حب في الثانوية

110

ركبنا في الطونوبيل وانا مورالي زيرو اول يوم رمضان هكدا البروقرام  تاع النهار كامل فسدلي وصلني لافارمسي قالي على الوحدة نعدي عليك وجدي روحك قبل ما نجي  منبقاش نستنى فيك . هبطت دخلت لافارمسي بلا ما نهدر معاه أصلا مبقاتش هدرة  معاه . لقيت لبنات يخدموا سلمت عليهم وقعدت في بيرو منيش نافحتلي حتى نهدر . نطقت وحدة فيهم وهي لي قريبة ليا في العمر حتى هي متزوجة قاتلي واش اريج راه حاكم فيك رمضان كيما راجلي صبح مشنف وحدو . قتلها حتى انتي راجلك حاكم فيه رمضان . قاتلي وي علابالك في رمضان يهبلني معاه ونفوتوه كامل مدابزين بصح نهار العيد يجي يصالحني . قتلها حتى انا ليوم راجلي راه يتسبب على كلمة . قاتلي اصبري وش راح ديري الرجال كامل هكدا في رمضان يحكم فيهم الدخان والقهوة .قتلها شفتي هداك الصبر لي راكي تهدري عليه انا معنديش قبيل حكمت روحي بسيف باه نغلق فمي ومنرجعلوش الهدرة . قاتلي راكي غالطة راجل لازم مترجعلوش الهدرة انا راجلي نحسسو بالذنب ونخرجوا هو لي غالط سيرتوا كي يعيط عليا ويبخصني ونبقا ساكتة نهبطلوا زوج دمعات يجي يرضيني وحدو بلا ما نهدر . قتلها انا منقدرش والفت هو كلمة وانا كلمة . قاتلي  ربي يعينك أصلا  راجلك من وجهوا يبان واعر . قتلها وي واعر بزاف وعقليتوا صعيبة  بصح حنين وقلبوا ابيض ديما نخسر معاه ويسامحني بصح ليوم غاضتني عمري منو . ضحكت قاتلي نورمال الرجال كامل هكدا كي يفطر ويركح مخو بالدخان  يفيق مع روحوا ويجي يرونجيك . وقفت قتلها استناي نجي نفرز معاك .  بقيت نخدم معاها وهي تحكيلي كيفاش حتى تزوجت مع راجلها قاتلي والله انا بابا قالي تديه بسيف مقبلتش المرة لولة بصح من بعد قبلت كونت كارهاتوا في الدم   كي عشت معاه حبيتو وليت نفنى   عليه  ، وانتي كيفاش حتى  تزوجتي زعما مزالكي صغيرة يعني متقوليش بلي حتى انتي سيففو عليك .قتلها لا بعيد الشر  الحمد يا ربي انا تزوجت بعد قصة   حب بصح صرا بيناتنا سوء تفاهم طلقنا عام وشهور من بعد رجع خطبني وقبلت عاودت تجوزت . محبيتش نحكيلها التفاصيل  قاتلي الله الله راه يبغيك هدا مدام تطلقتوا وعاودتوا وليتوا . ضحكت قتلها ايه يبغيني الحمد الله . قاتلي يا سعدك .  بقينا نهدرو حتى شفت دنيا دخلت . قاتلي جيت نزورك .قتلها اهلا اهلا مرحبا بيك زارتنا البراكة . ضحكت قاتلي قلت نجي نشوف الحالة عندك كيفاش مع رمضان . قتلها راكي تشوفي في الحالة كيفاش ديجا بديت نعطش ونجوع ربي تستر منعرف كيفاه نكمل النهار . قاتلي مع آدم ربي يعينك . قعدت قتلها متفكرنيش ربي يعيشك خوك ديما هكا في  الرمضان ليوم الصباح مخلاليش قرقشني ناقص غير يضربني  . ضحكت قاتلي ايه كيما هكدا حاجة انتي تشوفيها نورمال يولي هو يشوفها معوجة كنت نعاني معاه العام هدا وين تهنيت منو . قتلها يكمل شهر كامل هكدا منقدرش انا . قاتلي تحملي وش راح ديري هو الحل تاعو صمطيه خليه يهدر على روحوا .