حب في الثانوية

130

فوتت نهارين التخمام هلكني ، آدم مانهدر معاه ما نتعامل معاه عيا يفهم وشبيا متنايفا معاه بصح انا منجاوبوش لأني ما لقيت حتى دليل عليه بصح علابالي ومتأكدة بلي راه يخون فيا في الليل كي العادة نبات نايضة حكمني الارق من التخمام سمعت تلفونوا صونا  فيبرور من جيهتوا فطن غمضت عينيا لاعبتها راقدة شفتوا خزر معايا يتأكد من بعد هز التلفون ووقف بالعقل بلا مايدير حتى صوت  هز تلفونوا وخرج وغلق الباب وراه. غير خرج فتحت عينيا قلبي تقسم على الف ينوض من فراشي باه يروح يهدر مع حبيبتوا بالسر اسوء حاجة صراتلي تالموا لي راني في شوك كبير حابة غير نصارحوا ونسقسيه علاه دار فيا هكدا  في واش هيا خير مني حتى يبدلني بيها وشكون هادي لي قدر يخدعني علاجالها انا لي قريب نشعلوا صوابعي شموع من بعد نهز قشي ونروح ومنزيدش نشوف وجهوا أبدا . في لحظة هادي مقدرتش وقفت من بلاصتي وخرجت وراه لحقتوا علابالي يكون في صالة في البالكو وصح لقيتوا يحكي في التلفون بالتوتويت مسمعت حتى كلمة واصلا وميهمنيش نسمع  وش قاعد يقول باينة بلي راه يتمعشق معاها.  شعلت عليه الضو  شفتوا كوبا بالخف قبل ما نوصل عندو و دار شاف فيا قالي اريج  قتلوا اممم اريج لي خليتيها راقدة وخرجت هنا باه تتمعشق مع حبيبتك الاز . قالي وش راكي تقولي انتي  . قتلوا وش راني نقول راني نقول بلي من ليوم تنساني وجهي مازيدش تشوفوا خداع ما راح نسقسيك لا علاه لا شكون هيا أصلا ميهمنيش من هاد الدقيقة راك غريب عليا ما نعرفك ما تعرفني . دورت خارجة حكمني على ذراعي قالي وش قاعدة تحكي انتي   قتلوا شوف آدم متزيدش تطيح روحك من عيني اكثر من هكدا غير متسييش تكذب خاطر راني متأكدة من واش قاعدة نهدر ، حدرتك قتلك نروح ومتزيدش تشوف وجهي ، قبل ملقري كنت متأكدة بصح صدقتك وكدبت روحي واحساسي وقلت علابالي مستحيل آدم يديرها بصح انت  خدلتني وكملت   . قالي اريج بالعقل اصبري نفهمك . قتلوا ما تفهمني ما نفهمك نهز بنتي خيالي متزيدش تلمحوا اطلق يدي . عيط عليا قالي وشبيك طيري وحدك قتلك اصبري نفهمك راكي فاهمة كلش بالغالط . قتلوا  راني فاهمة كلشي، متسييش تكدب عليا وتبلعطني بهدرتك بالاك راك تحسابني راقدة على وذني  علابالي بكلشي وعلابالي حتى شكون هيا وعندي نميرو تاعها ولادراس تاع دارها  . كدبت عليه وانا ما عندي حتى حاجة من غير النميرو والفايس لي لقيتوا مبلوكيه في تلفونوا وقلت هكدا غير باه نجبد خيوطو ونخليه يعترف بلسانوا . قالي اريج بالعقل اقعدي نتفاهموا ويزي من العياط دوك تنوضي ريتاج  تبكي . قتلوا هدا فاش راك تخمم قول غير بنتك لي تخمم وانا لي راك تخون فيا البحر ياكولني قول  . قالي متقوليش تخون ملقيتينيش راقد معاها اريج وقتلك