حب في الثانوية

132

كنت حابة نعرف الحكاية كاملة قعدت فوق الطابلة قابلتوا قتلوا روح أهدر  راني نسمع فيك . قالي راكي متفكرة رندة  هديك الطفلة لي لقيناها في ريستورون . قتلوا ايه متفكرتها قالي  من ورا ما رجعنا من الفاكونس جات بدات تخدم عندي كيما قاع الخدامة بصح غلطتي كي كنت نميزها بحكم هيا نعرفها وكانت تقرا معايا ساعات كي تخرج روتار  نوصلها في طريق وساعات تجيني للبيرو على الخدمة تبقى تجبد معايا في الهدرة يمكن فهمت تصرفاتي معاها بالغالط  حتى بدات تخرج في الهدرة لصحاباتها لي يخدموا معاها بلي انا وياها في relation  بحكم هما يعرفوا بلي راني متزوج بيك ويعرفوك قالتلهم بلي راح نطلقك هادو لحكايات قاع سمعتهم السكرتيرا وجات قاتلي عليهم ، انا كي حكمتها وفهمتها حدها قاتلي بلي راهي عينها فيا ونورمال تقبل تكون دوزيام فام ولا حتى نتزوجها في السر  انا وقفتها عند حدها وجبدت روحي وليت نتعامل كيما قاع الخدامة لي عندي  بصح هيا لصقت فيا تاع الصح  قلقتني وصلت وين حدرتها مرة وزوج من بعد كي محبتش تفهم روحها  وليت حبستها من  الخدمة هكاك ومزالت كل يوم تعيطلي بنميرو من زي وليميساج محبتش تفهم مالقيت معاها حتى حل ومقدرتش ندير معاها حل مهما يصرا تبقى ولية منيش حاب نضرها صينو راني هدرت ديراكت مع والديها . قتلوا صاي كملت ومن بعد وش الفايدة كي سمعتك قول  زعما راك خاطي بصح انت لي عطيتيها وجه حتى لصقت فيك نقولك حاجة انت أصلا جاتك على قلبك وعاجبك الحال والبانيت تجري وراك وانت مديها في روحك . قالي اريج . وقفت  قتلوا لا اريج لا والوا غير أخطيني ومتزيدش تجي . ناض قالي الله يسهل عليك انتي لي حبيتي وبنتك انسايها تحلمي تشوفيها ادا حبيتي عليها راكي تعرفي الدار . خرج   جات ماما عندي قاتلي وش تفاهمتوا .قتلها متفهمناش ومش راح نرجع عندو . قاتلي علاه هدا الكل ياك جا حتى لعندك وش تحوسي اكثر انتي راه فسدك الدلال . قتلها ماما غير أخطيني مش بساهل ننسا وش عمل .حبت تفهم اكثر محبيتش نهدر ودخلت للشمبرة تاعي وقعدت السماطة تقتل والفت نجيب نهار كامل وانا لاهية مع ريتاج بففف ديچا بديت نتوحشها . الغدوة نضت لبست وخرجت ديراكسيو ديراكت لشريكة تاع آدم وصلت دخلت ديراكت طلعت عند سكرتيرة تاع آدم علابالي مكانوش حكيت معاها عاودتلي نفس الحكاية لي قالها لي آدم طمنتني اكثر ملقري علابالي ادم مكانش يكدب ، قلتلها مدتلي لادراس تاع الدار لي كاريتها شقيتلها غير طبطبت فتحت عليا عرفتني وجها تخطف منو اللون ، شفت معاها من فوق للتحت قتلها نورمالمو عرفتيني شكون انا راح نقولك زوج كلمات احفظيهم مليح راجلي تبعدي عليه  خاطر آدم تاعي وحدي ونقدر ندير  علاجالوا كلش  مالا اتقي شري خيرلك ، مش وحدة كيفك لي تجي وتخربلي داري . بدات تمهمه قاتلي انا خاطية هو لي . قتلها غير حبسي راني علابالي انتي لي تجري وراه كيما الكلبة  راجلي ونعرفوا بصح وش نتوقع من وحدة صوصيالة كيفك عايشة وحدها بصح يا ما فاتوا على علاقاتنا ناس كيفك هكدا يحبوا يخربوا بيناتنا بصح فوتناهم ولينا نتفكروهم ونضحكو عليهم ونقولك حاجة آدم يحبني  ويموت عليا يعشق التراب لي نمشي عليه عمرو ما يشوف في وحدة غيري ، زعما  من عقلك راح يخليني انا الزين والعين ولاطاي ويشوف فيك انتي والله لا ضحكتيني . مشيت وخليتها واقفة جامدة في بلاصتها بردت قلبي فيها متأكدة متزيدش أصلا تخمم فيه . رجعت للدار من وراها فوتت شهر في دارنا وواحد ما علابالو بمشكلتنا انا وادم ، ماما نهار كامل وهيا تسحت فيا روحي لدارك ارجعي لراجلك وبنتك حتى بابا وممحمد يقوليلي روحي لدارك وش مقعدك هنا ومطيشة بنتك مهملتها قولتهم حابة نقعد هنا فهموها بلي متعاركة مع آدم ومش حابة نهدر ، اما هو من نهار لي محبيتش نرجع معاه ومزادش جا عندي مرة على مرة يتطلب يقولي هيا ترجعي لدارك نقولوا لا ،  مزادش عيط حتى ريتاج ومزدتش شفتها مرة على مرة تبعثلي دنيا فوطواتها كبرت وعادت تشبهلي فوطوكوبي من غير شعرها كيما تاع آدم برك . كنت نفوت في وقتي غير مع القراية في النهار بصح في الليل نرقد نبات نحلم غير