حب في الثانوية

chapitre 36

دخلت للقسم وين راح نعدي الامتحان لقيت آدم لداخل مع معلم واحد اخر هما لي رايح يعسو علينا . قعدت جا جلال قعد ورايا قالي راني معول عليك في العربية نعتيلي قتلوا ان شاء الله لا قدرت راني نعتلك .  بدا يوزع علينا في الاوراق بصح من لي دخلت ماخزرش معايا مفهمتش واش بيه يبان قلقان  ومتغشش حتى وجهو يبان اصفر بلاك مريض . بديت نحل في السوجي وجلال كل دقيقة يعيطلي باه نعطيه الإجابة ، عيطلي آدم قالي #### بدلي بلاصتك . نضت  بدلت بلاصتي وانا حايرة اول مرة آدم يعيطلي باللقمة تاعي كان ديما يعيطلي اريج ولا ريجا ، كي قريب نكمل جا وقف فوق راسي بقا يقرا في الإجابة تاعي ومن بعد هز ورقة تاعي تاع المحاولات قالي كملتي بيها قتلوا ايه كملت ، كي شاف المعلم لي معاه خرج راح عطاها لجلال قالو نقل عليها وكي تكمل بيها  ابعثها لشروق  . انا كملت وعطيتو ورقة تاعي حكمها عليا بلا ما يشوف في وجهي . خرجت  هبطت لساحة نستنى في جلال وشروق بقيت مقابلة الباب تاع القسم ، حتى شفتهم خرجو ومن وراهم خرج آدم حبسهم ومنعرف وش قاعد يحكي معاهم.

