حب في الثانوية

chapitre 51

قعدت نستنى حتى الستة تاع الصباح طلع الضو لبست قشي والخمار . انا كملت سمعت الباب يصوني عرفتهم جاو ، خرجت نجري من الشمبرة  باه نهبط عندهم . لحق عليا آدم نفتح في الباب تاع الدار  . خزر معايا قالي عيطتي لباباك . قتلوا ايه راني عيطتلوا وراهو جا يديني . قالي والله شكون لي راح يخليك تروحي . قتلوا نروح بسيف عليك والله ما نقعد عندك .  راح وقفلي في الباب قالي املا على صحنية الوجه تاعك والله ما راكي خارجتها من هنا امشي ارجعي لبلاصتك  وباباك دوك نهبط نتفاهم معاه .قتلوا ما تفهمش انت قتلك منقعدش عندك طلقني نكرهك . جيت راح نبعدوا على الباب باه نخرج حكمني على يدي وقالي انتي وجهك صحيح تاع الصح قتلك مكانش خرجة . وليت نضرب فيه ونبكي قتلوا بعد  عليا نكرهك خليني نروح عن بابا والله  نطلق منك . حكملي يديا وقالي اركحي على الصباح تاع ربي لا نكسرلك وجهك . قتلوا قيسني تشوف والله ما نقعد هنا. بقيت غير نطير بين يديه ونضرب فيه  كركرني من يدي للشمبرة دخلني وخرج قفل عليا الباب بالمفتاح .وليت نخبط في الباب ونقولوا أفتح . قالي نتفاهم مع باباك ونرجعلك .سمعتوا خبط الباب وخرج من الدار . قعدت نخبط في الباب ونبكي حاسة عينيا راح يخرجوا من لبكا ، قلت ملا تقفل عليا الباب دوك تشوف وش ندير هزيت لقراعي تاع الريحة  ونرمي فيهم على المراية تاع الكوافاز  لمراية تاع الخزانة رجعتهم فتات الزجاج عاد في كل بلاصة . شفت الميكرو تاعو pc فوق طابل دو نوي هزيتو ورميتو على قوة جهدي حتى هو رجع فتات الخزانة كاملة هبطتها في الارض ، الفراش كيف كيف المهم ما خليت حتى حاجة تصلح في الشمبرة حبست غير كي حسيت روحي تعبت ، قعدت في الارض ورجعت نبكي بالصوت ونعيط على بابا وليت نرجف وحدي  على خاطر صح غاضتني منو  كيفاه ضربني حسيتو حڨرني والله ما نقعد عندو كون نعرفها نهرب وما نقعدش هنا . سمعتو فتح الباب شاف الشمبرة بقا حايرة . قالي وش درتي هكدا. مرجعتلوش وقفت راح نخرج حكمني قتلوا بعد عليا خليني. قالي وشبيه رب* انتي الصباح تاع ليوم تحبي  نضربك نفزدك . وليت نعيط  قتلوا ايه زيد اضربني صاي والفت عليا كون ما تضربنيش ما يبردش قلبك  بصح والله ما نقعد لك هنا . رجعت نبكي ، بقا يخزر معايا من بعد تحضني قتلو بعدني أخطيني  قالي صاي حبي اششش يزي راكي راح تضري روحك شوفي كيفاه ترجفي. قتلوا بعد عليا خليني نروح عند بابا.  قالي خلاص اهداي برك و من بعد نديك لباباك.  قتلوا لا نروح درك. قالي كيما تحب صغيرونة نتاعي امسحي دموعك وهيا نديك . خزرت معاه قتلوا صح . باسني على عينيا. قالي ايه صح هيا روحي اغسلي وجهك ، نبدل قشي ونديك .غسلت وجهي وخرجت لقيتو بدل قالي هيا هبطنا لقيت عجوزتي في  الصالة قاتلي اريج وين رايحة قتلها رايحة لدارنا . قاتلي بنتي العني الشيطان وتفاهموا بالعقل . سمعتوا قالها يما خليها ، شفتو غمزها مفهمتش علاه . 
