حب في الثانوية

chapitre 53

فات شهر رجعت نقرى بصح قطعت علاقتي بالطفلة لي تعرف عليها ، كنت نبقى غير وحدي ، تعلمت درس اني ما ندير  ثيقة في حتى واحد  على خاطر المظاهر خداعة قادر واحد تشوفوا عاقل وناس ملاح وهو يخطط كيفاه يأذيك  .
روحت من لقراية دخلت عند عجوزتي لقيت معها مرت عم آدم المتوسط سلمت عليهاوقعدت معاهم قالتنا راني جيت نعرض فيكم العرس بنتي وداد ادا كتب ربي قلتلها عجوزتي بالبراكة ان شاء الله . قلتلها ان شاء الله بصح  كيما تعرفي انا معنديش. ولد يوقف في العرس وباباها شوي مريض ميقدرش للعرس وحدو ، جيت قاصدة آدم يوقف مع بنت عمو ويقوم بالعرس . قالتها عجوزتي بلا ما تقولي راهم كيف الخاوة ولازم يوقف مع عمو . قالتلها ملا تجيو تقعدو عندي السمانة تاع العرس علابالي الحال بعيد عليكم باه تروحو وترجعوا . قالتها عجوزتي ما يكون غير خاطرك ولعشا تاع العرس كادو من عندي . فرحت مرت عمو وقالتلها يكثر خيرك ربي يفرحك بحفيد يعمر عليك الدار .قالتلها عجوزتي من فمك لربي ان شاء الله .خزرت معايا وقاتلي اريج انتي ثاني راكي معروضة ، عندك لا ماتجيش . قالتلها عجوزتي ما تخافيش نجيبها معايا .
وجدنا رواحنا باه نروحوا ، انا وجدت زوج فاليزات تاع قش على خاطر راح نقعدوا سمانة عندهم وحدة فيها جبات وڨنادر تاع الدار . ووحدة قشي تاع العراس .
رحنا مع وصلنا عندهم لقينا الحالة مهولة غاشي كبير عندها ،لافامي تاعهم كل لثم ، دخلنا الحق فرحوا بيا رحبوا بينا قعدنا في الصالة وكل مرة تجي وحدة تسلم عليا وتقولي انتي هي مرت آدم ، شفت هديك كوثر ثاني لثم خزرت معايا ودورت وجها محبتش تسلم عليا ، قلت في قلبي تهنيا حتى انا مش حابة نسلم عليها.
جاتني طفلة صغيرة قاتلي طاطا اريج راه يعيطلك عمو آدم ، قتلها وين راه قاتلي راه واقف في الكلوار . خرجت من الصالة للكلوار لقيتو واقف روحتلوا قالي اسمعي نوصيك الخمار ما يتنحاش من راسك ، تحكمي بلاصتك بحدا يما وين تروح تروحي معاها نلقاك هدرتي مع واحد من ولاد عمومي ولا قعدتي معاهم في نفس لبلاصة   تموتي . قتلوا ايه علابالي  . قالي ملا هيا من بعد راني نعيطلك تلفونك يقعد في يدك .باسني وخرج جيت راح نرجع لصالة هبط  من دروج ولد عم آدم هداك لي إسموا كريم شافني قالي اريج لاباس . قتلوا لاباس قالي ياك مزلتي متفكرتني . قتلوا ايه ، اسمحلي رايحة. قالي سماح رانا مزلنا نتلاقاو انا وياك قعدت نخزر معاه هدرتو وسوسوتني وشبيه هدا حتى خزرة تاعو مش نورمال دخلت للصالة وخليتو واقف . دار عمو هادي كبيرة عطاولي شومبرة انا وعجوزتي برك ، حطينا فيها قشنا . انا بدلت لبست جبة مستورة بالدراعين وخمار . درت شوي مكياج وخرجت لقيتهم الكل متلمين في الكوزينة يديرو في العشا . قتلهم أعطوني نعاونكم ،قالولي خلي برك راكي تعبانة من الطريق  . قلتلهم لالا مش تعبانة أعطوني نعاونكم خير ما نبقى قاعدة برك. قالولي ملا اغسلي السلاطة وقفت في البوتاجي نغسل فيها وهديك كوثر قاعدة مع البنات في الطابلة وكل وحدة حاكمة حاجة دير فيها . حتى نطقت قالت لبنت عمها صغيرة كي يدخل  آدم قوليلي نحتاجو  . درت خزرت معاها وقتلها وش تحتاجي من آدم . قاتلي حاجة بيني وبينو  . ضحكت وقتلها والله ،وش هاد الحاجة لي بينك وبين راجلي   .