မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!

Chapter ( 89 )

Unicode
                အခန်း ( ၈၉ )

Mary သည် မနက်ခင်း အိပ်ယာနိုးသည်နှင့် မျက်နှာသစ် အဝတ်အစားလဲကာ ထမင်းစားခန်းသို့ ထွက်လာခဲ့သည်။

Mary ဟာ ပုံမှန်သမားရိုးကျဖြစ်ပါသော သူမ၏မနက်ခင်းပိုင်းလှုပ်ရှားမှုလေးကိုသာ လုပ်ဆောင်ခဲ့ခြင်းဖြစ်သည့်တိုင် Bonita က အံ့သြသွားပုံပေါ်ခဲ့သည်။ ထိုခံစားချက်ကို Mary နားလည်နိုင်ပါသည်လေ။ Bonita အတွက်ဆို သူမဟာ သမီးရင်းတစ်ယောက်နှင့် မခြားလှပေ။

" သခင်မလေး! ကျွန်မ အရမ်းစိတ်ပူနေခဲ့တာ "

" သမီး သိတာပေါ့။ တောင်းပန်ပါတယ်နော် "

" ဘာမှတောင်းပန်စရာမလိုပါဘူး သခင်မလေးရယ်။ ကျွန်မက သခင်မလေး ပြန်ပြီးထူထူထောင်ထောင်ရှိလာတာနဲ့တင် ဝမ်းသာလှပြီ "

မည်သူမျှ Mary ဒီလောက်ကြောက်လန့်သွားလိမ့်မယ်လို့ မမျော်လင့်ထားကြလောက်ပါ။ Mary သည် မိုက်ရူးရဲဆန်သည့် အရာများစွာကို လုပ်ဆောင်ခဲ့သည်။ သို့တိုင် မိမိဟာ ဤကဲ့သို့ သူရဲဘောကြောင်တတ်သေးပါ့လားဟု သိလိုက်ရတဲ့အတွက် ကိုယ့်ကိုယ်ကို အံ့သြသွားခဲ့ရသည်။

ဘာကြောင့်မှန်းမသိ ထိုနေ့က အဲ့ဒီအမျိုးသားပြောခဲ့တဲ့စကားတွေဟာ သူမ့နှလုံးသား၏အစိတ်အပိုင်းအချို့တွင် အရိုးစွဲသွားခဲ့ပုံရ၏။ Mary က သူမ၏ရင်ဘတ်ကို ပုတ်လိုက်သည်။

အဓိပ္ပာယ်မရှိတဲ့စကားတွေအတွက် နာကျင်ခံစားနေဖို့ မလိုဘူး။ ငါကြားခဲ့ရတဲ့စကားတွေကလည်း ငါ ကြိုပြီးမျော်လင့်ထားတဲ့ အခြေအနေတွေပဲ။ ဘာမှအသစ်အဆန်းရှိမနေဘူး...

မနေ့က Grand Duke နှင့် ပြောခဲ့သောစကားများက အတွေးထဲသို့ ဝင်ရောက်လာခဲ့သည်။ သူက သူမကို ပွေ့ဖက်ကာ ပြောခဲ့သည်။

" သမီး သန်မာဖို့လိုတယ်။ အဲ့ဒါမှ ဒယ်ဒီ အိမ်မက်ဆိုးတွေမက်တဲ့အချိန်တိုင်း ဒယ်ဒီကို ပွေ့ဖက်ပြီး ချော့သိပ်ပေးနိုင်မှာ "

Mary သည် Grand Duke Estin က သူမကို ကာကွယ်ပေးမည်ဟုပြောခြင်းထက် သူမကို ပို၍သန်မာလာအောင် လုပ်ပေးမည်ဟုပြောခြင်းကို ပိုသဘောကျမိသည်။ သူမ တစ်ယောက်ထဲ ထိုသို့ခံစားရသည်လား မသေချာပင်မဲ့ ထိုစကားကြားရသည်နှင့် သူမက ခွန်အားနှစ်ဆတိုးလာသည်ဟု ခံစားရသည်။ နောက်ပိုင်းမှာ တစ်ယောက်ထဲနေရတော့မည့်အချိန်မျိုးတွေ ရောက်လာခဲ့ရင်တောင် လက်ရှိဒီမှတ်ဥာဏ်တွေရဲ့ကျေးဇူးကြောင့် သူမ ကောင်းကောင်းကြီး အသက်ရှင်နိုင်လောက်မည်လို့ ရယ်စရာကောင်းစွာ တွေးလိုက်မိသည်။