🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°
#الفصل الثاني: إلتئام الجرح🫀
°●الجزء: 144●°
بعد مرور أسبوع ..
طالقة موسيقى هادئة و بطموبيلتها غادا فالطريق تخت الظلام و الليل الخدمة يالاه سالات منها و راجعة لدارها ميتة بالنعاس !! .. وقفت طموبيلتها و شي حاجة تعرضت ليها .. استغربت و بغات تزيد لقدام ولكن والو .. حلت الباب و نزلت تتشوف غير الضلام و الطريق كايدوزو منها طمزبيلات قلال و البوطو ديال ضوء بعيد شوية .. يد تسلمت جسدها قفزت بخوف ماعرفت كيفاش و منين خرج ليها !! قبضها من يديها بقوة و دفعها على طموبيل ساد ليها فمها كاتم غواتها تيهمس ليها و عاض على سنانه .. : تغوتي ولا ديري شي حركة نزهق روحك !! طلقي ماعندك طلقييي !! (نزل يديها تيمررها على فخضها بخبث) .. نسالي مع رزقي وندوزليك الغزالة ..
دفعها بقوة حتى قربت طيح بسبب الطالون و الخلعة لي ركباتها من رجليها لي لابسة و حل باب الطموبيل تيقلب على صاكها .. مافكرت لا مرة لا جوج !! .. حيدت طالونها و لاحته و ركضات بكاع جهدها تتجري على طول الطريق سمحات فصاكها و فلوسها لي فيه و فطموبيلتها و نجات بروحها حتى دخلت لديك الخلا و القيفار صابرة لزاج و الحجر لي تيتخشى فرجليها !! .. دموعها على خدها غاتموت غاتسطى ماعرفات فين تزيد و فين هي !! .. بدات تجري من جديد و غير بدا يبانلها الضوء بعيد رجعت تتجري حتى وصلت ليه تتنهج ورجليها تيسيلو بالدم طاحت على ركابيها و تتبكي !! .. شبعت بكا و ناضت مسحاتهم و تاتدير اطوسطوب بيديها بغات شي طموبيل توقف ليها و تصولها على الأقل غير عند لبوليس باش تديكلاري !! .. حتى حد مابغا يوقف ليها حتى بانتلها طموبيل جايا فالطريق و وقفت ومشات وسط الشانطي غير باش تمنعها تدوز .. نزل راجل كبير فالعمر من ديك الطموبيل لي وقفت تيشوف حالتها و دموعها لي سايلين على خدودها !! ..
-اشصرا ليك ابنتي ؟
( .. طاحت جالسة على الطريق تتبكي بحرقة) .. عاوني اعمي سيلفوبلي عاوني راه غانمووت !!
-(نزل عندها خلعاته حالتها) .. واشتا صرالك ابنتي ؟ حالتك هادي ماراهش على خير .. (تيدور عينيه فالزنقة لي كانت خاوية) .. حد تابعك ولا ؟
-(حركت راسها تتشهق بحرقة) .. كنت جايا من الخدمة ! تگريسيت و هربت منو ناجية براسي خدالي طموبيلتي و فلوسي وصاكي ! ..
-(حرك راسه بقات فيه) .. حسبي الله ونعم الوكيل !! (عاونها ونوضها فشلانة) .. نوصلك لدارك هي لولة ابنتي !!
-(وقفت على رجليها و نقزت مغوتة و دموعها ماحبسوش) .. رجلي اعمي !! ( عضت فمها و قلبها تيتحرق) .. وصلني اعمي عفاك وصلني دغيا !!
ركبت معاه و الحر فرجليها تيقتل ! .. عطاته اسم الشاريع فين كاينين تاتشير ليه لطريق حتى وصلو و خدات عنده تيلفونه و دوزات لزاينة لي غير سمعت صوتها و بكاءها خرجت عندها هي و الحاج وطاحت عليها معنقاها ..
زاينة( .. مخلوعة) مالك ا هند ؟ واشا صرالك ؟
هند(.. بعدت منها تتبكي) تعرضت لگريساج كنت غانموت !
الحاج أحمد( .. عنقها عنده تيدوز يديه على ظهرها بحنان مخلوع عليها) .. صافي ابنتي صافي ! (تيتفحص فيها) .. ماطرالك والو ؟
هند( .. حركت راسها بلا تتشهق) .. هربت منو !
وقفت طموبيلته مستغرب علاش واقفين حدا الباب !! .. نزل مطلع حاجبه تيشوف ..
طاهر: .. اش واقع الحاج ؟ .. (دور عينيه لراجل لي واقف معاهوم و مررهوم جيهة هند لي كانت تتبكي قلبه ضرب و مشى عندها) .. هند ؟ مالك ؟ (شدلها يديها مخلوع عليها) .. البكا علاش ؟
هند( .. عنقاته وغير مزادت تتبكي) كنت غانموت تعرضلي واحد گريساني دالي طموبيلتي و فلوسي !
طاهر( .. شدلها وجهها بين يديه) .. ونتي ماطراليك والو ؟ (تيتفحصها بعيونه) .. حط عليك يديه ؟
هند( .. حركت راسها بلا) .. نو! هربت منو !
دخلوها لڤيلا و مشات نيشان مع زاينة تتغسل ليها رجيلاتها و تنقيهوم من الشوك لي دخلهوم و ضمضاتهوم ليها و ياقوت جالسة حداها ..
ياقوت( .. تتونسها) .. حمد الله ماطرالك والو احبيبة !
هند( .. إبتسمت بزز) .. حمد الله ! عمر طرالي هكا ديما كنجي لخدمة لدار مكايتعرض ليا حد !! ..
زاينة: .. ولا الحرام ! راهوم يحطو غصان الشجر ولا الحجر فالطريق باش يوگفو الطموبيلات و يگريسيو عيباد الله !
ياقوت: .. ياربي السلامة !!
دخل الحاج أحمد عندهم و تبعه طاهر و عينيه عليها بقات فيه و تخلع عليها كاتبقا أخته !! .. خرجت ياقوت حيت أولا و قبل كل شيئ يلقاها معاهوم عمر يدرلها حالة واخا يكونو جالسين معاها زاينة و هند ولكن هو متيعرفش هادشي !! .. حافضاه مزيااان و عارفة طينتو داكشي علاش ناضت وطلعت لبيتها من البارح و هي و عمر جاو عند العائلة ..
طاهر( .. تيمسحلها دموعها) .. ماتبكيش ا هند !!
هند( .. حاطة راسها عليه) .. داكوغ !
طاهر( .. بجدية) .. ديك الدار عمرك باقي تعتبي ليها .. جي سكني هنا مع العائلة !
هند( .. حركت راسها) .. هنا بعيد شوية على الخدمة !
طاهر(باسها فوق راسها) : .. حتى ديك الخدمة بعدي منها مكاترضينيش وخدمي على مشروعك !
هند( .. حركت راسها) .. داكوغ حتى نشوف !
#الأراء ..
أنت تقرأ
أشباه الرجال 🫀مكتملة🫀
Romansa💎مكتملة💎 ⚠️توضيح:العنوان لا علاقة له بأبطال القصة ، هو فقط موجه لبعض الشخصيات أخرى فالقصة ⚠️ الآمال العظيمة هي ماتخلق الرجال العظماء ..! 🔏[ممنوعة منعا كليا من النشر]🔏 #إكــــــــرام_اوشــــريـــــــــف(ي) ...
