حب في الثانوية

chapitre 75

بقينا واقفين نتفرجو عليهم  وادم حاطني في حضنوا . كي كملوا جا محمد خارج قالي آدم اقعدي استنايني نخرج مع محمد و نشوف الرجال شوي ونجي نطلعك للدار متطلعيش وحدك في الدروج . قتلوا ايه . هو خرج مع محمد وانا قعدت في الصالة نستنى فيه ونشوف مع دنيا كيفاش فرحانة تشطح مع يماها وماما ، فكرتني بروحي نهار خطبتي كنت هكدا فرحانة . جاتني ماما قاتلي ارواحي تشطحي معانا شوي وشبيك من صباح وانتي حاكمة كوانة وقاعدة تقول ماهي الخطبة تاع خوك . قتلها  والله غير مش قادرة . قاتلي هيا برك اوقفي رانا غير شوي ونروحوا ومن بعد اقعدي على روحك . بقات تحاول فيا حتى وقفت بقيت نشطح معاهم ، جيت راح ندور نلقى آدم واقف يتفرج فيا  .خزرت معاه ضحك قالي كملي كملي اشطحي من بعد قوليلي آدم  رجليا  راهم منفخين  عليا كان يهدر ويقلد في صوتي  . عادوا كل يضحكوا نطقت  عجوزتي قاتلوا خلي الطفلة تزهى على روحها ، ديجا ارواح اشطح  شوي مع مرتك  . قالها غير فكينا . قاتلوا ورحمة المرحوم غير تجي . عاد يضحك  قالها علاه تحلفي برك ، و تجبدي في المواتة .قاتلوا خاطر انت تجي غير بالحليف ارواح هيا  . كانوا حاطين لغناية تاع غير سايسوها عمري خلوها  دخل وحكمني من يدي يشطح معايا وانا راح نموت من الحشمة خاطر كانوا كل يشوفوا معانا ، تقول جامي لا شافوا زوج يشطحوا . فاق بيا بلي حشمت عاد يضحك قالي اشطحي وشبيك حاشمة . قتلوا يا آدم يزي . باسني على خدي قالي يا عمري على مرتي الحشامة . قعدنا نشطحوا غير انا وياه حتى فضت لغنا هو خرج وانا قعدت ونشوف في كوثر ويماها راح يموتو بالغيرة ، جاتني دنيا تضحك قاتلي والله غير سخفتوني بالزواج انتي وادم ، ربي يبارك عليكم حبكم يبان من لبعيد  . ضحكت قتلها ماتسخفي ما والوا راكي تشوفي الحب هداك كامل وكل يوم ندي في الضرب . قاتلي هداك الضرب تدي فيه خاطر انتي لي تجيبي فيه لروحك .قتلها والله تسما خوك خاطيه . قاتلي المهم يحبك خلي يضرب على روحوا . قتلها شوف اسيدي . قاتلي ايه والله المهم علابالك بلي هو يحبك وكي يضربك خاطر في مصلحتك مش يحڨر فيك . قتلها نشوفوها ترا كي تزوجي عندك تبدلي رايك وعندك لا نهار يضربك محمد تجي تبكي وتشكي  . قاتلي ما نبدل راي ماوالوا  المهم في الليل نبات في حضنو وخلي يضرب على روحوا . وغمزتلي ، قتلتني بالضحك . قتلها وشبيك يا طفلة انحرفتي ضربة وحدة .قاتلي ياختشي انتي وراجلك خربشتولي مشاعري هدا بوس وهدا تحضان وشطيح .. رجعت نضحك من هدرتها قتلها خمسة في عينيك لا تعاينيني ديجا بلا عين وراني غارقة معاه في المشاكل لراسي. قاتلي والله كيما نهدر معاك كي تطلعي سبعي شوي ملح على روحك راهم كل يشوفوا معاكم  وحاسدينكم ربي يبعد عليكم العين . قتلها ان شاء الله .شوي وروحوا دارنا بقاو غير لافامي تاعهم للعشا ، سمعتوا يعيطلي ريجا خرجتلوا قالي مش راح تطلعي لدارك . قتلوا ايه نطلع ديجا لاغوب خنقتني نبدلها . قالي هيا . حط يدو على ظهري وطلعنا دخلت للدار وفتت للشمبرة جبدت جبة  راح نبدل حسيت بوجاع كبير  في كرشي وليت حطيتها وقعدت حاكمة كرشي .