بريتاج تبكي عليا . حتى لنهار انا راقدة صونا تلفوني فتحت عينيا لقيتها زوج تاع الليل حرت شكون لي راح يعيطلي في هاد الوقت نضت جبت التلفون خاطر كان بعيد شفت لقيتوا آدم لي يعيط هزيت عليه ديراكت طاح عليا سبان وكفيرات مخلانيش حتى نهدر كلاني ماكلة وندير وندير فيك نفهمو والوا كوبيت عليه ديراكت يخاه وشبيه هدا ليل ليل ناضولوا جنونوا . عاود عيط زوج مرات مهزيتش المرة الثالثة هزيت عليه يهدر بالعياط قالي انتي مرا انتي عندك قلب ولا حجر ادا مكنتيش حابة تجيبيها علاه جبتيها ورميتيها بنتك مريضة في الموت شهر مسقسيتيش عليها وماقولتيش بنتي . تخلعت قتلوا وشبيها ريتاج وشبيها بنتي أهدر قالي دوك وين تفكرتي بنتك والله ما تزيدي تشوفي ضفرها ياك انتي لي سمحتي فيها ودخلتيها في مشاكلنا اصبري برك نفري مشاكلي ونقعدلك . وليت تبكي قتلوا وشبيها بنتي راني جاية عندها . قالي معندك وين تجي صاي انسايها ريتاج كيما كنتي ناسيتها ،عمري ما تخيلتك يكون قلبك قاسي هكدا انا على قد ما غلطتي في حقي عمري ما سمحت فيك وانتي علجال غالطة سمحتي فيا في بنتك بصح اشفاي عليها مليح مليح تخلصيها غالية . كوبا عليا بلا ما نفهم حتى وشبيها ريتاج. وزيد الحرقة لي كان يهدر بيها شعلت قلبي غاضني عندو الحق هو على قد ما غلطت معاه جامي سمح فيا في أي وقت نلقاه هو لول معايا  وغاضتني بنتي لي شهر ما شفتها . بكيت مخ راسي نعيطلوا نلقا تلفونوا مغلوق حتى عند دنيا وعجوزتي كيف كيف نلقاهم مغلوقين علابالي هو لي قالهم بلعاني . وليت لبست قشي وخرجت مشيت للشمبرة تاع محمد نقولوا يديني عندهم لازم نشوف بنتي وشبيها . طبطت عليه فتح الباب عينيه منفخين من النوم قالي اريج وشبيك نايضة.  قتلوا ريتاج مريضة اديني عندها . قالي بالعقل برك شكون لي قالك قتلوا آدم عيطلي قالي بصح مفهمت والو وكوبا عليا. قالي معليش نبدل قشي ونديك عندها متقلقيش روحك . شوي وخرج بعد ما بدل حوايجوا وخرجنا  ركبنا في طونوبيل عشر دقائق وصلنا لدار عجوزتي طبطبت واحد ما فتح عليا جبتها عشر دقائق وانا ومحمد  عند الباب واحد مافتح نعيط عند آدم تلفنوا فتحوا بصح ميهزش عليا عقل ما لقا في راسي عرفتها راه يديرلي فيها زكارة برك محبش يهز حتى عيطلوا محمد باه هز عليه نسمع فيه قالوا رانا في سبيطار رحنا للسبيطار دخلنا سقسينا ، لقيناهم كل ثما آدم وعجوزتي ودنيا . عجوزتي غير شافتني دورت وجها وادم جا عندي قالي انتي متحشميش بواش من وجه جاية قولي اصبري برك ترتاح بنتي كون منطلقش ونجيب لالاتك منيش آدم  . قالوا محمد آدم راني واقف أعرف ما تهدر  . قالوا محمد انت مدخلش روحك راني نهدر مع مرتي . قالوا ومرتك اختي ندخل روحي ونزيد . قتلوا آدم وشبيها ريتاج علاه راهي هنا وش صرالها ياك  خليتها عندك لاباس عليها. قالي متحوسيش تفهمي عليها ارجعي منين جيتي . قتلوا انطق علاه راك ديرلي هكدا وشبيها . نطقت عجوزتي من هيه قاتلوا كون عينك تعرفي راكي هويتي تلفون وسقسيتي عليها وانتي من رميتيها وصديتي لداركم متفكرتيش بنتك حتى لقطوط ولكلاب يحنو على ولادهم ويتفقدوهم وانتي لالا . قتلها شوفي ولدك وش دار تهدري عليا انا  . كي قلتلها هكدا نشوف غير في آدم تلاح فيا حكمني من الخمار ويجبد من الشعر قالي غالطة وتزيدي تشركي في فمك مع يما ليوم منخليش فيك عضمة صحيحة . حتى وقفلوا محمد في وجهو راح يتقابض هو ياه حتى خرج الطبيب.  راحلو آدم وانا وراه سقساه قالوا الطفلة عندها الربو وزيد عندها لانيمي طالعة لازم تكون في رعاية خاصة مع دوا وكل شهر  نديرولها التعييرات . غير راح الطبيب دخل عندها آدم هو لول من بعد انا وراه لقيتوا هازها في يدو يبوس فيها وهيا تشوف معاه وساكتة وهو يهدر معاها . ويقولها وشبيها الطبوزة تاعي مريضة دوك تبرى بنتي وترجع للدار . وهي تضحك معاه تقول عليها تفهم فيه كي شافني دخلت سكت قتلوا اعطيني نشوفها قالي مكانش . قتلوا آدم متزيدش عليا هاتها خلي نشوفها . يمكن غضتوا كي شافني نبكي مدهالي غير ما هزيتها ناضت تبكي فحمت راح طيح من يدي حتى حكمها هو عليا سكتت ديراكت . انا تشوكيت كيفاش نكرتني .