حب في الثانوية

115

ليوم  على غير العادة غير صلى العشا رجع ديراكت للدار مسهرش برة كيما موالف يمكن كي سمعني نشكي لدنيا ، قالي وجدي روحك نخرجوا برة .انا تالموا عندي بزاف ماخرجت معاه برة مصدقتش .قتلوا صح قالي لا نكدب هيا خفي وجدي روحك .لبست جلابة وخمار وخرجت عندو قتلوا صاي راني واجدة .شاف معايا قالي نقولك حاجة روحي بدلي هاد اللبسة لا نحلف عليك . قتلوا ديجا بديت .قالي لا بديت لا والوا متقلنيش روحي بدلي خليني مكلمي . دخلت بدلت خاطر منيش حابة نخسر الخرجة . خرجنا من دار قالي تحبي تمشي ولا نروحوا بالطونوبيل .قتلوا لا نمشوا خير .قالي تمشي ڨدڨد بلا ما تبداي تتكسليلي في طريق والله نصرفقك .قتلو علابالي هيا برك .قالي عينيك قدامك متبقايش تشوفي في الناس .قتلوا يا والله علابالي هيا برك راح الحال وحنا مزالنا متحركناش .حكمت في يدو ومشينا الضواو  وريحة رمضان الشعب قاع برة قتلوا ملا علاه كنت حابسني في الدار شوف الناس كل برة .قالي رمضان تاع عبادة مش تاع تحواس وتخرجي تتطورسي برة .قتلوا هاك  انت من تخرج تصلي مبقيتش ترجع .قالي ولاه انا نبقا برة ندور ، انا كي نكمل التراويح نقرا شوي في المصحف نلقاها ديجا وصلت 12  وزيد نتلاقا صحابي نقعد معاهم شوي ونرجع للدار. سكتت من بعد قتلوا علابالك وش .قالي وش ؟؟ قتلوا نحبك .ضحك قالي علابالي بصح شحال مسمعتهاش هاد الكلمة تفكري شهر وقيل .قتلوا انت لي قطعت على روحك الرزق ومخلتليش فرصة باه نقولهاك .قالي وكيفاش حتى قولتيها دوركا .قتلوا خاطر خرجتني ندور .قالي ملا صاي حتى يفض رمضان كل ليلة نخرجك دوري.قتلوا  هكا كل ليلة نقولهالك .ضحك قالي تموتي على البرة و  الزنق .وصلنا للبحر قعدنا طابلة وكراسا جابلي لاكرام والتاي وهدوك السقايط تاع البحر . قالي علابالك قبيلا حكمني واحد في المسجد موالف ديما يصلي معانا قالي بلي حاب يخطب دنيا  .قتلوا قول والله راك تحكي صح وانت وش قتلوا .قالي قتلوا لي فيها خير ربي يكتبها بصح انا نعرفوا الطفل عاقل متربي متدين وخدام لاباس بيه ماعندها ما تخير عليه ونعمة الناس انا من رايي تقبل برك وش قاعدة تستنى مدام ماعندهاش مشكلة تتزوج .قتلوا ومحمد .قالي وشبيه محمد وش دخلوا في الحكاية ياك قريب عام ونص من لي بطل عليها صاي . قتلوا بصح علابالك بلي كأنوا يحبوا بعض . خبط الطابلة قالي وش هدرة لي راكي تقولي فيها  هادي كيفاش يحبوا بعضاهم . قتلوا لا مش قصدي كيما فهمتني قصدي كان عندهم قبول لبعضاهم قعدو شحال وهم مخطوبين  وكون يرجعوا لبعضاهم خير . قالي لا صاي مبقاش مكتوب بيناتهم ديجا كون عينوا يرجع يعرف الدار   وراه رجع هادي شحال ديجا . بدا يتقلق خفت لا ينوض يعيط  قتلوا  دبر راسك انا هدرت أصلا القرار لول ولخر ليها هيا وكان تأخد رايي انا