حب في الثانوية

114

طول الطريق وانا نخمم في هادي الحاجة  لي مخوفاتوا اني نديرها وبسبابها راهو يعامل فيا بهاد الطريقة لي امبوسيبل نقبلها ولا نتقبلها ، وصلنا للدار دخلنا كانت 1 تاع الليل روحت ديراكت للكوزينة يا ربي لكان كفاني الوقت نوجد السحور سمعتوا يعيط اريج ارواحي . روحتلوا للصالة قتلوا انعم عيطتلي .قالي اقعدي نهدر معاك . قعدت بحداه في الفوتاي حكملي يدي قالي علابالك وش درتي .سكتت علابالي بلي راني زدت فيها بزاف .قالي عينك في عيني وتقولي متربية خير من طاسيلتك وش معنتها هادي وزيد كون جينا وحدنا في دارنا نورمال بصح قدام يما واختي تقولي هكدا عيب عليك طحتي من عيني كل مرة نقول راكي كبرتي ودرتي عقلك بصح نلقاك مزال بنفس عقليتك لي نعرفها من خمس سنين غير متعجبكش هدرة تخرجي ديراكت للعيب وصحانية الوجه قتلوا بصح انت علاه تقول عليا قدامهم بلي منعرف ندير حتى حاجة وش يقولوا دوك تلقاهم يقولوا عليا مكسرة اليدين والدار عندي راهي ماكلها الدود وانت راك ميت بالشر ياك غير نروح لدار الحاجة لي تطلبها تكون بين يديك نهار مطيبتلكش ولا نهار خليتك محتاج حاجة . ضحك قالي  انتي هدا لي بيك غير كي قلت قدامهم بلي حرقتي لفطور خايفة لا يضحكو عليك . درتلوا براسي ايه . قالي ربي يديرلك العقل  نوضي كملي السحور .نضت تسحرنا ورقدنا  من وقتها فات روتين تاع كل يوم ينوض الصباح يوصلني للخدمة ومن بعد يرجع يروحني على الوحدة نطيب لفطور  غير يكمل لفطور يروح يصلي ميرجعش حتى 11 ولا 12  ديراكت يرقد من بعد ينوض معايا وحدو حتى نوجد السحور يعاود يرقد كل يوم هكدا صح منتعاركوش بصح علاقتنا دخلها برودة انا وليت منقدرش نهدر معاه براحتي وهو عاد معايا سيريو بزاف غير الاحترام بيناتنا بديت نمل منو . وصلت ليلة النص غير فطرنا  عيطتلي عجوزتي قاتلي راني دايرة سهرة ولافامي كامل هنا ارواحي حتى انتي وجدت روحي  ، بما انو لافامي قاع عندهم لازم نلبس حاجة شابة لبست قفطان اخضر مطرز بالدهبي خفيف مش تقيل بزاف ولبست معاه دهب وطلقت شعري رجعت نقعد عليه من طولوا كملت مكياج سامبل ، خرجت للصالة لقيتوا يستنى فيا لابس قميص ياعمري القميص شحال يجيه شباب قالي كملتي .قتلوا ايه دقيقة ندير الخيمار ونجي.لبست الخيمار و العباية وروحنا وصلنا لدار عجوزتي ، فتح لباب ودخلنا نسمع غير في صوت الهدرة عرفتها شعب كبير عندهم خرجت دنيا من الكوزينة سلمنا عليها جيت راح ندخل للصالة قاتلي ارواحي سع للكوزينة من بعد روحي ، آدم راح للصالة دوزيام تاع الرجال وانا دخلت معاها للكوزينة قاتلي علابالك راهم كامل هنا قتلها شكون .قاتلي كوثر ويماها واختها . قتلها  تحكي صح انا كي قاتلي  يما لافامي هنا نحساب خالتك ونسا عماموك مش حتى لبنات .قاتلي راهم ڨاع هنا من قبيل وهوما يستناو فيك ويقولوا لماما علاه ماتجيش تسهر عندك . قتلها ديجا بداو . نحيت الخمار و العباية عدلت شعري عاودت درت البارفا .قتلها هكدا مليح ولا نزيد شوي في المكياج .قاتلي لا هكدا راكي تهبلي . دخلت عليهم للصالة وانا نطقطق في الطالوا وشعري يتحرك ورايا . سلمت عليهم وقعدت بحدا عجوزتي نشوف فيهم يكيلوا فيا راح ياكلوني بعينيهم ، قعدت معاهم بصح نهدر غير مع لعزاز عليا ونتفاهم معاهم الباقي حاطتهم في الثقيل وهديك كوثر ويماها مدورتش خلاص جيهتهم غير عاطيتهم بظهري . قاتلي عجوزتي اريج روحي انتي ودنيا وجدوا الضيافة مابين ما صلينا العشا .