حب في الثانوية

chapitre 77

فقت على ريحة الدوا و صوت تاع les appareils ، كنت حاسة روحي راني نحلم ،حسيت بالبرد فتحت عينيا لقيت آدم قاعد بجنبي فوق الكرسي قتلوا آدم البرد . حكملي يدي باسها قالي ريجا حبي فقتي راكي تسمعي فيا . قتلوا آدم البرد ، حط يديه على كتافي بقا يمسحلي عليهم قالي يا عمري احملي شوي برك ونرجعوا لدارنا . كنت مزلت حاطة روحي راني نحلم عاودت غمضت عينيا غفيت شوي ، عاودت فقت على وجاعة في يدي وفي كرشي فتحت عينيا وبقيت نشوف مع الشمبرة لي راني فيها ،خزرت مع يدي لقيت لاصق فيها السيروم والدم ،عرفت روحي بلي في السبيطار بصح وش جابني لهنا هزيت يدي حطيتها على كرشي وين كنت حاسة بالوجاع كانت فرغانة وهابطة مش منفوخة ،تصدمت هزيت الغطا لقيت روحي لابسة غير هديك اللبسة تاع السبيطار والخيوط لاصقين في صدري بصح هدا كل مهمنيش بقيت غير نشوف مع كرشي لي كانت فرغانة . دموعي هبطوا وش صرى علاه كرشي فرغانة حكمتني الخلعة وين راه ولدي وش صرالوا مافقتش مع روحي وليت نعيط نحيت هدوك الخيوط لي لاصقين فيا ووقفت حابة نفهم وش صرى علاه كرشي فرغانة ديجا علاه راني في السبيطار ،انا وقفت دخلت الطبيبة قاتلي مدام علاه وقفتي من بلاصتك . قتلها وش صرالي علاه راني هنا قاتلي الحمد الله على سلامتك تعرضتي لدبحة صدرية وعندك نهارين هنا ، حطيت يدي على كرشي قتلها وولدي وش صرالوا قاتلي مات ربي يخلف عليكم ، مصدقتش وش راني نسمع هكدا بهاد السهولة خسرت ولدي لي كنت نستنى غير وقتاه يجي لهاد الدنيا ونفرح بيه. هزيت راسي بلا مستحيل ولدي يكون مات مستحيل . قتلها مستحيل يموت . قاتلي مدام كالمي روحك هادا مكتوب ربي المهم صحتك انتي راكي وصلتي للموت ورجعتي منها معجزة لازملك راحة تامة وادا على الاولاد مزال العمر قدامك مزالك صغيرة . كنت نسمع فيها كيفاش تصبر فيا وانا مش مستوعبة بلي صاي خسرت ولدي بعد ما تعلقت بيه تهسترت وليت نعيط وحدي جيبولي ولدي وين ديتوا ولدي قدمتلي الطبيبة تجري باه ديرلي ابرا تاع المهدء دزيتها على قوة جهدي حتى قريب طاحت في الارض بقيت غير نعيط جيبولي ولدي وفرات يعني بعد ما ربيت عليه الكبدة وحبيتوا يموت ويروح هكدا نرقد نوض نلقاه مكانش شفت الفرمليات دخلوا يجريو بعد ما سمعوا صوتي ووراهم آدم غير شفتوا تقول عليا شفت بابا قدملتوا قتلوا آدم شفت راهم نحاولي ولدي من كرشي قتلولي ولدي ، تحضني على قوة جهدوا قالي خلاص عمري متبكيش خلاص ولدنا راح عند مولاه مكتبلوش ربي باه يجي للدنيا . رجعت نبكي ونعيط قتلوا لا أنا نسحق ولدي الله يسهل عليك جيبلي ولدي مسحلي على شعري قالي ربي يعوضنا ان شاء الله ، جيت راح نبعد عليه بقا حاكمني حتى حسيت حاجة دخلت في يدي شفت لقيت الطبيبة دارتلي إبرة وليت نشوف في كلش مضبب حتى دخت .
