حب في الثانوية

121

كملت السيروم وعطاوني الدوا ورجعنا للدار هو طول الطريق من الفرحة مسكتش يهدر غير البيبي نديرلوا هكدا ونشريلوا هكدا ونقريه هكدا يخطط من قلبوا متحمس وانا غير ساكتة حتى تولهلي قالي وشبيك ساكتة راكي وسوستيني ماراكيش فرحانة .قتلوا ايه مارانيش فرحانة وحتى انت مالازمش تفرح ڨاع هكدا وتتحمس بزاف . بقا يشوف معايا مستعجب  قالي  علاه منفرحوش ، كاش عبد يسمع بخبر كيما هدا وميفرحش .قتلوا ايه ملامزش نفرحوا خاطر في أي دقيقة راح يروح كيما راحوا لي قبلوا ،شحال من مرة وانا كل ما نسمع بلي راني اونسانت نفرح ونتحمس ونخطط كيفك هكدا واكثر بصح مع لخر وش ربحت والوا كيما راك تشوف واحد ما صلح لدالك راني نوجد في روحي من ضرك باه ادا مات ما نتصدم ما نزعف . قالي  وش الهدرة لي راكي تقولي فيها يا تقولي الخير يا تسكتي ، والله علابالك راني مشوكي فيك تقول راني نهدر مع وحدة جاهلة متعرفيش حاجة اسمها مكتوب هدوك كاتبلهم ربي يموتوا مش لازم حتى هدا يصرالوا كيفهم علاه راكي تفاولي عليه ،وزيد ياك حتى الطبيبة طمناتك كلش عندك مريڨل ولاباس ادا حافضتي عليه وعلى روحك راح يجي للدنيا ونفرحوا بيه.  سكتت قالي تفائلوا  خيرا تجدوه هكدا قالي نبي . قتلوا ان شاء الله . وصلنا للدار كانت الخمسة تاع الصباح  قعد معايا شوي   من بعد راح يخدم وانا كملت رقادي من بعد نضت طيبت الغدا تغديت ورجعت لبلاصتي نتفرج حتى جا . قالي من بعد راهي جاية ماماك ومحمد .قتلوا علاه جايين . قالي كيفاش علاه جايين قلتلهم بلي لبارح مرضتي وديك للسبيطار و راكي اونسانت جايين يباركولك ويطمنوا على صحتك.  سكتت وصح بعد العشا جات ماما ومحمد قعدوا في الصالة ، ماما سلمت عليها فوق القلب مستحيل ننسا وش دارت فيا أصلا كيفاش ننسا وليطراس تاع ضربها مزالوا . خليتهم قاعدين مع آدم ودخلت للكوزينة قلت نوجد قهوة . كانوا يهدرو نورمال من بعد نقص حسهم عرفتها راهم يهدرو عليا خرجت وقفت ورا الباب تاع الصالة نسمع في آدم يهدر مع ماما قالها راكي  غلطي كي ضربتيها انا قلت نجي نقولكم باه تهدرو معاها انتي يماها تفهماها خير مني كاين حوايج لازم انتي تفهميهملها مش انا بصح دورك كي ضربتيها غير زادت قاتلوا والله من قلقتي فيها ضربتها . قالها الضرب راه ما يجيب حتى نتيجة كون هدرتي معاها وفهمتيها بالسياسة لي يصلح ولي مايصلحش كانت فهمت غلطتها وتعلمت منها بصح دوك راح تعاودها مرة وزوج غير زكارة فيك . قاتلوا والله تعاودها نكسرها راهي تعرفني . قالها قدرك عالي بصح ها راه قدام محمد نقولها ، اريج متزيديش تحطي يدك عليها ولا تضربيها.  قاتلوا ماما بنتي هادي لي راك تهدر عليها نقتلها ڨاع واحد ما دخلوا . قالها بنتك هديك لي راكي تهدري عليها مرتي ، رجعتهالي لحمها كامل مطبع ومطراسي هادي المرة سكتت خاطر كانت غلطتي انا لي جيت وشكيتلكم غلطة منزيدش ڨاع نعاودها ، نورمالمو انا نتفاهم معاها بيناتنا كيما موالف  . قاتلوا تسمى دورك انا لي غالطة وانا لي الحق عليا لي حبيت نربيها.  قالها مايغيضكش الحال بصح ايه انتي لي غالطة .
نطق محمد قالها صح يما آدم عندو الحق ياك انا ديما نقولك متضربيهاش حابة تفهميها فهميها بالسياسة .قالها آدم علابالك راهي تقولي ماما تكرهني شوفي الضرب وين وصلنا راهي حاطة في بالها بلي راكي تكرهيها .  قاتلوا يا شومي كيفاه نكرها هادي راهي كبدتي عندي هي فرد عوينة  هداك ما نسعا  . قالها لي صرا صرا دوك . رجعت للكوزينة  هدرتهم نحاتلي شوي الزعاف لي كان في قلبي وزيد فرحت كي آدم قال لماما ماتزيدش تضربيها وقالها راكي غالطة . حسيتوا رجعلي حقي منها ايه هكدا حسيت . كملت طيبت القهوة وحطيت القاطوا وديتهالهم . شربو وانا غير ساكتة تهدر معايا ماما نرجعلها كلمة ونقص معاها الهدرة باه تفهم بلي راني زعفانة قعدوا ساعة وناضوا قالوا بلي مروحين كي عادوا خارجين سلمت عليهم قاتلي ماما مايغيضكش الحال مني راني ماماك ومدبيا نشوفك مهنية في دار راجلك . قتلها علابالي وسكتت . هما راحوا وانا رجعت فرزت دنيتي  بالخف ورجعت للشمبرة لقيت آدم متكي وحاط فيلم يتفرج حتى تكيت نتفرج معاه . شاف معايا قالي علابالك ساعات تضحكيني . قتلوا علاه نضحكك. قالي غير فهميني كيفاش عندك شهرين ونص اونسانت ومعلابالكش بروحك . قتلوا ما تولهتش وزيد مكنتش دايرة حسابي .قالي بصح راهي شهرين ونص وديجا كيفاش ما توحمتي وما تشهيتي . قتلوا لا جامي لا سخفت على حاجة من غير الرقاد كنت نحب نرقد بزاف وكي نوض نحب نخرج برة يضيق خاطري في دار . قالي كي تكملي ثلاث شهر  نسافرو لكاش بلاصة نصيفوا . قتلوا  ونقولوا ليما  ودنيا يروحوا معانا . قالي علاه خلي نروحوا انا وياك برك. قتلوا لا نقوللهم يروحوا معانا حتى هما تلقاهم يحبوا يروحوا يصيفوا أصلا تجي  باللمة احسن  ، ولا نقولك خلي نروحوا سمانة معاهم وسمانة غير انا وياك . تبسم قالي والله ظهر عندك مخ وتخممي  عندك الحق هكدا خير .وصح غير كملت شهري الثالث كي روحت للطبيبة قاتلي راكي روعة كلش راه يمشي على الساعة كملي هكدا وارجعي في الرابع قلتلها نورمال نسافر في الطونوبيل ونروح للبحر قاتلي بيانسور تقدري بصح كلشي يكون في المعقول راكي فاهمتني ..