حب في الثانوية

chapitre 48

فاتت 15دخلت في اكتآب عيا يفهم وش بيا ، انا نجيبها غير بكا من يسقسيني نقولوا والوا قالي ادا على كي  ضربتك  مبقيتش نضربك غير فهميني وشبيك . كان في الليل من يفيق يلقاني نبكي يبقا يسكت فيا يلحل بيا و يدلل فيا باه نسكت . انا كنت حاسة حياتي كاملة فزدت ،حاسة روحي مبقيتش نكفيه ، و أسوأ شعور انك تحسي روحك ناقصة على غيرك . بدات القراية كل يوم يقولي روحي تقراي ، انا نقولوا منروحش . في العشية كنت راقدة جات عجوزتي تطل عليا لقاتني راقدة . قعدت في الصالة و بقات تهدر معاه قاتلوا وش حوال اريج  . تنهد قالها والله ما فهمت وشبيها كل يوم جايبتها غير بكا الحاجة لي نقولها عليها تقولي لا  دافنة روحها غير في الشمبرة . قلتلها نديك ونسافرو محبتش . روحي تقراي محبتش ، عييت معاها . قاتلوا بالعقل برك عليها راهي صغيرة سايسها . تنهد وقالها راني نسايس فيها يما  غير حبيت نفهم وشبيها وش وصلها للحالة هادي . قاتلوا بلاك تبدل عليها الحال هنا . قالها راني قلتلها نديك تقعدي يامات عند يماك قاتلي لا  وش راح نديرلها حرت معاها  .  سكتت شوي من بعد قاتلوا بلاك راهي  تتوحم  قالها والله ما نعرف . قاتلوا   المهم  انت كبر قلبك معاها ولدي راهي غير فترة وتفوت .
انا سمعتها قالت تتوحم المرة لولة فرحت من بعد تفكرت الوجاعة تاع لي غاقل عندها نهارين وهي عقابي تسما باينة راح تجي زاد طالحلي المورال اكثر من قبل .
كملت نهارين اخرين وانا غير في الشمبرة من توالات للشمبرة  ما نتحرك لحتى بلاصة وهو مالقا  ما يدير معايا اي حاجة يقولي عليها نقولوا لا   . في نهارين هادم كانت كل دقيقة تحكمني وجاعة في كرشي تقتلني بصح مقتلوش قلت باينة تاع لي غاقل  . في الليل على العشرة كنت راقدة في السرير  وادم قاعد فوق البونكات في الشمبرة يخدم بالميكرو . فطنت وانا حاسة روحي  مشمخة بالعرق حتى السرير تحتي مبلول والوجاعة في كرشي متتحملش عدت نتلوا ونتوجع بالصوت وقف آدم جاني قالي اريج وشبيك مريضة . نطقت بالسيف قتلوا كرشي . حط يدو على جبهتي تخلع قالي وشبيك عرقانة كيف هك راكي تغلي من السخانة نوضي نديك للطبيب  نوضي . قتلوا خليني برك .قالي وش لي نخليك هادي نوضي نديك للطبيب راح تنشلي من السخانة  . هز عليا لغطا  جيت نشوف لقيت روحي نعوم بالدم .  بقا يخزر معايا  حاير قالي اريج وش هاد الدم من جا وليت نبكي قتلوا معلاباليش .هز التلفون عيط على دنيا قالها قولي ليما تطلعلي بزربة . راح للخزانة جبدلي قشي . نسمع في الباب يطبطب . فتح قاتلوا عجوزتي غير الخير عيطتلي . قالها ارواحي دخلت شافت حالتي هكدا تخلعت قاتلي من وش هاد الدم . قتلها وانا نبكي ونتوجع من كرشي ، ما نعرف  رقدت نضت لقيتوا .قاتلوا ازرب  بدللها نديوها للسبيطار نبدل ونجي معاكم . خرجت وخلاتنا . بدلي قشي بصح انا مزلت ننزف دارلي فوطة صحية . هزني وهبط يجري بيا .و انا نتلوى من الوجاعة روحي راح تخرج . ركبني في الطونوبيل من لورا مع عجوزتي حطيت راسي على حجرها ونتلوى من لوجاعة نعيط لربي لي خلقني وعجوزتي تواسي فيا وتصبر فيا  .وصلنا للسبيطار هزني ودخل يجري بيا جابولوا سرير حطني فيه . سقساوه قالهم تنزف دارولي إبرة تاع الوجاعة ، انا راح ندوخ سمعت الطبيبة قاتلوا طيحت البيبي  سنيلنا على الورق باه نديرلها تنظيف الرحم . غمضت عينيا دخت .