قاتلي راني قتلك حاجة بيني وبين ولد عمي  مش لازم تعرفي  .  حطيت يدي على جنبي وقتلها راكي تهدري على راجلي حبيبتي . قاتلي وانا ولد عمي . جاتني بنت عمو لكبير قاتلي اخطيك منها راهي حابة تقلقك . سكتت كملت شغلي ورحت قعدت في الصالة مع عجوزتي . تفكرت بلي نسيت التلفون تاعي في الكوزينة خرجت مع دخلت لقيت أدم واقف مع هادي كوثر انا شفتهم عقل ما قعد في راسي هادي ثاني مرة نلقاهم مع بعضاهم وحدهم . قتلوا أدم راك هنا قالي جيت نحوس عليك قدمت بستوا على خدو قدامها قتلو  كنت في الصالة . خزرت معاها  قتلها اسمعي انتي نخرجلك بيها ديراكت  آخر مرة نلقاك واقفة مع راجلي فهمتي .قالي اريج . ضحكت وقاتلي وشبيك تاكلي في روحك راني غير كنت نحتاجو برك .قتلها ايه  ناكل روحي   ونزيد نلقاك تحكي معاه نفزدك فهمتي . جبدني من يدي قالي اريج وشبيك هبلتي . قتلوا ايه هبلت هاد الطفلة  منحبهاش تزيد تحكي معاك cvهك . ولات تبكي وتستت قدامو قاتلو شفت مرتك كيفاه تحكي معايا . وخرجت تبكي  . قالي وشبيه رب# انتي كيفاه تحكي معاها هكدا .قتلوا واش غضاتك حبيبتك لقديمة . قالي وش قاعدة تخلطي انتي . قتلوا صار راني نخلط، تحسابني معلاباليش بلي كنتوا مع بعضاكم en couple . قالي شكون لي قلك . قتلوا ما يهمش شكون لي قالي المهم علابالي ، بصح دير في بالك نزيد نلقاها تهدر معاك نفزدها . خرجت وخليتو ورجعت للصالة بقا يعيطلي والله ما هزيت عليه . قاتلي عجوزتي راجلك يعيطلك قتلها أخطيني منو قاتلي وشبيكم ثاني تعاركتوا  قتلها لا بصح مش حابة نحكي معاه . شفت كوثر جات قعدت مقابلتني حطت رجل على رجل وتخزر معايا تمكر  فيا ، انا وليت نشوف فيها قرد قدامي حابتها غير تغلط معايا والله واحد ما يفكها من يدي .  
وصل وقت السهرة جاو الجيران وحطو لغنا طلعت للشمبرة بدلت لبست قندورة سير طاي مشقوقة من الجناب حتى للركبة  وبلا دراعين جبدت وليسيت  شعري وطلقتو عاد يوصل حتى لفخدي درت مكياج كامل ولبست دهبي  مع الطالوا ، حطيت الخمار على راسي وكتافي  وهبطت لقيت الصالة ديجا تعمرت بالنسا . دخلت قعدت بجنب عجوزتي ونحيت الخمار  نطقت مرا قالتلها هادي بنتك قالتها لا كنتي مرت ولدي . قالتلها الله يبارك تهبل ، ادا عندها اختها نخطبها لولدي . قالتلها عجوزتي زهرك راهي طفلة وحدة عند والديها  . قالتلها لمرا خسارة . هك شوي حطوا لغنا تاع لفقايرات العنابية . قاتلي عجوزتي اريج نوضي اشطحي .قتلها والله ماهي نافحتلي . بقيت قاعدة حتى شفت كوثر دخلت قعدت حتى هيا كانت تبدل .انا شفتها قلت والله نوض نشطح مكرة فيها . هزيت الخمار تحزمت بيه وفي زهري حطو لغناية تاع حبيتو كمل  بيا مكرة في ليهدرو فيا وعجوزتي تفرح بيا الحنة حمرة في يديا . وانا نموت عليها هاد لغناية  عطيتها شطحة من قلبي ونغني مع لغناية مكرة فيها  ونسا يسفقولي قعدو كل غير انا في نص نشطح وعجوزتي تزغرت فرحانة و من بعد ناضت  تشطح معايا . المهم امبيونس كبيرة ، نشوف في كوثر راح تطرطق من الغيرة .
