حب في الثانوية

127

تقلبت وانا راقدة حطيت يدي في بلاصتوا لقيتها فارغة فتحت عينيا نشوف قداه الساعة لقيتها زوج تاع الليل . بقيت نشوف مكانش في الشمبرة . خرجت لقيت الباب تاع التوالات مفتوح تسمى ماش في التوالات والكوزينة كيف كيف مكانش . دخلت للصالة لقيتوا قاعد والقارو في يدو يتكيف شعلت الضو ودخلت تلفتلي قالي علاه نضتي من فراشك  . قتلوا ملقيتكش نضت نشوف وين راك . قالي ارجعي لبلاصتك دوك نجي. قعدت بجنبوا  قتلوا علاه وش قاعد دير. قالي والوا روحي برك نكمل القارو و  نجي.  محبيتش نكثر عليه خاطر يبان قالق . رجعت للشمبرة نستنى فيه . حتى دخل حط التلفون وتكا في بلاصتوا.  حطيت يدي على شعرو قتلوا وشبيك . تنهد قالي والوا مشاكل في الخدمة برك . قتلوا احكيلي بلاك نقدر نعاونك.  تبسم قالي اممم كبرت البطة تاعي وعادت حابة تعاوني  وكيفاه راه تعاونيني زعما .قتلوا منعرف بصح نعاونك بشي لي نقدر عليه . باس يدي قالي كي راني نشوف في وجهك هدا  برك راكي معاونتني بزاف بزاف . قتلوا بصح انا مدابيا لوكان تحكيلي على شي لي مقلقك هكدا ومخليك نايض في نص الليل.  قالي منيش حاب نكسرلك راسك  متخمميش .  قتلوا وش فايدتي ملا ادا مكنتش تحكيلي على مشاكلك ونفهمك ونعاونك قالي  كي نشوفك فرحانة وتبسيمة في وجهك هديك هيا فايدتك الباقي متكسريش راسك بيه . سكتت  حط يدو على كرشي قالي مبقاش بزاف.قتلوا ايه قادر في أي وقت وجد روحك . تبسم قالي راني واجد غير تجي برك راهي لصقت في كرشك . قتلوا انت راك واجد بصح انا لا راني خايفة بزاف . قالي  متخافيش تفكري بلي قاع النسا فاتوا عليها صح راح تتوجعي  بصح ورا هديك الوجيعة كاينة روح راح تخرج  منك طرف مني ومنك باه تكمل حبنا وتكبر قدامنا تجري وتلعب وانتي راح تنساي هداك الوجاع وراح من وراها تجيبي زوج وثلاث  اولاد اخرين  . قتلوا ان شاء الله  . على الستة تاع  الصباح فطنت تقول واحد جا نوضني بسكينة في كرشي  نضت لقيتوا مزال راقد .  خرجت للكوزينة ندور بلاصة ما راني حاملتها حاسة بوجاع خفيف ، مفهمتش اسكوا هدا هو الوجاع تاع الولادة ولا غير وجاع خفيف ويفوت . بقيت هكاك بين نروح نوضوا ونقولوا  يديني للسبيطار ولا  نتحمل حتى يفوت ، سمعتوا يعيطلي . دخلت عندو قالي وشبيك نضتي بكري . قتلوا والوا هرب عليا النوم برك . قالي ارواحي . رقدت بجنبو دارني في حضنوا وغلق عليا  قالي اقعدي هكدا دوك يرجعلك النعاس . قتلوا  بصح يروح عليك الحال على الخدمة . قالي لا راني كونجي حتى تولدي وتفوتي وتوقفي على رجليك باه نرجع ديجا انا لقيتها سبة باه نهرب من الخدمة.  قتلوا ادا هكدا اخربلي في شعري حتى نرجع نرقد . بقا يمشطلي في شعري بصوابعوا قالي علابالكي راني نتخيل فيك بالشعر لونوا اورونج ولا موڨ يجي عليك يهبل تعودي  كشغل لعبة.  ضحكت قتلوا ادا راك حاب كي نولد نصبغوا  بصح ادا ماجاش شباب  نقتلك . ضحك قالي عمري ليك غير ترضاي علينا برك . بقيت هكاك شوي بصح لوجاع باقي ويزيد قلت نقولوا وخلاص . قتلوا آدم راني موجوعة.  بعدني عليه يشوف في وجهي  مخلوع وجهو  هرب منو الدم قالي كيفاش وين موجوعة علاه مهدرتيش من قبيل . بكيت  قتلوا آدم  راك تزيد تخوف فيا هكدا . قالي خلاص بالعقل قوليلي وين الوجاع .وريتلوا البلاصة قالي من وقتاه وانتي حاسة بيه قتلوا كي نضت على الستة حسيت بيه خفيف يروح ويرجع بصح دوكا بدا يقوى عليا . مسحلي الدموع من وجهي قالي مكاين والوا متخافيش صحا بنتي متتحركيش دوك نرجع.  خرج شفتوا فات الدوش منعرف وش بقا يدير من بعد رجع .قالي راكي قادرة توقفي نورمال .