حب في الثانوية

chapitre 89

وجدت روحي لبست صواري كحلةسامبل وهزيت شعري كوتشوفال ومكيجت سامبل ربع ساعة كملت خرجت عند ماما ، غير شافتني شهقت قاتلي اخلايا وش لبستي راح تروحي هكدا .قتلها ايه وشبيها لبستي .قاتلي رايحة لجنازة ملقيتي غير الصواري هادي تلبسيها ، وش بيك ماشطة شعرك هكدا رايحة تلعبي سبور . قتلها ماما شوفي ديجا انا مش حابة نروح متزيديش عليا انا عجبتني روحي هكدا . قاتلي والله جيتي تقول عليك عجوزة تاع ميات سنة امشي قدامي . دخلت للشمبرة تاعي فتحت لخزانة بقات تفركت في القش حتى جبدتلي صواري حمرة قتلها لا امبوسيبل نلبسها غير انساي. قاتلي والله غير تلبسيها راني حلفت شوفي تهبل . كانت غوب حمرة تلمع سير طاي فيها دراع واحد وجيهة لخرى مكانش مشقوقة حتى للركبة . قتلها شوفي ماما عريانة بزاف . قاتلي ياك انتي لي شريتيها وكنتي راح تموتي عليها ديجا ما عريانة ما والوا البنات كل تلبس هكدا . حتمتها عليا حتى لبستها قاتلي ارواحي نمشطلك شعرك . قتلها خليه هكدا برك .قاتلي راني قتلك ارواحي . بقات تمشطلي فيه قسمتهولي نص حكماتوا ونص طلقاتوا وكسلتهولي من تحت دارتلي البابليز وكملت قصتلي لاماش بومبي كيما موالفة .وعاودتلي ماكياج غامق ودارتلي الروج في شواربي المهم ما جات تكمل خرجتني بوبيه . بقيت نشوف مع روحي قتلها يخرج منك لعجب اماما مين تعرفي انتي لحوايج هادم .قاتلي وش تحسابلك ماماك طايحة ولا رايحة بكري كنت كل يوم نخرج لباباك عروسة . ضحكت قاتلي لا تضحكي لا والوا هادا واش يحبوا الرجال ، انا نروح نوجد روحي ليه ليه . كملنا وجدنا كامل راحوا معانا خالاتي ومرت عمي ، درنا كورتاج خفيف حتى وصلنا عدلت الخمار على راسي وهبطنا اول واحد طاحت عيني عليه هو آدم كان كيف العادة تقول عليه هو لعريس لابس الكوستيم بلونوي بقيت نشوف معاه كان عاطيني بظهرو ماشافنيش بقيت نشوف معاه سهيت فيه شحال توحشتوا ، فيقتني ماما قاتلي وش راح تبقاي تشوفي معاه هيا ندخلوا قبل ما يشوفك باباك تخزري معاه مشيت وانا عينيا عليه حتى دخلنا ستقبلونا نسا عمو وخالتوا وبناتهم سلمت عليهم كل فوق قلبي علابالي كل فرحانين بطلاقي ، حتى جات عجوزتي بقات تسلم وتعاود وانا غير حاطتها في الثقيل . دخلنا للصالة دايرين فيها ديكور قعدنا جابولنا القهوة والقاطو وانا زوج دقايق تجي تهدر معايا وحدة من فاميلتوا علابالي راهم يقرعجو عليا وحابين يفهمو على حياتي ، بقيت حاطتهم كل في الثقيل من بحدا ماما متحركتش . كملوا قراو الرجال الفاتحة ودفعوا الشرط. قاتلي ماما خوك نسا البوكي تاع النوار هنا هاكي اديه اعطيهولها هيا ولا لماماها . قتلها دوك يجو يدوه وحدهم علاه حتا نديهولهم انا . قاتلي نوضي عيب حنا لي جبناه لازم حنا لي نمدهولهم مش هم لي يجيو يحوسوا عليه هيا نوضي اديه بلا تخشان الراس تاعك ، باين خوك تلقاه دخل باه يخرج عروستوا ازربي. وقفت وانا تتأفف ومشيت الكوزينة علابالي نلقا عجوزتي لثم نعطيهولها هي توصلوا لبنتها . وصح لقيتها كي قولتلها قاتلي راني لاهية مع الناس اديه انتي برك وما تمديه لحتى واحد مكانش لامان صحيتي بنتي . مشيت وانا نسب بالمقلوب ،منيش حابة نحكي معاها الهم هديك وصلت للشمبرة تاعها كنت راح ندخل حتى سمعتها تهدر مع محمد قاتلوا وعلاه جبتها . قالها دنيا متقلقنيش كيفاه نجي واختي متجيش وشبيك .قاتلوا ياك قتلك متجيبهاش معاك منيش حابة ديريلي المشاكل في الفاتحة تاعي اختك ديما بالهمومات تاعها كون تشوف آدم تبدا تخدم في الفيلمات تاعها كيف ديما قالها دنيا اقسم بالله تزيدي كلمة غير نبطل ضورك بعد متقلقنيش خيرلك ديجا انا منيش حاملك متزيديش فيها .