حب في الثانوية

125

بعد ما كملنا الفاكونس روعة من غير عجوزتي لي كانت حاطتني في خشمها وعاستني في كلشي من مور ما رجعنا رحت للطبيبة قاتلي عندك طفلة . ملڨري كنت متمنية طفل بصح فرحة آدم بالخبر تسوى عندي الدنيا وما فيها كملت ثلاث شهور تاع الصيف في داري ما نروح لا لماما لا لعجوزتي حاكمة الدار راسي راس آدم نفس الروتين بصح منحسش خلاص بالقلقة هو مالي عليا الدار حب لي بينا يكفي حتى ادا قلقت يخرجني يحوس بيا غير قعاد ورقاد ربحت راحتي وراحتوا حتى حملي جا ساهل ساعات ننسا أصلا بلي راني اونسانت نتفكر غير كي نشوف روحي في مراية خاطر وزني زاد من ڨاع البلايص بصح آدم عاجبوا الحال يقولي طلع عليك وإن شاء الله تبقاي هكدا . غير وصل وقت الدخلة تاع القراية ناضت كبيرة بيني وبين آدم هو يقولي مكانش قراية وانتي كرشك لففمك وين راح تروحي هكدا ، وانا نقولوا غير القراية لي نقرا ديجا فاتوني عامين بسبابك . قالي كيفاش تقراي شهرين ولا ثلاثة ومن بعد تولدي وش من قراية هادي . قتلوا متسالنيش انت من لول قتلي غير القراية منحبسكش عليها وياك شرطهالك مع الشرط وانت قبلت . المهم على هاد السوجي قعدت سمانة في دارنا غير باه يقبل نسجل وهو مخشن راسوا محبش حتى وقف ليه بابا قالوا هادا مستقبلها خليها دير لي يخرجها باه من بعد ماتقولكش راك وقفت في طريقي .بسيف باه وافق سجلت ودخلت نقرى ، رجعنا لنفس العادة القديمة هو يوصلني الصباح ويروحني لعشية مرة على مرة يديني للفارماسي نضرب طلة بصح غير ندخل للدار نرقد شوي من بعد نوض نطيب ونغسل صح نتعب بصح المهم منسلمش في قرايتي . بقا شهر على ولادتي بديت نوجد في حوايجي حوايج البيبي كنت نقول لآدم وش يشريلي وهو يجيبلي خاطر صاي انا مبقيتش نقدر نمشي بزاف حتى من القراية درت مالادي ثلاثة شهور حتى من عجوزتي وماما مخلاو ما يشرو للبيبي حتى من لاشومبر تاعها هما لي شراوهالها . نضت من نومي شفت الساعة لقيتها العشرة تاع الصباح وادم مكانش مسكين هادي سمانة وهو يروح يخدم بلا حتى ما نوجدلوا لفطور كل ما نوض نلقاه ديجا خرج عيطت لآدم هز عليا قالي عمري صباح الخير .قتلوا صباح الخير حبي حتى ليوم رحت تخدم بلا فطور ياك قتلك كي تنوض نوضني نطيبلك . قالي لا بزاف عليك نوضك على سبعة ، راني شربت قهوة . قتلوا صحا ، قولي وش تحب نطيبلك غدا . قالي متعبيش روحك نشري من برة .قتلوا علاه تشري من برة دوك نطيبلك راك عندك سمانة كل يوم تجيب في الماكلة من برة .قالي علابالك بيا منحبش نتعبك وانتي ثقيلة ضالي واقفة على البوطاجي بزاف عليك .قتلوا نورمال منتعبش ، حقا من بعد في العشية اديني لدارنا نقعد شوي توحشت بابا قالي من بعد نديك هيا تهلايلي في روحك متبقايش تدوري . قتلوا صحا هيا بيزو من بعد ان شاء الله .كوبيت نضت فطرت وطيبت الغدا كملت دخلت للشمبرة تاع بيبي كاملة غوز حتى من السرير الفراش والخزانة التابي ولي ريدو كلش غوز ، فتحت الخزانة مليانة آدم كل يوم يجي ويديه مليانين صاشيات غير للبيبي كي نقولوا بزاف . يقولي بنتي لازم نعيشها اميررة كون نلقى نفرشلها فراش ذهب . مسحت منها الغبرة وغلقتها سمعتوا فتح الباب بالمفتاح . خرجت عندو قالي بطة ارواحي . وصلت عندو سلمت عليه حط يدو على كرشي وش راهي بنتي قتلوا لاباس وش راح يخصها . قالي يخصها تجي لدنيا وتفرح باباها وتريحك بزاف عليها تسعة شهر في كرشك . ضحكت قتلوا انت راك حابها تجي قبل الوقت .قالي والله راني حابها تجي ليوم قبل غدوة . قتلوا مبقاش بزاف . دخلنا الكوزينة قعدنا صبيتلوا الغدا . قالي ياك قتلك متعبيش روحك بزاف علاه طيبتي هدا كامل .قتلوا والله راني حاسة هملتك بزاف ليامات هادوا ديما نرقد ونخليك ساهر وحدك حتى صباح كي نوض نلقاك ديجا روحت للخدمة والغدا ديما تجيب من برة بزاف . هز يدي باسها قالي المهم انتي كوني بخير برك انا هدا وش يهمني وزيد حتى انتي بزاف عليك علابالي راكي تتعبي وانتي هازة بنتي في كرشك ، تحسابي مشفتش رجليك كيفاش عادو على هادي راكي تغطي فيهم عليا باه منشوفهمش . سكتت دورلي الهدرة قالي ياك تفاهمنا انا لي نسمي البيبي قتلوا ايه قالي لقيت اسم بزاف شباب في الحق . قتلوا وش هو . قالي ريتاج . قتلوا معجبنيش ديجا يشبه لاسمي . قالي هدا وش حاب انا خيرتوا يشبه لاسمك بلعاني . قتلوا لالا معجبنيش علاه حتى تسميها على اسم يشبه لاسمي . قالي انا عجبني هاد الاسم . صونا تلفونوا شاف وخلاه يصوني محبش يهز من بعد وصلوا ميساج ميسنجر قتلوا شكون لي راه يعيط ويبعث في لي ميساج .قالي الخدمة .قتلوا هز بالاك تعود حاجة ايرجوا . عاود صونا هو الوا راني شوي ونجي اوكي استنايني في البيرو . كوبا قتلوا شكون قالي راني قتلك من الخدمة .قتلوا بصح سمعت صوت مرا .قالي وحدة تخدم معايا ياك سمعتيني قولتلها راني نستنى فيها في البيرو . وقف قالي ملا انا نروح نرجع عندي خدمة بزاف هيا حبي من بعد راني نجي نديك لداركم . قتلوا اوكي ربي يعينك متسوقش فيتاس بزاف المطر راهي تصب . باسني قالي تعيشلي لي تخمم عليا . هو خرج راح للخدمة وانا بقيت نطلع ونهبط هادي قريب شهرين  عادوا ديما يوصلوه  لي ميساج ولي زابال   كيما قبيل  منيش حابة نوسوس روحي بصح لي زاد شككني هو ما يهز ما يرجع  على ليميساج حتى انا  نقولوا هز باه يهز ، قداه من مرة نحب نهز تلفونوا ونشوف شكون بصح نخاف يفيق بيا خاطر علابالي بيه كان يفيق بيا يقتلني .