မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!

Chapter ( 70 )

Unicode
                 အခန်း ( ၇၀ )

Mary က Estin ကို သူမကြောင့် သေဆုံးခဲ့ရသည့် ယုန်တစ်ကောင်၏အကြွင်းအကျန်များကို ဥယျာဉ်၏အစွန်ဆုံးထောင့်မှာ မြှုပ်နှံပေးဖို့ တောင်းဆိုလာခဲ့ချိန်တွင် Estin က ခဏမျှ မျက်မှောင်ကြုတ်သွားခဲ့သည်။ ထိုအရာကို Cameron က ပို့ခဲ့မှန်း သူသိသော်လည်း Mary ၏ ကျိုးနွံသော အမူအရာလေးကို တုန့်ပြန်ရန် ခေါင်းညိတ်ပြခဲ့သည်။ အကြောင်းအမျိုးမျိုးကြောင့် သူ မသိသည့်အချိန်တွင် သူမအန္တာရယ်ကြုံလာရမှာကို စိုးရိမ်နေမိသည်။

Estin သည် Mary က အမဲလိုက်ရာတွင် အနိုင်ရခဲ့ပါက သူမလိုချင်သည့် မည့်သည့်အရာကိုမဆို သူပေးမည်ဟု ပြောခဲ့သည်။ သူမက အရုပ်များကို နှစ်သက်ဟန်တူသည်။

အရုပ်သစ်တစ်ရုပ် ဝယ်ခိုင်းမလား? ဒါမှမဟုတ် အဝတ်အစား? လက်ဝတ်ရတနာ? Estin တခြားဘာကိုမှ မတွေးနိုင်ခဲ့ပေ။

အချိန်အတော်ကြာ တုန့်ဆိုင်းနေသော Mary သည် သူမ လိုချင်သောအရာ တစ်ခုရှိသည်ဟု ပြောလာခဲ့သည်။

" ဘာများလဲ? "

" Grand Duke သမီးကြောင့် အဲ့ဒါကို တစ်ခါအသုံးပြုပြီးသွားပြီဆိုပေမဲ့လေ...သမီး laminicho ကုသဆေးကို ထပ်တောင်းဆိုလို့ရမလားဟင်?  "

" ...မင်း ဘယ်နေရာမှာ နေလို့မကောင်းလို့လဲ?  "

Mary လိုချင်သည့်အရာမှာ laminicho ဆေးဖြစ်နေသည်။ ထိုစကားက Estin ၏အမူအရာကို စိုးရိမ်တကြီး တင်းမာသွားစေခဲ့သည်။ သူက ကလေးငယ်မှာ နေမကောင်းဖြစ်နေသလားဟု တွေးမိလိုက်သော်လည်း Mary က ခေါင်းကို မြန်မြန်ဆန်ဆန် ခါယမ်းပြလာခဲ့သည်။

" သမီး အဲ့တာကို သောက်မလို့မဟုတ်ပါဘူး...တစ်ချိန်ချိန်ကျရင် အသုံးလိုတဲ့နေရာရှိလာမလားလို့ သမီးတွေးလိုက်မိလို့ပါ "

" Laminicho က သေတဲ့သူတွေကို မကယ်နိုင်ဘူးနော် "

" သမီး အဲ့တာကို ယုန်ကို တိုက်မလို့မဟုတ်ပါဘူး.... "

ဤတစ်ခါမှာလဲ Estin ၏ ခန့်မှန်းချက်မှာ မှားသွားပြန်သည်။ ကလေးက စိတ်လှုပ်ရှားစွာဖြင့် သူမ၏လက်ဖဝါးနှစ်ဖက်ကို ပွတ်တိုက်နေခဲ့သည်။ သူမက ဆက်ရှင်းပြရန် ခက်ခဲနေပုံရသည်။ Laminicho သည် ပြုလုပ်ရန် ခက်ခဲသော ဆေးတစ်မျိုးဖြစ်သည်။ ၎င်းကို ထိခိုက်ဒဏ်ရာမျိုးစုံအတွက် အသုံးပြုနိုင်ပြီး တိကျသေချာသော အကျိုးသက်ရောက်မှုရှိသည်။ အင်ပါယာတွင် ရှားပါးလှသည့် ထိုအရာကို တောင်းဆိုနေသည်မှာ ထိုအရာသေးသေးလေးက သူမ၏အာရုံကို ဖမ်းစားနိုင်သွား၍ဖြစ်မည်။