قاتلوا شفت كيفاه هيا لي حرشاتك عليا علابالي راك تبدلت عليا بسبابها أصلا كون مبقيتش نحاول فيك كي الكلبة راك بطلت . بقيت مشوكية وش راهي تهدر عليا ليوم نوريلها الزنباع وين يتباع ياك انا تاع مشاكل معليش تشوف . دزيت الباب ودخلت هزيت البوكي تاع النوار ورميتهولها على وجها ديراكت . قتلها وانا نعيط: انا تاع مشاكل يا الكلبة يانكارة الخير والعشرة ،قالي خويا اريج روحي درك من بعد وتفاهموا .قتلوا لا منروحش . خزرت معاها قتلها كون عيني نحرشوا نحرشوا يبطل عليك درك بعد بصح ما عندك وين تهرب مني راكي تزوجي وتجي للدار نشربلك لمرار ،نكرهلك عيشتك اصبري عليا برك . قالي خويا اريج روحي من بعد نتفاهموا عليها الهدرة هادي. جيت ماشية راح نخرج من الشمبرة قاتلي يا الغيارة هادي كل غيرة مني كي انتي تطلقتي وانا راح نتزوج. دورتلها قتلها انا غايرة منك ولا انتي لي غايرة مني يا لفعة تحت التبن وين كنتي مخبية سمك يا الحية . كنت نهدر ونعيط حتى دخلت عجوزتي واختها حابين يفهموا واش كاين وخويا ملقا مايدير معانا . بقا غير يقولي اخرجي ويزي من البهادل بصح انا والله ما خرجت خاطر هيا لي بدات ، بقات هي تسب وانا نسب وعجوزتي تسكت فينا حتى سمعت صوتوا ورايا قال وشبيكم وش كاين هنا . دورت خزرت فيه طاحت عينوا على عيني مزالوا نفس العينين لي نموت ونعشق فيهم ، حسيت الوقت حبس وانا نشوف معاه شعروا طلع فيه شوي تاع الشيب حتى اللحية و الكور تاعوا زاد خشان عاد يبان كتلة تاع إغراء تاع الصح متأكدة مكانش طفلة ولا مرا تشوفوا وما تضربش فيه عشقة ومتدوبش فيه . حتى هو بقا يشوف معايا من بعد دور وجهوا مفهمتش علاه من بعد تفكرت بلي راني بلا خمار وبلا عباية وصواري تاعي عريانة .رجعت خزرت في دنيا و قتلها شوفي يا تخطي ساحتي يا اقسم بالله نمسح بيك الارض راكي علابالك كي يطلعولي جنوني ملا غير بعدي مني . قالي خويا نقصي صوتك وطيري منهنا بلا بهادل . قاتلوا خليها خليها هادي كل غيرة علابالي راني قتلك كون تجيبها معاك راح تفسدلنا كلش . قدمت عندها قتلها انتي حابتني نضربك نفسدك تاع الصح وشبيه عزرينك
معايا . نطق هو قالنا أيا افرڨوا علينا سوق النسا هدا شاف مع محمد قالوا اخرجوا برك الناس تستنا فيكم . خزر معايا خويا علابالي قاعد يتحلف فيا خرجوا . قدمت عندي عجوزتي حطت يدها على كتفي و قاتلي امسحيها فيا بنتي علابالي دنيا هي لي بدات . نطرت كتفي من يدها قتلها ما نمسحها في حتى واحد وبنتك الهدرة لي قالتها عليا ليوم تخلصها غالية راني قلتهالك في وجهك .سمعتوا قالها يما اخرجي . هدا مزال هنا حطيتوا خرج معاهم درت شنفت عليه وجيت خارجة حكمني على دراعي قالي حبسي نهدر معاك . قلبي ضرب يا يما هادي تسع شهر ما حسيت بلمستوا عليا راح ندوخ بسيف كوراجيت روحي وشفت معاه .قتلوا نحي يدك مني قالي علاه راكي معرية روحك هكدا . ضحكت شوكاني قتلوا وشدخلك انت نعري روحي ولا نخرج حتى بلا قش كيما خلقني ربي انت وش دخلك . بقا يشوف معايا من بعد قالي مزلتي كيف ما خليتك . مافقتش مع روحي كيفاش قدمتلوا وانا مسحورة بعينيه لي يشوفوا معايا هزيت يدي وحطيتها على خدوا قتلوا بصح انت تبدلت . وهو هز يدوا حطها على دراعي العريان وبقا يمشي فيها قالي كيفاه تبدلت . بقيت نعدي في يدي على الشيب لي في لحيتوا قتلوا شبت . تبسم قالي من بعدك شبت . بقا يقربلي من بعد كشغل فاق مع روحوا هبط يدو من دراعي وبعد عليا وهبطلي يدي من فوق خدوا .