မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!

Chapter ( 128 )

Unicode

                       အခန်း ( ၁၂၈ )

ယနေ့သည် Conler အိမ်တော်၏ အရှင်သခင် ပြန်လည်ရောက်ရှိလာမည့်နေ့ ဖြစ်လေ၏။

Mary သည် သူမ၏အခန်းပြတင်းပေါက်အနားတွင် ကော်ကဲ့သို့ကပ်နေကာ အပြင်ဘက်ကို ငေးကြည့်နေခဲ့သည်။ သူတို့ပြောသည်မှာ Grand Duke သည် ရဲတိုက်သို့ ပြန်မလာမီ ဧကရာဇ်နှင့် ဦးစွာတွေ့ဆုံမည်ဟု ဆိုသည်။

နတ်ဆိုးသားရဲတွေကို နှိမ်နင်းခဲ့လို့ ဆုချခံရမယ်လို့ ပြောကြပေမယ့် ဆုချမယ့်အစား သူတို့ကို အိမ်ကို ချက်ချင်းပြန်ခိုင်းပြီး နားခိုင်းလိုက်တာကမှ ပိုကောင်းတာမဟုတ်ဘူးလား?

" Grand Duke က ပြန်လာတာ နောက်ကျမယ်ထင်တယ် "

Rex က စောင်တစ်ထည်ယူလာပြီး Mary ၏ပုခုံးပေါ်သို့ လွှမ်းခြုံပေးလာခဲ့သည်။ သူက သူမ၏ ရင်တွင်းခံစားချက်ကို သိရှိသွားပုံရသဖြင့် Mary ရှက်ရွံ့မိသည်။ တကယ်တမ်းတွင် Mary သည် ဥယျာဉ်ထဲ၌ စောင့်နေနိုင်သော်လည်း ထိုသို့ စောင့်နေသည်ကို မြင်လျှင် ရှက်စရာကောင်းမည်ဟု ယူဆသောကြောင့် အခန်းပြတင်းပေါက်မှသာ စောင့်ဆိုင်းရန် ရွေးချယ်ခဲ့ခြင်း ဖြစ်သည်။

" ဘာပဲဖြစ်ဖြစ် ငါတော့ တော်ဝင်မိသားစုက ယောက်ျားတွေကို သဘောမကျဘူး.... "

​“Demimore ကိုရောလား?”

Mary ဧကရာဇ်နှင့် Cameron အကြောင်း စဉ်းစားနေဲ့စဉ် Rex က သူ၏ တလက်လက်တောက်ပနေသော မျက်လုံးပြာပြာလေးများဖြင့် သူမကို မေးလာသည်။ Demimore မှာလည်း တော်ဝင်မိသားစုဝင်တစ်ယောက်ပင်။

“Demimore က လွဲပြီးပေါ့ ”

​Rex က ထိုအဖြေကို ကြိုတင်မျော်လင့်ထားသည့်အတိုင်း ခေါင်းတဆတ်ဆတ်ညိတ်လိုက်သည်။ ထိုသို့ မေးမြန်းလာသည့် Rex မှာ အူကြောင်ကြောင်ပုံစံလေးဖြင့် ချစ်စရာကောင်းလှသည်ဟု Mary ထင်မိသည်။

အကြောင်းပြချက်မရှိ ရယ်ချင်စိတ် ပေါက်လာသောကြောင့် Rex ၏ နူးညံ့ပျော့ပျောင်းသော ဆံပင်ကို Mary က ဖွပေးလိုက်သည်။

" မမ က ကျွန်တော့်ကို ကလေးလို ဆက်ဆံနေပြန်ပြီ "

“မဟုတ်ပါဘူး၊ မင်းရဲ့ ဆံပင်လေးက ချစ်စရာကောင်းလို့လေ...ငါ ကိုင်ကြည့်ချင်လာတာပါဆို ”