قتلها نقولك صح آدم عقليته تبدلت معايا عاد صعيب نهدر كلمة يديرلي عليها شرع. قاتلي كيفاش مفهمتش.قتلها كي ما تفهميش خير انا ومنيش فاهمة .ضحكت قاتلي لا راكي توسوستي برك راكي تعرفي عقليته من بكري هو هكدا . قتلها ان شاء الله تظهر انا لي غالطة ، قوليلي وش راح تطبيو فطور انا حارتلي وش راح نطيب . قاتلي ندبر عليك ديري طاجين حلو آدم يبغيه نهار لول تاع رمضان يحب يفطر بيه مع شوربة وبوراك . قتلها زهري منعرفش نطيبو كيفاش يجي . بقات تقولي وش ندير فيه باه يجي بنين . قتلها لعمال على ربي نطيبو وصاي ان شاء الله يصلحلي .قاتلي ساهل يصلح نورمال . نطقت وحدة معانا قاتلي انا نقولك كيفاش يجي . بقات حتى هيا تنصح فيا كيفاش نطيبو حتى وصلت 12 ونص . دنيا روحت للدار وانا وجدت روحي باه كي يجي يلقاني واجدة شوي وجا دخل قال سلام عليكم رجعنالوا السلام . رحت عندو سلمت عليه  قتلوا راني واجدة صاي قال واش كيفاه ماشية الخدمة . قتلوا مليحة . قالي هيا. مشينا خارجين قاتلي وحدة من لبنات  صوريلنا الطاجين لي راح طيبيه الفطور نشوفوا خدمة يديك .ضحكت قتلها ايه نصور ونبعثلك . خرجنا انا وياه  ركبت في طونوبيل حتى هو ركب وخبط الباب حرت وشبيه . ديمارا قالي اريج باه راني نهدر معاك   بالشنوية انتي علاه متفهميش علاه حتا نعود نعيط بصوتي نهدر هدرة تدخل من وذن تخرج من الثانية .  قتلوا علاه وش درت انا .قالي وش درتي ،  زعما معلابالكش وش درتي  انا وش وصيتك على الدصارة الزايدة ياك قتلك  منحبكش داصريهم عليك وكل واحد في حدو .قتلوا وين داصرتهم غير هدرت معاهم برك نورمال وش فيها ديجا مدام راح نبقى معاهم نهار كامل باين راح نهدر معاهم . قالي قتلك انا متهدريش معاهم قتلك ما داصريهمش كيفاه هادي تقولك صوريلي لفطور .قتلوا وش فيها ما فيها والوا .قال كيفاش ما فيها والوا ليوم قاتلك صوريلي الفطور مرة أخرى تقولك صوريلي روحك في السرير  انتي هكدا حتى تخرحيني من ملة محمد  باه يبرد قلبك انتي علاه ما تسمعيش الهدرة  . سكتت علابالي كون نعاندو ونبقا ناقش فيه تخلى عليا . حتى وصلنا للدار وهو محبش يسكت كلا روحوا . دخلت وانا فادة صاي من نهار واحد كرهت هدا كيفاش راح نصبر معاه شهر  كامل بزاف . مع دخلت ديراكت دخلت للدوش وجدتهولوا من بعد وجدتلوا حوايجوا . سمعتو يعيطلي من صالة روحتلوا قتلوا انعم عيطتلي . قالي وش راكي ديري قتلوا وجدتلك الدوش و حوايجك.قالي ارواحي روبوزي شوي الدوش مش هارب . قعدت شوي  وصلت الزوج تاع العشية هو دخل دوش وراح يرقد وانا بدلت حوايجي ودخلت ديراكت للكوزينة يا ربي ادا كفاني الوقت نوجد موالفة نتعاون انا وماما بصح دوك كي عدت وحدي لازم ندخل للكوزينة بكري   . بديت نوجد حطيت الكيكوطة طيب تاع الطاجين وتاع الشوربة ، حطيت  السلاطة في فريجيدار شفت الوقت ديجا الربعة نقصت على الماكلة قلت نتكسل شوي ما بين ما اذن العصر . على ما حطيت راسي على المخدة غفيت من وراها فطنت غير على صوتوا  وهو يعيط راح تحرق بينا الدار هادي دوك نعول   عليها ونخليها وحدها في الدار  نغفل عليها دقيقة نلقاها دارت ديڨا وش حل معاها  هادي راح تهبلني .