Unicode
အခန်း ( ၁၂၇ )
Cameron က တဲအိမ်အတွင်းသို့ ခြေချလိုက်သည်။ သူသည် X နှင့် တွေ့ဆုံသောအခါတိုင်း ဤတဲအိမ်ကိုပင် အမြဲတစေ အသုံးပြုလေ့ရှိသည်။ သူတို့၏ တွေ့ဆုံမှုအား မည်သူတစ်ဦးတစ်ယောက်မျှ ဖမ်းမိခြင်းမရှိစေရန် အလွန်ပင် လျှို့ဝှက်ရန် လိုအပ်ပေသည်။
မူလက Count Stein အပါအဝင် သူတို့သုံးယောက်သားသည် ဤတဲအိမ်၌ တွေ့ဆုံရန် စီစဉ်ထားကြသော်လည်း ယနေ့တွင်မူ Cameron နှင့် X သည် နှစ်ဦးတည်းသာ တွေ့ဆုံရန် ဆုံးဖြတ်ခဲ့ကြသည်။ X သည် အမြဲတစေ ဦးစွာရောက်နှင့်နေတတ်သည်။ ဤတဲအိမ်လေးသည် ဝေးလံခေါင်ဖျားသော နေရာ၌ တည်ရှိသော်ငြားလည်း X မှာ ပျော်ရွှင်စွာ လာရောက်နေဆဲဖြစ်၏။
Cameron တဲအိမ်အတွင်းသို့ ဝင်ရောက်လိုက်ချိန်၌ X သည် သက်တောင့်သက်သာရှိသော ကုလားထိုင်ပေါ်တွင် ထိုင်၍ လက်ဖက်ရည် သောက်နေခဲ့သည်။ X သည် တော်ဝင်မင်းသားတစ်ပါးအား နှုတ်ဆက်ရာတွင် အနည်းငယ် ရိုင်းပြသော အမူအရာဖြစ်သည့် သူ၏လက်ကို မြှောက်ကာ နှုတ်ဆက်လိုက်လေသည်။ အခြားအချိန်များသာဆိုပါက Cameron သည် သူ့အား ကန်ကျောက်ရိုက်နှက်ပစ်လိုက်မည် ဖြစ်သော်လည်း ယခုတစ်ကြိမ်တွင်မူ X ကဲ့သို့ပင် သူ၏လက်ကို ဆန့်ထုတ်၍ နှုတ်ဆက်လိုက်၏။ X မှာ ပခုံးတွန့်ကာ ပြုံးပြလာခဲ့သည်။
“ အားလုံး အဆင်ပြေလား? ”
ထိုသူ၏စကားများမှာ ပုံမှန်အတိုင်း တုံးတိကြီးဖြစ်နေဆဲပင်။ Cameron မှာမူ ၎င်းကို ထောက်ပြရန်ပင် မကြိုးစားတော့။ ဤရက်ပိုင်းများတွင် Cameron စိတ်ကြည်လင်နေသဖြင့် X ၏ ရိုင်းပြမှုကို သူ စိတ်အနှောက်အယှက်မဖြစ်ခဲ့ပေ။ အကြောင်းမှာ သူသည် Sofia အား နောက်ဆုံးတွင် ဖယ်ရှားနိုင်ခဲ့သောကြောင့်ဖြစ်သည်။ Demimore နှင့် Mary တို့ စေ့စပ်ပြီးနောက်ပိုင်းတွင် Sofia သည် သူ့အပေါ် ပို၍ပင် စွဲလမ်းလာခဲ့သည်။
သူမသည် ဒေါသထွက်လိုက်၊ ငိုလိုက်၊ ရယ်လိုက်၊ ထို့နောက် ရုတ်တရက်ပင် တောင်းပန်လိုက်နှင့် ပြုမူတတ်သည်။ Sofia နှင့် ပထမဆုံး စကားပြောဆိုခဲ့မိသည့်နေ့မှာ Cameron နောင်တအရဆုံးနေ့တစ်နေ့ဖြစ်ခဲ့သည်။
YOU ARE READING
မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!
RomanceStatus in COO_ Chapter226+side story *credit to author 윤로체 and English translator*