فقت لقيت روحي في الشمبرة تاع السبيطار . خزرت بجنبي لقيت آدم قاعد فوق الكرسي وحاط راسو بين يديه . نطقت قتلوا آدم . هز راسو جاني باسلي راسي قالي حمدالله على سلامتك حبيبي . قتلوا وش صرى . قالي ماصرى والوا . قتلوا صح طيحت البيبي.  قالي ايه  نورمال مكتوب ربي المهم انتي . وليت نبكي قالي علاه تبكي حاجة توجع فيك . قتلوا لا  بصح كنت حابة نجيب  بيبي . باسني على خدي وقالي ياعمري انتيا . متبكيش مكتبش ربي  المرة هادي يكتب المرة الجاية والفايدة الكل في صحتك انتي .
جات الطبيبة قاتلي الحمد لله على سلامتك قتلها يسلمك . قاتلي ربي يخلف عليكم . قتلها مرسي قاتلي راني كتبتلك دوا تمشي بيه سمانتين  بربي ان شاء الله ترجعي كيف ما كنتي و بعدي على الهوا والتعب ، قتلها علاه طاح البيبي. خفت غير لا تقولي بسباب مرضك . بصح قاتلي مكانش سبب عضوي ، يمكن سبب نفسي  على خاطر البيبي راه يثأثر بالحالة النفسية تاع الام .
دخلولي ماما وعجوزتي بقاو يستفسروا ويسقسيو وكل وحدة توصي فيا من جيهة زادوا دوخوني اكثر ما راني دايخة . قلتلهم حابة نخرج . راح آدم شاف الطبيبة قاتلوا تقدر تخرج بصح لازم الراحة . قاتلي ماما تروحي عندي حتى تبراي  . خزر معايا آدم علابالي بيه ميحبش كي نروح ونبقى عند ماما  بزاف .قتلها خلي برك نقعد في داري خير . قاتلي وشكون يقوم بيك . قتلها آدم يقوم بيا . خزرت معاه قتلوا يخي تقوم بيا . ضحك وقالي ايه نقوم بحبيبي . ضحكت وقتلوا زوجي قرة عيني  . ماما خبطت يديها في بعضاهم وضحكت  قالتلنا على الأقل احشموا قدامي . 
روحت لدار لقيت الحالة نقية قتلوا شكون لي نظف الحالة قالي دنيا طلعت نقات الدنيا . قتلوا يعطيها الصحة يكثر خيرها  .بدلي  قشي وحطني في السرير. وراح لدوش ورجع رقد قدامي . قدمت عندو وحطيت راسي على صدرو . قتلوا ياك علابالك بلي أنا نحبك ونموت عليك .  ضحك وقالي و الله   لا معلاباليش . بستو على صدرو قتلوا نحبك . قالي وانا نعشق فيك . خزرت معاه وقتلوا علابالي بلي كرهتك معايا  ليامات لي فاتو ، باسني على فمي قالي عمري ما نكره منك ديري هاد الشي في بالك بلي أنا نحبك في كل حالاتك وراح نبقى نحبك حتى يهز ربي امانتو قتلوا بعيد الشر عليك ربي يخليك ليا .
فاتت سمانتين  دللني فيهم آدم دلال واحد ما يقدر يدرهولي لدرجة عاد ما يروحش يخدم يبقى غير قاعد معايا . يغسللي ويوكلني ويشربني  الحاجة لي نقولوا عليها يديرها لي. لدرجة عاد يعاملني تقول عليا بنتو . انا حالتي تحسنت جسديا ونفسيا. قلت لازم نتقبل روحي كيف ما كتبلي ربي .  في هاد الفترة تأكدت صح بلي آدم يحبني لانو امبوسيبل نلقى واحد أهتم بمرتو كيف ما هتم بيا آدم . حتى انا تعلقت بيه بدرجة كبيرة كان من يخرج نبقى نعيطلوا ونهدر معاه حتى يرجع . المهم علاقتنا زادت قوات اكثر من قبل ، وقت الشدة تلقى غير الانسان لي يحبك صح .
جاتني في الليل عجوزتي قاتلي راكي لباس تحستني . قتلها لاباس الحمد الله . قاتلي جيت باه نقولك غدوة  جمعة راني مداير لعشا وعارضة نسا عموم آدم وولادهم باه ديري حسابك . قتلها ايه مايكون غير خاطرك يا الغالية . قاتلي ربي يرزقك بالذرية الصالحة والله معزتك عندي كيف معزة دنيا وادم . قتلها علابالي بلى ما تقولي حتى انتي والله نحبك ونقدرك كيف ماما ديما توقفي معايا  .