دخل شافني حاكمة كرشي . قالي وشبيك . قتلوا شوي وجاعة برك. قالي اوقفي نديك للسبيطار خير. قتلوا خلي برك راهي غير شوي ديجا قاتلي يما  نورمال حاجة متخوفش راه غير من تعب برك  . قالي خلاص كيما تحبي بصح ادا زادت عليك قوليلي نديك للطبيب . قتلوا ايه . هز جبة وقالي هيا نبدلك قشك وتكسلي شوي من قبيل وانتي واقفة . بقا يبدلي في قشي وانا نشوف معاه غير كمل باسني على فمي قالي وشبيها البطة تاعي تشوف معايا. قتلوا والوا . ضحك وقالي مزلنا في الحكاية تاع والوا ، ياك قتلك راني نفهمك من عينيك ملا غير مكلاه تخبي عليا .  تحضنتو قتلوا حابة نبقى في  حضنك برك ،باسني على راسي قالي لعميرة تاعي تموت عليا . تبسمت وسكتت ، بقيت شحال وانا ساكتة نخمم ومن بعد قتلوا آدم حاسة حاجة راحتلي.خزر معايا حاير قالي مفهمتش وش لي راحلك . هزيت كتافي قتلوا منعرف هكا حاسة ، حاسة حاجة نقصت مني . هبطت دمعة من عيني ، مفهمتش أصلا علاه راني نبكي ياك تسامحنا انا وياه بصح معرفتش روحي علاه مش قادرة نفرح . بقا يشوف معايا حاير ومن بعد تحضني وقالي ياعمري علاه تبكي علاه وش راكي باغية هيا  اي حاجة تقوليها تكون عندك اي حاجة تطلبيها تكون بين يديك .  درتلوا براسي لا قتلوا ماني باغية والوا . قالي مالا علاه راكي تبكي . قتلوا هكدا برك حابة نبكي وخلاص . ضحك وقالي هادوا غير الهرمونات تبدلوا عليك . مسحلي على شعري قالي علابالي بلي ضغطت عليك بزاف ليام لي فاتوا وهادوا الدموع ڨاع  بسبابي انا . قتلوا لا . وقف راح للخزانة جبد منها صاشي تاع الكادو . ورجع قعد وجبدني لحضنوا قالي هادي شريتهالك لبارح شوفي . عطالي صاشي فتحتها لقيت فيها باطة تاع تلفون جديد وباطة تاع قطيفة فتحتها لقيت فيها باغيغ تاع دهب سنسلة وخاتم ولي بوكل تاع الوردة  .  بقيت نشوف معاهم قالي واش معجبوكش. قتلوا يهبلوا  ربي يخليك ليا . حكم السنسلة قالي دوري لبسهالك . دورت هزلي شعري كان راح ينحيلي السنسلة لخرى لي مكتوب فيها ريجا . قتلوا لا متنحيهاش قالي علاه البسي هادي خير . قتلوا لا نلبسهم في زوج . حكمت السنسلة لي مكتوب فيها ريجا . قتلوا هادي من نهار لي لبستها منحيتهاش وحلفت بلي منحيهاش حتى للموت   . باسني على رقبتي وقالي علابالك بلي انا نحبك فوق ما تتصوري . قتلوا حتى انا  نحبك منقدرش نعيش بلا بيك . قالي ربي يخلينا لعضانا طول لعمر قتلوا ان شاء الله كمل لبسلي السنسلة . قالي هيا ارواحي ارقدي ارتاحي شوي وجهك راه معصور خلاص . تمددت في السرير وغطاني بالغطا ومسحلي على شعري قالي انا نهبط نشوف  عمامي لتحت خليتهم وحدهم شوي ونرجعلك . قتلوا ايه وقف شعل التلفزيون وحط القران وطفا الضو وخرج . انا بقيت في بلاصتي نتلوا من الوجع لي باقي ويزيد كل دقيقة نخمم نعيط لآدم باه يديني للطبيب بصح نقول خلي  نحمل لغدوة منفسدش عليهم فرحتهم . بقيت هكداك حتى غفيت .
