حب في الثانوية

chapitre 64

روحت لدار ، لقيت عجوزتي وجدتلي شومبرة تاع الضياف حطتلي فيها قشي . قاتلي من اليوم هادي شمبرتكم ، تقعدو عندي حتى يفرج ربي وترتاحي وترجعي لدارك . قتلها ايه ، دخلت في السرير ، قتلها راني حابة غير نرقد  لبارح مرقدتش مليح ، قاتلي ايه ارقدي وقت لغدا راني نوضك تتغداي .كي بديت نغفا سمعت عجوزتي وادم يحكو في الصالة ، قاتلوا وشبيها مرتك حالتها هكا راهي غير سمانة طاح منها نص  شفت كيفاه شيانت  وضعافت مسكينة ، وجها
عاد في حالة  ، قاللها والله معلابالي وشبيها ، كل ليلة تبات نايضة نسقيسيها وشبيك ، تقولي خايفة ، مفهمتش وش صرالها  حتى ولات هكدا ،  لبارح صباح دخلت للدار لقيتها تقص في شعرها وحدها . قاتلوا انا من راي تبعتها تقعد عند يماها ايامات خير ،قالها ماعندها وين تروح تقعد هنا ، غير ترتاح شوي  نديها ونسافرو لكاش بلاصة تبدل الجو شوي ، قاتلوا دبر راسك انت تعرف ما يليق .
وقفت رحت المراية نخزر مع روحي ، عندها الحق عجوزتي راني غير سمانة برك  ملامح تاع وجهي ڨاع تبدلوا  خرجولي لي ساغن ، ووجهي عاد أكحل ، بقيت نمس فيه دخل آدم ، قالي اريج  وش قاعدة ديري علاه وقفتي من فراشك ، خزرت معاه قتلوا راني  نشوف في روحي برك ، شوف وجهي تبدل . قالي كيفاه تبدل راكي كيما راكي . قتلوا لا وجهي عاد أكحل ووليت باشعة . بقيت نخزر معاه  حسيتوا قاعد يضحك عليا  تقول واحد قاعد في مخي يوسوس فيا يقولي راه يضحك عليك ، قتلوا راك تضحك عليا . بقا حاير . قالي علاه نضحك عليك وشبيك ريجا هبلتي ،  وليت نعيط قتلوا شفتك راك قاعد تضحك عليا ، راك تضحك عليا كي وليت باشعة . قالي اريج وشبيك هبلتي انتي تاع الصح ولا واش وشبيك شكون لي ضحك عليك ، دخلت عجوزتي ودنيا قالولنا وشبيكم تعيطوا ، بقيت نخزر معاهم حاستهم كل يضحكوا عليا .قتلهم راكم تضحكوا عليا. خزرت مع عجوزتي قتلها وانتي راني سمعتك تحرشي فيه عليا وتقوليلوا راهي ولات باشعة  قاتلي عجوزتي وش قاعدة تقولي ابنتي وشبيك ، وليت نبكي ونعيط قتلهم اخرجوا عليا خلوني وحدي . بقاو يخزروا معايا حايرين ، قتلهم هيا اخرجوا عليا مش حابة نشوف وجهكم . قالي آدم اريج اغلقي فمك لا نجي نكسرهولك وشبيك ليوم تحوسي على طريحة ولا.واش . حكماتوا عجوزتي قاتلو بالعقل اصبر مش قاعد تشوف فيها كيفاه دير الطفلة بيها حاجة . قاتلوا دنيا ايه والله راهي تبدلت خلاص . قالهم خلاص اخرجوا خلوني نتفاهم معاها ، قاتلوا عجوزتي عندك كشما درلها والله ما نسمحلك كون دور بيها . قالها يما خلاص ماراح نديرلها والوا اخرجوا هيا . خرجوا غلق الباب بالمفتاح ودارلي قالي ارواحي ، بعدت عليه قتلوا منجيش واخرج عليا خليني وحدي ، قعدت في الارض وحطيت راسي بين رجليا نبكي ، جا قعد بجنبي وجبدني لحضنو قالي وشبيها مرتي ، وشبيها حنوني ، علاه وليتي هكدا احكيلي ، علاه تبدلتي ، كرهتي مني مبقتيش تحبيني . دخلت في حضنو قتلوا لا أنا نحبك بزاف ، منقدرش نعيش بلا بيك  .