دوك نفهمك كلشي . قتلوا الخيانة مش غير في الفراش ، تنوض من فراشي باه تهدر معايا كاين اكثر من هكدا مكانش . قالي عندك الحق صح انا غلطت وعلابالي بروحي بلي غالط بصح على الأقل اسمعيلي وش نقول من بعد ديري وش تحبي ، انتي دوك اقعدي وكالمي روحك راكي مريضة . ضحكت قتلوا ما عندي ما نسمعلك  من هاد الدقيقة كل حد في حدو ومتخافش ما عندو ما يصرالي خاطر كنت ديجا موجودة روحي علابالي اخرتها تفض بيناتنا هكدا . قدم حكملي وجهي قالي اريج والله كانت غلطة راني حلفتلك وعلابالك بيا منحلفش بالكدب كانت غلطة وهيا لي بقات لاصقة . خزرت فيه قتلوا كيفاش قدرت دير فيا هكدا ، كيفاش قدرت تشوف في مرا من غيري لاه وش راني منقصة عليك لي تطلبها تلقاها عندي قول علاه ساكت علاه حتا غلطتت  من لول علاه حتا عطيتيها فرصة تدخل بيناتنا . بقا ساكت قتلوا علابالي ما عندك حتى عذر . هبطتلوا يدو ومشيت للشمبرة فتحت لخزانة نهز في قشي ونحط فيه في فاليزة ملڨري دمعة ما هبطت من عيني بصح قلبي نحس فيه تفتت غايضتني عمري انا راجلي يخوني آدم لي حبيتوا وعشقتوا وحاربت الدنيا كامل علاجالوا مرضت وتمرمدت بسبتوا في لآخر يخوني ويبدلني بوحدة اخرى ، حبيت غير نشوفها ونعرف في واش هيا خير وش زايدة هيا عليا حتى يبدلني بيها . سمعتوا فتح الباب محبيتش ندور قالي اريج خلي لحوايج معندك وين تروحي حتى نتفاهموا . قتلوا ما عندي حتى مفاهمة معاك . قالي علاه راكي ديري هكدا حابة تخربي حياتنا . قتلوا حياتنا انت لي خربتها . قالي شوفي راه بدا يفض صبري معاك اطلقي هدوك لحوايج من يدك وارجعي ارقدي وغدوة الصباح نتفاهموا ويرحمها ربي . قتلوا يا خويا شحال وجهك صحيح ومتحشمش بعد كلشي دايرو وتقولي روحي ارقدي متحسش انت  قلبك حجر ادا شايفني هكدا واقفة ونهدر راه قلبي راح يتفلق راني نشوف فيك قرد قدامي قلبي معمر عليك كون نلقى الموت نحطها عليك متخلنيش نزيد نطيح معاك لقدر مهما صرى تبقا اب  بنتي  .قالي اريج احشمي على روحك لا نحط يدي فيك نطلقك ميتة . ضحكت قتلوا لا غير زيد ارواح اضربني ، شوف انا راح نروح لدارنا وانت فمك تغلقوا وراح تطلقني وواحد ما يسمع بوسخك منيش حابة يستشفاو فيا ويقولوا راجلها خانها  فهمت .  جا ديراكت حكمني من شعري قالي واله يا اريج وماتغلقيش فمك وتسكتي غير ندير فيك شرع يدي   . قتلوا كون منخليكش تحلم تزيد تشوفني انا وريتاج منسماش اريج  اشفا على وجهي مليح زيد عمر دواسيك معايا . جا راح يهدر ناضت ريتاج تبكي قالي غدوة ونتفاهموا مليح   . خرج وغلق الباب بالمفتاح . قعدت نسكت في ريتاج بعد ما شريتها حليبها مخي يعاود في هدرتوا كي قالي كانت غلطة وهيا لصقت حبيت نفهم وش قصدوا بصح صاي فاض بيا الكاس من لول حذرتوا وهو جاب اخرتنا