حب في الثانوية

chapitre 25

فاتت الخطبة وروح خويا فقت من الرقاد على العشرة تاع الليل لقيت ماما مع محمد قاعدين يحكيو على الخطبة قالها والله جات خطبة ملاحة فرحو بينا . شافتني ماما قاتلي وش اريج لباس من الصباح وانتي راقدة معيتيش من الرقاد قتلها تعبانة نضت باه ناكل ونرجع نرقد قاتلي ارواحي اسهري معانا شوي ومن بعد ارقدي قلتلها في قلبي نسهر معاكم باه تحكيلي على الخطبة وتحرقيلي قلبي اكثر ما راهو محروق .قتلها خلي برك راني تعبانة غدوة نسهر معاك . انا درت راح نرجع الشمبرة تاعي تحل لباب لقيتو بابا رحت نجري ليه تحضنتو وترشقت بالبكا كنت متوحشاتو بزاف بيسك عندي سمانتين مشفتوش ولقيتها سبة باه نبكي ونفرغ قلبي قتلوا بابا توحشتك بزاف قالي حتى انا توحشت الاميرة تاعي بنتي تاج راسي بعدني عليه قالي بعدي خلي نشوفك خزر معايا قالي وشبيك شينتي هكدا مريضة قتلوا لا توحشتك برك رجعت تحضنتو نبكي قالي وعلاه تبكي لمدللة تاعي اه شكون لي بكالي بنتي قاتلوا ماما تبكي بيسك مدللة واحد ما دار بيها شكون لي كيفها خوها يديها لتونس يحوس بيها وزيد تجي انت تعنڨ وتبوس فيها قالها بابا وشبيك يا مرا وقيلا غرتي ارواحي حتى انتي نحضنك ونبوسك متنا عليه بالضحك قاتلوا  ماما يا احشم راك كبير قالها مزلت صغير والله تجي نحضنك علابالي بيك غرتي  جبدها ليه حضنها وباسلها راسها قدامنا  بقيت نخزر معاهم ونحمد في ربي لي عطاني عائلة هايلة كيف هادي  . شافهم خويا قالوا الحاج راهي عندكم شمبرتكم قالوا بابا والله لاتحشم بقينا نضحكو ونڨصرو نسجمت معاهم ونسيت همي شوي بصح جيست ما حكمت فراشي حتى رجعت نخمم في أدم وصلت الخمسة تاع الصباح وانا مزلت نخمم من بعد نضت شربت دوا تاع الرقاد ورقدت . وليت روتيني كامل هكدا في لي نبات نخمم وفي نهار نقعد راقدة حتى العشية حتى ماما فاقت بيا قاتلي وشبيك وليتي ترقدي بزاف انتي ماعلابالهاش بيا نبات نايضة في الليل من التخمام قتلها ما نلقى ما ندير كي نوض خلي نرقد خير ديجا بالاحد ترجع لقراية ونرجع كيما كنت .
جا نهار الأحد جات ماما نوضتني باه نوجد روحي نروح نقرى وجدت روحي وانا نخمم كيفاش باه نتحمل نشوفهم مع بعض . وصلت وين ليسي لقيت شروق قاتلي سمعتي لخبر قتلها ايه سمعت قبل حتى ما تصرى الخطبة قاتلي وش درتي قتلها وش راح ندير ربي يهنيهم قتلها وانتي شكون لي قالك قاتلي انا شفت الفيديو تاع الخطبة كي كان يديرلها في الخاتم حطاتو شهرة في الفيسبوك تاعها نسمع فيها تهدر وانا قاعدة نغلي من داخل وعلاش مش انا في بلاصت شهرة وعلاش يا ربي . دخلنا نقراو وصلت العشرة وقت الحصة تاعو دخل كي شفتو قلبي ضرب راني نعشقو غير شوفتو هي لي تحيني كيفاش راح ننساه يا ربي خزر معايا تبسملي تبسمت معاه وهبطت  راسي . بقا يقرى فينا مرة على مرة نلقاه يخزر معايا خزرة مش كيما العادة حسيت فيه حاجة مبدلة مش كيما قبل كان يدخل يضحك ديما زاهي . فضت الحصة تاعو هزيت حوايجي خارجة عيطلي قالي اريج ارواحي رحت وقفت مقابلة البيرو تاعو قالي وش راكي cvقتلوا الحمد الله قتلوا مبروك عليك الخطبة ربي يكمللكم على خير قالي يبارك فيك وسكت حرت فيه كيفاه مكملش قال انشاء الله كي قتلوا ربي يكمللكم  . بقا ساكت عرفتو عندو حاجة حاب يقولهالي بصح متردد قالي اريج وشبيك شينتي هكدا قتلوا مرضت شوي في عطلة على هديك ضعفت  كان راح يكمل يهدر حتى دخلت شهرة تهدر قاتلوا آدم حبي انت هنا وانا نستنى فيك لتحت .شافتني سكتت قاتلي اريج راكي هنا قتلها راني خارجة درت راح نخرج قاتلي متباركليش قتلها مبروك عليك ربي يهنيكم قاتلي مرسي حبيبتي لعقوبة ليك وضحكت عرفتها قاعدة تتمسخر بيا قتلها مزلت صغيرة خلي يتزوجو لكبار سح . خرجت وخليتها مغزلة طاحو دموعي بصح مسحتهم وقلت ادا راهو فرحان معها ربي يهنيهم .
شهرة قاتلوا آدم حبي علاه مهبطش لتحت من قبيل وانا نستنى فيك . قالها وش من الصباح وانتي لاصقتلي في كلمت حبي هادي كسرتيلي راسي بيها قاتلوا شهرة بيسك نحبك علا هديك نقولهالك قالها فهمنا بلي تحبيني بصح هادي الكلمة مبقيتش تقوليهالي ok قاتلوا صحا كيما تحب مبقيتش نقولها بصح ليوم تتغدى معايا كيما تفاهمنا قالها ايه كان خارج من بعد دعاود رجعلها قالها شهرة اريج منحبكش تزيدي تهدري معاها فهمتي قاتلوا بصح انا مهدرت معها والوا قالها راني قتلك متزديش دوري بيها فهمني ولا لا قاتلوا اوك كيما تحب قالها مليح خرج وخلاها قاتلوا ملا كون منكرهاش في حياتها منتسماش شهرة .
في ليل حكمت بلاصتي جبدت التلفون دخلت الفيسبوك تاع شهرة لقيتها حاطة الفيديو تاع الخطبة بقيت مترددة اسكو ندخل نشوف الفيديو ولا لا من بعد دخلت مقدرتش نتحكم في الفضول تاعي ملڨري علابالي راح يأثر عليا. كانو مديرينها في الصالة تبان من الديكور تاعها بدا الفيديو كي كانت قاعدة لابسة غوب صواري في الروج sur taille مسيبة شعرها ودايرة تاج مع مكياج غامق ملڨري نكرها بصح جات تهبل  دخل هو لابس كوستيم بلو نوي تهبل زايدة فيه النص قدم سلم عليها  كانو طالعين على بعضاهم ومن بعد ركبلها الخاتم كي كمل حكماتو من يدو تشطح معاه وفض الفيديو فقت بروحي بلي من وقت لي بديت نتفرج وانا نبكي .