مسحلي على شعري قالي ملا علاه تبدلتي عليا قوليلي هيا راني معاك . خزرت معاه نبكي قتلوا خايفة.  قالي من واه خايفة قولي راني معاك والله ما نخليك ، هيا حبي . درت الكوراج حابة نقولوا خاطر صح حاسة بالرعب . قتلوا مرا ، بقا يخزر معايا قالي شكون مرا ، وش دارتلك قولي ، جا هداك لخيال بين عينيا لصقت فيه اكثر نرجف بكلي وليت نبكي بالصوت قتلوا راهي تخزر معايا والله راني نشوف فيها ، واقفة تخزر معايا .حسيتوا جمد قالي وين تشوفي فيها قولي قتلوا هنا معانا في الشمبرة راهي تخزر معايا وديما تجيني مسحلي على شعري قالي خلاص عمري ماتخافيش مكاين والو . خزرت معاه قتلوا مش مصدقني ، علابالي مش مصدقني ، والله عرفتها مش راح تصدقني دوك تقول عليا مهبولة . حكملي وجهي قالي لا  راني مصدقك وهاد لمرا دوك نسحتها مبقاتش تجيك خلاص . قتلوا  صح ، ايه سحتها راني نخاف منها ، تخوفني بزاف . قالي ياعمري انتيا متخافيش راني معاك منخلي حتى حاجة تضرك ، هيا ارواحي ارقدي شوي هيا ، هزني حطني في السرير قتلوا اقعد معايا متروحش ، تمدد بجنبي وفتحلي يديه رقدت على صدرو ، قتلوا آدم نحبك انا متزعفش مني ، حتى يما نحبها ودنيا نحبهم كل مش قصدي باه نعيط عليهم قبيل غير منعرف وش صرالي هكدا ، حاسة واحد قاعد يهدرلي في مخي ويوسوس فيا . خزرت قتلوا يخي مصدقني والله مش قاعدة نكدب عليك. بقيت نخزر معاه عينيه فيهم دموع مغرغرين .قتلوا وشبيهم  عينيك فيهم الدموع راك زعفان مني . زير عليا في حضنو قالي عمري ما نزعف من بنتي دوك تبراي وترجعي كيف ما كنتي . قتلوا قصدك دوك انا مريضة . قالي لا مش مريضة راكي تعبانة برك ارقدي متخمميش، وش قولك نديرلك القران شوي باه تتنحا عليك . لحمي تشوك . قتلوا لا لا لا لا متشعلش القرآن . مسحلي على شعري قالي علاه راه مليح القرآن . قتلو ايه مليح بصح منحملوش يقلقني .قالي خلاص مش راح ندير هيا ارقدي شوي ليوم راكي تعبتي بزاف  .
عند ادم بعد ما رقدت اريج بين يديه حطها في الفراش وشعل القران في التيلي وخرج . لقا يماه تستنى فيه في الصالة هي ودنيا . غير شافاتوا قاتلوا وش راهي اريج رقدت ، قعد ومسح على وجهو . قالها  ايه رقدت غدوة نجيبلها الراقي . قاتلوا علاه راقي وش راح يدرلها . قالها يرقيها يما الطفلة تشوف في حوايج مش ملاح تسمع في حوايج مكانش منهم خلاص ، قاتلي راني نشوف في خيال تاع مرا ونسمع في صوت يوسوس فيا . الطفلة راح تموت بالخوف تبات نايضة تبكي. قاتلوا يا لطيف وش صرالها يخي كانت لاباس بيها ، قالها غدوة نجيب الراقي ونشوف . قاتلوا بلاك عندها مس ولا اذى . قالها والله ما علابالي يما ، من لي تزوجنا مشفنا يوم كيما الناس لازم كل يوم مشكل . قاتلوا بالعقل برك ولدي ، زيد عيط قول ليماها وباباها باه يكون عندهم علم ببنتهم . قالها ايه من بعد نقولهم راني خارج عندك عليها يما ساعة ساعة شوفيها متخليهاش وحدها . قاتلوا تهنى دوك نقعد معاها حتى ترجع .
