حب في الثانوية

chapitre 35

آدم خرج من الليسي وراح للكافيتيريا لقا ام اريج تستنى فيه ، قعد قاتلوا غير خير علاه طلبت باه تقابلني ،  سكت شوي ومنبعد قالها علاه راكي قاعدة تديري في هاد الشي كامل ، قاتلوا مفهمتش وش  تقصد ، تجاهل  كلامها وكمل يهدر قالها انا  نقلك علاه انتي  عرفتي بلي بنتك تحبني  باه تبعديها  عليا تجبريها تتخطب من واحد متعرفوش وهدا في مصلحتها كيما قولتيلها . لا وزيد تحرشي عليها باباها باه يسيف عليها تقبل .
.قاتلوا إيه  راك فاهم كلش ومدام عارف بلي بنتي راهي تحبك ومتعلقة بيك علاه قاعد تستغل فيها هادي هيا الرجلة عندك يا آدم ، بنتي راهي في مرحلة تاع مراهقة متعرفش صلاحها   منقدرش نلوم عليها بصح انت كبير.
قاطعلها الهدرة  قالها حبسي وش قاعدة تخلطي وش تقصدي اهدري ديراكت.  قاتلوا كيما تحب جبدت التلفون تاعها بقات تقلب فيه ومن بعد مدتهولوا قاتلوا هاد الشي لي راني  نهدر عليه كي شاف التلفون لقا les photosتاعو هو واريج كي كان متحضنها نهار الرحلة صورة كي كان حكملها يدها صورة يمسلها في شعرها وحد 10تصاور تاعهم  من بعيد لي يشوفهم يقول بلي راهم كوبل . قاتلوا هادو تصاور وصلوني ليلة العرس من خطيبتك ومعاهم ميساج تقلي احكمي بنتك لي راهي رامية روحها على خطيبي خير من نفضحا ونبعث les photosلباباها وخوها . سكت قاتلوا أهدر كون جيت في بلاصتي وش دير ، تخيل وصلوا هادو تصاور لخوها ولا باباها وش راح يصرى .ولات تبكي وقاتلوا  هادي امانة صاحبك ادا نسيت ،قالها مكاين والوا بيني وبين اريج . قاتلوا شكون راح يصدق ، شوف  انا مجيتش باه نلوم عليك المهم عندي بنتي تبعد عليك وتنساك وصاي الخطبة تاعها تقررت وباباها مد كلمتو لراجل ،  خلي يكون هدا الجزاء تاعها انها تساهلت معاك وخلاتك تقرب منها . ضحك و قالها قررتي كلش بلا ما تسمعي بنتك ولا تسمعيني . قاتلوا وش الفايدة  على كل حال لازم تنساك انت راح تزوج وهي راح تقعد تتعذب في باطل .
تكا ضهرو على الكرسي وقالها وباه تنساني تزوجيها ،قاتلوا عندك حل واحد آخر . سكت شوي ومنبعد قالها ادا مبقاتش تشوفني راح تنساني ، قاتلوا وش تقصد قالها انا عندي دكتوراه تاعي  في أمريكا مزلت ما كملتها في صيف راني رايح ومبقيتش نرجع بصح لحكاية تاع الخطبة تنسايها  حتى تقبل هيا . قاتلوا  بصح باباها. قاطعها و قالها كيف ما قدراتي تقنعيه مرة لولة تقدري تقنعيه درك . قاتلوا  و شهرة . قالها انا وشهرة بطلنا الخطبة بصح حطي هادو التصاور تفصاو من عندها  صاي ومابقات تقلقك لا انتي لا اريج . وقف  جا رايح حبساتو قاتلوا مهما صرا تبقا معزتك عندي كي محمد ونتمنالك الخير في حياتك قالها ان شاء الله بصح راح تندمي  على خاطر ما سمعتيني لا أنا لا بنتك .  خرج وخلاها . جات نايضة شافت تلفون فوق الطابلة كانت راح تعيطلوا تقولوا بلي نسا التلفون تاعو حتى عرفتو بلي تاع اريج ولات هزتوا وروحت .
في ليل كانت قاعدة ام اريج وباباها  قال لمرتو وكي تلاقيتي مع آدم وش قالك . قاتلوا قالي بلي راه رايح في الصيف لامريكا يكمل الدكتوراه تاعو بصح حكاية تاع الخطبة ننساها . قالها والله راني حاس بلي ضلمناهم في زوج. قاتلوا هكدا خير كل واحد يشوف حياتو لوكان على اريج مع الوقت تنساه .

عديت على الصالة لقيت ماما وبابا قاعدين كملت مشيت محبيتش نهدر معاهم ، عيطتلي ماما قاتلي اريج ارواحي . دخلت وقفت مقابلتها قاتلي هاكي التلفون تاعك نسيتيه في الليسي  حكمتو وسكتت محبيتش نقلها شكون لي جابو ،متغششة منها ومش حابة نهدر معاها . نطق بابا قالي بنتي ارواحي اقعدي بحدايا عندي هدرا معاك ، قعدت قالي  زيدي قوليلي رايك في الخطبة قتلوا بابا والله ما حابة مزلت صغيرة ، قالي صاي ملا مكانش خطبة قتلوا كيفاه قالي صاي مادام مراكيش قابلة مكانش خطبة قتلوا وش لي تبدل ياك غير الصباح كنت تقلي تقبلي بالسيف عليك   . قالي صباح كنت متقلق وكي خممت مليح لقيت بلي عندك الحق مزلتي صغيرة . تحضنتو نبكي قتلوا ربي يخليك ليا بابا قالي ويخليك ليا . قاتلي ماما وانا مش راح تحضنيني ولا صاي كرهتيني رحت تحضنتها وبستلها راسها مهما تغششت منها تقعد ماما لي في حضنها ننسى هموم الدنيا الكل .
فاتت سمانة كنت نروح نقرى فوق قلبي على خاطر آدم سمانة كاملة وهو غايب ، قالت أختوا قدامي بلي مسافر لولاية آخرى .
جات سمانة تاع الامتحنات نضت الصباح فرحانة على خاطر آدم ليوم يجي بيسك ميقدرش يغيب في الامتحنات . مع دخلت لليسي قابلتني شهرة عينيها حمورة ومنفخين خزرت فيا ومن بعد دخلت عند المدير ، رحت وقفت مع شروق قاتلي اريج سمعتي لخبر قتلها واش من خبر قاتلي شهرة رايحة تبدل الليسي قتلها صح شكون لي قالك قاتلي سمعت المراقبين يهدرو ديجا الناس الكل سمعت قتلها ان شاء الله يكون خبر صحيح نتهناو من وجها .