حب في الثانوية

chapitre 💯

وقت فقت المرة الثانية كان الليل بصح لقيتهم كل  قاعدين بجنبي ماما بابا محمد ، غير شافوني فتحت عينيا ناضوا كل يحمدوا في  ربي ويحتضنوا فيا مكنتش نتوقع ردة فعلهم راح تكون هكدا . قاتلي ماما الحمد الله يا ربي خمس شهر وكبدتي مشوية عليك كل يوم نقول يا ربي راني خايفة لا يجيني خبرها ولا تبقى طول حياتها هكدا لا راهي حية لا راهي مية ، علاه درتي فينا هكدا علاه قهرتينا عليك بنتي هكدا راكي سامحة فينا وفي عمرك لي مازلتي ما عشتي منو والوا ، قالها محمد يما مش وقتها هاد الهدرة شوفي راهي قدامك الحمد الله لباس عليها . نطقت بسيف قتلها ماما قاتلي يا حبيبة ماماها كشما خص بنتي .قتلها علاه قلتي خمس شهر . قاتلي اه يابنتي انتي عندك خمس شهر في غيبوبة مفقتيش تشوينا عليك كل يوم نستناو تفيقي بصح والوا حتى صباح باه قالنا آدم بلي فقتي شوي ورجعتي رقدتي . غمضت عينيا نحاول نتففكر حاجة من لخمس شعر لي فاتوا بصح والو نتفكر غير كي شربت الدوا وصاي . قتلها ماما اعطيني مراية . هزتلي لمراية باه نشوف روحي فيها غير شفت روحي تخلعت هادي انا مستحيل نكون انا وجهي شاحب بلا حتى لون ، عينيا ذابلين ، شعري نصو طاح ولونوا رجع كيما بكري ، كي شافتني ماما نشوف مع روحي وحايرة قاتلي متخمميش غير ترتاحي ترجعي كيما بكري وخيرمن بكري ، قتلها ان شاء الله . دخلت الفرملية قالتلهم فض وقت الزيارة .. وقفوا باه يخرجوا قتلهم متروحوش وتخلوني . قاتلي الفرملية انا نبقى معاك . قتلها مهاني ماما تبقى معايا . حكمت يدها قتلها ماما متروحيش وتخليني وحدي .خزرت مع الفرملية قالتلها خلي نبقا معاها برك راكي تشوفي فيها حابتني نبقى معاها .قالتلها الفرملية بصح مدام مدبيك ما تقلقيهاش خليها تريح اوكي . قالتلها ماما ايه . خزرت مع بابا ومحمد شفت محمد كي شفت معاه مهبط راسوا وغير ساكت وهادي مش عادتوا ، تفكرت وش صرا بيناتنا آخر مرة يمكن على هديك مش حاب يهدر معايا زعما مزال متغشش. مني غدوة ادا رجع نهدر معاه . خرجوا بعد ما بقاوني انا وماما بالسلامة راحت ماما للتوالات بقيت وحدي نخمم حتى رجعت ماما قعدت بجنبي تبوس فيا قاتلي متعرفيش قداش توحشت يا بنتي والله حياتنا ما بقات حياة من نهار لي دخلني للسبيطار ،الضحكة مدخلتش للدار سيرتوا باباك مسكين يضل يبكي ويقولي مشبعتش من بنتي وراهي  بين لحيات و الموت  ، غير ترجعلي نديرلها الحاجة لي باغيتها كون تطلبني في عينيا نمدهملها . قتلها راني رجعت يا ماما رجعت . وليت نبكي كيفاش قدرت نمرمدهم معايا هكدا مهما صرا ماكانش عليا ندير لي درتوا كيفاه قدرت نوجعهم هكدا ، هاد الحاجة لي درتها راح تبقا بصمة سودة في حياتي محال ننساها . قاتلي ماما يزي بنتي متبكيش الناس كل تغلط والشيطان الله يلعنوا ويخزيه هو السبب اطلبي السماح و المغفرة من ربي سبحانو يغفرلك ويسامحك ومتزيديش تعاودي فعلتك هادي،  نفسك عليك حق وراح تتعاقبي عليها يوم القيامة مهما يصرا مع الانسان لازم يصبر هدا امتحان من عند ربي باه يشوف ايمانك وانتي كان ايمانك ضعيف بصح معليش الناس كل تغلط وانتي صغيرة واللحمد الله يا ربي خرجتي منها سالمة  غانمة . سكتت شوي بقيت نشوف مع ماما . قاتلي اريج بنتي اهدري وش كاين كلام في فمك . قتلها ماما آدم . ضحكت ماما قاتلي كون مسقسيتينيش عليه كنت راح نقول هادي ماشي بنتي اريج . تبسمت قاتلي يا بنتي وش نقولك وش نخلي راني في عمري خمس وخمسين سنة جامي شفت واحد كيفوا ربي يحفظوا لميمتوا ويخليه لشبابوا وقف معانا وقفة رجال ، تبسمت وهبطت راسي حكمتلي يدي قاتلي اريج آدم يحبك ويعشق فيك متفرطيش فيه متخليش واحد كيفوا يروح من بين يديك راكي متزيديش تلقاي واحد يحبك قدوا هو صح غلط معاك  ومننكرش بلي انتي ثاني غلطتي  في حقوا بزاف بصح متخليهش يروح من بين يديك راهوا معدنوا اصيل وولد أصل  ويحبك من لي دخلتي للسبيطار وهو هنا معاك نهار ما خلاك كنت وقت نجي الصباح نلقاه ديجا سبقني وجا قبلي تهلا فيك نضفلك ومسحلك ومشطلك شعرك كنت نبقى حايرة فيه لهاد الدرجة يحبك حتى يجي كل يوم قبل ما يروح للخدمة باه يشوفك ويطمن عليك ويتهلاى فيك . قتلها بصح شوفي ما جاش باه يشوفني . قاتلي ما جاش خاطر حنا جينا هو حاب تكونوا وحدكم . قتلها صح ؟؟؟. قاتلي ايه انا هكدا بانتلي غدوة ان شاء الله يجي عندك . قتلها أن شاء الله.ضحكت قاتلي توحشتيه. قتلها بزاف ماما بزاف .