حب في الثانوية

133

بنتي لي سوفريت علجلها وقريب لا مت وانا نولد فيها ناكرتني ، بقيت نشوف فيها كيفاش ساكتة في يدين باباها آدم وبين يدين عجوزتي ودنيا وانا غير تقرب منها ونجيب نهزها في حضني تنوض تبكي على طول صوتها كشغل منيش يماها ، هنا وين حسيت بحجم الغلطة لي درتها انا كيفاش عطاني قلبي نبقى بعيدة على كبدتي شهر كامل بلا حتى ما نشوفها كيفاش عماني غشي عليها مهما صرا نورمالمو نبقا معاها والا نديها معايا ، انا صح منيش تاع مسؤولية كيفاش سمحت في بنتي حتى مرضت مهما كانت جداها وباباها معاها بصح مش راح تجي كيما حضن امها ، بقيت غير نشوف كيفاش هما يهزو فيها في حضنهم ساكتة وتلاغي وانا منيش قادرة حتى نهزها ولا نشبع منها  . كي جات ماما و شافتني ماما قاتلي شفتي   قرراتك وين يوصلوك  ربي يهديك برك . من وراها كي راحوا كامل بقات غير عجوزتي مع ريتاج وانا وادم . عجوزتي غير تشنف عليا وعندها الحق والله انا وحايرة في روحي كيفاش قسيت قلبي لهاد الدرجة وخليت بنتي بلا ما نسقسي عليها. حتى العشية باه  قالتنا الطبيبة بلي نقدرو نخرجوها . هزها آدم في يدو بعد ما لفها في زاورة تاعها وخرجنا وصلنا وين الطونوبيل تاعو ركبت عجوزتي من قدام وهزت في يدها ريتاج غير فتحت الباب باه نركب حتى انا .  قالي وين . قتلوا كيفاش وين راح نركب رايحة لداري.    قالي والله دارك  دورك وين تفكرتيها . قتلوا آدم دوك مش وقت هدرتك هادي انا أصلا جاية علجال بنتي . شاف معايا قالي معليش في دار نتفاهموا وراح ركب  . حتى انا ركبت علابالي وش قصدو بنتفاهموا يعني باينة راح ندي فيها ضربة ولا زوج بصح والله ما يهمني المهم نبقى مع بنتي . وصلنا لدار  دخلنا عجوزتي حطت ريتاج في بلاصتها وانا دخلت للشمبرة تاعي لقيتوا لحقني دخل بلا ما يهدر معايا بدل حوايجوا لبس حوايج الخدمة وجا خارج . حكمتوا على يدو قتلوا آدم . قالي شوفي نحي  عليا && يدك  ومذابيك متقابلنيش  اوكي خلي تروح يما من بعد نتفاهموا مليح . قتلوا شوف علابالي بلي غلطت بصح والله كنت زعفانة على شي لي درتوا ومقدرتش نبقى وانت لي قتلي متخرجش بنتي من الدار . قالي مارانيش قاعدلك عندي خدمة لراسي . خرج راح لخدمتوا حتى انا بدلت حوايجي وخرجت لقيت عجوزتي قاعدة في الصالة . غير شافتني قاتلي اسمعي انتي ارواحي هنا نهدر معاك . قلت باينة وش راح تهدر ديجا . قعدت . قاتلي وش تحسابي في روحك قولي وقيلا راكي من الحور العين وحنا معلابالناش تروحي لدارك باباك شهر لا تسقسي على راجلك لا على بنتك وشبيك انتي راكي مليحة في مخك مخلية راجل وطفلة بيبي وراك ورايحة والله لا علابالك   . . جيت راح نهدر قاتلي اغلقي فمك خلي نكمل هدرتي وقيلا كي شفتيه يحبك خريتي فيها حاشة السماعين والله يا كون  مش على الطفلة الملائكة والله ما تزيدي فيها دقيقة عند ولدي وجهك مش وجه هنا الراجل يموت عليك وانتي غير طيري انا في حياتي ما شفت مرا دارت لي درتيه . قتلها شوفي ولدك وش دار . قاتلي قولي وش دار . سكتت قتلها حاجة بيني وبينوا مش  . قاتلي لاه هو قليل  ما سامحك نهار ما هجرك كيما هجرتيه ، انتي راكي روحتي ما رجعتي . سكتت قاتلي شوفي بنتي مهما يصرا متخرجيش من دارك راه الراجل ميصبرش كيما المرأ قادر في نهار تطلعلوا في راسوا حتى هو يرميك ويجيب عليك اخرى ، انا عندي نشوف ولدي متهني راهي الدنيا ما فيها وانتي شهر وانتي مرمداتوا ما فهم يشوف