ركبنا في الطونوبيل تكيت راسي على الكوسالة حاسة راسي فيه قنطار من البكا ، بقيت نتفرج من التاقة حتى غفيت . فطنت كي بقا ينوض فيا شفت لقيت روحي وصلنا للدار . قالي صحا النوم على صغيرونة تاعي . شنفت عليه قتلوا ما تهدرش معايا . ضحك وقالي خلاص اسيدي مانهدرش . جيت هابطة قالي حبسي . شفتوا جبد التلفون تاعي .قالي هاكي تلفونك كي نعيطلك تهزي فهمتي.  بقيت ساكتة قالي راني نهدر .قتلوا ايه قالي وهادوا الصوارد مصروفك قتلوا خلي برك  ما نحتاجش .قالي احكمي يا الله ما تقلقنيش .حكمتهم . قالي شوفي تحكمي الدار نسمع بيك خرجتي برة نقتلك تقعدي  عاقلة نهارين ونجي نروحك  .قتلوا ما نرجعش عندك طلقني . ضحك وقالي والله. قتلوا ايه طلقني صاي كرهتك ما بقيتش نحبك . باسني على خدي وقالي والله غير تحبيني وتموتي عليا . قتلوا هديك بكري درك كرهتك .ضحك وقالي ياعمري نتيا ، كيما وصيتك تحكمي الدار نلقاك خرجتي ما نتفاهمش معاك . جيت هابطة قالي حبسي . قتلوا وش ثاني قالي ما تبوسيش  حبيبك .قتلوا لا . قالي نورمال انا نبوسك  بقا يبوس فيا على وجهي . حط جبينو على جبيني وقالي راني نت*** عليك . ازربي اهبطي  قبل ما نرجعك .
هبطت دخلت للدار سلمت على ماما قتلها علاه روحتوا وخليتوني . قاتلي  آدم قالي راهي راقدة من بعد نجيبها . ديجا اسكتي برك  باباك راهو متحلف فيك هديك عملة ديريها اريج تكدبي على راجلك كون جا وحد اخر راهو طلقك ديراكت احمدي ربي كي ضربك برك . قتلها بصح . قاتلي لا بصح لا والوا يجي باباك يتفاهم معاك وغدوة ترجعي لدارك قتلها ما نرجعش عندوا راح نطلق .قاتلي اغلقي فمك عليا  وش من طلاق لي راكي تهدري عليه وانتي عندك شهرين من لي تزوجتي . وليت نبكي قتلها ماما راهو ضربني بالسبتة شوفي كيفاه زرقلي رجلي . قاتلي تستاهلي لاه كان في رحمة ربي وجا ضربك وحدو  راجل يحبك ويموت عليك يحوس غير على مصلحتك . انتي هيا لي كذبتي عليه وخرجني من وراه  ، علابالك هديك الطفلة لي كنتي تبعي فيها وتاخدي في رايها ولاية كاملة تعرفها بلي مش متربية ودير حوايج مش ملاح  تخلي حصلاتك معاها في كاش مشكل ولا دارتلك ديڨا مش تحصلي ساعتها . ياك وصاك قالك منسحقش صحبات من الجامعة علاه ما تخديش الراي انتي علاه  . قتلها انا المهم والله ما نرجع عندو . قاتلي نوضي من قدامي لا نكمل عليك انا انتي وجهك صحيح تاع الصح يجي باباك يتفاهم معاك .
دخلت للشمبرة تاعي ضربتها برقدة حتى للظهر . نضت صليت وتغدينا وعاودت رقدت ، حتى سمعت التلفون يصوني شفت لقيتو هو كوبيت عليه .ملڨري علابالي بلي انا لي  غالطة بصح مزال غايضتني منو كي ضربني .بقيت نهارين من يعيطلي نكوبي عليه ، بابا دارلي حالة قالي كيفاه ديري حاجة كيف هادي تزيدي تعاوديها انا لي نضربك مش هو .
في الليل على 12 بعثلي ميساج قالي اخرجيلي راني نستنى فيك . عيطتلوا قتلوا وش تسحق قالي راني قتلك اخرجي . قتلوا انت مهبول راهي 12وين نخرجلك .قالي هيا ارواحي برك ياك راكي معايا . قتلوا لا منخرجش كون يفيق بيا بابا يقتلني .ضحك وقالي يا بنتي راكي مرتي لاكان نسيتي،قتلوا  منعرف .قالي هيا برك والله تندمي كون ما تجيش. قتلوا اوك . قالي البسي سروال . حرت كيفاه قالي البسي سروال .قتلوا صح قالي ايه وهيا ازربي ماطوليش .قالوا اوك.لبست سروال تاع السبور بيه بالتريكو تاعو وصبات أبيض وخمار . خرجت بالعقل باه ميفيقوش بيا وقفلت الباب تاع الشمبرة ، انا وصلت الباب تاع برة شافتني ماما قاتلي وين رايحة . قتلها آدم يستنى فيا قالى اخرجيلي ، قاتلي ما صبرش حتى لغدوة جاي على 12تاع الليل ، قتلها نروح نشوفو وش يسحق ونرجع .قاتلي روحي ومطوليش راني نستنى فيك.
