မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!

Chapter ( 83 )

Unicode
                အခန်း ( ၈၃ )

ရထားလုံးတစ်စီး ချဥ်းကပ်လာခဲ့သည်။ ရထားလုံးပေါ်မှ ရေးထွင်းထားသော Conler ၏ အမှတ်အသားကြီးကို မြင်လိုက်ရချိန်ဝယ် Mary တစ်ယောက် ချက်ချင်းပင် ငိုချမိတော့မလို ဖြစ်သွားရသည်။ ရထားလုံးက မနီးမဝေးမှာ ရပ်သွားခဲ့သည်။ Lucas နှင့် Aiden တို့သည် ရထားလုံးပေါ်မှ အပြေးအလွှား ခုန်ဆင်းလာကြလေသည်။ Lucas ကို မြင်ရဖို့မှာ မျော်မှန်းထားပြီးသားဖြစ်သော်ငြား Aiden ကိုပါ တွေ့ရလိမ့်မည်ဟု Mary မထင်ခဲ့ပေ။ ထိုသူမှာ Gilbert ဖြစ်နေခဲ့ပါက သူမဤမျှထိ မအံ့သြသွားလောက်ပါ။ Aiden မှာ သူ့၏ညီမအငယ်ဆုံးလေးကို တကူးတက လာကြိုမည့် အစ်ကိုတစ်ယောက် ဖြစ်လိမ့်မည်ဟု Mary မထင်ထားမိခဲ့။

Lucas နှင့် Aiden တို့သည် တိုက်ပွဲဖြစ်ပွားရာသို့ ခုန်ဝင်လိုက်ကြသည်။ Aiden က လက်တို့ကို ဆန့်ထုတ်လိုက်သည်နှင့် သူ့၏လက်များမှ အနက်ရောင်အလင်းတစ်ချက် ထွက်ပေါ်လာကာ Knight အဖွဲ့များကို တိုက်ခိုက်နေသော အရာများ၏ လည်မျိုကို ပစ်ခွင်းသွားခဲ့သည်။ ထိုသူများမှာ ချက်ချင်းပင် လဲကျသွားခဲ့သည်။ Knight အဖွဲ့ဝင်များက သူတို့၏ ဓားရှည်များဖြင့် ထိုအရာများကို မည်မျှပင်ခက်ခက်ခဲခဲ ခုတ်ထစ်နေခဲ့ပါစေ ထိုအရာတွေမှာ လဲပြိုမသွားခဲ့။ သို့သော် Aiden ၏ စွမ်းရည်က ထိုအရာများအပေါ်တွင် အလုပ်ဖြစ်ပုံရသည်။

" တော်သေးတာပေါ့! "

သူမ၏မျက်လုံးအစုံက မျက်ရည်ဝဲလာခဲ့သည်။ Aiden ဆီသို့ ဦးတည်ကာ Mary ထွက်ပြေးသွားဖို့ ကြိုးစားလိုက်သည်နှင့် တစ်စုံတစ်ယောက်က အနောက်မှနေ၍ သူမ၏ပါးစပ်ကို အုပ်လိုက်သည်။ တစ်ချိန်လုံး တည်ငြိမ်ကာ အမူအယာမဲ့ဖြစ်နေပါသော Adien ၏မျက်နှာမှာ ပျက်ယွင်းလာခဲ့သည်။

ဟင်..Aiden မျက်နှာပျက်သွားတာလား?

သူမ၏အမြင်အာရုံမှာ ဝေ့ဝါးလာပြီး ရှင်းရှင်းလင်းလင်း မြင်ရဖို့ ခက်ခဲလာသည်။

ဤသို့ဖြင့်..

Mary လေး သတိလစ်သွားပါတော့သည်။

***

Estin သည် ရွာသားများပြောင်းရွှေ့ဖို့ရန်အတွက် မပြင်ဆင်ရသေးသော အရာတစ်ချို့ရှိတာကြောင့် ပြင်ဆင်မှုပြလုပ်ရန်အတွက် နေရာတစ်ခုကို သွားနေခဲ့ခြင်းဖြစ်သည်။ ရထားလုံး၏ပြတင်းပေါက်မှ အပြင်ဘက်ရှိ ရှုခင်းကို ကြည့်နေရင်း ထူးဆန်းစွာဖြင့် စိတ်အနှောက်အယှက်ဖြစ်လာသလို ခံစားလာရသည်။