جلال وشروق كانو هابطين حتى حبسهم آدم قالهم عندي هدرة معاكم قاتلوا شروق غير الخير استاذ ، قالهم انتم رايحين تكملوا حتى الباك في هاد الليسي . قالولوا ايه نكملوا هنا بربي ان شاء الله قالهم ملا  نقدر نتكل عليكم  قالوا جلال ادا حاجة نقدرو عليها علاش لا . آدم حط يدو على كتفو وقالو تقدرو عليها بصح انا راح ندير فيكم ثيقة كبيرة . قاتلوا شروق وش هي هادي الحاجة والله خوفتني . ضحك و قالها حاجة متخوفش، انا هاد العام تاعي لخر هنا في هاد الليسي . قاتلوا  يا علاه  ماتقوليش بلي سحتوك . قالها والله انتي ديما هدرتك ضحكني شكون لي يقدر يسحتني ، بصح انا مسافر لامريكا نكمل الدكتوراه تاعي . قالوا جلال  لازم تروح والله والفنا بيك هنا ملڨري في لول كنت منحملكش . ضحك وقالوا ايه لازم . قالهم اريج امانة عندكم في زوج نحبكم توقفوا معاها كيف خاوتها لي يقيسها بوردة تقيسوه بشوكة وادا حاجة مقدرتوش عليها تعيط تقول لخوها . لي يقرب ليها توقفوه عند حدوا ، خزر مع جلال وقالوا نحبك تكون خوها هنا في ليسي ظهرها لي تسند عليه وكيما قتلكم حاجة مقدرتش عليها تعيط لخوها . قالولوا بلى ما توصينا قاتلوا شروق وقتاه رايح قالها في  اليوم لخر تاع  الامتحنات نهار الخميس   بربي قاتلوا توصل بالسلامة وربي يوفقك قالها أن شاء الله بصح بلا ما نوصيكم واحد ما يسمع فهمتوا سرتوا اريج . قالهم هيا ملا انا نخليكم جاء رايح قالوا جلال  بصح نورمالمو توصيني على اختك . ضحك آدم  وقالوا اختي هنا معروفة بلي اختي وواحد ما يدنى ليها ، وفهمك كفاية وغمزلوا  . قدملوا جلال و   قالوا مدام تحبها علاه رايح . تنهد وقالوا الظروف ، خبط جلال  على كتفو وقالوا كيف ما وصيتك خليت راجل ورايا قالوا جلال تهنى .
بقيت نشوف معاهم من لبعيد قاعدين يحكيو مفهمتش وش هاد الحاجة لي قعدو ربع ساعة وهم يهدروا عليها . كي كملوا جاو  عندي قتلهم علاه حبسكم آدم ، شفتهم خزروا مع  بعضاهم ومن بعد قاتلي شروق بقا يهدر معانا على الامتحان برك ، قتلها وش هي هادي الهدرة . نطق جلال وقالي وصانا باه مانقولوش بلي خلانا نقلوا . قتلهم ok، ملڨري حكاية مدخلتش لمخي .
كملت سمانة تاع الامتحان كاملة آدم نشوفو غير من لبعيد حتى كي نحب نروح نحكي  معاه يتجنبني . شهرة صح بدلت الليسي تهنيت  منها . بصح حابة نفهم علاه آدم يتجنب فيا ملڨري ما درتلوا والو . بالخميس نضت الصباح قلقانة وقلبي مقبوض عليا منعرف علاه  .   دخلت لليسي وبقيت نخزر نحوس على آدم ، موالفة كي ندخل نلقاه واقف وين قاعة الاساتذة . قلت بلاك مزال ما جاش . دخلت عديت الامتحان لخر تاع الفيزياء ، كملت وخرجت بقيت نفركت علىيه  مكانش  ، قلت بلاك مزال يعس بصح موالف حتى كي يعس يخرج يوقف قدام الباب يتكيف . جاتني شروق سقسيتها قتلها مشفتيش آدم ليوم ، دورت عينيها عليا وقاتلي ما شفتوش . قتلها علاه حساتك مخبية عليا حاجة قاتلي  وش راح نخبي عليك ، انا نروح . راحت تمشي وخلاتني باينة مخبية عليا حاجة. بقيت نستنى حتى وصلت الربعة جاني  جلال وقالي  هيا نروحو  راح لحال ، قتلوا استنى شوي و من بعد نروحوا قالي في من قاعدة تستناي قتلوا نستنى في آدم نحتاجو ، قالي راه مجاش ليوم.  سمعت وحدة تعيطلي درت لقيتها دنيا سلمت عليها. قتلها لاباس قاتلي لاباس نقدر نحكي معاك وحدنا دقيقة  قتلها ايه ، ولا جلال قالي راني نستنى فيك لهيه وراح . قاتلي دنيا هاكي مدتلي صاشي صغيرة كيما تاع لي كادو قتلها واشنو هادي ، قاتلي قالي آدم اعطيها لاريج ، قلتلها وش فيها قاتلي والله ما علابالي هو مدهالي وانا جيت وصلتهالك . قتلها علاه حتى مدهالك ليك ، ديجا هو وين راه من صباح وانا نحوس عليه على النقاط تاعي مالقيتوش  ، قاتلي لاه  ماعلابالكش بلي آدم سافر الصباح . قتلها مفهمتش وين سافر . سكتت من بعد قاتلي سافر لامريكا يكمل الدكتوراه تاعو . قتلها تحكي صح ولا تتمسخري قاتلي والله نحكي صح في بالي علابالك . انا ديجا عينيا دمعوا راح نبكي قتلها قصدك يكمل الدكتوراه تاعو في الصيف ويرجع . قاتلي معلاباليش قالنا قادر نقعد ربعة ولا خمسة سنين باه يقدر يكمل  الدكتوراه و يعطيوه الرخصة لي راح يحل بيها مصنع تاع الأدوية . انا لعبت عليا الدوخة  زربت حكمت في يدها قبل ما نطيح قاتلي اريج واشبيك . خزرت معها وانا صاي مقدرتش نقاوم الدوخة قتلها آدم راح صح ولا  راكي تتمسخري بيا . قاتلي والله سافر صباح . هي كملت هدرتها وانا طحت في الارض ملڨري عينيا قعدو  مفتوحين و نشوف في الغاشي كيفاه تلم عليا ويفيقو فيا بصح انا مخي بقا يعاود غير في الهدرة تاع دنيا . ومن بعد غمضت عينيا كي فقت لقيت روحي في السبيطار كيف العادة مع الاكسجين والسيروم ، وماما قاعدة بجنبي ، كي شافتني فقت بقات تهدر معايا بصح انا ما نيش قاعدة نسمع بقات غير الهدرة تاع دنيا تتعاود هي تقولي آدم راح . بقيت نخزر مع السقف ودموع يسيلوا وحدهم من عيني . مش مصدقة بلي مبقيتش نشوفو ونسمع صوتو ، الاحساس لي حسيت بيه نهار لي خطب ما يبان حتى شئ قدام الشي لي راني حاسة بيه درك . كي شغل واحد قاعد يعصرلي في قلبي بين يديه ، هادا وين عرفت  صح المعنى تاع قلبك يوجعك . بديت نحس بالسطر قاوي  في صدري باقي ويزيد حتى وليت نعيط من السطر  ماما بقات غير تهدي فيا وتقولي وش يوجع فيك . ولات لاباراي لي مديرنهالي تصوني جات طبيبة تجري وجدت ديراكت إبرة ، قلتلها ماما وشبيها بنتي ، وش صرالها قالتلها طبيبة بداية تاع ذبحة صدرية ومن بعد ضربتلي لابرة في يدي، تكالميت  بديت ندوخ وصورة  تاع آدم وهو يتبسملي بين عينيا .