وقت فقت المرة الثانية لقيت آدم قاعد بجنبي حاط راسوا بين يديه يخمم مافاقش بيا حتى بلي راني نايضة نحيت الماسك تاع الاكسجين من وجهي ودموعي يهبطوا وحدهم مزلت مش مصدقة بلي صاي خسرت ولدي ، نطقت بسيف قتلوا آدم . طلع راسوا خزر معايا قدملي باسني على جبيني قالي ياروحي فقتي وش راكي حاسة حاجة توجع فيك علاه راكي تبكي نعيط للطبيبة تجي تشوفك . درتلوا براسي لا قتلوا ولدنا مات صح ؟؟ . قالي ياروحي متبكيش هادا مكتوب ربي ربي يخلف علينا ان شاء الله . قتلوا لا أنا نحب على ولدي رجعهولي الله يسهل عليك . سمعتوا ستغفر وقالي ريجا يا عمري ولدنا راح عند لي خلقوا لازم تكوني أقوى من هكدا ربي يعوضنا ان شاء الله . رجعت نبكي ونعيط ونحي في هدوك لخيوط من صدري وهو يحكم فيا و les appareils هدوك عادو يصونيو حتى جات الطبيبة تجري مع فرملية حكمتني قاتلي مدام وش راكي ديري هكدا حياتك راهي في خطر المرة لي فاتت الدبحة ديراكت جاتك في توام وماتوا المرة هادي بعيد الشر تجي فيك انتي لازم تساعدي روحك قلبك راه ضعيف مش راح يقدر يتحمل الضغط اكثر من هكدا . انا سمعتها عقل ما قعد في راسي يعني انا كنت حامل بتؤام وراحوا قبل حتى ما نعرف بيهم فات بين عينيا اليمات لي تعداو لي كنت نعاني فيهم وحدي واحد معلابالو وش راه صاري معايا وهدا كل بسباب آدم مفقتش مع روحي كيفاش درت عليه قتلوا كلوا بسبابك أنت كلوا بسبابك أنت ولادي ماتوا بسبابك أنت عمري ما راح نسامحك بقيت غير نتحرك في بلاصتي حابة غير نوقف ونتلاح فيه نبرد قلبي بصح طبيبة والفرملية بقاو حاكمني مخلونيش نوقف وهو غير واقف يشوف معايا . قتلوا اخرج عليا اخرج عليا بسبابك أنت ماتوا ولادي قبل ما نشوفهم ، كنت حاسة قلبي كان حاس ، ياك قتلك آدم راني حاسة حاجة راحت مني حاسة حاجة نقصت مني كلوا منك انت كلوا منك عمري ماراح نسامحك اخرج عليا برة عليا ، وهو غير ساكت يشوف معايا يمكن مصدوم متوقعنيش بلي راح نلوموا هكدا ، دخلت ماما مع عجوزتي ودنيا تجري عندي حكمتني قاتلي بنتي بالعقل برك خلاص تهدني راكي مريضة كالمي روحك . قتلها ماما بسبابوا هو ماتوا ولادي هو لي قتللي ولادي هو . قاتلي اريج وش راكي تقولي هبلتي انتي . قتلها متقوليليش هبلتي هو السبة هو . قاتلي اريج اسكتي وش راكي تخلطي وقيلا مزالكي دايخة . رجعت نعيط على طول صوتي قتلها متقوليليش راكي دايخة مانيش دايخة كلوا منكم انتم قتلتولي ولادي اخرجوا عليا منحب نشوف حتى واحد فيكم نكرهكم كلكم اخرجوا عليا رجعولي ولادي نحب على ولادي . نشوف فيهم كل يتفرجو معايا مشوكيين فيا كيفاه راني ندير بصح الله غالب كنت في هستيريا تاع الصح دايخة معلاباليش حتى وش راني نهدر ، حتى حسيت بحاجة تخرج من فمي كيف الزبدة وطرافي جمدوا عليا عينيا تقلبوا غير شافوني حالتي هكدا ماما ناضت تعيط على الطبيبة لي قربت تفحص فيا قالتلها وش صرالها وشبيها بنتي .. قالتلها طبيبة حكمتها كريز اخرجوا خلوني نخدم خدمتي وناكدلك يا مدام بنتك ادا قعدت في الأجواء هادي راهي تروح من بين يديك . ماما رجعت تبكي من بعد خرجوا كل بقات غيرر طبيبة تفحص فيا وركبتلي إبرة تاع المهدء وخرجت . فات نهار كامل وانا راقدة من نوض تجي الطبيبة ديرلي إبرة نعاود ندوخ بصح حتى انا تمنيت ندوخ ومنفيقش خلاص قلبي محروق على ولادي ولي حارقلي قلبي أكثر هو اني بسبة آدم لي خرستهم ايه بسبتوا هو ، هو لي ضغط عليا هو عيشني عداب خلاني نفقد ولادي ، هو لي مراعاش حالتي وبلي راني مريضة وضغط عليا حتان صراتلي دبحة صدرية ، هو السبة عمري ما راح نسامحوا نكرهم كلهم .
