حب في الثانوية

chapitre 29

وصل وقت الغدا فرشنا في الارض وقعدنا وحطولنا هداك اللحم المشوي مع الديسار والليموناد بداو الكل ياكلو غير انا .  بقيت  نشوف فيهم ياكلو في اللحم دار عليا قلبي  وليت نضت قعدت بعيد في الكراسة.
شافني آدم جاني قالي ريجا علاه مراكيش تتغداي معاهم وقاعدة وحدك هنا . قتلوا انا منكلش اللحم ومنحبش ريحتو على هديك جيت قعدت هنا . قالي وعلاه مقلتليش si non راني جبتلك حاجة اخرى تكليها قتلوا نورمال مانيش حاسة بالجوع قالي اواه متقعديش حتى لعشية وانتي بلا غدا . سكت شوي ومنبعد دار راح المعلم لآخر يهدر معاه بقيت نخزر معاه وهو يمشي سبحان لي خلقو كلش فيه مميز حتى مشيتو كي يعود يتمايل بكتافو تحبي غير تتفرجي فيه طولو هدرتو مشيتو لبستو ضحكتو راني نعشق فيه كيفاش راح ننساه يا ربي، فقت مع روحي غير كي حسيت بدمعتي طاحت ،ساعات نقول ياريت ما شفتو ماحبيتو بيسك صح حبو عياني . رجع وقف قالي هيا قتلوا وين هيا قالي كاينRestaurant هنا نديك تتغداي ومن بعد نرجعو . قتلوا خلي برك قالي راني قتلك هيا ماتكتريش الهدرة قتلوا اففففok دقيقة نقول لشروق بلاك تجي معانا قالي روحي ليه ليه قوليلها .  روحت قلت لشروق  وانا ميتة بالفرحة قاتلي منروحش روحو وحدكم خير بقيت نحاول فيها  قتلها اني نحشم كيفاه نمشي معاه وحدي هيا برك تروحي معايا محبتش، قاتلي لا روحي معاه وحدك وضحكت . قتلها او يجيك نهارك يا الهاملة ههههه . هزيت التلفون  وسكدو تاعي ورحت وصلت وين كان واقف يستنى فيا قالى وشبيها مجاتش معاك شروق قتلوا محبتش قاتلي تعبانة  قالي bien sûr تعبانة من الشطيح تاع الصباح .
هبطنا نمشيو وحدة وحدة بقينا ساكتين حتى نطق قالي كيفاه حتى وليتي ما تكليش اللحم قتلوا من لي كنت صغيرة وعرفت بلي يجي من الكبش والدجاجة وليت ما نكلوش بيسك يغيضوني ، ضحك وقالي اول مرة نشوف واحد يخمم كيفك ههههه. قتلوا مساكن ندبحوهم باه ناكلوهم ، بقا يضحك قالي والله ضحكتيني وش تاكلي ملا انتي قتلوا ناكل غير الخضرة ديجا انا نموت على الخضرة . وصلنا دخلنا restaurant يهبل نضيف باين بلي غالي و يبان تاع لي كوبل بيسك ديكور تاعو يبان تاع les amoureux  قعدنا في طابلة مقابلين  بعضنا ، مكانش فيه الغاشي بزاف وحد 5ولا6 عباد وباين بلي des couplesبيسك كل زوج مع بعض . جانا السرفور قالنا مرحبا بيكم وحطلنا المينو وراح . انا بقيت ساكتة وندور في راسي نتفرج على الديكور ، خزر معايا آدم قالي عجبك restaurant قتلوا وي ديكور تاعو يهبل . سكت قالي هيا وش تحبي تاكلي  ندومنديلك قتلوا كيما تحب انت، هز المينو بقا يقرى قالي حسب الشوفة الماكلة تاعهم كاملة باللحم والدجاج . عاود قفلوا وقالي تحبي البيتزا قتلوا نعشق فيها ، خزر معايا وضحك قالي غير البيتزا لي تعشقي فيها ؟قتلوا هه!!!! . عيط لسرفور قالوا 2 بيتزا . راح جابلنا البيتزا مع الكانات تاع الكوكا  حطهالنا وراح . بقيت نخزر معاها حشمت باه نبدا نوكل قدامو حتى قالي هيا كولي هزيت السكينة باه نقسم tranche معرفتش بيسك جامي لاقسمتها وحدي وزيد سخونة من الفرماج ما لقيتش من نحكمها هو نشوف فيه تاعو كمل قسمها وصاي . هز راسو شافني حاصلة قالي هاتي نقسمهالك قتلوا ايه . قسمهالي وهز طرف وعطاهولي قالي هاكي حكمتو  وهزيت القرعة تاع لهريسة وعمرت طرف تاع البيتزا قالي يا راكي درتي بزاف  عمرتيها قتلوا نحبها حارة ضحك وقالي هيا كوليها دوك تشوفي واش