حب في الثانوية

117

كي روحت عند ماما وحكيتلها بلي آدم قالي مبقيتيش تقراي وتخدمي رجعت عليا انا قريب لا تضربني قاتلي انتي تاع الصح جايحة ووجهك صحيح عمرك شفتي ولا سمعتي مرا تقول لراجلها كي نخرج نقرى يجو يهدرو معايا ويحبو يخطبوني باينة بلي راح يتوسوس ويقول بلاك يلعبولها بعقلها ولا تشوف واحد يعجبها ولا يغويها بهدرتوا ملا يقول نخليها في الدار مقابلة لحيوط ولا نخرجها لبرة أصلا مكانش راجل يقبل هدرة كيما هادي من مرتوا وينك يا آدم لمعقد  قتلها بصح انا كنت نهدر بنيتي برك ديجا هو علابالو بيا نحبو ومستحيل نشوف في راجل غيرو قاتلي ارواحي انتي وفهميهالوا هادي رجال في هادو لحوايج تلقايهم مغلوقين يعني عندك الزهر كي مكسلكش بطريحة . قتلها والله يحط يدو عليا نهز قشي ونصد هنا مبقيتش نرجع عندو   .قاتلي اسكتي وارزني شوي احكمي فمك علاه تشركي فمك حتى تعاشي معاه في حل واربط راكي انتي وحدك لي ديري في المشاكل لعمرك . قتلها انا خطيني هو لي منعرف على جدو عاد معقد هكدا شاريهالي على كلمة غير انا لي نسايس وساكتة . قاتلي عندو الحق خاطر راني يماك ونعرفك وربيتك بيدي انتي غير يرخفلك الواحد شوي ديري كارثة من التبهليل تاعك معلابالكش بالدنيا لا تهدري مسڨم لا تخممي مسڨم .قتلها والله عرفتها راح ترجعيني انا لي غالطة لي جيت نتشكالك منو باه تلقايلي حل كي يجي بابا نحكيلو وهو لي يتفاهم معاه. قاتلي علاه راكي تكبري في المشاكل وش دخل باباك في حكاية كيما هادي نهار ميخليكش صح تروحي تخدمي ولا تقراي ثما تهدري بلاك يكون يخوف فيك برك ومش يهدر صح علاه متسرعة هكدا . سكتت بيسك هي عندها الحق انا متسرعة بزاف في قراراتي  . قعدت عندها حتا العشية من بعد جا آدم روحني للدار . غير وصلنا قالي وجديلي حوايجي غدوة نسافر على الوحدة قتلوا ريزارفيت صاي .قالي ايه صاي . بكيت قتلوا منيش حباتك تروح وتخليني . قالي والله ما نطول بزاف سمانة ولازوج ونجي هيا امسحي دموعك علابالك منحبش نشوف دموعك . مسحت دموعي قالي وش نجيبلك معايا .هزيت كتافي قتلوا دبر راسك لي تعجبك جيبها المهم مطولش بزاف بصح نحبك توعدني بحاجة . قالي وش هيا  عينيا ليك .قتلوا اوعدني بلي عينيك لا تشوف منا ولا منا   .قالي بلا ما تحتاجي توصيني عمري ما نشوف في مرا من غيرك كوني متأكدة من هاد الشي . الغدوة وصلناه انا وعجوزتي للمطار زعما باه نودعوه درتلهم مندبة كبيرة عيا يسكتني بسيف باه سكتت هو ركب راح بعد ما وصاني الف مرة متخرجيش وحدك واشربي دواك وكي نعيط هزي عليا واقعدي عاقلة وبلا مشاكل وتبقاي عند يما متتحركيش من عندها . حتى من عجوزتي وصاها قالها عينيك عليها متخليهاش تخرج وحدها تحكماها عندك حتى نرجع وادا كشما صرا لا قدر الله تعيطوا لمحمد ولا باباها . بعد ما روحنا للدار فوتت سمانة عند عجوزتي مرضت غير راقدة وفشلانة مافهمتش وشبيا حتى عجوزتي عادت تقولي راكي رايفتي على آدم برك وكي تقولي نديك للطبيب نقولها لا غير الطبيب لي منروحلوش وادم كل عشيا يهدر معايا نسقسيه وقتاه ترجع يقولي مزال ما بان وقتاه بصح راني منطولش بزاف . قتلوا نروح عند ماما قالي لا تقعدي عند يماا حتى نرجع متتحركيش من بلاصتك . حتى وحد العشية وصلت حالة غير نبكي  حاسة بخنقة مش نورمال  حابة نخرج برة ، لبست حوايجي وخرجت عند عجوزتي شافتني قاتلي وين رايحة اريج قتلها راح نخرج ندور شوي ونرجع قاتلي وين تخرجي وش وصاك آدم . قتلها ونبقى محبوسة في دار علجال ولدك تخنقت يا ربي سيدي علاه ماراكمش حاسين بيا علاه دنيا تخرج تقرا وتحوس و هو لهيه عايش ويحوس وانا هنا غالق عليا الباب ما نخرج ما نتنفس .قاتلي الله يهديك برك وين تشوفي فيه يحوس مسكين وهو مشوطن مع الخدمة . قتلها مالا راح نروح عند ماما منبقاش هنا قاتلي علاه حتا تروحي  راكي قاعدة هنا لاباس عليك ولا حابة تروحي عند ماماك باه تلقاي راحتك وتخرجي كيما تحبي  دوك نعيطلوا نقولوا من بعد الله يسهل بيناتكم . منعرف علاه تقلقت وزعفت كي قلتلها نروح عند ماما . عيطتلوا نسمع فيها تحكيلوا بلي أنا مش حابة نبقى عندها وحابة نروح عند ماما . من بعد عطاتلي التلفون قاتلي هاكي اهدري معاه . دخلت للشمبرة هزيت التلفون غير شفتوا بكيت قتلوا وقتاه ترجع. قالي يا اريج والله غير حرت معاك راني قتلك والله ما نطول ونرجع علاه راكي ديريلي هكدا . سكتت قالي علاه راكي حابة  تروحي لداركم يما قلقاتك في حاجة ولا تعاركتي مع دنيا قولي الصح .درتلوا براسي لا قالي مالا علاه راكي مخلية بالي معاك وقلبي متحير عليك .قتلوا قلقت في دار حابة نخرج برة راني سمانتين ما خرجت ما عتبت الشارع بزاف ضاق خاطري في الدار وانت طولت  توحشتك .قالي والله ما فهمتك انا تحوسيني نبطل خدمتي ونجي ولا كيفاه يزي من الدلال اريج راكي زدتيلها  هادي سمانتين برك درتي حالة مخلتينيش حتى نقضي شاغالاتي في غرضي وش يقولوا ملا النسا لي رجالاتهم يروحوا عليهم بثلاثة شهر وعام ياك راهم حاملين ساكتين ، ولا راكي ديرلي فيها مكرة كي ماديتكش معايا ياك قتلك غير نرجع نخلفهالك غير خليني برك نركز في خدمتي . قتلوا هدا وش فهمت من هدرتي انت ، اوكي كيما تحب منزيدش نديرونجيك ولا نقلقك لا زدت عيطتلك منيش مرا ، ودوك نعيط لمحمد يجي يديني لدارنا .قالي تتحركي من بلاصتك تخلصيها غالية راني قتلك تبقاي عند يما حتى نرجع .قتلوا بسيف نقعد عند يماك يا دين الله منيش حابة نقعد عندها حابة نقعد في دارنا ودوك يجي محمد يديني . كوبيت عليه