صحبتها ونعرفها  خليها هيا تخير مع من تكمل حياتها . قالي علابالك انتي كيفاه راكي تتخمي زعما انا وياك تعارفنا وحبينا بعضانا وتزوجنا حتى دنيا تلقا واحد ووتتعرف عليه  يحبوا بعض ويتزوجوا بصح راكي نسيتي حاجة بلي مش رجال كل كيما انا كنت قاصد الحلال وددنيا مش كيفك ومش شرط تتزوج بالطريقة لي تزوجتي بيها انتي كل واحد ومكتوبوا في هاد الدنيا قادر الزواج التقليدي تاع واحد يجي ديراكت للدار بلا ما يكون يعرف الطفلة قبل يكون ناجح خير من زواج  مع طفلة يعرفها فهمتي يعني هيا مش شرط تروح تتعرف على واحد باه تتزوج  . قتلوا استنى استنى كيفاش هادي  مش رجال كل كيفي هادي فهمتها وعلابالي بيها بلي انت خير من الرجال كامل وانت هو لمخير في عيني بصح دنيا مش كيفي مفهمتهاش وش قصدك ..ضحك قالي قصدي واضح دنيا مسكينة عاقلة و انتي راكي النار تشعل معاك .قتلوا  ياااا انا راك تحكي عليا. قالي عليك ملا على من جامي شفت طفلة في طيارتك وقباحتك وانتي من برة لي يشوفك تقول ملاك هابط من الجنة واحد الستوتة . قتلوا يا انا ستوتة والله ما ننساهالك هادي .قالي ستوتة برك يا ودي ستوتة وفمك مشرك ووجهك صحيح ومدللة بزاف وخلي وخلي الباقي والله ما عرفت روحي كيفاش حبيتك وحصلت فيك انا مش تاعك ڨاع  . بقيت نسمع فيه وحايرة بكيت قتلوا اشفا عليها مليح وتشوف . قالي ايه نشفا عليها كولي كولي  لاكرام تاعك راح يذوب وامسحي عليا خناينك نهار كامل وانتي تنوحي . قتلوا شكون لي تزوج واحد كيما انت وماتنوحش قلبك فريجيدار . مسحلي على خدي قالي بصح تعجيبيني .قتلوا وانت خليت فيها تعجبيني خرجتلي لعيوب السبعة .قالي زعما راني نتبلى عليك هادي لخرة غير مرت عمي تلاقيتها الصباح مع عمي جابتهالي بضحكة  قاتلي اريج مرتك ظهرت فرس كبيرة وانا لي حطيتها عاقلة  هدرت معاها بخصتني قدام الناس كل  راني زعفانة منها وراني لايمة علاها .قتلوا هيا لي تستاهل علابالك بيا منسمحش ومانسكتش على حاجة الحق لبغا قدامك  . قالي  ايه علابالي  بيك ،راني قتلك وجهك صحيح.  سكتت وانا نشوف مع البحر قدامنا منظر يهبل ويصفي المخ ڨاع الغمة تروح مع الهوا وريحتوا تمنيت غير ندخل نعوم فيه . تقول عليه  سمعني قالي ادا حبيتي روحي بللي رجليك شوي في شط وارواحي. قتلوا نروح تخليني .قالي روحي  على روحك بصح رجليك برك كون يتبلل الحجاب نباصي عليك في هاد الليل . وقفت قالي تشوفي هك ولا هك عينيك نڨلعهملك راني نشوف فيك من هنا . نحيت الصندالة من رجلي . قالي عندكي تعفسي على شي حاجة في الرمل يقدر يكون فيه قزاز .درتلوا براسي قالي روحي هيا مطوليش بزاف .