يصرالك . مع بديت ناكل حسيت فمي شعلت فيه النار من الحرارة وعينيا غرغرو بالدموع حطيت هداك الطرف وبقيت نمروح  بيديا على فمي وعينيا يقطرو بالدموع وهو ميت عليا بالضحك قالي راني قتلك بلي راكي درتي بزاف كملت بلعت هديك اللقمة بسيف مدلي كاس تاع الما قالي هاكي اشربي دوك تتنحا  ، شربت الما كي كملت مد يدو مسحلي دمعة من خدي وانا راح ندوب من الحشمة كانو معديين علينا زوج طفل وطفلة راح يخرجو  باين بلي كوبل  طفلة قالت لطفل  قاتلوا ياااا عمري شوف شوف كيفاش يمسحلها في دموعها ملڨري تبان صغيرة عليه بصح باين بلي يحبها  so cute. انا سمعت هدرتها  جمدت في بلاصتي تمنيت تنشق لرض وتبلعني هو طلع راسو خزر معاهم قاتلوا ربي يهنيكم  دارلهم براسو ايه وسكت . انا هبطت راسي ورجعت ناكل لعبتها ماسمعتهمش . حتى هو محبش يعلق على هدرتها ورجع ياكل . هكا شوي دخلوا ربعة دراري يعودو في عمرهم 25بصح باين تاع مشاكل قعدو مقابلينا ،ملي قعدو وهم يضحكو بالقاوي ويعيطو ويهدرو في هدرة زايدة ونشوف في واحد منهم قاعد يغمزلي تخلعت رجعت هبطت راسي ، آدم خزر معاهم ومن بعد قالي  ادا كملتي هيا نخرجو قتلوا ايه كملت دقيقة نغسل يدي ونجي . نضت رايحة لتولات  عديت من الجهة تاعهم  سمعت واحد فيهم قال لصاحبو  شوف لاطاي لي عندها ورجليها نبيع روحي علاجالهم نورمال وضحك . درت نشوف غير في آدم قالوا عاود وش كنت تقول ،  وقف ورجعلوا هداك طفل قالوا واش خويا مانيش نهدر معاك . نشوف غير في آدم طاح عليه بدماغ باين بلي كسرلوا خشمو هداك الطفل طاح في لرض وادم يضرب فيه برجلوا على كرشو يسب فيه بوحد سبان اول مرة نسمعو في حياتي سخطهم ، وصحابو يفكو فيه بصح واحد ما حب يدافع عليه  خافو بيسك واحد فيهم ما يجي نص تاع أدم يبانو قدامو اقزام . انا وليت نرجف من الخوف دخلت في نصهم ونجبد في أدم من يدو بصح محبش يطلق هداك الطفل وليت نبكي ونقولوا خليه صاي راح تقتلوا بسيف باه طلقوا وهو يسب فيه دار خزر معايا قالي هزي حوايجك وهيا حط صوارد تاع الماكلة فوق الطابلة  وحكمني من يدي وجرني وراه وانا نفس راح يتقطعلي من الخوف ، بقا ماشي ويجر فيا وراه حتى حبس دار خزر معايا و قالي وش قلت لرب##على هادي اللبسة اه وش قتلك  انتي متفهميش تحبي تسمعي وش هدر عليك اه . كان يهدر يعيط على طول صوتو . قالي شوفي نزيد نشوفك لابسة كيف هادي اللبسة اقسم بربي رجليك نكويهملك سمعتي  .درتلوا براسي ايه وانا نبكي رجع يمشي ويجر فيا وراه وانا غير نشهق راحلي النفس من الخلعة و الخوف وزيد ماشين في بلاصة طالعة وهو يمشي بزربة .  حبس دار خزر معايا قالي وشبيكي مقدرتش نرجعلوا بقيت غير نشهق قدم طلعلي راسي قالي خلاص تنفسي غير بلعقل . حسيت بحاجة سخونة هابطة من خشمي عرفتها دم كيما المرة لي فاتت . شفتو جبد البابي مشوار وحطها على خشمي وهويسب ويكفر خرج من رحمة ربي يا درى وش  سمعو هدر هداك حتى خرج من رحمة ربي هكدا . قالي ارواحي اقعدي حكمني حتى قعدت في الترتوار تاع الطريق. بقيت مطلعة راسي وهو مرة على مرة يبدل البابي حتى حبس . قالي صاي خلاص راهو حبس هبطت راسي وجبدت لاباري تاعي من سكدو تاعي ودرتها في فمي  وحد 5دقايق باه رجعت نتنفس نورمال بصح الفشلة تاع الخلعة لي كليتها قبيل قعدت فيا يديا نحس فيهم ثلج ويرجفو وحدهم . طلعت راسي نشوف مع آدم يحكي بالتلفون سمعتو يقول وعلاه تحوسي على ز##وين ومن بعد كوبا عرفتها بلي كان يحكي مع شهرة .