حب في الثانوية

120

هل في رايأكم تصرف يمات اريج كي ضربتها ا بالبليغة ننورمال ولا مش نورمال وكون جيتوا في بلاصة اريج وش تعملوا ، خلولي رأيكم في لي كومنتار ❤️

غير شاف حالة وجهي وقف وجا  عندي
حكملي وجهي يشوف فيه قالي شكون دارلك هكدا شكون ضربك . بعدتلوا يدو من وجهي قتلوا حتى واحد غير طحت برك . قالي تتمسخري كيفاش طحتي راهي ليطراس تاع ضربة . قتلوا ماما لي ضربتني رتحت دوك ياك هكدا كنت تحوس انت.  قالي وش قصدك ، كيفاش هكدا كنت نحوس قتلوا  ما نقصد والوا، هيا نروحوا . بقا يشوف معايا من بعد قالي هيا خرجنا لقينا محمد لبرة انا رحت ركبت في طونوبيل بعد ما سلمت عليه ، وهو بقا يهدر معاه من بعد طلت عليه ماما من الباب منعرف حتى هيا وش قعدت تهدر معاه ، شوي وجا ركب . ديمارا يسوق وانا مدورة راسي نتفرج من التاقة ، حتى حسيت بيدو تمسلي في بلاصة الضربة تلفتلوا قالي توجع فيك. درتلوا براسي لا وعاودت دورت نتفرج من التاقة مانيش حابة نهدر حابة غير نوصل للدار ونقعد وحدي . حتى هو فهم روحوا مزادش هدر غير وصلت للدار دخلت للشمبرة نبدل حوايجي لحقني لقاني غيرر كيما نحيت الحجاب بقا يثبت مع ليطراس تاع ضربات لي في زنودي وفي فخضي بصح ما قال والوا قالي راني رايح نخدم كشما تحتاجي عيطي  درتلوا براسي ايه . عاود خرج وانا ديراكت حكمت الفراش ورقدت بعد ما غلقت كلشي ، بدا عقلي يخدم خممت في كلشي الافكار السلبية ڨاع جاو في مخي حتى رقدت .كي نضت شميت ديراكت ريحة دخان حرت من جات شفت الساعة لقيتها الستة تاع العشية عرفتوا يكون هو  جا وراه قاعد يتكيف.  لبست روبة خفيفة قصيرة وخرجت  لقيتوا قاعد في الصالة حاط البيتزا فوق الطابلة ياكل منها و تلفون في يدو يكونكتي . مهدرتش معاه غسلت و دخلت للكوزينة نطيب حاجة ناكلها من البارح في الغدا ما كليت والوا راح نموت بالشر . قليت فريت  وفلفل ودرت مقرونة بالبشاميل سخفت عليها وعصرت القارص خدمت الشربات كشما تنقص عليا المرض . دخل عليا للكوزينة لقاني واقفة مع البوتاجي نطيب ونقطر بالعرق حتى شعري عاد مشمخ . بقا يشوف معايا قالي علاه راكي عرقانة هكدا ووجهك احمر  . قتلوا من السخانة .قالي بصح  مكانش سخانة بزاف . قدملي حط يديه على خدودي  وشواربوا على جبيني  قالي راكي مسخنة بزاف . قتلوا نورمال من la grippe دوك تهبط وحدها كيما موالفة .  مسحلي وجهي بيديه . قالي علاه موالفة تطلعك الحمة كل يوم هكدا . قتلوا لا عندها بلاك ثلاث ايام تطلع وتهبط وحدها . قالي نشوفوا من هنا لمبعد ادا مهبطتش نديك للسبيطار خير .هزيت كتافي قتلوا كيما تحب ودرت كملت نطيب وهو واقف ورايا قالي باه ضرباتك يماك حتى خلاتلك ليطراس هكدا قتلوا بالبليغة تاع نيلوا . قالي راني جبتلك بومادة  قبل ما ترقدي ادهنيها باه يروحولك . درتلوا براسي ايه . خرج كملت طيبت وحطيت فوق الطابلة في الكوزينة كنت جيعانة ميتة غير قعدت باه نبدا ناكل راحتلي الشهية وحدها ، بقيت نخزر في الماكلة وحاطة يدي على خدي وليت نضت هزيت كلش وحطيتوا في الفريجيدار ورجعت للشمبرة نكمل رقادي ، غير غمضت عينيا لا عرفت روحي راني راقدة ولا راني نايضة كنت نوم بلي ماما مزالت تضرب فيا وانا نعيط ماما .