روحنا للكوزينة بقينا نوجدوا ودنيا تسقسي  فيا  قاتلي وش حوالك مع آدم .قتلها نقولوا لاباس .قاتلي مزال زعفان منك . قتلها لا مش زعفان بصح حسيت قلبوا  برد عليا .قاتلي كيفاش زعما مفهمتش .قتلها حتى  انا معلاباليش كيفاش نشرحلك علاقتنا عادت باردة غير واجب وخلاص كل يوم يسهر برة ويخليني وحدي في دار بين ربعة حيوط من لي بدا رمضان جامي لا سهر معايا ولاقال مرتي تقلق وحدها نبقى معاها من لي يخرج ما يرجع حتى 12 ولا 1 تاع الليل يتسحر ويرقد .وانا نبقى وحدي نقنط حتى نولي نبكي وانا غير وحدي كي نقولوا يجيبني عندكم يقولي لا احكمي الدار علاه حتا تروحي حتى ماما ميقبلش نروح عندها .قاتلي ربي يهديه برك وشبيه يدير هكدا .قتلها منعرف عليه عييت نلقى معاه حل والوا . قاتلي معليش تعيا وتتحل .قتلها ان شاء الله .جيت راح ندور نلقاه واقف في الباب تاع الكوزينة ايي وقيلا سمعني. قالي ارواحي دقيقة . خرجت عندو للكلوار قالي راني خارج شوي ونجي نروحوا .قتلوا  كيما تحب .شاف مع شعري قالي لمي شعرك . قتلوا علاه حتا نلموا تشعشط ولا وشبيه .مشيت نشوف في روحي في المراية ادا  شعري فسد لقيتوا مزال لباس عليه .قالي لا لميه خير شعرك يجيب العين .قتلوا بصح لبنات كل طالقين شعورهم غير انا لي راح تحكم فيا العين .قالي ولاه شعرك انتي كيما شعورهم انتي شعرك فتنة . تبسمت ولميتو هكاك . قالي هيا راني خارج صالة دوزيام ممنوع تفوتي عليها عمي راه ثم. قتلوا علابالي .رجعت نمشي للكوزينة قالي حبسي . قتلوا انعم .قالي علاه راكي تمشي هكدا قتلوا راني نمشي كيما موالفة .قالي راكي تتمسخري قريب راح تشطحي وانتي تمشي كلش يرجف ريڨلي مشيتك  . ضحكت قتلوا والله نمشي كيما موالفة بلاك من الطالوا برك. شاف مع رجليا قالي نحيه الطالوا  وروحي البسي حاجة من عند دنيا .قتلوا علاه بصح .قالي نحيه وهاتيه . نحيتوا من رجلي عيطتهولوا . قالي راهو في الطونوبيل داه وخرج لبست صندالة من عند دنيا . رجعت قعدت في الصالة  .نطقت مرت عموا وسطاني قاتلي اريج مزال ما حنش ربي  وتسمعينا خبر يفرح .قلقتني بصح بلعتها وسكتت .قتلها مكتوب ربي .قاتلي انا في رايي بانتلي مايصلحولكش ياك شحال من مرة وانتي يطيحولك كون روحتي لتونس داويتي . شعلت فيها  قتلها هادي حاجة تخصني انا وراجلي  .قاتلي عندك الحق بصح انا قلت نقولك على واحد الطبيب معروف بزاف في هاد الحوايج . شفت مع عجوزتي دارتلي بعينيها تاع اسكتي برك قتلها كثر خيرك بصح ميشقاش تقوليلي راني قارية ونعرف مش حتا نستناك انتي تجي تقوليلي . وقفت قلت لعجوزتي نروح نجيب القهوة  قاتلي استناي نجي معاك . خرجت وانا نغلي وجه الهم شحال قلقتني .هزيت صينية تاع القهوة ودنيا هازة تاع القاطو جينا راح ندخلوا للصالة نسمع فيهم يهدرو عليا .  قالتلهم شفتوها جيت راح ننصحا قريب شوي راح تنوض تضربني هدا لي يحب يدير الخير وش يصرالوا وجها صحيح القباحة تمشيلها في الدم  .