غدوة الصباح فقت وانا كالم اكثر من اللازم كأنهم بدلوني مش اريج تاع البارح لي كانت تبكي وتعيط خاطر خسرت ولادها بسباب راجلها ، كنت في حالة تاع هدوء كأنو مشاعري تجمدت ضربة وحدة دخلت الطبيبة شافتني كالم تبسمتلي قاتلي راني نشوف فيك هادية هاد الصباح . بقيت ساكتة قاتلي المهم حالتك راهي تحسنت شوي على لبارح راح تكملي معانا نهارين من بعد تقدري تخرجي للدار بصح لازم راحة تامة والا راح تسوء حالتك . بقيت ساكتة حطت يدها على كتفي قاتلي متيأسيش هكدا راهي غير فترة وتفوت وربي يرزقك من عندو مزالكي صغيرة ، راجلك حاب يشوفك ويطمن عليك هو ويماك نقولهم يدخلوا عندك ولالا . قتلها لا قوليليهم راهي راقدة . دورت وجهي وغمضت عينيا مش حابة نشوف حتى واحد . خرجت الطبيبة من عندي شوي وسمعت الباب تفتح صوت خطوات تاع مشي خطوات نعرفهم مليح خطوات يخليو قلبي يرعش بين ضلوعي وريحة برفان نعشق فيهاو صوت انفاس يخلوني نحس بالامان شكون من غيرو آدم حب حياتي وراجلي ودنيتي ولي كان سبب في موت ولادي . قعد بجنبي في السرير ، انا قعدت مغمضة عينيا حتى هو كان حاطني راني راقدة حط يدو على كرشي وقالي ياريت انا لي متت ، وقت لي سمعتوا قال هكدا جسمي قشعر مستحيل نتخيل حياتي بلا بيه مهما يعملي منقدرش نتخيل دنيتي بلا آدم حتى يا لوكان بعيد عليا من شرق للغرب المهم نعرف بلي راهو حي بخير . كمل يهدر قالي علابالي بلي أنا السبة في موتهم علابالي بلي صاي كرهتيني وعندك الحق منقدرش نلومك ادا كان انا وكرهت روحي الشي لي تطلبيه راح يكون خاطر عارف روحي نستاهل ، ياريت نقدر نرجع الوقت للور . طبس باسني على خدي وحط شفافوا على رقبتي باسني بوسة طويلة شوي وناض وقف عدللي لغطا وخرج . وقت لي خرج فتحت عينيا وساحوا دموعي علاه وصلنا للحالة هادي علاه . فات نهار آخر من. تدخل عندي الطبيبة تقولي راهم حابين يشوفوك نقولها لا مانيش حابة نشوف حتى واحد حاسة بالكره ليهم كلهم ، غدوة الصباح دخلت الطبيبة قاتلي ليوم تقدري تخرجي بصح لازم راحة تامة وتمشي بالدوا لي عطيتهولك في وقتوا راح تتحسني ان شاء الله وترجعي كيف قبل ، مدام راح نوصيك ممنوع عليك الحمل الفترة هادي خاطر الرحم راه مضرر . قتلها كيفاش مفهمتش . قاتلي الرحم تاعك مضرر بزاف وادا صرا الحمل في الفترة الجاية حياتك حياة الجنين راح تكون في خطر كبير لدلك تفداي انو يصرا الحمل على الأقل لمدة عام ولا عامين. كنت نسمع فيها يعني مكفاش انو ولادي ماتو قبل ما يجو للدنيا وزيد ممنوع عليا الحمل لمدة هادي كاملة ، زدت كرهتهم اكثر كلهم واولهم آدم لي هو السبة في هاد الشي كامل . دخلت ماما قربت باستني قاتلي هيا نعاونك توجدي روحك باه تخرجي . دورت وجهي قتلها خلي برك نعرف نوجد روحي وحدي . قاتلي خلي نعاونك راكي مريضة منقدريش وحدك . قتلها مانيش مريضة راني لاباس عليا . وقفت من بلاصتي بسيف كنت حاسة جسمي كامل يوجع فيا ورحت للخزانة جبدت قشي لي كانت جابتهولي ، خزرت معاها قتلها تقدري تخرجي خليني نبدل قشي . قاتلي بدلي برك راح تحشمي مني يماك . قتلها راح تخرجي ولا نروح نبدل في الدوش . شافت معايا وتنهدت قاتلي الله يهديك برك . قتلها الله يهديني معلوم درك راني وليت مهبولة نقطع في قشي .