حب في الثانوية

chapitre 81

اسمحولي حبوباتي على الروتار هيا شوي تفاعل ❤️❤️
وصلنا للدار وهو مزال متقلق وجهو السيف ميقصوش دخل ديراكت للدوش دوش وخرج راح للشمبرة تكسل على السرير وحط دراعو على عينيه وقعد يخمم وانا غير نشوف ما فهمت  والوا وش ندير وش نهدر باه نهديه علابالي هدرة تاع يماه زعفاتو . قدمت قعدت قدامو قتلوا آدم وشبيك تبان زعفان كشما صرا . نطق وهو مزال على نفس وضعوا قالي لا والوا جيست شوي مشاكل في الخدمة . قتلوا متقلقش روحك كلش يفوت بربي ان شاء الله منحبش نشوفك زعفان . هبط يدو وهز يدي باسها  وخزر معايا قالي وش رايك نديرو voyage de noces نسافرو  علابالي مقصر معك مديتكش درتي شهر العسل مور العرس بصح دوك نعوضوها . قتلوا صح . قالي ايه نروحوا للبلاصة لي تحبيها . قتلوا خلاص ملا نروحوا لفرانسا عندي شحال وانا حابة نروح ونحوس فيها  ونروح دزني  لاند . قالي خلاص غير غدوة نروحوا وجدي روحك  . الغدوة فات نهار بالخف وانا نوجد في روحي فرحانة عيطت لماما قتلها فرحت حتى هيا وبقيتها بالسلامة . غير غدوة سافرنا وانا ميتة بالفرحة فوتت احلى شهر في حياتي منضنش اني راح نفوت شهر احلى منو خاطر تاع الصح فرحت فيه ونسيت كلشي ڨاع همومي ومشاكلي نسيتهم .   آدم كان مدللني دلال تاع اميرات مكانش بلاصة محوستش فيها تصورت في كل بلاصة في فرنسا . عملت شوبينغ لعبت في دزني لاند كيما حبيت كان شهر عسل تاع الصح حبي لآدم زاد كبر وصل لدرجة العشق والهوس ، عاودت تعلقت بيه بدرجة مش نورمال وهاد الشئ كان على قلبي كي لعسل . رجعنا لدزاير  غير وصلت رحت لدارنا كنت توحشتهم بزااف سلمت عليهم وبقيت معاهم حتى للعشية ومن بعد روحت لداري .
غدوة الصباح صبحت في حالة حكمتني الحمة وحلقي يوجع فيا عرفتها لاڨريب على خاطر تبدل عليا الحال . فتحت عينيا لقيت آدم راقد بجنبي قدمت عندو بقيت نوض فيه قالي ريجا خليني نرقد منيش رايح للخدمة ليوم . قتلوا آدم نوضي راني مريضة . فتح عينيه قالي وشبيك وش يوجع فيك .قتلوا والوا حلقي يوجع فيا . حط يدو على جبيني قالي راكي مسخنة ، دقيقة نجيبلك الدوا . وقف جابلي الدوا شربتو وغطاني مليح . قالي نديرلك تيزانة بالقرفة والبابونج والزنجبيل  تروح عليك  . بقيت نستنى فيه وشوي وجبهالي جيست شميت ريحتها قلبي دار عليا راح نتقيا. قتلوا وشبيها ريحتها هكدا اففف تعيف . قالي وشبيها ريحتها لاباس بيها . قدمهالي باه نشربها قتلوا منشربش ريحتها تزعف . قالي ريجا يزي من دلال ياك موالفة تشربيها كيفاه ريحتها تزعف.  قتلوا منعرف المهم انا منشربهاش . قالي اريج اشربي يالله  متقلقنيش . انا راح نشرب  منها وهو صونا التلفون تاعو كان في الكوزينة خرج باه يهز . مع شفتو خرج بعدتها  من فمي بقيت نخمم مستحيل نشربها بففف ريحتها تزعف وقفت  بالخف سيحتها في البالكو في البو تاع النوار ورجع ليه ليه لبلاصتي . دخل شاف الكاس فارغ قالي شربتيها . قتلوا ايه شربتها..