نطقت مرت عموا الصغير قتلها ما شفتيهاش كيفاش شايفة روحها وتفوخ علينا من بكري هيا فواخة وزيد الرزق لي عند راجلها مبقاتش تشوف فينا أصلا شوفتيها كيفاش من لي جات وهي عاطيتنا بظهرها ما شافت فينا ما هدرت معانا تمشي وتشطح في روحها تقول غير هي عندها #### وصحة وغير هي لي  عندها شعر .شفت مع دنيا قتلها هادوا راهم يهدروا عليا سمعتيهم . قاتلي غيرين منك متعمريش راسك بيهم . دخلت قعدت معاهم بصح قتلتهم بالفوخ والتكبر  ياك هما قالوا عليا فواخة خلي نكمللهم بيها . سمعت صوتوا خرجت عندو قالي هيا نروحوا راح الحال .قتلوا  نزيدوا شوي برك حتى يروحوا الغاشي عيب حنا موالاين الدار نروحوا قبلهم .شفت مرت عموا الوسطاني خرجت هي وبناتها جاو سلموا على آدم من بعد شافت معايا قاتلي محقش عليك  قبيل تقوليلي هكداك انا حبيت ننصحك وانتي نشعتيني والله لا زعفت منك  .قتلها لا متزعفيش  بصح انا منحبش واحد براني يدخل روحوا في حياتي .  وجها عاد احمر دم قاتلي مش قصدي ندخل روحي  بصح غير قتلك راكي في مقام بنتي  . ضحكت قتلها صح علابالي . خرجت راحت .قالي آدم وش درتي للمرا .قتلوا وش راح نديرلها هيا لي دخل في روحها في حاجة خاطيتها عطيتها الصرف لي تسحقوا . حكيتلوا كلش قالي يا يما عندك وحد اللسان تقول سيف بصح  عندك الحق .قتلوا باينة عندي الحق وزيد مسمعتش وش كانوا يقولوا عليا سقسي حتى دنيا  سمعتهم معايا .حكيتلوا كلش ناض يضحك  وهو يشوف مع جسمي قالي غايرين منك بصح راهم غالطين مكانش وحدة عندها ###وصحة وشعر كيما لي عندك  سيرتوا ### كنز يا جدك  .قتلوا يا أحشم وشبيك كاش واحد يسمعك  .قالي علاه نحشم مرتي حلالي ديجا هيا نروحوا للدار حاب نسهر معاك .قتلوا  لا مش قادرة نسهر تعبانة .قالي وش يتعب في ناناك  نهار كامل وانتي قاعدة   والله ماراكي راقدتها . مور ما روحنا للدار وسهرنا مع بعض قالي آخر مرة نسمعك تخرجي حياتنا برة الدار حتى لوكان راح تحكي لاختي ، كل دار عندها اسرار وانا منحبش أسرار داري تخرج من هاد الدار قتلوا ياك نهدر مع دنيا .قالي حتا لوكان دنيا ملا انا علاش خليت الدار لي فوق دارنا وجيت سكنتك هنا غير علاجال الخصوصية فهمتي  .قتلوا بصح انا لمن راح نفرغ قلبي ونشكي .قالي ارواحي أشكيلي انا . قتلوا انت مبقيتيش تسمعلي كيف بكري مين نهدر معاك تفهمني غالط أصلا انت وينتا قعدت معايا وسقسيتني اريج وشبيكي ولا تقول نقعد مع مرتي ونسقسي عل حوالها . سكت من حط يدو على خدي قالي عندك الحق في هادي . قتلوا علابالك والله انا بديت نمل من هاد المعيشة .قالي علاه حتا تملي راني باخل عليك بحاجة  ياك حتى الخدمة راكي تخدمي قتلوا لا بصح انت مبقيتيش كيما بكري كلشي فيك تبدل طبايعك عقليتك . قالي انتي برك تبانلك هكدا هادي هيا عقليتي و هادي هيا طبايعي بكري كنت نساير فيك خاطر كنتي صغيرة بصح لوقتاش راح تبقاي صغيرة ونقعد انا نساعف فيك لازم تتعلمي ترفدي المسؤولية كثرة الدلال بزاف مش مليحة . قتلوا انا معجبتنيش هاد المعيشة وعقليتك هادي منقدرلهاش ومستحيل تجي مع عقليتي يا تشوف كيفاش تبدلها وترجع كيما بكري يا نهز قشي ونصد لدارنا تنوض الصباح متلقانيش .قالي انتي ڨاع ما تتبليش منعرف كيفاش راح نكملوا حياتنا هكدا .دارلي بظهرو .قالي طفي الضو معاك .