မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!

Chapter ( 131 )

Unicode
                        အခန်း ( ၁၃၁ )

​
​Tahata ရွာ အကြောင်းကို ကြားဖူးထားခဲ့၍ Mary ထိုရွာလေးကို စိတ်ကူးဖြင့် အကြမ်းဖျင်း ပုံဖော်ထားခဲ့သည်။ သို့သော် ကိုယ်တိုင်မြင်တွေ့လိုက်ရသောအခါ သူမ့စိတ်ကူးထဲကထက်ပင် ပိုပြီးရင်သပ်ရှုမောစရာ ကောင်းနေခဲ့လေသည်။

သစ်လုံးအိမ်လေးများမှာ အရုပ်ဖြင့်တည်ဆောက်ထားသည့် အိမ်လေးများသဖွယ် အစုလိုက် အစုလိုက် တည်ရှိနေသည်။ ဤဒေသသို့ ယခုမှ ရောက်ဖူးသော Rex နှင့် Mary ဟာ ရွာကို ချဥ်းကပ်လာသည့်နှင့်အမျှ နှစ်ယောက်သား အံ့သြမင်သက်မှုများဖြင့် ပါးစပ်အဟောင်းသားဖြစ်နေမိကြသည်။

​မမျော်လင့်ဘဲ တွေ့ဆုံရသည့် ဒေသခံများကလည်း Mary အား နွေးထွေးစွာ ပြုံးပြနှုတ်ဆက်လာကြရာ Mary က ရှက်ရွံ့စွာဖြင့် ပြန်ပြုံးပြနှုတ်ဆက်နေခဲ့သည်။ Cheroke ကမူ ထိုလူများကို တရင်းတနှီးဖြင့် နှုတ်ဆက်နေလေ၏။

​ဤရွာလေးသည် မြင့်မားသော တောင်ထိပ်တွင် တည်ရှိနေခြင်းကြောင့် ဖြစ်မည်။ Mary လမ်းလျောက်နေရုံမျှဖြင့် စိတ်ရောကိုယ်ပါလန်းဆန်းလာမှုကို ခံစားလိုက်ရသည်။ ဒေသခံများမှာ အပူအပင်ကင်းမဲ့စွာ နေကြရသည့်ဟန်ပင်။

​​ဗီလာကြီးကို သစ်တောအလယ်၌ အဖြူရောင်ကျောက်များဖြင့် တည်ဆောက်ထားပြီး ၎င်းမှာ သဘာဝပတ်ဝန်းကျင်နှင့် ထူးခြားစွာ ပေါင်းစပ်လျက်ရှိကာ မြင်ရသူအဖို့ ရေဆေးပန်းချီကားတစ်ချပ်အလား ထင်မှတ်မှားစရာ ဖြစ်နေပေသည်။ ဤနေရာသည် နတ်သမီးပုံပြင်များရေးတတ်သော စာရေးဆရာများအဖို့ အလွန်တရာမှလှပသည့် မင်းသမီးလေးတစ်ပါးအကြောင်း ပုံပြင်ရေးရန် စိတ်ကူးစိတ်သန်းများရရှိနိုင်မည့် နေရာမျိုးဖြစ်လေသည်။

​​Rex နှင့် Mary သည် တစ်ခန်းနှင့်တစ်ခန်း ကပ်လျက်ရှိသော အခန်းများကို အသုံးပြုရန် ဆုံးဖြတ်ခဲ့ကြသည်။ ထိုအခန်းတွင် လှပသောတောအုပ်ကြီးနှင့် ရွာငယ်လေးကို လှမ်းမြင်နေရသည့် ပြတင်းပေါက်ကြီးတစ်ခု ရှိ၏။ ဒုတိယထပ်တွင် အခန်းရသည့်အတွက် Mary ဝမ်းသာမိသည်။

ဤကဲ့သို့သန့်စင်သော သဘာဝအလှတရားကို မမြင်ရသည်မှာ အတော်ကိုကြာလှပြီဖြစ်သည်။ နှိုင်းယှဥ်ကြည့်လျှင် ပြုပြင်ဖန်တီးထားသော တော်ဝင်နန်းတော်မှ ဥယျာဥ်များမှာ မည်မျှပင် အတုအယောင်ဆန်သည်ကို Mary ရုတ်ချည်း သဘောပေါက်လာမိသည်။