مشيت حتى وصلت الشط دخلت شوي الماء بارد يهبل ويفايج على القلب بقيت واقفة والموجة تضرب في رجليا ومن بعد طبست شوي وليت نلعب بيديا في الماء هديك الراحة والله نعمة كبيرة . دورت عند آدم لقيتوا رافد التلفون ويصور فيا وليت وقفت ندير في لي بوز باه يخرجوا لي فوطوا ملاح من بعد رجعت كيما كنت نلعب بالماء والرمل .فاتت بلاك نص  ساعة ولا ساعة غير ربع باه شفتوا شاورلي وليت خرجت من شط شفت مع الحجاب نلقاه قريب نص مبلول اه يا ربي ليوم يضحي بيا مشيت وصلت عندو شاف مع  الحجاب .قالي وش ندير فيك وش وصيتك بصح لا لا انتي هدرتي تدخل من وذن تخرج من وذن . قتلوا والله ما انا غير  الموجة هي لي بلتني.  تنهد وضحك قالي ربي يهديها الموجة علاه تبل فيك دوك نروح نتفاهم معاها نقولها مبقاش تبللي البطة تاعي . قتلوا يا آدم يزي.  قعدت باه ننشف شوي  حتى قالي  هيا هيا وقيلا حلاتلك القعدة ديجا راهي الوحدة يا ربي لكان تسحرنا ورقدنا . قتلوا دقيقة نلبس صندالتي برك .لبستها ووقفت .قالي كيفاش راح تمشي هكدا الحجاب مشمخ .قتلوا نورمال دوك يشيح ديجا الدنيا ضلمة منبانش .قالي لا نحكمو تكسي خير شفتي كون جينا بالطونوبيل ولا هاد تكسار الراس .قتلوا المشي رياضة وانت نهار كامل زوج خطوات متمشيهمش بلا طونوبيل. قالي وش راح ندير بالمشي علابالك بيا نفوت العشية ديما في صال دو سبور.ضحك قالي  شوفي روحك انتي وليتي بڨرة لا ينفع فيك لا مشي لا سبور . قتلوا والله راك تضحك على لاطاي تاعي .قالي ايه راني نضحك على البطة تاعي تساليني ، هيا امشي خلي نرجعوا للدار.حكمنا تكسي وصلنا في خمس دقايق للدار .دخلت ديراكت للدوش دوشت من الملح تاع البحر ودخلت للكوزينة لقيتوا واقف يطيب في القهوة والحليب . قتلوا وش راك دير قالي راني  نوجد في السحور حطيتك راح طولي في دوش .قتلوا يعطيك الصحة .قعدت فوق الكرسي .دارلي شاف فيا من فوق للتحت قالي راني نشوف فيك قعدتي وطلڨتي لاطاي أيا نوضي كملي انتي .قتلوا كمل برك والله لا عييت من المشي تاع ليوم .قالي يخي فراجيل  مشيتي نص ساعة ديجا عييتي . قتلوا متقارنش روحك بيا انت راجل وانا مرا باينة راح نتعب .تسحرنا وصلينا هو راح للسرير يرقد وانا بدلت حوايجي لبست بيجامة وبقيت نشوف مع لاطاي تاعي في المراية ونثبت ونتفكر في هدرتوا كي قالي راكي وليتي بڨرة . شافني قالي وش راكي ديري .قتلوا والوا راني نشوف في روحي برك .قالي متبقايش مقابلة لمراية في ليل مش مليح . دورت عندو قتلوا شوف صح راني سمينة بزاف .ضحك قالي عرفتها ارواحي عندي . دخلت في السرير. قالي انتي اي حاجة نقولها تصدقيها كنت نضحك معاك برك وزيد علابالك بيا انا نحبك هكدا  .قتلوا  تحبني قالي نحبك ونموت عليك هيا ارقدي درك. عاد كل ليلة يخرجني ندور انا وياه برة في البحر ولا في سونتر فيل كل مرة في بلاصة نحيت الغمة لي في قلبي كنت محبوسة في الدار في الليلة سبعة وعشرين عرضت عجوزتي ودنيا  ودارنا باه يفطرو عندي  .