قتلوا ايه . وقفت مشاني حتى للدوش . قتلوا وش راح دير . قالي راح ندوشلك من بعد نروحوا للسبيطار ياك راكي قادرة تصبري شوي . درتلوا براسي ايه . دخلني للدوش دوشلي بالخف من راسي حتى لرجليا من بعد وضالي الوضوء الاكبر كملي ولبسي قشي . ركبنا في الطونوبيل طريق كاملة وانا حاكمة روحي باه منعيطش خاطر صاي الوجاع مبقاش يتحمل . حكمتلوا يدو قتلوا آدم  . شاف معايا عرفني وش راح نهدر قالي اسكتي اسكتي ماتكمليش راح تولدي وترجعي ما راح يصرى والوا علابالي . قتلوا وكون يحبس قلبي . قالي شششش ميحبسش  انا علابالي .ضحكت قتلوا وانت علاه راك خايف وترجف هكدا ياك انا لي راح نولد مش انت.  ضحك قالي والله راني حاس  كشغل انا لي راح نولد في بلاصتك . وصلنا للسبيطار لقينا الطبيبة تاعي تستنى فيا غير شافتني قاتلي لوجع تاع الطلقات تاع الولادة بصح لازم تصبري وتتحملي شوي حالتك قادرة طول شوي . دارتلي السيروم  وخرجت . قعد بجنبي آدم . قالي ريجا وش راكي حاسة دورك.  قتلوا شوي نقدر نتحمل ما تخافش ، روح جيبلي الفاليزة تاعي لي وجدتها من دار. قالي اوكي منطولش عشر دقائق نكون عندك صحا عمري دوك نوصي الفرملية تجي تقعد معاك . غير خرج شوي  مقدرتش وليت قريب نقطع شعري من الوجاع دموعي وعرقي يسيلوا كي الما عليا  الدنيا قلبتها بالعياط . شافتني الطبيبة قاتلي مزال شوي زيدي اصبري . قتلها صاي مقدرتش . ضحكت قاتلي صاي استسلمتي زيدي اصبري شوي في خاطر المموشة لي جاية في الطريق . انا راح نموت بالوجاع وهيا تضحك باردة القلب وليت نشوف فيها قرد . شفتوا دخل طلقت البكية من راسي قتلوا آدم مقدرتش راح نموت قلهم يجبدوها صاي . قاتلوا الطبيبة مزال الكور تاعها متفتحش مليح من هنا لي ليل سينو نديرلها سيزريان . قالها ديرلها دوكا سيزريان علاه حتا نستناو لليل .قاتلوا منقدرش معنديش الحق هيا تقدر تولد نورمال ونديرلها سيزريان . خرجت هيا وهو جا قعد بجنبي حضني بقا يمسحلي في وجهي قالي مبقاش بزاف لازم تصبري شوي باه تجي بنتنا ونفرحوا بيها .درتلوا براسي ايه . بقيت هكاك فاتت ساعة زوج وطبيبة كي ما تجي تشوفني تقولي مزال مزال حتى وصلت الستة تاع العشية . روحي راح تخرج من الوجاع طاقتي فضت كي رجعت شافتني قاتلي صاي راكي واجدة .خرجتني من الشمبرة ودخلتني للصالة تاع الولادة   . قبل ما دخلني دخلت عندي ماما وبابا سلمت عليهم وبستهم   .هما خرجوا ودخل عندي آدم غير شفت وجهوا ضحكت والله لا خايف اكثر مني  عشت وشفت آدم خايف طبس باسني قالي بطة عندك لا تسمحي فيا ارجعيلي انتي وبنتي . قتلوا ادا كتب ربي وادا مكتبش اسمحلي وتفكرني . رجع باسني قالي عمري حياتي  انتي . غير خرج هو بدات ولادتي من قوة الوجاع تقول ما راني نشوف ما راني نسمع في حياتي ما جربت وجاع كيف هدا قلبي فسخ لا طبيبة رحمتني لا لي معاها رحموني انا نقولهم ماقدرتش صاي قلبي نحس فيه راح يحبس وهيا تقولي لا كملي ازحمي متحبسيش لازم تصبري .حسيتهم راهم يعذبوا فيا وليت نعيط غير على آدم باه يجي يسلكني منهم . طاقتي فضت حبستلهم في النص غمضت عينيا دايخة ستسلمت وقلت خلي لي يصرا يصرا . رجعت نسمع غير في صوت آدم يقولي هيا ريجا افطني راهي رايحة تموت فتحت عينيا لقيتوا حاكملي وجهي  بكيت آدم قالي ياعمري يا قلبي . قاتلي الطبيبة هيا اريج كملي ازحمي راكي رايحة تقتلي البيبي راح تخنقيها هيا شوي كوراج .درتها براسي لا  قتلها منيش قادرة صاي راح نموت .قالي آدم تقدري متخافيش .قاتلي الطبيبة خمس دقايق دفعة وحدة وصاي . قالي آدم هيا اريج ريتاج  راح تتخنق تموت .  غيرسمعتوا نطق اسمها  كوراجيت روحي علاجالوا علابالي كون تصرى للبيبي حاجة راح يقولي قدر الله ما شاء فعل بصح راح تبقى حرقة فرحتوا والحماس تاعوا وهو يستنى فيها تجي خلاتني ندفع لآخر طاقة عندي مع عيطة حسيت معاها روحي خرجت بعدها ما شفيت على والوا  هنا فضت المهمة تاعي .