فقت على صوت آدم ينوض فيا .قالي ريجا حبيبي  نوضي.  قتلوا خليني . باسني قالي منخليكش مكانش رقاد ليوم . فتحت عينيا خزرت معاه قتلوا علاه مكانش رقاد . قالي خاطر توحشتك  وليوم راح تسهري معايا ولا مراكيش متوحشتني . قتلوا لا توحشتك بصح حابة نرقد . باسني على رقبتي قالي خلاص ارجعي ارقدي علابالي راكي تعبانة . قتلوا ياك مزعفتش . ضحك وقالي لا محال نزعف من الكبيدة تاعي . حطيت راسي على صدرو وقتلوا دومي خربلي في شعري حتى نرقد . قالي ايه تدلل مرتي . بقا يخربلي في شعري وانا نخمم الوجاع حبس بصح  قلبي مقبوض عليا ، قلبي رايف على حاجة منعرف وش هيا . حتى سمعتوا يهدر قالي علابالك اول حاجة  عجبتني وحبيتها فيك وش هيا .قتلوا وش هيا . قالي شعرك وخدودك سيرتوا خدودك وقت لي نشوفهم قدامي ديراكت تجي في بالي نعضك منهم  .ضحكت قتلوا راك تهدر صح . قالي والله كيما نقولك الله غالب يسخفوني نبقى غير نستغفر وخلي يا لاطاي تاعك سيرتوا كي تلبسي السروال نهبل . قتلوا يا والله ما تحشم . ضحك قالي  راني سيريوا اول حاجة عجبتني فيك هي شعرك . قتلوا وانا اول حاجة عجبتني فيك بزاف وحبيتها هي عينيك هكدا جايين جدابين بزاف ويلمعوا ، بلا ما ننسى طولك ، انا من لي كنت صغيرة وانا مقررة نهار نتزوج لازم نتزوج بواحد طويل وعندو لحية ، وربي كتبلي وش حبيت .قالي ياربي تجيبلي طفلة هكدا تشبهلك .... قتلوا أن شاء الله . سكتت شوي من بعد قتلوا آدم كون نموت وش دير . خزر معايا قالي واش الهدرة هادي بعيد الشر عليك علاه تقولي هكدا . قتلوا راني نسأل فيك برك . قالي مبقتيش تعاودي هاد الهدرة . قتلوا بصح انا نحبك توعدني ادا متت تبقى تتفكرني ومتنسانيش وتحكي عليا لولادك . قالي انتي والله الهرمونات لعبولك بعقلك ڨاع  وش مجبدك في الموت دوركا ربي يخليك ليا طول لعمر  ان شاء الله ونشوفوا احفادنا . قتلوا هكدا حبيت نوصيك برك ، وتفكر ديما بلي انا نحبك اكثر من اي حاجة في الدنيا هادي انت اول حب في حياتي واخر حب ، انت لي اكتشفت بيك الدنيا ،. انت لي حسيت معاه بأنوثي ، انت لي مستعدة نضحي بكلشي على خاطرو . تحضني اكثر وقالي يا عمري على حبيبي كي يعرف يهدر .. بستوا على صدرو ودخلنا في عالمنا فوتت اجمل ليلة مع آدم ملڨري كنت تعبانة وكلشي بصح مقدرتش نقاوم سحر آدم وحنانة آدم وحب آدم نسيت كلشي بين يديه . هدا هو الحب وقت لي تكوني بين يدين حبيبك تنساي الدنيا كاملة وتعيشي في عالم وردي خاص غير بيك انتي وياه وبس .