في العشية جات عندي دنيا قبل باه تعاوني من بعد تلحق عجوزتي ودارنا . بدينا نوجدوا حتى نشوف فيها تاكل في حبة زلابية قتلها يااا وشبيك نسيتي روحك راكي صايمة .قاتلي لا راني فاطرة ليوم . ضحكت  قتلها أيا بصحتك  دبرتيها .قاتلي علاه انتي مزلتي مفطرتيش راه قريب يفوت شهر. قتلها لا مزال بلاك نهار العيد  انا كل مرة تجي وقت مبدل .وجدنا كلشي الرجال وحدهم والنسا وحدهم فطرنا في جو يهبل غير ضحك وحكايات كملنا .قاتلي دنيا.اقعدي دوك انا نلم لماعن نديهم للكوزينة .بقات تدي فيهم قعدت شوي من بعد قلت نوقف نعاونها .هزيت الكيسان لي بقاو راح وديتهم مع دخلة شفتها واقفة مع محمد في الكوزينة . اول حاجة خممت فيها بلي كون يشوفهم آدم يقولي انتي لي عرضيتهم باه تلاقيهم ببعضاهم وراح يرجع عليا انا وندي طريحة . نسمع فيه قالها صح راح تزوجي كيما قاتلي اريج .قاتلوا ايه آدم قالي اقبلي .قالها ما تلصقيهاش في آدم علابالي بلي هو ميسيفش عليك وانتي لي حابة تزوجي .قاتلوا باينة راح نزوج ولا نبقا هكدا حتى نبور .قالها وحنا حكايتنا كيفاش .قاتلوا حكايتنا فضت هادي شحال ربي يسهل لكل واحد فينا .غير قاتلوا هكدا خرج ديراكت . دخلت للكوزينة قتلها علاه قولتيلوا هكدا .قاتلي كي كنت نحاول فيه باه نرجعوا ونكملوا مع بعض بطل عليا ودرك حاب يرجعني ليه . قتلها علابالك تندمي عليها تاع الصح ادا كنتي تحبيه كيما كنتي تقوليلي راح تندمي وراح تقطعي شعرك ندامة خاطر تبعتي كرامتك .قاتلي كون جيتي في بلاصتي راح ديري كيفي .قتلها حتى انا صرالي اكثر منك بصح حبي لآدم غلب كرامتي وكبريائي تاع صح كنت نحاول فيه قريب نبوسلوا رجليه  وصلت بيا كون يقولي موتي ونرجعلك نموت ، خاطر انا  نحبوا ومستحيل نعيش حياتي بلا بيه. بصح انتي ظاهر ما كنتي تحبيه ما والوا غير تهدري برك .قاتلي انتي باينة راح تجي مع خوك .قتلها خاطر خويا عندو الحق في كلشي كي حبس  معاك كان رد فعل على الشي لي درتيه ، بصح نقولك حاجة اقبلي بهدا عريس الغفلة لي جاك خاطر انتي أصلا متستاهليش محمد . خرجت وخليتها قلقتني لي يسمعها تهدر هكدا تقول خويا لي غلط معاها وهي لي مخلات ما دارت ومن فوق تخرج روحها ضحية وخويا حڨرها . رجعت قعدت معاهم في الصالة حتى كملنا الڨصرة كل واحد رجع لداروا وانا بقات دنيتي مرونة لماعن لفم الباب تاع كوزينة . بديت نغسل فيهم ماجيت كملتهم مسلاني تقسم عليا زدت سيقت الدار  وفرزتها كملت على الوحدة طيبت السحور ، تسحرنا انا وادم ورقدنا . بصح وش من رقاد بايتة في صرات غير نتقلب في الفراش راح نموت بالوجاع تاع ظهري . حتى طلع الضو باه رقدت . فطنت على آدم ينوض فيا قالي ريجا نوضي وجدي روحك راهي السبعة ونص .رجعت غطيت راسي ورقدت .عاود نوضني قتلوا خليني منيش قادرة .نحا عليا الغطا قالي علاه وشبيك راكي مريضة حاجة توجع فيك .قتلوا لا فشلانة برك لبارح تعبت. قالي خلاص مالا كملي رقادك راني خارج .غمضت عينيا قتلوا ايه .قالي من بعد نعيط تهلاي في روحك وكشما حاجة عيطي اوكي .