قالي المهم انا راني رايح للخدمة عيطولي تهلاي في روحك اقعدي في بلاصتك حتى  نجي مطيبيش الغدا  دوك نجيب معايا . قتلوا ايه لبس قشو وباسني وخرج . بقيت مع التلفون نتفرج وهو كل دقيقة يعيط يسقسي عليا حتى وصلت 12 سمعتو فتح الباب ودخل قدم باسني على رقبتي قالي واش حوالك قتلوا لاباس خير من الصباح قالي شفتي خاطر شربتي التيزانة . حكمتني الضحكة كون يعرف بلي سيحتها يقتلني .قالي هيا تتغداي . خرجت للكوزينة قعدت غير شفت الماكلة قدامي  رجع قلبي دار عليا وقفت قالي علاه وقفتي . قتلوا والوا شبعانة برك راح نرجع للشمبرة . قالي اقعدي تغداي من الصباح ما كليتي والو كيفاش راح تشربي الدوا لازم تتغداي  .قتلوا شبعانة .  خزر معايا وقالي اريج راني قتلك اقعدي . قعدت وانا نتأفف قلبي راح يخرج من ريحة الماكلة . قالي هيا كولي هزيت المغرف تاع الروز  غير قدمتها لفمي  صاي مقدرتش وقفت نجري للدوش نتقيا ، لحقني بقا معايا حتى كملت غسللي وجهي . طاقتي كاملة راحت من القي رجعني للشمبرة . قالي نديك للطبيب خير باين عندك التهاب في حلقك على هديك تقيتي . قتلوا خلي برك دوك نشرب الدوا راهي موالفة تصرالي كي نمرض قالي خلاص ملا ارجعي ارقدي ، تقدري تقعدي وحدك ولا نعيط لدنيا تقعد معاك خاطر انا لازم نرجع للخدمة منقدرش نقعد . قتلوا نورمال نقعد وحدي ديجا  نعسانة راح نرقد ما بين ما جيت . قالي خلاص كشما كاين عيطيلي اوكي حبيبي تهلاي في روحك الزينة تاعي . قتلوا ان شاء الله حبيبي هيا فأمان الله مطولش عليا بزاف . قالي اوكي . غير  خرج بقيت وحدي غمضت عينيا راح نرقد ضربت ديراكت في راسي  العادة عندها بزاف مجاتنيش فتحت عينيا  تخطفت من بلاصتي هزيت التلفون شفت لادات لقيتها روتار بعشر ايام . قعدت نخمم زعما راني اونسانت  غير خممت برك قلبي راح يطير بالفرحة ياربي نكون اونسانت لازم ندير تاست بصح شكون راح يشريهولي ، هو مستحيل نقولوا وانا مستحيل نخرج نشري وحدي خاطر منعرفش لبلاصة هنا وزيد نخاف يفيق بيا . بقيت نخمم حتى لقيت الحل نروح عند دنيا وهي تشريلي هديك هيا . كملت عشية كامل وانا بلاصة ما حكمتها غير رايحة جاية نستنى في أدم يجي باه يديني عند دنيا . وصلت الستة جا بقا يسقسي فيا قتلوا راني لاباس رتحت صاي . قالي الحمد الله زعما كنت راح نديك للطبيب . قتلوا لا خلاص راني رتحت مكان لاه نروح للطبيب .قتلوا اديني عند دنيا . قالي علاه . قتلوا هكدا برك حابة نروح نقعد معاها . قالي  خلي غدوة نديك . قتلوا اديني دوركا برك والله توحشتها . بقيت نحاول فيه حتى قبل وجدت روحي ووصلني عندها دخلنا سلمت عليها وعلى عجوزتي قعدنا في الصالة   هم بقاو يحكيو وانا  مخي راه غير في التاست لي راح نديروا ، مقدرتش نصبر حتى يكملوا حكايتهم خزرت مع دنيا كانت تحكي غمزتلها منتبهتليش  قرصتها  على دراعها خزرت معايا ، درتلها براسي باه نروحوا للشمبرة تاعها . فهمتني وقفت قاتلي اريج ارواحي معايا للشمبرة نوريلك الغوب  لي شريتها جديدة . نطقت عجوزتي قلتلها خلي من بعد ووريهالها خلي تروبوزي دوك وين وصلوا .  