မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!

Chapter ( 86 )

Unicode
                    အခန်း ( ၆၈ )

" စိတ်ပျက်စရာကောင်းလိုက်တာ "

" ဘာတွေဖြစ်နေတာလဲ? "

ထိုအမျိုးသားသည် Baron Bruno ၏ စောဒကတက်ခြင်းကို တုန့်ပြန်မည့်အစား စားပွဲကို ခေါင်းဖြင့်တိုက်နေရင်း ထူးထူးဆန်းဆန်းပြုမှုနေသည်။ Baron Bruno သည် ထိုသို့သောမြင်ကွင်းမျိုးနှင့် အသားကျနေပုံရ၏။ တုန်လှုပ်ခြင်းမရှိဘဲ ရိုးရှင်းစွာ စောင့်ကြည့်နေခဲ့သည်။

" ငါမသိတော့ဘူး။ အရာအားလုံးက ပျက်စီးသွားပြန်ပြီ "

ဘန်း ဘန်း ဘန်း

'သောက်ရူးကောင်...'

Bruno သည် ဒါကို လုံးဝကျင့်သားရမနေခဲ့ပေ။ တကယ်တော့ အပြင်ပန်းကတည်ငြိမ်သယောင်ဖြင့် ဟန်လုပ်ထားခြင်းသာ။

ထိုသူသည် အပြောကောင်းသော်လည်း ရုတ်တရက်ကြီး ဒေါသထွက်ကာ ကိုယ့်ကိုယ်ကိုနာကျင်အောင် လုပ်နေသည်ကို မြင်ရသည်မှာ ထူးဆန်းနေခဲ့သည်။ တစ်ခါတစ်လေမှာ ကလေးဆန်တဲ့ပုံစံနှင့်လည်း စကားပြောတတ်သည်။ မဟုတ်ပေ။ ကလေးဆန်စွာ စကားပြောတတ်သည်သာမက ကလေးလိုလဲ ပြုမှုတတ်ပေသည်။

' ဒါက မရဏကမ္ဘာရဲ့ အုပ်ချုပ်သူတဲ့လား...'

X သည် မရဏကမ္ဘာ၏ဘုရင်ဖြစ်သည်။ ထိုသူသည် သူနှင့် တစ်လှေတည်းစီးနေသည်ဟု မှတ်ယူ၍ရသော်ငြား Bruno က ထိုသူရဲ့နာမည်ရင်းကိုတောင်မှ မသိခဲ့ပေ။ Bruno ထိုသူနှင့် ပထမဆုံးအကြိမ်စတွေ့ချိန် နာမည်ကို မေးခဲ့ရာ  ထိုသူပြန်ဖြေခဲ့သည်မှာ

" ငါ့မှာ နာမည်မရှိဘူး "

" ဘာ? "

" ဒီမှာ ဘယ်သူကမှ ငါ့ကိုနာမည်မမေးကြဘူး။ အဲ့တော့ နာမည်မလုပ်ခဲ့ဘူးလေ "

Bruno သည် သူကိုယ်တိုင်နှင့် သူ့မိသားစုကို ဒီလိုလူ၏လက်ထဲ အပ်နှံသင့်ရဲ့လားဟု တွေးမိလာခဲ့သည်။ မည်သို့ပင်ဆိုစေကာမူ ထိုအမျိုးသားသည် သူ၏မေးစေ့ကို ကုတ်ရင်း ခဏမျှ စဥ်းစားနေခဲ့သည်။

" X ဆိုပြီး လုပ်လိုက်ရအောင် "

" X? မင်းရဲ့မျိုးရိုးနာမည်ကရော? "

" ငါက အဲ့ဒါမျိုးကို လိုအပ်လိမ့်မယ်လို့ ခင်ဗျားထင်နေတာလား? ငါ့ကို X လို့သာ ခေါ်ပါ "