Unicode
အခန်း ( ၁၁၃ )
စွန့်ပစ်ခြင်းခံလိုက်ရသည့် ခွေးလေးတစ်ကောင်ကဲ့သို့ နာကျင်မှုအပြည့်နှင့်ဖြစ်နေသော Rex ၏မျက်နှာလေးကို မြင်သောအခါ Mary ရင်ထဲတွင် တစ်စို့ကြီးဖြစ်သွားရသည်။ Rex သည် အလွန်ပင်ကြင်နာပြီး သူမကိုလည်း အလွန်ကို ချစ်မြတ်နိုးသူဖြစ်သည်။ လွန်ခဲ့သောနှစ်များက Mary တို့ ပျော်ပွဲစားထွက်စဉ်က သူမ ဖမ်းထားခဲ့သော ပိုးကောင်ကိုမြင်၍ Rex တစ်ယောက် ကြောက်လန့်ပြီး သတိလစ်မတတ်ဖြစ်သွားခဲ့ရသော်လည်း သူက ရယ်လိုက်ပြီး သတိမထားမိသည့် သူ့အမှားသာဖြစ်သည်ဟု ပြောခဲ့သည်။ သူသည် Mary ကို အလွန်ချစ်သောကြောင့် Mary ၏ လှည့်စားစနောက်မှုများကိုလည်း ဘာမျှမငြိုငြင်ခဲ့ပေ။
“ Cameron က မမကို ထပ်ပြီး ဒုက္ခပေးခဲ့တာလား? ”
Mary တစ်ခဏမျှ စဉ်းစားလိုက်ပြီးမှ ခေါင်းညိတ်ပြလိုက်သည်။ Rex သည် သူ့မျက်နှာကို လက်နှစ်ဖက်ဖြင့်အုပ်ရင်းဖြင့် သက်ပြင်းရှည်ကြီးချလိုက်သည်။ တစ်စုံတစ်ယောက်ရောက်လာပါစေဟု Mary မျှော်လင့်နေမိသည်။ အနီးရှိကိုယ်ရံတော်များက Mary ကိုဘာဖြစ်နေကြောင်း မေးမြန်းလာမည်ဆိုလျှင် ပို၍ပင်ကောင်းပေလိမ့်မည်။ သို့သော်လည်း ဂုဏ်ယူစရာကောင်းသော Conler မိသားစု၏ကိုယ်ရံတော်များသည် ထိုနေရာ၌ပင် လေကဲ့သို့ ရပ်နေရင်း သူတို့၏အလုပ်ကိုသာအာရုံစိုက်နေကြ၏။
“ အဲ့ကိစ္စကို အားလုံးသိကြလား? အစ်ကိုကြီးတို့ရောလား? ”
“အင်း...”
“ဘာဖြစ်လို့ ဘယ်သူမှ ကျွန်တော့်ကို မပြောပြကြတာလဲ၊ ကျွန်တော်က မိသားစုဝင် မဟုတ်လို့လား? ”
“အဲလိုမျိုး မဟုတ်ပါဘူး!”
Rex က အလွန်အမင်း စိတ်ဆိုးနေပုံရသည်။ ထို့ကြောင့် ထိုစကားမျိုးကို ပြောခဲ့ခြင်း ဖြစ်မည်။ ထိုအကြောင်းကို Mary သိသော်လည်း မျက်လုံးထဲ၌ မျက်ရည်များစတင်ဝဲလာသည်။ Rex ကို Mary ၏မိသားစုဝင်မဟုတ်ပါဟု တစ်ခါမျှမတွေးခဲ့ဖူးပေ။ သူ အပယ်ခံရသည်ဟု ခံစားနေရသည်လား။
“ဒုတိယမင်းသားရော သိလား?”
Demimore သိသည်မှာ သေချာသည်။ ဤအမှုတွင် Demimore၏နာမည်ကို ထည့်သွင်းပြောဆိုသွား၍ သူသိကိုသိရမည် ဖြစ်သည်။ ထို့အပြင်... Jasper သည်လည်း ထိုအကြောင်းကို သိရ၍ အလွန်ပျော်ရွှင်နေခဲ့သည်။ အဘယ်ကြောင့်ဆိုသော် Demimore သည် Cameron လုပ်ခဲ့ခြင်း ဖြစ်သည်ကို သိရှိပါက အလွန်အမင်း ဒေါသထွက်လာတော့မည် ဖြစ်သောကြောင့်ပင်။
YOU ARE READING
မြို့စားကြီးရဲ့ဒုက္ခအိုး သမီးဆိုးလေးက တစ်ယောက်ထဲပဲ နေချင်လို့ပါ!!!
RomanceStatus in COO_ Chapter226+side story *credit to author 윤로체 and English translator*
