أشباه الرجال 🫀مكتملة🫀

🫀الجزء 92🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 92●°

عائشة ماعرفات باش تبلات غفلاتها و صعقاتها .. ماحسات غير بيد قوية جراتها حتى طلقات منها و هي كلها كاترعد شالها طاح و شعرها غطى ليها وجهها .. مكانتش لا يد زاينة و لا يد الحاجة كان عُمر هو لي فكها عليها و شادها بيديه و يديه لخرا غطى ليها شعرها بالشال لي طاح ليها عينيه حمرين فيها على هادشي لي دارت  ! .. هي رجعات لوور و رجليها فشلو عليها بالأعصاب قلبها غايسكت ايما العائلة كانت مزال مصدومة من ردة فعلها العنيفة عمرهم شافوها هكا ديما كاتبان هادئة و ضكتها ماتسمعهاش .. شافته جاي ليها و نظراته و تعابيره مكايبشروش بالخير غير من وذنيه لي تحمرو و يديه لي تعرقات عرفاته طلع ليه الدم بزربة مشى طاهر شدو مانعو يقرب ليها و زاينة حتى هي جات عنده .. عمر دفع طاهر من طريقو ..

طاهر: .. عُمر تهدن راك عارف البنات كي دايرين !

عُمر( .. رجع دفعو و عينيه غير على ياقوت طلع يديه لفوق كايهضر عكس داخله) .. طلگ ا طاهر راني مهدن !

ياقوت غير شافته جاي قاصدها ناضت بزربة هاربة منو حتى زرب عليها و شدها من يديها قبل ماتهرب يحساب ليها غايدير ليها شي حاجة حيت نظراته خلعوها لكن غير رجع جلسها بلاصتها واخا كانت يديه مزيرة على يديها و قصحها منها لكن من فرط أعصابه محاسش بلي مزير عليها و هو باغي غير يفهم شنو وقع عارف ياقوت ماديرش هكا بدون سبب ! عارف طينتها و عارف شكاتسوا ! .. زاينة باقي مصدومة و الكل باقي مصدوم دموعها طاحو من منظر ياقوت لي كانت كاترعد و فمها كايتحرك بواحد الطريقة جابت ليها التبوريشة .. شافت جيهة عائشة لي مخشية فالحاجة و كاتبكي و تخنزر كاتشوف فخوها كاتسناه يدير شي حاجة  ..

زاينة( .. جعرات عليها دبصاح) .. علااااااش تديييرييي هكدااا علاااااش .. ( .. طاحت جالسة شادة راسها و كاتبكي ) .. علاااش تديرو ليا هكداا ؟

الحاج أحمد مشى يشدها و عُمر حتى هو ماحيلتو لمو ماحيلتو لمرتو ماحيلتو لختو ! .. هنا تأكد بلي بصاح نيت عائشة لي منها الفوت غير فاش تصرفات زاينة هكا مابقاش عندو الشك فيها ! ..

عُمر( .. شد زاينة من يديها كايهدن راسه بزز ابتلع ريقه من فرط الأعصاب مزير على سنانه) .. واشا صرا ؟ گعدي و حكيلي راني شاد روحي بالسيف !

كررات ليها الكلام الجريح لي قالت لياقوت و تعابيره عقدهم تفكر نهار عاودات ليه على مها مكانش باغي يجبد معاها الموضوع ديال الأم ديالها و الطريقة باش ماتت مايستحملش يشوفها كاتبكي !

زاينة( مسحات دموعها و كاتهضر مغددة) .. ماربيت فيها غير الخلا ! ماعرفت ماندير ا عمر ماعرفت  ..

عُمر( .. دور عينيه جيهتها بنظرة حادة) .. لي راه تگول مّا صحيح ؟ .. (غوت عليها) .. هضرييي ؟؟

عائشة( .. كاتبكي و تشهق خايفة منه) .. والله اخويا ماقصدت بيها شي حاجة !