كي قعدت قاتلي عجوزتي الله يبارك على مرت ولدي ليوم يصيبوك بالعين . ضحكت وقتلها لاه حتى يصيبوني بالعين .قاتلي شوفي كيفاه يخزرو معاك راح ياكلوك بعينيهم متزديش تزوقي روحك  هكدا ناس راهي على ضحكتك وتحسدك . قتلها معليش ، راني رايحة التوالات احكمي تلفوني عندك .قاتلي ايه .درت خماري سترت روحي وخرجت . فتت للكلوار تاع الدوش راح ندخل حسيت يد حكمتني على دراعي درت نشوف شكون لقيتوا ولد عم ادم كريم . تخلعت قتلوا  نحي يدك  وشبيك هبلت . قالي ايه هبلت من لي شفتك لا ليلي ليل ولا نهار نهار غير نخمم فيك . انا حسيت قلبي طاح في الارض بقيت نشوف منا ومنا خايفة يكون واحد سمع كلاموا   . قتلوا انت ما تحشمش وش هاد الهدرة لي راك تهدر فيها راني مرت ولد عمك لكان نسيت يا وحد رخيس . قالي الله غالب حبيتك من اول نهار شفتك . قتلوا تحبك عقرب ان شاء الله ياوحد ديوث . وخليتو ومشيت . سمعتو ضحك و قالي نورمال من عندك كي لعسل بصح مصيرك تكوني ليا ليوم ولا غدوة . درتلوا بزقتلوا في وجهو قتلوا نجوم السما اقربلك مني تزيد دور جيهتي تندم فهمت . رجعت للصالة وانا نرجف حاسة قلبي راح يحبس من الخلعة عمري ما توقعت روحي نتحط في موقف كيف هدا كون يسمع أدم يباصي علينا في زوج والله يقتلنا .
خزرت معايا عجوزتي قاتلي وشبيه وجهك أصفر . قتلها والوا عييت برك  . قاتلي اطلعي للشمبرة ارقدي . خفت لا نزيد نخرج نطيح فيه .قتلها خلي برك من بعد نطلع معاك .
صونا التلفون تاعي هزيت لقيتوا أدم قالي اخرجي راني نستني فيك في الكلوار . خرجتلوا لقيتوا واقف باين من وجهوا متقلق  رحتلوا ، خزر معايا قالي علاه من قبيل وانا نعيطلك ماتهزيش .بقيت ساكتة قالي تزيد تعاوديها نكسرك فهمتي . قتلوا ايه .وانا مش حتى نسمع فيه راني  نخمم في الموصيبة لي طاحت عليا . طلعت راسي شفتوا فات ورا أدم خزر معايا غمزلي وبعثلي بوسة وخرج من الباب .انا الدنيا دارت بيا كون شافو ادم تصرى كارثة ، وليت نشوف في الدنيا كاملة بيضة دخت راح نطيح ، زرب حكمني أدم قالي اريج وشبيك ، دخت بين يديه جات عجوزتي تجري قاتلوا وشبيها قالها منعرف كانت واقفة لاباس بيها طاحت داخت هزني طلعني للشمبرة حطني فوق السرير . جابولي الريحة دارلي في خشمي وزاد جابتلي عجوزتي لبصل دارتلي في رجلي وفي يدي . فطنت لقيت آدم قاعد بجنبي في السرير وعجوزتي واقفة عند راسي . شافني فتحت عينيا قالي لاباس .   قتلوا لاباس تفكرت وش صرى وليت نبكي . بقا يمسحلي على شعري  قالي وشبيها لعميرة تاعي علاه راكي تبكي حاجة توجع فيك ، درتلوا براسي لا . قالي ملا علاه راكي تبكي ، خممت نقولوا بلي ولد عموا راه يقلق فيا بصح علابالي كون يسمع يدبحوا نورمال . وليت سكتت قتلوا والوا حابة نروح لدار . قالي علاه كاش واحد قلقك هنا. .قتلوا .لا هكا برك مانيش حابة نقعد هنا . قالي ياك كي سقسيتك  ادا  تجي معايا ولا تقعدي عند يماك قولتي نروح معاك   . قتلوا صاي بطلت مش حابة نقعد هنا . شفتوا تقلق قالي علاه مش حابة تقعدي هنا وش صرى وبقا يخزر معايا بشك.قتلوا ماصرى والوا هكدا برك .