حب في الثانوية

134

فقت على صوتوا كي دخل للشمبرة مزروب مفرفج ويهدر في التلفون مع السكريتيرا تاعوا ويعيط يقولها متخليهم يمسوا والوا حتى نجي انا فهمتي ، كوبا وكمل يلبس في قشوا شفت الساعة لقيتها الثمنية ، قعدت قتلوا آدم وش كاين . قالي والوا كملي رقادك . قتلوا علاه راك مزروب هكدا وش كاين. قالي قتلك والو علاه تبقاي تسقسي كمل لبس حوايجوا والتلفون تاعوا محبسش حتى خرج . انا نضت عند ريتاج لقيتها مزال راقدة وليت قضيت شغالاتي شوي حتى وصلت 11 قلت نعيطلوا نسقسي والله كي خرج هكداك مفرفج قلبي مهنانيش عليه باين كاين حاجة . بقيت نعيط وهو ميهزش . قلت باين راه مشغول خاطر علابالي بيه حتى واذا مزال زعفان وهو في شور وانا في شور بصح غير نعيطلوا من لابال لول يهز عليا . كملت قضياتي و دوشت ريتاج ، سمعت تلفوني يصوني نحسابوا آدم حتى لقيتها دنيا تهدر معايا وتبكي ما فهمت والوا منها خلعتني الماء ساح في ركايبي قلت آدم سير صراتلوا حاجة . قلتلها بالعقل وش كاين متخلعينيش دنيا . قاتلي آدم جاوه لابوليس للخدمة راح يشمعولوا (يعني يغلقولوا ) وقالولوا راك تخدم في دوا بdes produits فاسدين وتبيع فيه . قتلها يا نندب راكي تهدري بصحك شكون لي قالك . قاتلي عيطتلي دوك السكرتيرا تاعوا قاتلي راه حاصل وحدو حتى ولاد عمي باه يروحولوا مكانش عيطي انتي لمحمد خلي يروح يشوف لحكاية معاه تعيشي اريج والله ماما راهي في حالة طلعتلها لاطونسيو من الخلعة . قتلها كوبي راني جاية . لبست حجابي وانا نرجف من الخلعة . هزيت ريتاج في Port bébé تاعها وخرجت غلقت الباب لقيت جارنا لي ساكن مقابلنا يخدم تكسيار مع مرتوا قاتلي مرتوا نوصلوك في طريقنا حتى انا كنت مزروبة مش وقت نبقى واقفة نستنى في تكسي . شوي ووصلت عيطت نجري دخلت عند عجوزتي لقيتها في كلوار حازمة راسها وتعدد وعندها الحق آدم مسكين شحال تعب وقرى وتمرمد في الغربة باه فتح البروجي لي كان حلموا ، ساعات يبات نايض في يخدم وكي كان راح يفتح شحال تسلف صوارد من عند صحابوا غير باه يمشي كلش مريققل . وكي الحمد الله نجح المشروع تاعوا وعاد معروف وكلشي ماشي مشاء الله تجيه ضربة كيما هادي . بقيت نهدي فيها وعيطت لمحمد حكيتلوا قالي صاي دوك نروح نشوف وش كاين . بصح قلبي مهنانيش عليه قتلهم نروح انا نشوف وش كاين ونشوف آدم منقدرش نبقى هنا . قاتلي عجوزتي وين تروحي حتى كان روحتي وش راح ديريلوا . قتلها المهم نروح منخليه وحدوا في وقت كيما هدا . خليت ريتاج عندهم راقدة عاودت حكمت تكسي وصلني وين يخدم . وصلت لقيت الدنيا مسركلة لابوليس والناس واقفة حبين يفهموا وش كاين دخلت قابلني واقف في الدخلة ومعاه محمد واقف ولي يخدموا معاه واللابوليس والحسوسات والعياطات وهو واقف صح كان يبان واقف نورمال ويهدر ويجوجي فيهم بصح انا لي نعرفوا من عينيه علابالي شحال راهي غايضاتوا الوقفة هادي خدموا وتعبوا راحوا في الهوا . المهم كملت دخلت حتى وصلت وقفت مع سكرتيرة تاعوا بقيت نستفسر منها قاتلي لحكاية عندها وحد ثلاث شهر كل مرة تجيه كونفوكاسيون بلي كاين لي شكا بيه من بعد كترث الخدمة و المشاكل نسا لحكاية حتى جاو ليوم على غفلة ، بصح لي راني متأكدة منو كاين شكون لي دارهالوا زكارة . قتلها وكيفاش درك والحل . تنهدت قاتلي مكان حتى حل راح يشارع في المحكمة لازم ويشمعولوا مابين ما بانت لحكاية اسكو صح ولالا . كي شافتني نبكي قاتلي كوراج برك دوك نشوفوا كيفاش تتفرى لحكاية بلا خساير . شفتوا كيفاش خلاهم يهدرو وجا طالع للبيرو تاعوا مع دخل لحقتوا . لقيتوا يهز في حوايجوا سمعني كي فتحت الباب خزر فيا وعقد حواجبوا قالي وش جابك وقتاه جيتي . قتلوا جيت قبيل شوي . قالي وين خليتي ريتاج . قتلوا آدم هدا وقت تخمم في ريتاج وين خليتها . قالي بيانسور راح نخمم في بنتي وين خليتيها. قتلوا ها باينة خليتها عند يما ، قولي وش كاين وش لحكاية انا نفهمو والوا شكون لي راه شاكي بيك . كمل يهز في وراقيه قالي كيما قلتي مرة خرجت هدرتك صحيحة جا نهار لي حبست فيه الخدمة . قتلوا متقولش هكدا آدم كلش يتفرى بربي ان شاء الله . قالي اممم يتفرى راكي معلابالك بوالوا هدا ادا مباصيتش . قدمت حكمتوا على وجهوا بيديا . قتلوا كلش يتحل بربي أن شاء المهم انت صافي عند ربي . تبسم بستوا على خدوا . كمل هز وراقيه وخرجنا لقينا محمد مزال واقف مع لابوليس كي شافوا آدم قالوا بلي صاي راح يغلقوا . خرجنا كل و غلقولوا أبشع منظر والله محمد راح قالي كي تسحقوا حاجة عيطولي . ركبنا في طونوبيل. ديمارا يسوق قتلوا وش راح دير دوك قالي معباليش ، بصح لازم محامي . قتلوا راهي قاتلي سكرتيرا تاعك بلي كاين شكون لي دارها عليك زكارة . قالي اريج والله ما راني قادر نخمم دوك . سكتت علابالي راه حاب يبقى وحدو كشما يلقى حل . وصلنا عند عجوزتي غير دخلنا تحضناتوا ودارت مندبة محبتش تسكت وتعدد . ناض يعيط قالها يما لاه متت انا حتى راكي ديري هكدا كلشي كاتب من عند ربي مش راح نجهلوا. قاتلوا بصح تعبك كامل راح في الباطل . كي شفتوا زعف وتقلق منها تاع صح قتلها يما حاجة ما راحت راهي غير فترة وتفوت . ولات سكتت هو شاف ريتاج شوي وجا خارج قتلوا وين رايح ادم . شنف عليا قالي من وقتاه تسقسيني وين رايح . خبط الباب وخرج.