فقت من النوم لقيت عجوزتي قاعدة معايا خزرت معاها حاشمة منها ، قتلها يما اسمحيلي والله ما قصدي قبيل كي بقيت نعيط منعرف وش صرالي مقدرتش نحكم روحي ، جات قعدت جنبي وقاتلي نورمال راكي كي بنتي    دنيا ، متخمميش بزاف ومتخافيش رانا كامل  معاك ، المهم انتي تهلي في روحك وفي  البيبي . قتلها ايه وين راح آدم . قاتلي خرج دوك يجي . هكا شوي وجا دخل قالي بطة راني جبتلك الشيبس لي تحبيها ، قتلوا مش حابة ناكل قعد بجنبي قالي علاه يخي موالفة تحبيها ، قتلوا لا كرهتها صاي ، قالي ايه علواه ساخفة نجيبلك ، قتلوا ماني ساخفة على والوا ، دخلت دنيا قاتلي راهي شروق حابة تحكي معاك . قتلها أخطيني منها . قالي آدم علاه احكي معاها راهي حابة تسقسي عليك برك . قتلوا مش حابة نحكي معاها تسالني انت . خزر معايا وضحك قالي ايه منسالكش ، بصح راهو يفوت وقت لوحم تخلصي كلش. . قعدنا نضحكو مع الحكايات حتى نعست.  قتلوا دومي راح نرقد . قالي  كولي حاجة ارقدي. قتلوا مش حابة ناكل شبعانة ، قالي اريج راكي مكليتي والوا من لبارح ياك وصاتك الطبيبة قاتلك لازم تكالي . قاتلوا عجوزتي ، دوك نروح نجيب لغدا نتغدوا كل مع بعض هنا, خرجت عجوزتي ، قدمت لآدم وحطيت راسي على صدرو قتلوا توحشتك . قالي صح . قتلوا ايه توحشتك بزاف . قالي ادا قادرة هيا نخرجوا لبرة ندورو شوي ، قتلوا  لا حابة نبقى معاك وحدنا ، قدمت بقيت نبوس فيه ،حبسني قالي اريج راكي مريضة . قتلوا لا مش مريضة راني لاباس بيا . حطيت راسي في رقبتوا راني توحشتك .ضحك وقالي قولي بلي توحشتي حنانتي . قتلوا يا دومي يزي . طلعت راسي خزرت معاه قتلوا تتفكر كي رحنا للاوتال في العرس  . ضحك وقالي واش  حابة تعاوديها  ، درتلوا براسي ايه وسكتت . باسني قالي هيا وجدي روحك نروحوا نحوسوا حتى يطيح الليل ومن بعد نكملوا الليلة في للاوتال . قتلوا صح . قالي صح هيا ازربي وجدي روحك ، لبست قشي وخرجنا داني المول بقينا ندوروا فيه قالي ارواحي نشرو القش تاع الحوامل.  دخلنا بقا يشريلي ، كملنا زيد دخلنا للكوسمتيك شرالي مكياج وروايح وبارفا . كملنا . شاف فترينا تاع لتبيع سوفاتموا وملابس الداخلية .  ضحك قالي هيا ارواحي خيري حاجة شابة نعدوا بيها الليلة  . قتلوا يا دومي احشم . قالي علاه نحشم ارواحي دخلني بسيف وبقا يخير حتى شرالي ديزابي في الموف مع الحوايج تاعها . كملنا قالي ارواحي نتغداو ، قعدنا كلينا ، وصلت الثمنية قتلوا دومي اديني للبحر . هز يدي وباسها قالي كيما يبغي حبيبي هيا نروحوا .رحنا للبحر لقيناهم دايرين سهرة تهبل قعدنا فات وقت يهبل عندي بزاف محوستش هكدا حتى وصلت 12 باه روحنا للاوتال . حكمنا شومبرة . وجدت روحي لبست ودرت مكياج سامبل وخرجت لقيتوا يستنى فيا .قتلوا طولت عليك قالي لا ارواحي عندي . قعدني على رجليه بقا يعدلي في شعري قالي ياك علابالك بلي أنا نحبك ونموت عليك  وتهمني غير مصلحتك . بستوا قتلوا ايه علابالي . تنهد قالي  ملا غدوة راح يجي الامام لدار تحكيلوا وش حاسة كامل. قتلوا علاه بصح . قالي باه تبراي ترتاحي  وترجعي كيف قبل  . قتلوا تسما انا درك راني مريضة . قالي لا مش مريضة  . قتلوا  ملا علاه راح تجيبلي لامام تحساب فيا هبلت وقفت من فوق رجليه قتلوا رجعني للدار منقعدش هنا . قالي ريجا حبي اسمعيني .قتلوا ما نسمع والوا علابالي بيك تحسابني هبلت كون جا علابالي هكا راني مقتلكش خلاص . حكمني من يدي ورجعني قعدني فوق رجليه . قالي ياك ثوتقي فيا . درتلوا براسي ايه . قالي ملا خلاص حبي لازم تبراي باه نرجعوا كيما قبل ، باه كي يجي ولدنا يلقانا عايشين هانيين . قتلوا بصح وش راح يديرلي الامام ، مايديرلك والوا غير يرقيك برك ، هاه وش قلتي غدوة كي يجي تحكيلوا وش راكي تحسي . قتلوا ايه صاي ، باسني قالي اك تفاهمنا ، ملا هيا نكملوا ليلتنا .