حب في الثانوية

129

فات شهر على ولادتي لريتاج من لي مبقاتش ماما تجي عندي عولت على روحي وقفت في سمانتي نطيب ونغسل صح عانيت شوي من بعد والفت أصلا آدم كان معاوني بزاف  في الليل كنت نخلي ريتاج عندو ادا بكات هو لي ينوض ليها وادا جاعت هو لي يشربها الحليب وادا خمجت هو لي يبدللها روحو فيها يضل مقابل يتفرج فيها ولا هازها في حضنوا ويدوح حتى هيا والفاتوا تسكت عندو اكثر مني . في الليل نسمع فيها تبكي محبتش تسكت لحت يدي بجنبي في سرير باه نوضوا يسكتها خاطر في الليل ديما هو لي ينوض كي تكون تبكي خاطر ساعات تبقى تبكي وانا منفيقش بيها سيرتوا كي نتعب الله غالب نومي ثقيل . ملقيتوش في بلاصتوا فتحت عينيا وشعلت الفيوز دو نوي بقيت نشوف مكانش في الشمبرة وين راح هدا في هاد الليل . بقيت نسكت في ريتاج مبغاتش تسكت خلاص عرفتها تكون جاعت لبست الكيمينو تاعي وهزيتها في دراعي خرجت بيها من الشمبرة سكتت تقول كانت حاسة بلي لازم تسكت منعرف ادا زهري ولا ربي حبني نفيق المهم حتى انا مكنتش لابسة بنتوفتي بقيت نمشي ونهدر مع ريتاج قلتلها وين راح باباك قولي يا زينة . سمعت صوت هدرة في الصالة حبست في نص الكلوار حرت دخلت للصالة نمشي بالشوي باه منديرش الحس لقيتوا واقف في البالكو تاع الصالة ومطفي الضو ويهدر بالشوي مقدرتش نسمع حتى كلمة قلبي ضرب مع من راه يهدر . قدمت شوي سمعتوا يقول ياك قتلك متزيديش تعيطيلي في هاد الوقت ما تفهميش  لا .وبعدها كلام فاحش تاع الصح . انا حسيت الموت دخلتني جمدت  ملڨري سمعت بلي راه يهدر بصيغة تاع مرا بصح كدبت ومصدقتش وذنيا . مقدرتش نزيد نسمع أكثر خرجت ورجعت للشمبرة حطيت ريتاج في بلاصتها وقعدت نشوف وانا ساهية مخي مقدرش يستوعب امبوسيبل يكون الشي لي.راني نخمم فيه صحيح رجعولي وسواسي تاع قبل بصح هو قالي مستحيل يخوني وهو جامي كدب عليا. تمددت في بلاصتي وغلقت عينيا نخمم وريتاج نسمع فيها راح تفحم من البكا . دخل قالها بابا علاه راكي تبكي الطبوزة تاعي دوك تنوضي ماما . هزها باقي يدور بيها من قدم عندي ينوض فيا قالي ريجا حبيبي نوضي شوفيها محبتش تسكت . عودت تقلبت على جنبي قتلوا شربها الحليب دوك تسكت قالي صحا نوضي احكميها ما بيد ما وجدتلها الحليب . سكت خليتوا بقا يستنى فيا النوض من بعد خرج بيها الكوزينة وشربها حليبها ورجع رقدها في بلاصتها وجا تمد بجنبي حضني ويشوف معايا وتنهد لا هو رقد ولا انا رقدت ليلة بيضة فاتت علينا حتى هو حسيت عندو حاجة منغصة عليه رقادوا كيفي . مع الصباح نضت للكوزينة نشرب في قهوة راسي ضرني من التخمام دخل عندي قالي صباح الخير قتلوا صباح النور قالي لبارح بقيت نوض فيك علجالت ريتاج بقات تبكي وانتي منضتيش . قتلو مسمعتهاش قالي صحا حقا غدوة راني راجع للخدمة . قتلوا مش قتلي بلي راك كونجي ثلاث شهر .قالي بزاف وزيد صرا عندي بروبلام في لوزين لازم نوقف عليهم . قتلوا ربي يسهل حتى انا راني حابة نرجع للقراية مدامني رتاحيت  . قالي كيفاش ريتاج .قتلوا نخليها عند ماما ولا عند يما المهم منيش حابة نضيع الراتراباج . قالي معليش كيما تحبي دوك نخبر يما بالاك تحكمها هيا قريبة لينا احسن . سكتت ومخي يخدم يبني ويريب لازم نفهم كلشي . فوتت نهاري مع الدار وريتاج وهو من لي خرج مرجعش عيطتلوا قالي راني عندي صوالح نقضيهم ونجي .  