أشباه الرجال 🫀مكتملة🫀

🫀الجزء 63🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 63●°

طاح الظلام و السهرة بدات ! .. أول يوم فالعرس الناس حاضرة و ناشطة و الغناء مسموع فالأرجاء كاملة .. عند الرجال لي فالخيمة دايرين بالعريس كايعلقو ليه الفلوس .. و عند النساء لي يالاه خرجو العروسة و جلسوها فالبرزة بتكشيطة فالموف بارد معمرة بالعقيق و المضمة د الذهب لي هداتها زاينة فالكادو .. شعرها مطلوق و مصفف بعناية مزين بتاج فوق راسها و مكياج سموكي برز ملامحها و زادهم جمال .. جات عندها ياسمين بتكشيطة فالأبيض مفصلة على طايتها و شعرها طالقاه على طولته و مكياجها مركزة فيه على عينيها و العكر لونه أحمر مطراسي على شنايفها الصغار .. جلسات حداها كاتصور معاها و تحط فالسطوري فالأنستغرام و الواتساب .. حتى جاها ميساج فالواتساب مردود من السطوري ..

- راجل ختك مكايتلفش بيناتكوم الغزالة ؟ ..

ياسمين تحنات عليه كاتقراه و إبتسامتها كاتوساع و كتبات ليه : .. علاش الغزال ؟ (مع صيفطاته بانو ليها جوج شرطات زرقين باين بلي ماخرجش من الميساجات) ..

-كاتشابهو بزاف ! .. توحمات مكم على العسل و حطاتكم ..

ياسمين حنات راسها باش ماتعيقش بلي كاتضحك لتيليفون : .. ماعندناش نفس الأم مشاركين با ..

- حتى خوك جايب فيكوم ! .. طلعتو كاتشبهو لباكوم ..

ياسمين عضات شنايفها و جاوباته بالزربة: .. و نتا ازين لمن طلعتي كاتشبه ؟ .. (صيفطاته و رجعات كتبات ميساج أخر) .. زينك عمرني شفت بحالو حتى ليك نتا ! ..

فاش قرا ميساجها الأخير قهقه كايضحك حتى دخل عليه راجل من رجال الجوندارم ..

جدارمي: .. سي حكيم ! (دخل عنده لبيرو) .. طاحو فجوج مضاربين على الأرض ! واحد نزلوه للبريكاد ولاخر لسبيطار !..

جمع ضحكته و طفى تيليفونه دارو فالجيب و ناض بلبسته الخاصة بالجدارمية عاقد حجبانه خارج من البيرو  ..

......................

ياسمين بقات حاضية الميساجات كاتسناه يجاوبها منغمة بالهضرة معاه .. شافته تعطل و مخلي ميساجها معلق .. تمحات الإبتسامة على وجهها و طفات التيليفوت كاتمتم بينها و بين راسها "ولد ال*حبة خلا ليا vu !!" ..

نسات همها و ناضت حزمات كاتشطح مع البنات بيناتهوم نوضات هند معاها و عائشة حتى هي تبعاتهم كاتشطح معاهم و العيالات بداو بالزغاريت  و كولشي ناض يشطح و ينشط .. شافت ياسمين جيهة ياقوت و مشات قادصاها نوضاتها تشطح معاهم .. ناضت معاها شادة التكشيطة ديالها حيت كاتجرجر ليها .. داروها الوسط و بداو يدورو عليها و هي حشمانة كاتحرك غير كتافها و تبتاسم ليهوم و هي وسط فرحتها عيون حسودة و حاقدة مراقبينها من لور و كون فيديها تقتلها ماترددش ! .. الدموع عمرو عينيها غايطيحو فأي لحظة و هي كانت غاتكون بلاصتها ماشي العكس ! .. قلبها كايتقطع بالغيرة و كون كان فيديها ترجع الزمان لور ماتفرطش فيه ! .. عائشة عرقات بالشطيح و حيدات زيفها كاتنيش بيه و خرجات من وسطهم بانت ليها مينة عينيها مدمعين و وجهها حمر غاطرطق ! .. مشات عندها جلسات حداها ..