نطقت بزربة قتلها لا خلي نروح نشوفها . وادم غير يشوف معانا ، انا حكمني الستراس خفت غير لا يفيق بلي كاين حاجة وهو ادا شك في حاجة يجبدها يجدها . حكمتني دنيا من يدي وخرجنا من الصالة دخلنا للشمبرة تاعها قفلت الباب بالمفتاح  بقيت نشوف معاها نخمم كيفاه نقولها . قاتلي غير الخير  اريج وشبيك . قتلوا دنيا راح نقولك حاجة  بصح اوعديني تبقا بيناتنا . قاتلي غير قولي راكي خوفتيني كشما صرا . قتلها اوعديني قبل واحد ما يسمع وش راح نقولك وتقعد بيناتنا . قاتلي وعد والله ما نقول غير قولي راكي خلعتيني . قتلها راني شاكة بلي راني اونسانت . وجها لونوا تخطف قاتلي اونسانت ؟؟؟ قتلها ايه راني شاكة ملقيتش كيفاه نشري تاست خممت انتي تروحي تشريلي . قاتلي اريج راكي سيريو وش راكي تقولي كيفاه حتى راكي شاكة . قتلها عادة راهي روتار عندي بعشرة ايام .حكمتلي يدي قاتلي اريج علابالك ممنوع عليك الحمل ياك الطبيبة وصاتك وعطاتك الدوا امبوسيبل تكوني اونسانت. قتلها مكنتش نشرب الدوا وجامي شربتوا . غير كملت هدرتي ولات تندب في خدودها قاتلي هبلتي انتي هبلتي حابة تقتلي روحك حابة تموت كيفاه متشربيش الدوا . قتلها اشششش اهدري بالعقل يسمعونا ، متخافيش معندو ما يصرالي غير طبيبة تزيد فيها النسا الكل تولد . قاتلي اريج راكي مريضة المرة لي فاتت قريب لا موتي تزيدي راح تعاوديها هاد المرة ماتمنعيش منها . بقيت نشوف معاها عادت تبكي قاتلي ماشفتيش حالتك المرة لي فاتت كنتي غارقة في دمك بقيتي عايشة معجزة ومش كل مرة تمنعي اريج . قتلها دنيا كلش كاتب من عند ربي ادا كاتبلي ربي نموت راح نموت حتى لوكان نلف روحي في القطن ، هيا امسحي دموعك روحي اشريلي تاست من لافارماسي وعندك لا يفيق آدم . قاتلي راه راح الحال ميخلنيش نخرج في الوقت هدا . حكمتلها يدها نحاول فيها ، قتلها دنيا تعيشي شوفي كيفاه تقوليلوا يخليك تخرجي لازم ندير تاست الليلة منقدرش نزيد نقعد بالشك هدا اكثر حتى لغدوة قلبي راح يخرج من الستراس . طبطب الباب زربت مسحت دموعها وحلت لقيناه آدم بقا يخزر معانا قالنا وش راكم ديروا . علابالي بيه شك بلي عندنا حاجة مخبينها هادي هيا عادتوا غير يشك يجي يطبطب علينا . قتلوا والوا كنا نجربوا في لاغوب برك . خزر معايا قالي بصح راني نشوف فيك مزلتي بقشك كيف ما جيتي . سكتت ما لقيت ما نقول نخاف نزيد نكدب يفيق بيا . خزر مع دنيا قالها وشبيهم عينيك حمر كنت تبكي،تخلعت  قاتلوا لا غير دخلتلي الغبرة في عيني . قالنا ارواحوا تتعشاو راهي حطت يما لعشا .