قالي اخرجي . كنت علابالي بلي غير نشووفوا راح نضعف ونرجع لنقطة الصفر صاي مبقيتش نخمم بعقلي بقيت نسمع غير في قلبي لي يقولي حاوليه يرجعك حاوليه حتى لوكان تبوسيلوا رجلوا . قدمت عندوا وحطيت يديا على صدروا قتلوا آدم تعيش خلينا نرجعوا بقا يشوف معايا قتلوا توحشتك . قالي اريج حبسي . قطعت عليه الهدرة وطلعت على راس صوابعي باه نوصلوا وحطيت شواربي على شواربوا نبوس فيه على قوة جهدي ويديا على خدودوا باه ميقدرش يبعد عليا . حسيتوا تخلع متوقعش راح نبوسوا حكمني على شعري من لورا وجبدوا حتى حسيتوا راح يطير من راسي بصح محبيتش نبعد عليه حتى عضيتوا على شواربوا وبعدت عليه ، بقا حاكمني على شعري ويد الثانية غرسها في جنبي حتى حسيت صوابعوا دخلوا في لحمي . عينيه حمر ويتنفس بالجهد قالي آخر مرة ديري لعفايس تاع القحا# هادوا سينو #### سمعتي كمل هدرتوا ودزني . قتلوا آدم راح نكمل نهدر دخلت هديك لي شفتها معاه في البيرو اميرة قاتلوا آدم راك هنا . قالها وش راكي ديري هنا .قاتلوا خسارة عليك زعما راني خطيبتك ومحبيتش تعرضني الفاتحة تاع اختك بصح شوف انا احسن منك وجيت بلا عرضة. دخلت في هستيريا تاع ضحك وش قالت هادي خطيبتوا . قتلها وانا نضحك انتي خطيبتوا ههههههه علابالك ضحكتني وانا كنت مقلقة ههههههه . قاتلي ااا صغيرونة راكي هنا اسمحيلي مشفتكش كيما راكي تشوفي كنت في نقاش مع خطيبي ، مرحبا بيك الدار دارك رانا فميلة واحدة ضرك وراح نتشاوفوا بزاف .حبست الضحك ضربة وحدة هادي راهي تبان تهدر صح خزرت معاه قتلوا هادي تتمسخر ياك وش من خطيبة هادي . قالها اميرة اخرجي قاتلوا علاه .قالها راني قتلك اخرجي . شافت معايا وخرجت . قالي اريج شوفي حنا حكايتنا خلاصت هادي شحال واانتي لي حبيتي ، وانا حاب نعاود حياتي كيما الرجال الكل . قتلوا تسما انا خربتلي حياتي تمسخرت بيا مرضتني ورميتني وضرك راح تعاود حياتك مع وحدة اخرى . بقا ساكت هجت عينيا تغمضو . قتلوا يا رخيس يا رخيس يا الطحان .هزيت الفاز ورميتوا عليه جاب ربي بعد سينو يجي في راسوا .قتلوا يا تاع البنات من وحدة الوحدة من شهرة لكوثر لاريج لاميرة يا الشماتة يا عرة الرجال . كنت نعيط على طول صوتي لمزية صوت لغنا برة . قدم عندي غلقلي فمي بيدو قالي اغلقي فمك خير من نكسرهولك راني حاكم روحي بالسيف عضيتوا على يدوا قتلوا بعد مني يا كلب يا الطحان يا الشايب يا الشارف بعد مني والله ندمك والله ندمكم كل اصبرو تشوفوا . كنت نرجف وحدي كي المهبولة كون يشوفني واحد يقول هادي يا مهبولة يا تدروڨي حكملي وجهي قالي خلاص ريجا بالعقل برك عندك الحق انا رخيس غير انتي اهداي برك ، شوفي خشمك بدا ينزف تهدني . تهدنت صح على خاطر خفت على روحي قلبي كان يوجع بطريقة مش نورمال حكمت في يدو وانا نتنفس بالسيف راح ندوخ . حط جبهتوا على جبهتي قالي شيبتيني بطة مالقيت حتى حل معاك علاه راكي ديريلي هكدا قولي علاه راكي تعذبي فيا . خزرت معاه .قتلوا شكون لي عدب شكون انا ولا انت . قالي انا لي نتعدب وقت نشوف حالتك هكدا انا لي قلبي يتكوا وقت نشوف دموع . شفت معاه حتى لقيتوا يبوس في وجهي كامل . بعد عليا وقت لي سمع ماما قاعدة تعيط عليا وباينة بلي جاية للشمبرة لي رانا فيها قتلوا راح ندمك على دموعي وحياتي لي خسرتها بسبابك راح تندم . بقا حاكملي وجهي قالي ديري وش فيا تحبي بصح بلا هبالك ندميني وانتقمي مني كيما جاتك بلا هبالك اريج . خاطر نعرفك هبالك راح يأذيك غير انتي .هي دخلت ماما وهو وقفف قاتلي اريج وش ديري هنا مع هدا .