أشباه الرجال 🫀مكتملة🫀

🫀الجزء 6🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الأول:جرح الروح🫀
°●الجزء: السادس (6)●°

غير خرجات و خلاتهم طاحت على سرير كاتدور تيليفونها لي كله تهرس بين يديها كلما كاتزيد تشوف فيه كلما كتبغي تبكي ! ..

ياقوت(تاتشوف فيها حابسة ضحكة): هارسو لك داك الملعوق؟ ..

نادية(شافت فيها بعينيها مدمعين): شني تاتقول؟

ياقوت(طلقات ضحكة): داك العايل لي نتينا معاه ! .. (صغرات عيونها باغا تفكر) .. شني اسمو ؟ نسيتا ؟

نادية(ناضت دغيا حداها سدات ليها فمها): سكووت !! غاتسمعاك ماما ..

ياقوت(حيدات ليها يديها): مغاتسمعنيشي غير طلوق مني ..

نادية( كاتحرك بلاصتها و كاتبتاسم دموعها كايسيلو منظرها كيجيب ضحكة): خاليلي تيليفونك اياقوت عفاااك ؟ ..

ياقوت (وسعات فيها عيونها): ويانا شني زعما مانحتاجوشي؟ ..

نادية(جمعات يديها قدامها كاترجاها): وعافاك اياقوت .. نعماليك لي بغيتي ! ..

ياقوت(بقات فيها وبغات ترييح ليها خاطرها): صافي صافي غير سكوت عليا ..

نادية (نقزات عليها باستها): كانحماق علك ! .. (حيدات منها و مدات يديها) .. عطيه لي دابا ؟

ياقوت(ضربات فخدها): اوااعدي !ماقلناليكشي خالد خرجو ليه ليوراق غايدجي هاد سيمانة ! ..

نادية(تمسحات إبتسامتها و قالت): شني ؟ واش بصاح ؟ ..

ياقوت(كاتشوف فيها كيفاش مافرحاتش ): شني مالك مافرحتيشي راه خاك زعما ؟ ..

نادية(ربعات يديها كاعيا):راك عارف ..! مغايخلينيشي نخروج تاني و هو مغادوزشي عليه و مغانشوفشي حب قلبي ! ..

ياقوت: نوض عليا ! .. (نوضاتها من حداها و قالت) .. نوض تخروج حتى ليل مجي دي تيليفون .. !

خرجات نادية ماحملاش الوضع و رجوع خوها خسر ليها المورال .. من ديما كايتحكم فيها و كايمنعها من شحال من حاجة لا هي لا ياقوت و الإختلاف فعقليتهم ياقوت ماعندهاش سوق تخرج و لا تجلس فدار عندها زايد ناقص .. نادية باغا تعيش حياتها كي بغات تخرج و تفوج و لكن العائلة حاصراتها على لي بغات حتى قالت على الأقل تهنات من خوها خرج ليها جدها فالجنب .. من نهار مات باها و جاو عنده هي و مها و ياقوت و هو مسيرهوم على هواه .. نادية بغات تخرج تخدم و تعول على راسها قرات حتى عيات فلخر تحبسات بين ربعة د الحيوط تفوت العتبة نهارها ماطلع فيه الشمس .. ياقوت عندها فكرة وحدة فعقلها ماحد موفر ليها كولشي و لي بغاته ماعندها فين تخرج تخدم الأهم عندها أنه قرات وتعلمات! .. مذاق الحياة و حلاوتها فقداتها بعد خسارة الأم ديالها و المشاكيل لي مرات فيهوم حقدوها و بغات غير راحتها لا غير ! ..

ياقوت( تفكرات خالد و دوزات رقمه فالحين جاوبها بلا تعطال):
مجاوبتينيشي باقي ؟ ..

خالد: وي ! غانجي ان شاء الله .. غاتوجدي وراقك ولا حتى نجي ؟

ياقوت(تقادات فجلستها و صلا لمرادها و قالت ):
علاش ليوراق؟ .. شغانعمل بيهوم ؟ و ديالاش ؟ ..

خالد(ضحك بصوت مسموع و قال): لزواج..

ياقوت(حلات فمها ملهوفة تعرف الجواب): ديالمان دزواج ؟

خالد: ديالنا أنا وياك ! .. نهار 2 فشهر غانجي علمت مي توجد الخطبة نديروها باش نديرو العقد دغيا !

ياقوت(كاتبلع فريقها مالقات ماتقول مصدومة و فرحانة): وحسن مانزربوشي على دزواج؟ ..

خالد: عطاوني شهر فالفيزا داكشي علاش ! .. وأنا نيت مابغيتش نزرب ولكن ماعندنا مانديرو مهم باكغاف حنا غانحلو كولشي شهر غاتقدنا ان شاء الله ! ..

ياقوت(كاتبسم و تعض على شنايفها الحشمة طاحت عليها):  .. تواحشتك بزاف قولي شني عملتي لبارح مكانتيشي كاتجاوب علاش ؟ ..

خالد: ديشارجا ليا تيليفون و جيت عيان ماقدرتش نجاوب ! .. (نطق قبل مايقطع عليها) .. نخليك دابا اوكي !  ..

ياالاه غاتنطق و تجاوبه حتى قطع فوجها .. جاتها فشكل لكن ظنات أنه تابعاه خدمة دوزاتها عادي لكن الأساس و المهم فهادشي هو ماطمأنش عليها حيت مايمكنش مايكون عارف شنو وقع ليها البارح حيت كاع خبار الدار كاتوصله من عند خيري .. !  فرحتها ماكملاتش حيت أصلا هو لول لي كاتسناه يسولها كي بقات رجليها لكن كاع ماعطاها أهمية لا هي لا رجليها .. ناضت خارجة من بيتها لي مخشية فيها يومين هادي بسبب رجليها  مشات ديريكت لكوزينة و وجهها معبوس لقات حليمة و نادية كايطيبو الغذاء حليمة كاتشرمل دجاج و نادية كاتقلي فالفريت ..

ياقوت(قربات كاتشوف فيهوم مسطنعة الإبتسامة): ايما لحبيبة ريحة كاتشاهي ..

حليمة(بادلتها الإبتسامة): عمل العصير نتينا تاتعرف لو كايجيك مزيون ..

ياقوت: واخا غانعملو دبا ..!

مشات تقاد العصير بالديسير لي عندهم و كايتحدثو بيناتهوم حتى سمعو صوت الدقان فالباب مشات ياقوت تحل الباب كان خيري و جوج رجال يديهوم عامرة بالتقدية بقات حالة فمها فداك الكم الهائل دتقدية ..

خيري ( عبرها من راسها لرجليها خنزر فيها بحدة): دخوول لباااس علك شراوطك! ..

كانت عينيها غير على تقدية حتى قفزها كلامه و قبل مادخل حولات أنظارها لدوك الرجال لي معاه و جه واحد فيهوم ماغريبش عليه فايت شايفاه عينيها دارت ليها طن فراسها و عرفاته شكون هو ..!