عمري 19 صاي كبرت تلفت على جنبي لقيت آدم راقد حطيت يدي على وجهوا نوض فيه قتلوا وقتاه ينوض البوڨوص تاعي راجلي هيا نوض راح الحال . فتح عينيه قالي علاه تنوضي فيا ياك ليوم ويكاند خليني نرقد لبارح سهرت. قتلوا لا نوض صاي مكانش رقاد ليوم نهار مميز لازم نوضوا بكري ديجا واحد ما قالك اسهر بزاف شوف انا رقدت بكري راني نوضت اونفورم ليوم .قالي وشبيك نايضة على الصباح تاع ربي تقول بالعة كاسيط اسكتي شوي ديجا اخرجي خليني نكمل رقادي طيرتهالي مع  الصباح تاع ربي . بقيت حايرة شعل فيا ضربة وحدة قريب كلاني وانا غير كنت نضحك معاه .قتلوا آدم وشبيك تهدر هكدا ياك ما درتلك والوا . قالي ايه ما ديرتيلي والوا دوك اخرجي خليني نكمل رقادي . قلقني وقفت من بلاصتي لبست بنتوفتي وقتلوا هاني خارجة مخليتهالك كمل رقادك لي راح تربح بيه شعر . تقعد من  بلاصتو راح ينوضلي قالي ليوم نكويلك فمك . هربت نجري خرجت وردخت الباب ورايا دخلت للدوش قفلت  الباب بالمفتاح . جا بقا يطبب قالي افتحي قتلوا منفتحش روح . قالي افتحي وعاودي وش كنتي تقولي يا زوفرية ،راح ترجعيلي مافية قتلوا مانفتحش . بقا يطبب قالي ياك تخرجي تخرجي ونحكم وتشوفي . بقيت شي ربع ساعة تخنقت في الدوش . قتلوا دومي خلاص سامحني راني راح نخرج تخنقت . فتحت الباب ديراكت حكمني من تريكوا تاعي على ضهري قالي هاني حكمتك وش ندير فيك دوكا قتلوا سامحني برك ديجا انت لي قلقتني كيفاش تقولي اخرجي عليا وانا لي زعما نوض فيك بالحنانة . قالي قوليلي برك من تجيبي في كلام هدا انا نبعتك الجامعة باه تقراي ولا تتعليمي في الالفاظ تاع الشارع راح تولي زوفري ناقص غير تتكيفي . ضحكت قتلو والله شفتها في الفايس بوك مش من الجامعة قالي وانتي اي حاجة تشوفيها ولا تسمعيها تعاوديها . قتلوا خلاص سامحني . طلقني وهو يتنهد خزرت معاه قتلوا متفكرتيش حاجة ليوم . قالي وش نتفكر . قتلوا اففففف خلاص خلاص انت أصلا ما تحبني ما والوا كون جيت تحبني راك تفكرت وش كاين ليوم . كملت نهار كامل وانا نلمحلوا وهو والوا ناسي وصلت التسعة تاع الليل قالي وجدي روحك راح نروحوا عند يما قتلوا علاه غير الخير كشما صرا قالي والوا جيست قاتلي ارواحوا اسهروا عندي ليوم  قتلوا ايه . المرة هادي حبيت نبدل ستيل شوي كنت شريت جلابة غوز كيما تاع المراركة لبستها درت شويا مكياج وخمار حطيتو برك ورجعتوا لورا كملت مع صابوا طالوا خرجت عندوا شاف فيا قالي واش لابسا هكدا .قتلوا واش مش شابة ، قدم باسني على خدي قالي لا شابة بزاف قتلوا صح قالي لا نكدب . ضحكت قالي هيا ديجا راهي قريب العشرة. وصلنا عند دار عجوزتي هبطنا وصلنا للباب قتلوا افتح ندخلوا البرد راح نتجمد بقا يفتش  على المفتاح في جيبوا حتى جبدوا وفتح الباب قابلتنا ديراكت الدنيا ضلمة يدك متشوفيهاش قتلوا آدم علاه راهي الضلمة هكدا قالي بلاك راح الضو باينة قتلوا ايه بلاك هيا . كملت نمشي وانا حايرة كيفاه مخرجوش موالفة غير نوصل ندخل ديراكت تجيني دنيا قلت بلاك مافقوش بينا ولا مسمعوش الهدرة نضت نعيط دنيا راني جيت وينك وهو ورايا ساكت.جيست وصلنا للصالة حكمني على يدي ودخلنا شعل الضو ونشوف الدنيا كاملة بالزينة غوز ولاطارت في النص وماما ودنيا وعجوزتي واقفين و معاهم شروق  ويغنيو في  سنة حلوة حطيت يدي على فمي وانا نضحك عرفتهم دارولي مفاجأة درت عند آدم تحضنتوا قتلوا علاه ما قتليش . قالي حبيت نديرهالك سيربريز ، سلم عليا و باسني قالي كل عام وانتي مرتي و حياتي ودنيتي  وعمري لي نموت عليها ...... يا يما قلبي الصغير لا يتحمل وليت نبكي قتلوا نحبك .  