خرجت وخلاتني بقيت نبدل في قشي ونبكي حاسة بفراغ كبير واحد ما يقدر يحس وش راني حاسة واحد ما يقدر يفهم العداب لي قاعدة نتعدب فيه . أصلا شكون لي مهتم بيا ولا حاول يفهم عليا كلهم همهم غير مصلحتهم ورواحهم برك . غير كملت لبست سمعت الباب طبطب من بعد تفتح . دخل بابا قالي وش راهي بنتي ، رجعتلوا بالناشف قتلوا لاباس . قالي راكي واجدة خاطر آدم راه جاي باه يخرجك . قتلوا ايه واجدة بصح راح نروح معاك . قالي علاه روحي لدارك خير . قتلوا وانا مش حابة نروح لداري ادا مش قابل نجي نقعد في دارك قولي ديراكت . شفتوا تقلق استغفر ومن بعد قالي اريج احشمي وش بيك تهدري معايا هكدا . بقيت ساكتة حتى دخل آدم سلم على بابا من بعد خزر معايا قالي وش راكي . شنفت عليه ومرجعتلوش شفتوا وجهوا عاد احمر علابالي كون ماجاش بابا واقف راهو عطاني طريحة على اللقطة لي ديرتهالوا . خزرت مع بابا قتلوا راني واجدة هيا نروحوا . نطق آدم قالي هيا . شفت معاه قتلوا انا راح نروح مع بابا .قالي كيفاه .قتلوا كيما سمعت انا راح نروح مع بابا وانت تبعثلي ورقة طلاقي وراني متنازلة على كلش هكدا . قالي بابا اريج وش قاعدة تقولي انتي . قتلوا كيما سمعتوا انا حابة نطلق ونحب في اقرب وقت توصلني ورقة طلاقي . قالي بابا وشبيك انتي راني نشوف فيك راكي بديتي تقلقيني احشمي على روحك خير من نمد يدي عليك . قتلوا علاه نحشم انا مش حابة نعيش معاه وطلبت الطلاق وراني متنازلة على كلش . قالي علاه حتى طالبة الطلاق . قتلوا هو لي قتللي ولادي . هو نشوف فيه غير ساكت ووجهوا احمر دم وقاعد يخزر معايا بوحد الخزرات كون ماجاش بابا واقف راهوا قتلني . نطق وقالي كيما تحبي روحي معا باباك . وخرج وخبط الباب . بابا شاف معايا قالي غير تبراي نعاود نربيك ولا مانيش انا اصبري برك الضاهر كنت غالط فيك وفي تربيتك . حتى هو خرج شوي ورجع هو وماما ومحمد قالي هيا . جات ماما راح تحكمني من يدي باه تعاوني نمشي . بعدت يدي وقتلها خلي برك . بقاو في ثلاثة يخزروا معايا حايرين فيا . كملت نمشي وحدي حتى خرجنا من السبيطار ركبت في الطونوبيل وحطيت راسي على الكارو وغمضت عينيا نخمم دموعي يهبطوا وحدهم حتى وصلنا للدار فتحت الباب وهبطت دخلت ديراكت للشمبرة تاعي وقفلت الباب بالمفتاح رميت روحي على السرير ديراكت رقدت . فطنت في الليل وغصة كبيرة في قلبي رجعت نبكي بالصوت حابة نفرغ قلبي ونرتاح . سمعت ماما طبطب في الباب قاتلي اريج أفتحي الباب علاه راكي تبكي . قتلها روحي خليني في حالي مدخلكش فيا ، شوي وسمعت صوت محمد قالي ريجا خويا هيا افتحي الباب نشوفك . قتلوا روحوا عليا خلوني وحدي متفهموش . قالي لا افتحي الباب . هزيت القرعة تاع الريحة خبطتها في المراية تكسرت وقتلوا روحوا عليا خلوني وحدي . سمعت ماما قاتلوا خليها دوك تتكلما وحدها . ايه هادي هيا ماما انا ديما آخر اهتماماتها . رجعت دفت راسي في المخدة نبكي حاسة روحي