شهقت وانا نتفكر في الفطور  أكيد تحرق . روحت نجري للكوزينة لقيت دنيا قريب تتخنق من الدخان وهو يطفي في الڨاز . دارلي قالي انتي راح تهبليني عبالك كيفاه تخلي الڨاز شاعل على الكيكوطة وتروحي ترقدي راح تطرطقي بينا الدار . قتلوا والله ما فقتش مع روحي غفيت
قالي ارواحي شوفي الحالة هنا شوفي كيفاه ديريلها المرة الجاية تولهي تبثي روحك وش تفنين تاعك هدا لوقتاش نقعد نهدر   .  بقيت ساكتة ودرتلوا براسي ايه ، خرج وخلاني بقيت نشوف فيهم متحرقش بزاف الطاجين شوي برك . الشوربة تفحمت .عاودت طيبت شوربة وقليت البوراك والطاجين حطيتوا في  كيكوطة اخرى . المهم ما جيت نخلص قلبي راح يحبس  تاع الصح كنت نجري من حاجة لحاجة المهم نوجد كلش غير يسكت عليا  آدم برك . طل عليا قالي طيبتي كسرة . تخلعت نسيتها خلاص قتلوا نسيتها . شفت مع ساعة قتلوا دوك نطيبها بالخف . شاف معايا قلت باينة مبقاش يسكت بالعياط يا ربي وش يسكتوا  بصح  سكت وخرج . طيبت الكسرة في نص ساعة غير كملت من الزربة غلطت هزيت  الطاجين بيدي . ويما احكميني  وليت نسوطي وحدي نجري للما وانا نبكي تاع الصح بكيت ، ديجا انا من الصباح وانا غايضتني عمري من آدم كي عيط عليا وزيد مع الحرقة وليت نطيح في دموع مقدرتش نسكت . دخل لقاني هكاك يدي تحت الماء وانا نبكي بالشهقة الطاجين طاح تكسر في الارض و المغرب مزالوا عشر دقائق ويأذن يعني باينة راح يباصي عليا هاد الليلة . حط لحوايج من يدو و زرب جا عندي قالي ريجا وش صرى علاه راكي تبكي وشبيها يدك .قتلوا وانا نبكي تحرقت بالطاجين تاع الكسرة . بقا يشوف فيها قالي وش كنت نوصي فيك ياك قتلك تبثي روحك  ، انتي علاه مستهترة هكدا نقعد نعس فيك انا كيفاش تهزي طاجين سخون بيدك وين كان مخك .قتلوا كنت نزرب مافقتش .قالي ديما ماراكيش فايقة . بقا يداويلي فيها بالبومادة بصح محبش يسكت كالعادة انتي مخك ديما طاير منك وكي نهدر معاك متسمعيش الهدرة ياك ديما نقولك ارزني شوي وتبثي روحك وانتي مستهترة مش تاع مسؤولية .المهم ماخلا ماقالي غسلني ونشرني اكثر من الصباح حتا كمل ربطلي يدي ، شافني مزلت نبكي بالساكتة قالي علاه راكي تبكي دوك .قتلوا  يدي توجع فيا . قالي اسكتي برك دوك تتنحى عليك . سمعت الاذان تاع المغرب ضحك قالي لا فطور لا والوا راني قتلك باينة راح تخليني بلا فطور .قتلوا لا راه واجد الفطور نحطو برك . قالي احكمي بلاصتك مش ناقص ديري ديڨا اخرى دوك نصلي ونحط وحدي .ستنيتوا حتى صلى وجا هو لي حط الفطور فوق الطابلة تاع الكوزينة . هو ديراكت راح للطاجين حلوا يبدا بيه غير حط المغرف في فمو شاف معايا قالي وش هدا قتلوا طاجين حلو قالي والله راكي متأكدة زعما مش غالطة في روسات اخرى.قتلوا لا متأكدة علاه معجبكش .