မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!

Chapter ( 72 )

Unicode
                အခန်း ( ၇၂ )

နန်းတော်အတွင်းထဲရှိ ကြီးမားလှသောဖန်လုံအိမ်ဥယျာဥ်ကြီးတစ်ခုအတွင်းတွင် Estin သည် ဧကရာဇ်မင်းမြတ်ရှေ့မှောက်၌ ရပ်နေခဲ့သည်။ ဤသီးသန့်နေရာသည် ဧကရာဇ်မင်းမြတ်အတွက် အထူးနေရာတစ်ခုဖြစ်ပြီး  ၎င်းကို ဂုဏ်ယူစရာဟုမှတ်ယူထား၏။ ဧကရာဇ်သည် ပန်းများကို အလွန်နှစ်သက်ကာ Britina အင်ပါယာနှင့် Kaya တိုက်ကြီးတစ်ခုလုံးမှ ပုံမှန်မဟုတ်သောပန်းပင်မျိုးစိတ်များအားလုံးကို ခဲရာခဲဆစ် သယ်ဆောင်ကာ ဤနေရာတွင် စိုက်ပျိုးထားခဲ့သည်။ ဤမှန်လုံအိမ်ဥယျာဥ်ကြီးမှာ နောက်ဆုံးရလဒ်ဖြစ်ချေသည်။ Britina ထက် ပိုပူနွေးသော အရပ်ဒေသမှ ပန်းပင်များကို တင်ပို့စေကာ ဤကျယ်ဝန်းသောဥယျာဥ်ကြီးအတွင်းတွင် ထားရှိစေသည်။ ထို့ကြောင့်ပင် ဤဥယျာဥ်က နန်းတော်အပြင်ဘက်ရှိဥယျာဥ်ထက် ရောင်စုံပန်းများစွာ ပွင့်လန်းနေခြင်းဖြစ်နိုင်၏။  ကောင်းကင်တမန်ပုံသဏ္ဌာန်ရှိသော ရုပ်ထုများပင် ရှိနေသည်။

ကောင်းကင်တမန်များဥယျာဥ်ဟူ၍ ခေါ်ဆိုကြသည်။ မျိုးရိုးမြင့်အရာရှိမှူးမတ်များပင် ဤဧရိယာကို လွယ်လင့်တကူမဝင်နိုင်ပေ။ ထို့ကြောင့် ရလဒ်အနေဖြင့် အင်ပါယာတွင် ဤနေရာကို ဒဏ္ဍာရီဆန်ဆန်နေရာတစ်ခုအဖြစ် သတ်မှတ်ထားကြသည်။ အင်ပါယာရှိလူတိုင်းက ဤနေရာကို တစ်သက်တွင်တစ်ခါမျှတော့ လာရောက်လည်ပတ်လိုကြသည်။ တစ်ဖက်တွင်မူ Estin သည် ဤမျှဝင်ရောက်ရန်ခက်ခဲလှသောနေရာတွင် သက်တောင့်သက်သာရှိသောပုံစံဖြင့် ထိုင်နေခဲ့ကာ ကောင်းကင်တမန်ဥယျာဥ်ကို အကဲဖြတ်ရန်ပင် ပျင်းရိနေခဲ့သည်။

အပြင်ဘက်မှာတောင် တစ်ခုရှိပြီးသားပဲကို ဒီလိုမင်းမျိုးမင်းနွယ်တွေရဲ့စံအိမ်လောက်ကိုကြီးတဲ့ ဥယျာဉ်တစ်ခုကို အတွင်းထဲမှာ ထားရှိဖို့က လိုလို့လား? အပိုလုပ်နေတာမဟုတ်ဘူးလား?

သို့သော် Estin သည် ထိုမျှရိုးရှင်းသောမေးခွန်းကို ထုတ်မေးရန်ပင် စိတ်မဝင်စားခဲ့ပါ။

Estin ရှေ့တွင် ထိုင်နေသော ဧကရာဇ်မင်းမြတ်က Estin အတွေးများကို နားလည်သယောင် ခပ်ဖွဖွပြုံးပြလာခဲ့သည်။ ထိုအချိန် ဤဥယျာဥ်၏တာဝန်ခံ အိမ်အကူတစ်ယောက်က လက်ဖက်ရည်ကို ယူလာရင်း သူတို့ကြားရှိ ကို့ရို့ကားယားနိုင်သော တိတ်ဆိတ်မှုကို ချိုးဖြတ်လိုက်‌လေသည်။