الغدوة وصلنا ريتاج عند عجوزتي على الصباح حطيناها حكمتها ماقالت والوا أصلا فرحت بيها قالت نعمر بيها وقتي . وصلني لقرايتي وهو راح للخدمة كيما قالي  . وصلت 11 تاع النهار هزيت ساكي وحكمت تكسي وصلني وين يخدم دخلت طلعت البيرو تاعو لقيت السكرتيرا تاعو قتلها صباح خير قولي لآدم بلي راني جيت . قاتلي مدام ميسيو آدم مش هنا قتلها ايه ملا عندو اجتماع نورمال نستناه قاتلي لا ماجاش خلاص ليوم . قتلها كيفاش قاتلي مزال مادخل من الكونجي تاعو . وجهي رجع احمر دم هديك تبهديلا قدامها راجلي ومعلاباليش بيه . قتلها معليش صحيتي.  حسيتها تشوف معايا بشوفات معلاباليش كشغل حابة تقولي حاجة ومقدرتش . خرجت هبطت وانا النار تخرج من راسي  . خرجت ورجعت للدار قعدت هكداك بقشي مخي تحرق من التخمام لازم نلقى حل ونفهم كلشي يا نخرجلوا بيها ديراكت يا نحوس وراه حتى يبرد قلبي ونتأكد ادا صح يخون فيا ولا انا لي غالطة . عيطلي هزيت عليه قالي نفوت عليك نروحك ياك كملتي قتلوا لا صاي راني رجعت للدار وحدي قالي صاي ملا دوك نجيب ريتاج ونجي . شوي وجا حط اريج ورجع قعد معايا قالي وشبيك مزالك بحوايجك قتلوا والوا كادتني باه نبدل . قتلوا آدم ليوم جيت عندك للخدمة باه نتغدى معاك  ملقيتكش . شفت شغل تفرفج قالي صح ايه مخدمتش ليوم قتلوا وين كنت من الصباح قالي واش مدام ريجا راكي دايرتلي لونكات هنا ، كنت مع صاحبي كان مسافر . قتلوا معليش. شفتوا جبد التلفون تاعو وفتحوا حفظت بلايص الارقام لي كليكا عليهم باه يفتحوا ودخلت للشمبرة كتبتهم في التلفون باه مننساهش .من وراها كملت شغالاتي في الدار نورمال مخليتهش يشك  فيا خلاص  .  في الليل هو رقد وانا رفد ت التلفون وخرجت بيه للكوزينة وغلقت  الباب بالمفتاح باه حتى ادا فاق بيا بلي هزيت تلفونوا ميقدرش ينحيهولي جربت الكود مرة زوج وثلاثة خمس مرات باه تفتحلي .قلبي ضرب يديا عادوا يرجفوا مقدرتش نهزو حطيتوا فوق الطابلة وقعدت على الكرسي نهدي في روحي وندعي في ربي ما نلقا والوا منيش حابة نتصدم صدمة عمري  .
دخلت للكونتاكت تاع ليزابال بقيت نقرا في الاسامي غير تاع رجال ومعاهم تاع دنيا وعجوزتي غير نميرو واحد بلا اسم ومعيط شحال من مرة وغير هو لي قاعد يعيط .صورت النميرو بتلفوني وكملت فتحت لي ميساج ماكان فيه حتى ميساج باين مسبريميهم . كملت دخلت les photos مكاين والوا غير تصاور تاعي وتاعوا  فليتهم فلي من بعد دخلت للفايس تاعوا لقيت بزااف معاه دخلت فيهم قاع قريت لي ميساج كامل بقيت نهبط ونقرى  بالاك ساعة وانا نقرى ما لقيت والوا . خرجت ورحت للباراماتر شفت شكون مبلوكي لقيت غير ثلاثة عيباد  فيهم وحدة طفلة مسمية الفايس تاعها لابرانساس رانوا . هزيت اسم الفايس وخرجت من كلشي . رجعت للشمبرة حطيت التلفون في بلاصتوا وحكمت بلاصتي نشوف معاه زعما قاع الحب لي في قلبو  من جيهتي ويقدر يشوف في مرا اخرى .يعني بعد كلشي بيناتنا ويكون يخدع فيا يا ربي معنديش القدرة باه نتقاتل مع مرا آخرى علاجالوا أقصى حاجة نديرها هيا اني نخرج من حياتوا   . سمعت صوت ريتاج تبكي حسيت بيه تحرك راح ينوض غمضت عينيا . فاق  شاف معايا كي لقاني مغمضة عيني باسني على خدي و وقف راح ليها ورجع وهيا في يدو تكا وحطها فوق صدرو يلعب معاها محبتش ترجع ترقد بقا يبوس فيها قالها راكي حابة تسهري مع بابا ليوم قولي اطبوزة . وهيا بقات تشوف معاه يعجبها الحال كي يبقا يهدر معاها هكدا .هو بقا يحكي معاها وانا  بقيت نطلع ونهبط حتى   رقدت خليتهم نايضين .