حب في الثانوية

chapitre 37

جبتها 15 يوم  كاملة في السبيطار دخلت في اكتآب من نفيق وانا نبكي حتى الليل حالتي غير تسوء نقعد في الليل نبكي حتى   تجي الطبيبة ديرلي ابرا ترقدني بيها ، ماما  ديما عندي ، حتى بابا هز كونجي وقعد معايا ، نقعد نتفكر ذكرياتي معاه ونبكي كيفاه راح نقدر نعيش بلا ما نشوفو . كنت غير في العطلة تاع سمانتين منقدرش نصبر عليه ونقعد نحسب في الايام باه ترجع لقراية ونشوفوا ودرك  كيفاه راح نصبر 4ولا5سنين هدا ادا رجع وما قعدش لهيه  .
قاتلي الطبيبة ادا قعدتي في الحالة هادي راح تبقاي هنا في السبيطار ، و ساعات تقعد تسقسي فيا على الشي لي خلاني نوصل للحالة هادي وتقولي وش الحاجة لي تخلي طفلة في عمرها 16 توصل للحالة هادي .  بصح انا نقعد ساكتة ما نجاوبهاش . ماما وبابا جامي لا سقساوني ولا قالولي علاه راكي  تبكي ، كانت ماما من تشوفني نبكي تجي تتحضني وتبقا تهدي فيا وساعات تقرا القران حتى نهدا وحدي  ونرقد ، وبابا كي يشوفني نبكي يتنهد ويستغفر ،  يحب غير يخرجني من الحالة لي راني فيها  ويقعد يلحلح و يضحك فيا باه ننسى  ، ساعات نحس بلي علابالهم بالشي لي راني نعاني منوا ، بصح وقفوا معايا هادا وين حسيت بالنعمة كي يكون عندك والديك واقفين معاك الحمد الله ياربي   .
جلال وشروق كل يوم عندي ملڨري بابا ومحمد كي شافوا  جلال المرة لولة معجبهمش الحال بصح كي شافوني نفرح كي نشوفهم سكتوا  . جابتلي شروق الصاشي  لي عطاتهولي دنيا وقاتلي هدا كنتي هزاتوا نهار لي دختي  ، قتلها مرسي . في الليل  كي خرجوا كل من عندي وقعدت وحدي جبدت هديك الصاشي وحليتها لقيت فيها باطة صغيرة . هزيتها ويديا يرجفوا هدا أخر شي من عند ادم زعما وش راح يكون فيها هاد لباطة . فتحتها وانا  دموعي يسيحوا لقيت فيها سنسلة  رقيقة صفرة باينة تاع دهب ومكتوب فيها كلمة ريجا بالعربية وفيها حجر بيض . كي شفتها مقدرتش رجعت نبكي بالصوت ونقول علاش مخلانيش حتى نودعوا ولا نشوفوا آخر مرة علاش . بقيت نبكي حتى جات الطبيبة دارتلي أبرا رقدت .