تبسم وقالي وانا نعشق فيك هيا امسحي دموعك . مسحت عينيا ورحت سلمت عليهم وانا الدنيا مش سايعتني من الفرحة رجعت وقفت بحدا آدم وحكمت في يدو قتلوا هيا نطيفيو الشمعة . قالي هيا تمناي امنية وإن شاء ربي يحققهالك . قتلوا ما نتمنا والوا غير ربي يحفضلك ليا انت وو لدي لي جاي ويدوم فرحتنا هكدا . قالي لن شاء الله هيا طفي الشمعة . قدمت طفيتها وهم يسفقولي ،شحال راني فرحانة . كملنا سهرة تهبل كامل مع بعضانا من بعد عطاوني لي كادوا و روحنا . غير وصلت للدار دخلت للشمبرة باه نبدل قشي لقيتها كاملة مزيتة بالورد والشمع وغوب في الغوج محطوطة فوق السرير والعشا محطوط فوق الطابلة مصدقتش عنينا خرجت نجري عندو عنقتو وانا نبوس علابالك بلي انت احلى واجمل واحسن راجل في الدنيا ڨاع يا ربي باش نموت من الفرحة ، تبسم قالي ربي يدومها فرحتك يا روحي هيا وجدي روحك والبسي لاغوب لي خلتهالك فوق السرير باه نكملوا السهرة تاعنا . عاودت رجعت للشمبرة لبست لاغوب وطلقت شعري مع مكياج سامبل ولبست طالوا تاعي كملت . دخل قالي كملت الزينة تاعي ، ضحكت قتلوا ايه كملت كيفاه جيت شابة ؟؟؟؟ قالي كيف العادة ملكة جمال . قعدت تعشينا وعاودت طفيت الشمعة تاع لاطارت لي دارهالي من بعد جبد بوات من الجيب تاعوا عطاهالي كي فتحتها لقيت فيها ساعة تهبل باينة بلي سبيسيال ، لبستها في يدي وانا نضحك قتلوا دومي حبي راك مزروب على فراقنا انا وياك . قالي كيفاه ؟؟؟ قتلوا علابالك بلي ساعة تدل على الفراق . قالي بطة مزلتي تأمني بالحوايج هادوا كي الساعة كي السنسلة كلهم كيف كيف غير خرافات برك .قتلوا منعرف من بكري يقولوا هكدا بصح انا وياك حاجة ما تفرقنا لا ساعة لاغيرها . قالي صحيتي هكدا نحب البطة تاعي انا . من بعد راح شعل غناية رومانسية .ورجعلي عطاني يدوا قالي تسمحلي الاميرة تاعي بهاد  الرقصة . قتلوا ايه الامير تاعي . رقصنا مع بعض . كانت ليلة مميزة من البداية للنهاية بصح ما كنتش نعرف بلي هادي آخر ليلة لينا . رقدنا غدوة الصباح فقت لقيتو قاعد فوق الفوتاي في الشمبرة وحاط راسوا بين يديه يخمم . قعدت في بلاصتي قتلوا دومي صباح الخير علاه ماروحتش تخدم ياك اليوم الأحد . مسح على لحيتو قالي ليوم معنديش خدمة بزاف محبيتش نروح قلت نبقى معاك خير.  قتلوا ايه خير مدابيا كل يوم تبقى معايا . كان يبان يخمم ومقلق. وقفت ورحت قعدت بحداه قتلوا آدم راك تبان مقلق كڜما صرا . قالي والوا قتلوا انا قلقتك في حاجة راك زعفان مني . قالي مش زعفان منك . قتلوا ايه مليح علابالك انا منحبش نزعفك ولا نقلقك . قالي علابالي . قعد ساهي شوي من بعد وقف قالي دوك نجي . شوي ورجع هاز في يدو كاس تاع الجي ،كي وصل مدهولي قالي اشربي . قتلوا يا تقول عليك طليت على قلبي حتى انا نضت فشلانة ليوم . شربتوا كامل على ضربة وحدة ، غير كملتوا راسي ثقل عليا مفقتش كيفاش دخت في بلاصتي بعدا .
شوي وقت حسيت روحي راني مهزوزة فتحت عينيا شوي برك قيس ما شفت روحي راني في الطونوبيل مع آدم من بعد عاود رقدت والمرة ثانيه كي فتحت عينيا لقيت روحي في السبيطار وادم بجنبي والطبيبة تاعي واقفة بحدا راسي . سمعت آدم قالي ريجا حبي اسمحيلي بصح انا راني منقدرش نشوفك راح تنضري ونسمح بهاد الشي انا منقدرش نعيش بلا بيك منقدرش نشوفك تخاطري بحياتك ونبقا قاعد . مفهمتش المرة لولة على واه راه يهدر من بعد ضربت ديراكت ديراكت في راسي ولدي .قتلوا آدم لا تعيش ماديرش فيا هكدا . هز يدي باسها قالي اسمحيلي حبيبي .  نطقت الطبيبة قاتلي في مصلحتك بنتي وحسيت بيها ضربتلي إبرة في يدي .