မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!

Chapter ( 119 )

Unicode

                      အခန်း ( ၁၁၉ )

​လှုပ်ရှားနေသော ရထားလုံးထဲတွင် Mary တစ်ယောက် အသက်မဲ့နေသကဲ့သို့ ငြိမ်သက်စွာ ထိုင်နေခဲ့သည်။ သစ်ရွက်သစ်ခတ်လေးများဖြင့် ဖူးပွင့်ဝေဆာနေသော ဤရာသီမှာ တစ်နှစ်တာပတ်လုံးတွင် အလှပဆုံးအချိန်ဖြစ်သော်လည်း ရထားလုံး၏ပြတင်းပေါက်မှ ဖြတ်သန်းသွားသော ရှုခင်းများမှာ မှုန်ဝါးလို့နေ၏။

​Demimore နှင့် သူမ၏ စေ့စပ်ပွဲပြီးဆုံးပြီးနောက်ပိုင်း Mary နန်းတော်သို့ မရောက်ဖြစ်သည်မှာ တစ်လနှင့် ၁၅ ရက်ပင် ရှိခဲ့ပြီဖြစ်သည်။

Mary က တက်ကြွသောစိတ်ဝိညာဥ်ဖြင့် နန်းတော်သို့ သွားရောက်လည်ပတ်ရန် ကိုယ့်ကိုယ်ကို တွန်းအားပေးလိုက်သည်။

​မျက်လုံးများကို မှိတ်၍ Lausanne  သူမထံ ပေးပို့လာခဲ့သောစာကို ပြန်လည်အမှတ်ရလိုက်သည်။

​မင်းသမီး Lausanne ထံမှ သူမ၏အချိန်ကြာမြင့်စွာ စောင့်မျော်နေခဲ့ရသော ဆွေးနွေးပွဲကို တက်ရောက်ပေးရန် တောင်းဆိုသောစာတစ်စောင် ရရှိခဲ့သည်။ တော်ဝင်မိသားစုသည် Demimore နှင့် Mary ၏ စေ့စပ်ပွဲကို စီစဉ်နေရသောကြောင့် Lausanne ၏ ဆွေးနွေးပွဲကို မကျင်းပနိုင်ဘဲ ဖျက်သိမ်းခဲ့ရသည်။ တကယ်တမ်းတွင် ကျင်းပနိုင်သော်လည်း Lausanne က မကျင်းပရန် ရွေးချယ်ခဲ့သည်။ သူမက Demimore အပေါ် သဘောထားကြီးခဲ့ခြင်းပင်။ ထို့ကြောင့် ဤဆွေးနွေးပွဲမှာ Lausanne အများကြီးမျော်လင့်ထားခဲ့သော ပွဲတစ်ခုဖြစ်သည်။

​အဲ့ဒါကို သိပင်မဲ့...

" ဝူး... ငါ မသွားချင်ဘူးလို့... "

​ဝမ်းနည်းစရာမှာ Mary ထိုပွဲကို မသွားချင်ခြင်းပင် ဖြစ်သည်။

Mary က သူမအနေဖြင့် ​မင်းသမီး Lausanne ကို တွေ့ဆုံရခြင်း၊ အထက်တန်းလွှာမျိုးရိုးမြင့်များ စုဝေးရာပွဲကို တက်ရောက်ရခြင်းနှင့် အခြားအမျိုးသမီးငယ်လေးများနှင့် ဆက်ဆံရခြင်းကို အသားကျလာလိမ့်မည်ဟု ယုံကြည်ထားခဲ့သည်။ " သူတို့က ဆွေးနွေးပွဲကို ကျင်းပဖို့ကို ဘာလို့ ဒီလောက်အချိန်အများကြီး ယူနေတာလဲ? " ဟူ၍ပင် Mary တွေးမိခဲ့သည်။ သို့သော် တကယ်တမ်း ယခုလို ဆွေးနွေးပွဲကို တက်ရောက်ရန် အချိန်ရောက်လာသောအခါ သူမ၏ သတ္တိနည်းသော နှလုံးသားလေးက ရုတ်တရက်ပင် ထိုပွဲကို မတက်ရောက်လိုပါဟု ကြေညာလာတော့သည်။