قتلوا ايه دوك نجيو بقا يشوف معانا من بعد راح . قلت لدنيا تعيشي شوفي كيفاه تخرجي تشريلي . قاتلي خلاص دوك نشوف هيا نروحوا قبل ما يرجع آدم . خرجنا قعدنا على الطابلة تاع العشا وانا غير نستنى وقتاه تشريلي . كملنا بالسيف الدقيقة ولات فيها ساعة هزينا الطابلة . غمزت دنيا باه تقولوا . نطقت قالت لعجوزتي ماما لازم نروح نشري من لافارماسي ايرجوا . قاتلها وش راح تشري في هاد الليل من لافارماسي خلي غدوة واشري  . قاتلها دنيا ماما افهمي حاجة ايرجوا وشبيك . قاتلها صحا دوك نقول لآدم يوصلك بالخف لافارماسي لمقابلتنا تكون غلقت. راحت قاتلوا قالها وش راح تشري في هاد الليل نسمعوا فيها  قاتلوا تشري حوايج تاع بنات . قاتلي دنيا في جرتك تبهدلت قدام خويا يا زح . قتلوا ختيتو انتي والله ما ننسالك خيرك . قاتلي ربي يستر برك .خرجت هي وياه وحد ربع ساعة ورجعو شفتها هازة صاشي فيها الاوان حكمني الضحك عليها ههههه تبهدلت مسكينة . دخلت للشمبرة تاعها لحقتها . غير فتحتلي الباب طرشقت بالضحك عليها وجها احمر طماطم قاتلي والله ما بقيت ننسا التبهديلا تاع اليوم هاكي راني جبتلك زوج تاست جربيهم في زوج .قتلها يعطيك الصحة حبيبتي ادعيلي ان شاء الله نكون اونسانت . دخلت التوالات درتهم وبقيت نستنا وقلبي يخبط يديا يرجفوا فات الوقت وانا نشوف فيهم عادوا زوج خطوط حمر خرجت نجري  من توالات تحضنت دنيا نبكي قتلها دنيا راني اونسانت والله راني اونسانت شوفي زوج خطوط حمر شوفي . حتى هيا عادت تبكي قاتلي اريج طيحيه . قتلها واشنوا؟؟؟؟ قاتلي كيما سمعتي غير طيحيه حياتك راهي في الريسك  حياتك اهم ، كون يسمع آدم راح يقولك نفس هدرتي مستحيل يخليك تجيبيه . قتلها آدم منقولوش حتى يعود عندي ربع شهر باه منقدرش نطيحوا باه نقولوا . قاتلي انتي مريضة كيفاه راح تقدري تخبي عليه المدة هادي كاملة باين راح يفيق راه راجلك  . قتلها متخافيش نعرف كيفاه غير نروح للدار نشري معاه مشكل وتقولوا اديني لدارنا ومبقيتيش نرجعلوا حتى نوصل ربع شهر . قاتلي انتي هبلتي تاع الصح راكي قاعدة ترسكي حياتك وبزواجك . حطيت يدي على كرشي  قتلها نورمال كلش يهون في خاطر ولدي . بعدت عليا قاتلي شوفي اريج راكي اختي لي ماجابتهاش يما بصح اسمحيلي منقدرش نسكت يا تقولي انتي لآدم يا انا لي نقولوا  منقدرش نخبي عليه حاجة كيف هادي قادرة تخسري حياتك فيها . حكمتلها يدها قتلها دنيا راكي وعدتيني بلي متقولي لحتى واحد درت فيك كونفيونس..قاتلي مش حكايت كونفيونس ووعد هادي فيها حياتك وانا منقدرش نشوفك ترسكي بحياتك ونبقا واقفة نتفرج .  وليت نبكي قتلها كون تقولي لآدم يجبرني نطيحو . قاتلي مزالت عندك الجرئة تخبي عليه بعد لي صرا المرة لخرة هاد المرة يطلقك ديراكت كون يسمع بلي خبيتي عليه حاجة كيف هادي راكي راح تهدمي حياتك بيدك وراح تخسري كلش . قتلها مش كيف كيف هاد المرة لمصلحتنا راني نخبي حتى هو حاب يكون عندو بيبي مهما يخبي شوقوا راني نحس بيه بلي حتى هو حاب يكون عندوا ولاد يكبروا قدام عينيه ويفرح بيهم حتى ماماك حابة تشوف ولادوا علاه نحرموا من هاد الشي هو ديما يفرحني ويضحي علجالي.  قاتلي تفرحيه على حساب حياتك .قتلها ايه نفديه بعمري نورمال .  سكتت شوي من بعد قاتلي هاد الشي كامل ميهمنيش في يدك من هنا لغدوة يا تقوليلوا انتي يا انا لي نقولوا .