غدوة الصباح فقت شفت مع السنسلة لي في يدي بستها ومن بعد لبستها في رقبتي وحطيتها تحت تريكو باه ما تشفهاش ماما وتقعد تسقسي فيا من جبتها . قعدت  نخمم وقلت لوقتاه راح نقعد في الحالة هادي لازم عليا نرتاح ونخرج من هنا وننسا ونكمل حياتي بصح انا آدم عمري لا ننساه نقعد نستناه حتى يرجع حتى لوكان بعد 20سنة ، آدم حب حياتي راح نبقى نحبو حتى الموت .
جاتني ماما فرحت كي شافتني تحسنت ومش قاعدة نبكي ونحكي معها نورمال ، قتلها ماما حابة نخرج من هنا ، قاتلي الطبيبة قالت نهارين  وتخرجي . وصح نهارين وخرجت ،  كنا صاي دينا عطلة تاع الصيف وخرجو نتائج جيت لولة فرحت بزاف . بابا قالي هيا لبلاصة لي تحبيها نديك تحوسي فيها . قتلهم حابة نرجع نحوس في تونس . رحنا المرة هادي الكل كرينا دار بحدا البحر وجبناهاشهر وحنا لتم صح بدلت الجو وبديت نتأقلم مع الوضع بصح مقدرتش نحي آدم من راسي ، غير نحكم بلاصتي في ليل نقعد نخمم فيه ونتفكر فيه حتى نرقد .
رجعنا لدزاير و خطرا كنا انا وماما في سونتر فيل  قاتلي ماما انا ندخل نشري من حانوت وانتي استنايني هنا على الغاشي . هي دخلت وانا قعدت نستنى فيها في الباب ، حتى لقيت مرا حكمتني على يدي . درت لقيتها ام  آدم ، سلمت عليها قتلها طاطا لباس ، قاتلي لباس انتي وش راكي سمعت بيك بلي مرضتي وكنتي في السبيطار .  قتلها ايه الحمد الله على كل حال . قاتلي جيتكم لدار نطل عليك  انا ودنيا قالولي الجيران بلي مسافرين قتلها ايه كنا في تونس .حبيت نسقسيها على آدم على الأقل نسمع اخباروا ، قتلها دنيا لباس . ضحكت وقاتلي لباس الكل لباس انتي برك تهلاي  روحك و في صحتك ، حسيتها فهمتي بلي راني نسقسي على آدم  حشمتني  . ومن بعد تنهدت وقاتلي ساعات الواحد ياخد قرارات ويدير حوايج يندم عليهم ، مفهمتش وش تقصد بهدرتها قتلها مفهمتكش ، مسحتلي على راسي وقاتلي يجي نهار وتفهمي كلش ،قاتلي هيا انا نخليك تهلاي في روحك وسلميلي على ماماك قتلها يوصل ان شاء الله في أمان الله . راحت وانا قعدت نخمم في هدرتها وش تقصد بيها ومن بعد قلت باينة راهي غير تخرط.
فضت العطلة تاع الصيف وجات الدخلة قتلهم حابة ندير الخمار  ، قالي بابا مزلتي صغيرة زيدي شوي وديريه . قتلهم صاي راني حابة نديرو راني مقتنعة بيه ، قالي ملا ربي يسهل بالستر ان شاء الله .
صباح رحت نقرى لبست ليكات طويلة فايتة الركبة لونها غوز مع سروال ودرت الخمار . مع دخلت لليسي حسيت حاجة مبدلة مكانش نفس الشغف لي موالفة نجي نقرى بيه العام لي فات ، خزرت في البلاصة لي ديما كنت نلقاه فيها مكانش  هنا عرفت صح بلي آدم مبقيتش نشوفو . بقات  الناس الكل تباركلي على الخمار وفرحوا بيا ، قلت في قلبي كون جا هنا حتى هو  يفرح بيا ويباركلي. لي يشوفني يقولي وليتي بالخمار احلى من قبل نورلك وجهك .
ولات دنيا تقرى معايا ورجعت صحبتنا انا وشروق ولازم معانا جلال ، عرفت من دنيا بلي آدم بطل الخطبة مع شهرة قبل ما يسافر فرحت بصح قلت وش الفايدة ادا هو مكانش هنا .
فض الثلاثي لول وانا كل يوم نستنى في آدم يرجع كل صباح نقول بلاك ليوم يرجع . خرجت النتيجة ديت 17 وجيت لولة دارولنا حفلة تاع تكريم ، قتلهم ما نروحش. بقات ماما تحاول فيا قتلها منروحش ، قاتلي اريج صاي انساي وعيشي حياتك راح تغبني  روحك وانتي صغيرة قتلها وش تقصدي بانساي ، قاتلي لاه تحسابيني معلاباليش بالسباب الحالة تاعك هادي آدم صاي سافر وعايش حياتو مش راح يرجع ، بركات ما تعدبي في روحك عليه وهو مش سامع بيك . قتلها مننساهش سمعتي ماننساهاش نقعد نستناه حتى يرجع لآخر يوم في عمري . قاتلي وادا رجع متزوج وش راح ديري راح تكوني خسرتي حياتك في الباطل قتلها نورمال نقولوا اديني مرا ثانية نورمال مهم نولي معاه . قاتلي انتي هبلتي تاع الصح ، ادا ما عدلتيش روحك نقول لباباك وهو يتفاهم معاك . خرجت و خلاتني نبكي على زهري .