حب في الثانوية

chapitre 60

لبست حجابي وخماري وانا مش جايبة خبر لحتى حاجة ، قلبي عند ادم كون تصرالوا حاجة نموت يا ربي راني منقدرش نعيش بلا بيه يا ربي احرمني من كلش الا آدم . هبطت لخويا ركبت في الطونوبيل مع دنيا وعجوزتي دموعي واد على خدي نتفكر كي قعد يوصي فيا الصباح كان حاس . وصلنا للسبيطار لي قالولنا بلي راه فيه .دخلنا سقسا خويا في الاستقبال قالولوا راه في الانعاش ، رحنا وصلنا وين كان ، لقينا الطبيب خرج من عندو.  قالنا تضرر بزاف في الكلية تاعو وفي راسوا وعندو رضوض في يديه ورجليه ، كون تصرالوا مضاعفات في هاد النهارين راح نديروا  استأصال تاع الكلية   انا نسمع ومش مصدقة بلي آدم حبيبي صرا فيه هاد الشي كامل راه غير الصباح كان كيف الصيد الباب يسدوا طول بعرض بصحتوا ، حاسة روحي مزلت نحلم . قتلوا نقدر نشوفوا . قالي ممنوع راه في الانعاش ماتقدريش تشوفيه . قتلوا تعيش نشوفوا حتى دقيقة ربي يخليك دقيقة وحدة برك .بقيت نحاول فيه ونبكي وهو يقولي امبوسيبل تشوفيه واحد ما يقدر يشوفوا ، حكمني محمد قالي اريج خلاص علاه ديري هكدا غدوة يخرج وتشوفيه ، قتلوا لا نشوفوا درك . قالي اريج اسمعي الكلمة راه قلك امبوسيبل اصبري اختي . كملت نهار كامل وانا قاعدة في الكرسي بحدا الباب دموعي ما نشفوش ، كل ما نشوف الطبيب تاعو نقعد نحاول فيه باه يخليني نشوفوا بصح ما يقبلش . حاجة ما دخلت لفمي رايحة جاية على التوالات زاد عليا الحال بالقي ، جات ماما وبابا قعدوا معانا في السبيطار وكل دقيقة يقولولي كولي حاجة ولا روحي للدار ريحي  بصح ما نقبلش قتلهم ماتحركش من هنا حتى نشوف آدم قدامي ويخرج  ، نروحوا انا وياه. لافامي تاعو كل جاو ولاد عماموا وعماموا خالاتوا ، شفت كوثر حتى هيا جات  ودايرة حالة بالبكا عليه  بصح ما كنتش في وضع يسمحلي باه نحكي معاها ولا نتعارك ، نخمم غير في آدم قلبي تشوا عليه ما يحس بالجمرة  كان لي عافس عليها . طاح الليل وحنا قاعدين نفس القعدة ، دورت راسي شفت كريم حتى هوا جا راح لعجوزتي يهدر معاها ، من بعد شفتوا جا جيهتي عرفتوا جا راح يهدر معايا ، خاطر كنت قاعدة وحدي بابا وخويا راحوا يصليو في العشا وماما راحت التوالات . وقفت جيت رايحة باه ميهدرش معايا. .سمعتوا قالي اريج حبسي دقيقة نهدر معاك.  قتلوا معندك ما تهدر معايا روح أخطيني مش ناقصاتك . انت بلا قلب صح حيوان ولد عمك بين لحياة والموت وانت جاي تهدر على خماجك . قالي اسمعيني برك قبل ما تهدري والله راني ندمت على وش درتلك . والله غرني الشيطان مكنتش في وعيي راني كنت شارب دوا والله ، بصح راني تبت لربي نتمنى تسامحيني ومتقوليش لآدم راه كي خويا ومنيش حاب نخسرو على جال لحظة غرني بيها الشيطان . بقيت نخزر فيه وهو يهدر ويبكي مصدقتش عينيا . تنهدت قتلوا الحمد لله كي فقت مع روحك وش درت ، راه آدم يحبك كي خوه  صح وديما يهدر عليك بالخير وتهنى مش راح نقول لآدم ، وراني مسمحاتك كيما قلت كانت لحظة شيطان وفاتت ربي غفور رحيم . قالي فرحتيني بكلامك كنت  حاس روحي هاز جبل فوق ظهري ، عاد يبكي قالي ساعات الواحد يطغى في هاد الدنيا حتى تجي حاجة تفيقوا كيف الكف  والحمد الله فقت قبل ما نموت ونروح عند ربي وانا عاصيه. انا حكمني الفضول على وش صرالوا حتى تاب لربي  وفاق . قتلوا وش صرالك حتى رجعت للطريق الصح  .قالي في وحد الليلة كيف كل يوم  كنت ساهر مع صحابي شرب وغنا وبنات ، واحد من صحابي وقف قدامنا وهو شارب سكران ، قعد يكفر على ربي قالنا هاد الكلمة  ادا كان كاين ربي صح كيما راهم يهدرو راه مخلانيش نكفر بيه في هاد دقيقة قال كلام كون  تسمعيه لحمك يشوك . وفي هديك الدقيقة مع كمل هدرتوا طاح في الارض ودم يخرج من فمو وودنيه وخشمو ، مات قدامنا بعد ما تعدب ، مات وهو كافر وسكران وزاني  . بأي وجه راح يقابل ربي سبحانو . من لي صرا هاد الشي قدامي مبقيت نرقد لا ليل لا نهار ، نخمم غير كيفاه نمحي دنوبي ونطلب السماح من الناس لي غلطت في حقهم ، خايف لنموت وكاين لي يدعي عليا ويبكي بسبتي . تنهدت مسحت دموعي . قتلوا المهم تبت لربي ان الله غفور رحيم ، خزر معايا قالي ياك راكي مسامحتني على وش درت فيك . قتلوا ايه مسمحاتك . شاف ماما جات قالي هيا ربي يجيبلوا الشفا ادا احتجتوا حاجة راني هنا  قتلوا ان شاء الله . راح كي وصلت ماما قاتلي شكون هدا قتلها ولد عم آدم كان يسقسي فيا عليه قاتلي ايه يعطيه الصحة واقف مع ولد عموا باين ولد حلال . قتلها ايه ولد حلال .