وحدي . غدوة الصباح نضت شفت الساعة لقيتها الوحدة تاع النهار خرجت من الشمبرة رايحة للدوش لقيت ماما في وجهي قاتلي صباح الخير كيفاه صبحتي فتت عليها وخليتها غسلت وجهي ورحت الكوزينة لقيت لبلاتوا تاع الماكلة محطوط فوق الطابلة قعدت ناكل منو حتى شبعت شربت الدوا تاعي كملت دخلت للشمبرة وقفلت الباب بالمفتاح . في العشية كنت قاعدة في الشمبرة سمعت صوت تاع هدرة صوت نعرفوا مليح صوت آدم ، علاه جا شوي وحات ماما طبطبت على الباب قاتلي اريج أفتحي راه جا راجلك يشوفك . قتلها قوليلوا بلي مش حابة نشوفوا ويطلقني . قاتلي اسمعي احشمي باباك راهوا قالق منك يزي من صحنية الوجه تاعك واخرجي راجلك حاب يحكي معاك. ايه حابتني نخرجلوا ايه . كنت لابسة غير بيجامة شعري داخل في بعضاه خرجت للصالة لقيتوا قاعد لثم وقفت في الباب وربعت يديا طلع راسوا خزر معايا قتلوا علاه جاي . نطقت ماما قاتلي اريج احشمي. قتلها ما نحشمش علاه جاي عندي ياك قتلك غير الطلاق بيناتنا . جبدتني ماما من يدي قاتلي اسكتي يسكت حسك وشبيكي انتي . قالي اريج اقعدي خليني نهدر معاك . قتلوا معندك حتى هدرة معايا ياك انا الكلبة الخاينة لي خبيت عليك يخي هكا كنت تقولي ولا نسيت وراح طلقني بالسيف عليك ولا والله نديرلك الخلع ونبهدل بيك قدام الناس خلي يقولوا مرتوا دارتلوا الخلع. قالي اريج متقلقنيش خيرلك خليني نهدر معاك كي ناس ولا والله نوض نكسلك بطريحة . قتلوا ايه هدا فاه تعرف اريج انت تعرفني غير وقت لي تضربني . قرصتني ماما على دراعي قاتلي اغلقي فمك بهدلتي بيا اسكتي يسكت حسك .خزرت فيها قتلها انتي بالدات متهدريش معايا كون جيتي تحبيني صح وتخافي عليا وتخممي فيا راكي عرفتي وش كان صاري معايا عندو بصح انتي آخر همك انا تخممي غير على محمد وفرات واريج بالبحر عليها . قاتلي صار هكدا انا منخممش عليك . قتلها ايه هكدا عاودت خزرت معاه وقتلوا وانت من اليوم ما تعرفني ما نعرفك فهمت وراح طلقني بالسيف عليك ولا والله نديرلك الخلع ونقولهم مهوش راجل . كنت غير نهدر برك المهم نجرحوا بهدرتي كيما جرحني ، ما فقتش حتى حكمتني ماما من شعري ضربتني بكف قاتلي والله نعاود نربيك يا لي متحشميش تهدري مع راجلك هكا . بقات تضرب فيا وانا نبكي حتى فكني آدم منها حبت تعاود تحكمني باه تكمل تضربني لقيت روحي وحدي وحدي بلا مانحس تخبيت ورا آدم وحكمت فيه حتى هو بقا واقف قدامي باه متقدرش تحكمني . قاتلي دركا متخبية وراه يا الكلبة يا لي متحشميش ، كانت تهدر وتلوح في يدها باه تحكمني . مخلاهاش آدم قالها خلاص خليها . هبطت يديها وقاتلي معليش من بعد نتفاهموا. انا بقيت نبكي حاسة روحي ضايعة وحدي معلاباليش حتى علاه راني ندير هكا .خزر معايا قالي كيما تحبي ورقة الطلاق توصلك في اقرب وقت مع حقك كامل . قال كلمتوا وخرج بلا يشوف فيا ، انا جمدت في بلاصتي يعني صح راح يطلقني خلاص فضت حكايتنا هكدا بهاد السهولة . فقني صوت ماما وقت قاتلي هاو راح يطلقك صح تهنيتي برد قلبك وقت خليتي دارك بيدك تستاهلي خرجت وخلاتني . طحت على ركايبي نبكي من قلبي .