أشباه الرجال 🫀مكتملة🫀

🫀الجزء 88🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 88●°

قطعات عليها و دوزات الآبيل ل ياقوت كاتسناها تجاوب حتى بدات تبتاسم فاش سمعات صوتها ..

كلثوم: .. آلو بنتي ؟

ياقوت( .. بفرحة) .. خالتوو كلثوم !!

كلثوم: .. بيخير ابنتي ؟

ياقوت: .. حمد الله اخالتو و نتينا ؟ تواحشتكوم دغيا ..

كلثوم: .. حتى حنا ابنتي توحشناك! .. ولكن ماعندنا ماندير هادي هي سنة الحياة !

ياقوت( .. إبتسمت) .. و بابا ؟

كلثوم: .. لباس عليه ابنتي ! .. غير عيان شوية هاد اليامات ..

ياقوت: .. الله يشافيه ..

كلثوم: .. ايوا ابنتي الصبر ! و راجلك ابنتي واش مزيان معاك ؟

ياقوت( .. شافت بنظرة إستغراب ف عُمر لي جالس حداها كايداعب شعرها  ) .. اه اخالتو علاش كاتسول ؟ ..

كلثوم( .. تنهدات من قلبها) .. ياسمين قالت ليا بلي الحاجة فاطمة نوضاتك فصباحك تشقاي .. عليها كانسول ! ايما حتى عكوزتك من أطيب خلق الله ..

ياقوت( .. وسعات عيونها و بللات شنايفها) .. اممم اه غير التقاليد ديالوم و صافي .. ( زيرات على عيونها) .. نتينا ماتخافشي اخالتو و تهلالي فراسك !

ياقوت قطعات عليها دغيا و شافت ف عُمر  لي سمع  كولشي ! .. غرسات ظفارها وسط يديها و هو نظرته فيها عميقة ! .. حنات عينيها بزربة ماقدراتش تزيد تشوف فيه من هاد الموقف لي وقع عارفاه مكايحملش تخرج لي بينو و بينها و بين العائلة لبرا ! .. من الشيئ لي طرا فأنكاد فاش عرف الحاج أحمد بلي تخاصمو فداك النهار و خرج و خلاها نعلات راسها ألف مرة فاش دارت عكس كلامه و توصياته دارت واخا تكون هاديك أختها مكانش عليها تخرج أول موشكيل طرا مع العائلة ! ..

.

جمعات شعرها لقاته باقي كايشوف فيها بنفس النظرة قلبها فقد دقاته الطبيعية فوسط داك الصمت لي بيناتهم و التوثر لي راودها نظراته مكايبشروش بالخير ماعرفات مادير فهاد الحالة .. كون عرفات بلي غاتوصل لهكا مكانت غاتقول ل ياسمين والو كانت تسد فمها ..

ياقوت( .. بللات شنايفها) .. ع عُمر !

بدون رد ! .. ناض من بلاصته بهدوء ماتسناهاش تشرح ليها ولا حتى عطاها فين تهضر ! هز تيشورت دياله لبسو ..

عُمر(ببرود) .. هودي تغذاي !

بدون مايكرر كلامه مرة ثانية ناضت و لبسات شالها و عينيها كايهربو ليه ! .. جاها العجب فاش ماغوتش عليها مولفة فيه كلمة منها يخاصم عليها بالغوات .. لكن هدوءه هو لي خلعها كاطلب الله فنفسها تدوز بيخير هادي و التوبة عمرها تعاود و ياسمين حسابها معاها هو لول ماشي حتى لخر ! .. شافته دخل لديرسينك و خرج لابس تجاكيطة دياله و تعابيره باردة لكن نظرة عينيه مكانتش باردة ! .. خرج بلا كلمة بلا جوج و هي غير شافته خرج ناضت واقفة و تبعاته سادة معاها الباب هو نزل من الدروج و هي طلعات فالسانسور حتى نزلات و قصدات الكوزينة كاتقلب على زاينة مالقاتهاش خرجات من الباب لاخر د الكوزينة لي كايخرج من الجردة بانت ليها جايا و مشات قصداتها ..

ياقوت: .. خالتو حاطيتو الغذا ؟

زاينة( .. غير شافتها تنهدات) .. اه ابنتي يالاه كنت بغيت نعيطلكم !

ياقوت( .. حركات ليها راسها) .. واخا اخالتو ..

زاينة( .. عقدات تعابيرها فاش شافت ملامحها مهمومة ودغيا سهات) .. واش بيك ابنتي هكدا ؟

ياقوت( .. كانت ساهية حتى طلعات فيها عينيها مدمعين) .. ماعرفتشي شني نقولاك اخالتو والله ..

زاينة( .. شداتها من يديها و جلساتها على الكرسى لي ضايرين بالطبلة فين كايفطرو بعد المرات) ..گوليلي مالكي ؟ واشا غير حالك؟

ياقوت ( .. طاحو دموعها) صونيتلا ل اختي ياسمين و قلتلا شني عملاتلي الحاجة و قالتا ل خالتو كلثوم و صوناتلي و عُمر عرف بالي قلتالوم .. ( مسحات دموعها) ..

زاينة( .. وسعات عينيها كاتشوف لجنابها ياك مداز حداهم ) .. احاا سكتي سكتي ! يسمعك دروك كاتعاوديلي يزيد على مابيك ! ( تنهدات) .. مكانش علك تگوليلهم والو ..

ياقوت( .. حطات راسها على صدرها) ..ماكنتشي عارفة غايوقاع هايدا ..

زاينة( .. مابغاتش تقوليها بلي صونات ليها مابغاتش تزيد عليها دوزات يديها على راسها و باسته بحنان) .. صاي ابنتي دروك يرجع عُمر مايطولش فالمخاصمة ! .. غوت عليك ؟

ياقوت( .. زادت تخشات فيها ) .. لا ماغوتشي عليا .. و مقالي والو عمل راسو بحايلا ماسمعلاشي ..

زاينة: .. حتى نتي ابنتي ماتبقايش تحكي لي يصرا بينك وبين راجلك ولا شي غيار يصرا عندنا فالدار ولا مع حد منا راه كلثوم فاش سمعت لابظ عليها تسول وتبغي ترييح من جيهتك راه لي يضرك ولا لي يخسرلك ماكانش وراجلك واگف معاك ..

..