خرجت ركبت في الطموبيل . قدم باسني قالي واش حوال البطة تاعي .شنفت عليه و قتلوا لاباس ،  ضحك قالي لعميرة تاعي مزالت زعفانة  مني قتلوا ايه . قالي دوك نحيلك الزعاف.ديمارا ،سقسيتوا قتلوا وين رايحين قالي سوربريز راح تعجبك . مشينا وحد نص ساعة حتى حبس في بلاصة خالية كيما الجبل وحابسين فيها موطاوات بالانواع الكل   قتلوا وش لبلاصة هادي قالي اهبطي دوك تعرفي . هبطنا مشينا حتى وصلنا وين مڨارين الموطاوات les motocyclettes  قالي هيا خيري وحدة نركبوا فيها . ضحكت قتلوا صح .قالي ايه هيا خيري  . بقيت نشوف لقيت  ديجا كاين des couplesقاعدين  يخيرو . شفت وحد الموطو حمرة تهبل  حكمتلوا يدو قتلوا هادي نركبوا في هادي . قالي كيما يبغي حبيبي . راح عند الراجل لي حاكمهم خلصو وعطاه المفتاح . ورجع قالي ارواحي تركبي . طلعني ركبني قدامو قالي باه ما طيحيش وركب ورايا بدا يسوق ، انا المرة لولة كنت خايفة من بعد بدات عجبني كي بدا يزيد في الفيتاس ،قالي عجباتك قتلوا ايه عمري ما توقعت روحي نركب في موطو .باسني على رقبتي وقالي نحبك. قتلوا حتى انا نحبك . قتلوا دومي حابة نوقف ونفتح دارعيا  كيما نشوف في الافلام . ضحك وقالي هديك في الافلام كون ديريها صح طيحي على وجهك  . قتلوا خليني نجرب . قالي لا . بقيت نحاول فيه محبش جبناها ساعة وحنا ندورو روعة مع دنيا  ليل وظلمة  زيد لقينا  وحايد ولينا نتسابقو معاهم  . كي كملنا وجينا مروحين فتنا على البارك شفتوا . قتلوا دومي حبي هيا نلعبو في البارك قالي اواه راح الحال راهي الوحدة ونص .قتلوا هيا برك منطولوش ، بقيت نحاول فيه حتى قبل. دخلنا بقيت كل لعبة نشوفها نقولو نلعب فيها ، حتى وصلت وحد لعبة تهبل بصح تخوف قتلوا راح نلعب فيها قالي اواه هادي واعرة متقدريلهاش . قتلوا نورمال  هيا العب معايا. ركبنا فيها المرة لولة بدات تطلع بالعقل عجبني الحال كانو دايرين لغنا  جبدت تلفوني ونصور . حتى بدات تقوا لصقت في أدم قتلوا هيا نهبطوا بطلت مش حابة نلعب .ضحك وقالي صاي درك فات الوقت . بقات كل مرة تقوا وليت نعيط وهو يضحك نورمال . من بعد ولات تتقلب راسي لتحت ورجليا لفوق تحضنتو ولصقت فيه نبكي ونعيط قتلوا درك تهبطني  مدخلنيش فيك وهو يضحك وهاز التلفون يصور فينا فيديو سلفي ماجات كملت قلبي حسيتو خرج هبطت منها دايخة وهو حاكمني يضحك عليا قالي باه المرة الجاية تسمعي الكلمة قتلك راهي واعرة . قتلوا صاي تبت مبقيتش نعاود ، بقينا نتمشاو انا وياها حكمين في يدين بعضانا . شفت لي يبيعو في غزل البنات، جبدتو على يدو  قتلوا دومي اشريلي.  قالي ايه نشري لعمري . روحنا شرالي زوج وشرالي مستورة (مييس) المشوية . عطالي وحدة وحكملي الباقي . قالي هاتي نهزهملك مابين ما كليتي . لي جاست هادوا لي يديرهملي يخليني نزيد  نحبو اكثر . ركبنا في الطونوبيل مروحين هو يسوق وانا قاعدة ناكل في غزل البنات . نعست رقدت حتى حسيت بيه ينوض فيا قالي بطة حبي  نوضي رانا وصلنا . نضت قالي غدوة نجي نروحك .قتلوا ايه حتى انا توحشت داري . ضحك وقالي وانا متوحشتنيش . قتلوا توحشتك . قدم باسني وقالي هيا ملا غدوة راني نجي الصباح وجدي روحك .قتلوا ايه . بستوا على فموا قتلوا نحبك .قالي وانا نعشق فيك.