خدمتوا ولا يشوف بنتوا لي رميتيها وهيا حتى عينيها مزال مفتحتهمش . بقيت ساكتة على خاطر هدرتها كامل عندها الحق فيها  . قاتلي المهم  شوفي كيفاش ترونجيه واحكمي دارك بزاف ما طرتي كوني جيتي بنتي والله نحكمك بالسوط نشويك . ناضت ريتاج تبكي قاتلي نروح نشوفها وانتي نوضي شوفي دارك . وقفت بقيت مع الشغل هدا غسيل قش هدا تسياق المهم نقدت الحالة حتى وصلت التسعة تاع الليل قاتلي عجوزتي انا نوجد روحي باه غير يجي آدم نروح لدار دنيا وحدها . وصح غير وصل آدم خرجوا روحها. دخلت عند ريتاج لقيتها نايضة بصح ساكتة غير تشوف يا عمري على بنتي شحال شابة وتشبهلي فولة وتقسمت انا وياها سبحان الله حتى المرض وداتوا من عندي . هزيتها شوي في حجري ناضت تبكي . محبتش تسكت حتى قريب نرجع نبكي معاها مش ساهلة تنكرك بنتك تقول راهي ترجعلي فيها كيما حبيتها شهر . دخل آدم قالي وشبيها تبكي قتلوا منعرف هزيتها ناضت تبكي قالي علاه مسكتيهاش قتلوا منعرف محبتش تسكت  . قالي هاتيها  هنا . مديتهالوا غير هزها ضحكتلوا .  ضحك معاها قالها يا عمري يا عمري على بنتي الطبوزة  توحشتيني . وهيا غير تضحك شوف الحلوفة انا تبكي عندي وهو تضحكلوا حتى قريب تشرق . خرجت وخليتوا معاها.  شوي ولحقني للكوزينة كنت نوجد باه نحط لعشا وهو جبد يخدم في  الحليب لريتاج . قتلوا وش راك دير .   رجعلي بالتشناف قالي حليب لريتاج  كون جيتي لاهية بيها راكي عرفتي بلي هدا وقت حليبها مخليتها راح تموت بالشر . سكتت علابالي راه يتسبب عليا باه نقول كلمة غالطة ينوض فيا  صاي وليت نعرف عقليتوا . خبط القرعة تاع الما وهز البيبرون وراح . كملت حطيت العشا ورحت باه نعيطلوا لقيتوا مدلها قاعدة تشرب في الحليب . قتلوا راني حطيت العشا .  ما خزرش فيا قالي شبعان كليت برة . عاودت خرجت  تعشيت وحدي هو من شومبرة ريتاج مخرجش كي رقدت قعد يخدم بالميكرو . نضت الصباح لقيتوا راح يخدم بصح باين رقد في الشمبرة تاع ريتاج علابالي يرجعلي فيها   . جاتني ماما وبابا ومحمد طلوا على ريتاج  وراحوا  . وهو من خرج ما رجعش غير يعيطلي مرة على مرة باه يسقسي على ريتاج . في ليل باه  جا للدار دخل ديراكت للصالة تكسل فوق الفوتاي حاكم راسوا وجهوا معصور .عرفتوا بيه حاجة  قتلوا آدم شبيك . بقا مغمض عينيه قالي والوا عافيني دوك . قتلوا  راسك وجعك نديرلك قهوة ولا نجيبلك كشيات تاع الراس . قالي طفي الضو وروحي عليا قيلي ### . نشعني قتلوا وشبيك تهدر هكدا   . قالي اريج  راني سيريو روحي عافيني  . طفيت الضو وخرجت بقيت في شومبرة نطبق قي القش حتى سمعتوا  خبط الباب وخرج . وشبيه هدا علابالي مزال  مقلق مني بصح مش لهاد الدرجة أصلا هو ما جبد معايا الموضوع ما قالي لا كيفاش لا وعلاه كنت نحسابوا راح يزرقني عليها . فوتت ليلة كاملة نستنى فيه نعيطلوا يصوني وميهزش حتى الفجر باه دخل دخل ديراكت لعند ريتاج . دخلت وراه  لقيتوا حاطها على صدرو وهيا نايضة  . قتلوا وين كنت .  بقا ساكت مداهاش فيا خلاص كشغل نهدر مع حيط . قتلوا انا الغالطة لي تحيرت عليك. خرجت وخليتوا .  من وراها فوتت سمانة كاملة هكدا يجيبها يوم كامل برة حتى الفجر باه يدخل للدار يروح ديراكت للشمبرة تاع ريتاج يبات عندها ، نهار كامل وهو منرفز مقلق يعيط على اتفه سبة . انا مطولة بالي معاه نقول بالاك راه مزال لحكاية تاع المرة لي فاتت مقلقاتوا مني  بصح ضهر الموضوع اكبر من هكدا