رجعت غفييت وهو طفا الضو وخرج .من هداك الوقت ما فطنت حتى سمعتوا هو  فتح الباب و يعيط اريج وين راكي .دخل للشمبرة وجا ديراكت عندي بقا ينوض فيا .فتحت عينيا قالي عبالك خلعتيني علاه من الصباح وانا نعيطلك متهزيش . قتلوا مسمعتوش راقدة .قالي وش من خليتك  وانتي راقدة . درتلوا براسي ايه .قالي نوضي راكي خمرتي راهي زوج تاع النهار .قتلوا خليني راني تعبانة .بقا يجبد فيا قالي نوضي وش لي تعبانة تاعك من لبارح وانتي راقدة بزاف . وليت نضت دوشت ودخلت للكوزينة نوجد الفطور بصح منيش قادرة نوقف غير قاعدة في كرسي ونطيب وطايح عليا واحد النعاس حابة غير نحط راسي على المخدة ونرقد . اذن العصر كنت كملت طيبت الشوربة صاي بزاف راح ندوخ حابة غير نرقد طفيت عليها ، سمعتوا يتوضى رايح يصلي . طل عليا قالي راني خارج نصلي كشما نجيبلك معايا .قتلوا لا كاين كلش . قدملي قالي وشبيك ذبلانة هكدا .قتلا والوا غير تعبانة برك من لبارح في الليل .قالي صحا روحي تكاي شوي مازال الحال على المغرب . هو خرج وانا روحت للصالة حطيت القران في التيلي وتكيت رقدت .فقت على صوت الأذان تاع المغرب  نضت  مخلوعة ليوم آدم يكسرو الدار على راسي كيفاش ما فقتش لقيت روحي مغطية وكلش طافي ، نسمع في صوت الماعن خرجت للكوزينة لقيتوا واقف يوجد في الطابلة تاع الفطور . شافني قالي نضتي .  عطاني حبة تمر من الصحن قالي هاكي افطري . قتلوا والله ما فقت باه نوجد الفطور .قالي نورمال راني وجدتوا انا اغسلي وارواحي . دخلت غسلت وجهي ورجعت قعدنا قالي حالتك مش عاجبتني غدوة الصباح نديك للطبيبة خير .قالوا علاه راني لاباس بيا .قالي منعرف راكي غير راقدة وفشلانة .قتلوا من تعب والسخانة برك . كملنا لفطور قالي طيبيلي قهوة ووجدي روحك نديك تتكساي للعيد . خرجنا للسونتر فيل بقينا ندورو  خيرلي غوب تاع برة مع صندالة وخمار وساك وكمل شرالي ڨندورة حمرة تاع دار باه نلبسها نهار العيد وشريت حوايج اخرين كوسميتيك وروايح بارفانات . المهم قلشت روحي وهو شرا حوايج ليه . كملت نهارين الباقيين على العيد غير رقاد وين ندور نرقد في الصالة في الشمبرة وهو من مورايا هيا نديك للطبيب حالتك مش عاجبتني . وانا قتلوا غير الطبيب لي منروحلوش كرهت من الطبة والدووات خلي دوك تتنحى عليا كي نروبوزي . ليلة العيد  تنحات عليا شوي وجدت الحنة خلطتها ودخلت دوشت ومن بعد جبدت شعري وبلاكيتوا . هو مكانش برة مع صحابوا ، بديت نحني في رجليا كملت رجل لقيتوا دخل قتلوا جابك ربي .قالي شوفي غير أخطيني  .قتلوا والله غير تعبت ارواح كمل حنيلي رجلي لي مزالت . قالي انتي راح تهبليني وش لي حنيلك رجلك . قتلوا هيا برك ياك مافيها والوا هيا ربي يخليك . قالي روحي تلعبي بعيد  هداك لي بقا ،وراح للدوش . كملتها وحدي على سعدي .وكملت يديا وروحت للشمبرة رقدت . فيقني صباح العبد على الخمسة ونص . قالي نوضي حدديلي القميص .نضت وجدتهولوا من بعد وجدت صينية تاع العيد وحطيت القاطوا لي شريتوا من