بقيت نوجد وش راح نلبس الخزانة كاملة هبطتها على خاطر هادي اول مرة يشوفوني بعد الزواج . واقفة مقابلة المراية بالدوبياس نقيس في الڨنادر ونحي . دخل آدم عليا شافني واقفة عريانة ضحك  جاني تحضني من لورا وباسني على رقبتي قالي وشبيها البطة تاعي عريانة . قتلوا راني نقيس نشوف وش راح نلبس غدوة . راح قعد في السرير وقالي هيا قيسي دوك نقولك انا ويناها الڨندورة لي خير . بقيت نقيس وهو يقولي هادي مليحة هادي لا . قستهم كل حتى قالي هادي الحمرة مليحة انتي يطلع عليك الاحمر . قتلوا زعما قالي قيسيها نشوفها قستها جاتني مع لاطاي قدقد يديها تاع الفولار ورقبتها كاري وكاملة بالحجر يلمع . قتلوا شوف . قالي جاتك روعة . قتلوا صاي نلبس هادي . نحيتها وقعدت غير بالدوبياس ندور ونحوس على الصابو لي يجي  مع القندورة. شفتوا تكسل في السرير وقالي اريج ارواحي . خزرت معاه قتلوا علاه .قالي ارواحي برك .قتلوا دقيقة نلبس بيجامة ونجي . قالي والله يا تلبسي بيجامة نزرقك . من قبيل وانتي دوري عريانة كي قتلك ارواحي راح تلبسي بيجامة .ضحكت ورحتلوا جبدني ليه وباسني على فمي قالي لعميرة تاعي باقية وتزيان . تبسمت معاه وقتلوا شوف بصح راني زدت في الميزان .طابس راسو وعضني على دراعي قالي هكا خير  أنا نحبك بطة . قتلوا اييي وجعتني . بقا يمسحلي على اللطراس تاع العضة. قالي متلومنيش انتي لي حلوة كيف السكر .طلعت فوقوا قتلوا حتى انت حلو ليوم ناكلك . بقيت نعض فيه وهو يضحك قالي سنانك صغار مش تاع عضان راكي تقول عليك دغدغي  فيا .
جيت راح نعضو على رقبتوا قالي هنا حبسي منخليكش قتلوا علاه قالي عيب تبقى ليطراس . قتلوا نورمال واش فيها قالي عيب قدام الناس . جبتها معاه حتى الصباح على الخمسة باه رقدنا كنا متوحشين بعضانا . فقت على العشرة لقيتو واقف قدام لمراية يلبس في قشوا . قتلوا دومي حبي صباح الخير . جا طابس عليا باسني وقعد بجنبي قالي صباح النور على حبي  كيفاه صبحتي قتلوا لاباس قالي ادا تعبانة ارجعي ارقدي .  قتلوا لا مش تعبانة . ديجا لازم نوض نعاون يما نفرزو الحالة قبل ما يجيو الضياف . قالي راهي دنيا معاها مش لازم انتي ادا عدتي تعبانة ارجعي ارقدي ما فيها والوا .  عرفتوا خايف عليا بستو على خدو وقتلوا  اواه عيب لازم نعاونهم.  لقيت التريكو تاعو قدامي لبستو ووقفت قتلوا نروح نوجدلك لفطور و ندوش ليه ليه ديجا راه راح الحال. قالي مكلاه توجدي لفطور نروحو نفطرو عند يما . قتلوا ايه . جيت داخلة لدوش . قالي  متغلقيش الباب تاع الدوش . قتلوا علاه . قالي هكدا خير اقفلي الباب تاع برة برك . كملت دوشت ولبست جبة تاع دار . وخرجت هبطنا لدار عجوزتي . سلمنا عليها . قتلها جينا نفطرو عندك . قاتلي خير ماعملتي راني غير وحدي دنيا راحت تجيب حوايج ناقصين  ، قاتلي حقا اريج وقتاه تروحي تقراي . قتلها مانعرف. وخزرت مع آدم قتلوا وقتاه نروح .  تبسم وقالي وقت لي تحبي انتي.  قتلوا ملا خلاص السمانة الجاية ادا كتب ربي . كملنا فطرنا وحنا نتحكاو . كي جا خارج آدم خرجت معاه باسني قالي هيا من بعد راني نجي بكري. قتلوا ايه . مشا شوي ومن بعد رجع قالي قولي وش حابة تقولي . قتلوا الشكيولا فضت. ضحك وقالي والله عرفتها حكاية فيها شيكولا .قتلوا عندي سمانة مكليتش . باسني وقالي المرة الجاية قبل ما تفض قوليلي نجيبلك . قتلوا حبيبي ربي يخليك ليا . قالي هيا من بعد.قتلوا في أمان الله .