أشباه الرجال 🫀مكتملة🫀

🫀الجزء 42🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

#الفصل الثاني: إلتئام الجرح🫀
°●الجزء: ثلاتة و ثمانون ( 42)●°

كلثوم(حيدات طابليتها بزربة): .. ولدي يرحم باك بقا هنا حتى نرجع .. (شافت فياقوت) .. ياقوت زيدي معايا ابنتي غانرجعو دابا ..

خرجات كلثوم و ياقوت تابعاها مافاهمة والو ..

ياقوت: خالتو كلثوم قوليلي شني واقع ...؟

كلثوم(بزعفة) : .. داك الحمار غايطرطق فيا شي عرق صحيح .. مابغاش يجمع راسو ..

خرجو من الدرب المجاور لقاو الناس مجموعين و العيلات كايبرككو و الرجال كايفكو .. مشات كلثوم كاتجري دخلات وسطهم و ياقوت بقات واقفة بعيد مكاتحملش بحال هادشي و كارهة تحضر لمطايفات ماولفاتش هادشي فحياتها كاتخلع فاش كاتشوف هاد المناظير .. كلثوم كاتجر حسين من يديه كله سيكاتريسات بكترة المضاربات و لي طراس د زيزوار فيديه ناصل تريكوه من لفوق عريان و صدره واشم فيه ضارب خط وسط حجبانه مطلعهم لفوق معصب و كايسب ..

كلثوم(عاضة على سنانها معصبة): .. زييد قدامي زيد ماتزيدش تشوهني مع ناس !! ..

واحد من دراري كان واقف كايتفرج عارف شنو واقع حال فمه و باينة فيه هبيل كايهضر بلا فرانات مشى نيشان قاصد كلثوم كايضحك و كايسرسب ليها كولشي ..

***: .. خالتي ولدك كيبغي الميمات ههههههههههه لقاه ولد العسكري مع مو ..

نقز واحد الولد أخر منهم مخاطب حسين لي كان حالف مايتفك مع ولد العسكري ..

***: واحسينة نتا لي عندك ذوق اصاحبي لميمة تصرف عليك و تهنيك من تمارة لي كاضرب مع الكرابي ! ..

كلثوم(جاوباتهوم معصبة معصبة): .. نعلت الله و عليكوم ! .. ماتحشمو ماترمشو ماتحتارمو حد ..(أشارت لواحد منهم) .. غا بلاتي لاماقلتها لمك ..

جرات حسين الملقب ب حسينة فدربهم تقريبا كولشي كايعيط عليه حسينة إلى مو .. عاودات جراته بجهد حتى تفكو و ماكملوش هنا بداو يسبو سمطة لتحت ..

***(كايمسح الدم من فمه): .. نلقاك تاني مع الواليدة غاتشوف لي عمرك شفتيه فحياتك ..

كلثوم(شاداه من يديه جاراه معاها خارجة من وسط ديك الجقلة): .. مابغيتيش تفارق مع مرت العسكري ؟ .. (شافت ياقوت لي مخشية فالحيط مخبية) .. ياقوت زيدي ابنتي راه هادو حالهم ديما هكا .. (رجعات شافت ف حسين كاتخنزر فيه) .. بغيتي تصيفطني لقبر ؟ اا هضر ؟ .. ديما مشوهني مع الجيران ديما .. مرضتوني فحياتي بالفقصة و الغمة .. (جاتها البكية بقوة الفقصة ) ..

ياقوت(مشات عندها عنقاتها من كتفها ): .. خالتو كلثوم صافي ماتقلقيشي ..

حسين(مطلع حجابنه معصب و مكاميش طالع ليه دم دبصاح باغي غير فيمن يخوي أعصابه عينيه على ياقوت و تيهضر مخاطب كلثوم ): .. وصاااف الواليدة تانتي را غاطلعت ليها البوطة و لصقات فيا ! ..