فقت غير وقت عنقني هو فتحت عينيا قالي خلاص عمري راكي غير تنومي استغفري  شفت معاه قالي شش صاي مكاين والوا علاه الدموع . هز يدو يمسحلي في دموعي . رجعت عنقتوا نبكي من قلبي وهو يسكت فيا مقدرتش نسكت تقول كنت نستنى فيه غير يعنقني حتى نشكيلوا ونبكي في حضنوا بقا يمسحلي على شعري بيديه وبقا  يهمسلي في  وذني قالي حبيبي حياتي انتي عمري وعينيا بنتي ودنيتي انتي شحال عندي من اريج انا عندي  غير انتي تسواي عندي بالدنيا كاملة   . هدرتوا كانت تفوت من وذني ديراكت لقلبي خلاتني تلقائيا نفتحلوا قلبي نطقت وانا نبكي بالشهقة داخلة في حضنوا   .قتلوا ماما تكرهني . قالي شششش متقوليش هكدا .قتلوا ماما تكرهني ضربتني وانا مريضة وليلة كاملة ماجتش تشوفني  ادا راني حية ولا ميتة  . بقيت غير نشهق من البكا قالي خلاص عمري راكي غير تنضري من البكا .  قتلوا بقيت ليلة كاملة وانا موجوعة وماجتش حتى طلت عليا ، بصح علابالي بيها  أصلا تحب غير محمد وانا حابة غير تتهنى مني والله مانزيدش نروح عندهم  من اليوم تنسا بلي عندها طفلة اسمها اريج . بقيت هكدا دموع ورا دموع مقدرتش نحبس حتى  حكمتني الرعد ة تاع الحمة وليت نترعد وحدي .  حط يدو على جبيني  قالي  راهي زادت  طلعتلك الحمة والله انتي حابة تهلكي روحك  نوضي نديك للسبيطار  . لبسني حجابي بالخف وداني للسبيطار ، كي وصلت قاتلوا  الطبيبة  لازم  نديرلها ليزاناليز تاع  الدم باه نعرفوا من واه راهي تطلعلها السخانة راهي ديجا جاتني زوج مرات ورا بعضاهم سير كاين حاجة مش من la grippe  . بعد ما داو مني الدم قعدوني في شومبرة حتى يخرجو لي زاناليز .  قعد يمسحلي في العرق من وجهي قالي متبقايش تخممي هكدا حتى تصرا فيك حاجة ديجا شوفي حالتك ماراهيش تعجب ڨاع خليتك كي الوردة رجعت لقيتك في حالة . رجعت الطبيبة عندي فرحانة وتبسيمة في وجها من وذن لوذن قاتلي مبروك عليكم هدا  غير البيبي لي يديرلك في الحمة راهو يقولك ماما راني هنا . آدم شاف معايا حاير وضحك الفرحة راح تخرج من عينيه قالها راكي تهدري صح . قاتلوا بيان سير راني متأكدة 100 بال100 وهاوليك ليزاناليز زيد اقراهم بعينك باه تتأكد . انا كي قاتلي محسيت حتى شعور لا فرحت لا ما فرحتش تقول ماراهيش تهدر عليا غير آدم نشوف فيه قريب شوي ينوض يسوطي من الفرحة . دارتلي الايكو قاتلي كلش عندك ممتاز البيبي عندو شهرين ونص . عطاتني دوا وخرجت جا عندي آدم عنقني فرحان قريب راح يطير قالي مبروك علينا .  كي شافني ساكتة ومنيش معاه ڨاع قالي وشبيك مراكيش فرحانة  . قتلوا لا راني فرحانة غير تعبانة برك هدا ماكان . بقا يشوف معايا بشك مش مصدقني وعندو الحق مكنتش فرحانة منعرف علاه .