أشباه الرجال 🫀مكتملة🫀

🫀الجزء 87🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 87●°

كانت مراقباهم بعيونها الحقودة و الشرارة لي كاتخرج منهم خلاو دموعها يطيحو من أول ماركبو فالخيل و جلسو فالخيمة و فاش هزها بين يديه !! .. تبعاتها حفيظة فاش شافتها غادي تحماق بالبكا خلات خدمتها و عتاذرات من الحاجة لي عطاتها الموافقة تمشي لدار و تديها حيت حالتها لا تبشر بالخير .. دخلات نيشان وطاحت كاتبكي و تعض فالمخدة و تفقص قلبها غايسكت و حفيظة كاتشوف فيها و تبكي بالدموع كتر منها و على الحالة لي وصلات ليها !!

حفيظة( .. مسحات دموعها) .. صافي ابنتي صافي عفاك ابنتي صافي ! .. ( شافتها كاتنتف راسها و كاتخبش وجهها مشات كاتجري عندها مخلوعة شدات يديها و دموعها طايحين) .. صافي ا مينة صافي عفاك ابنتي عفاك حميمتك ابنتي صافي .. كاتعدبيني معاك ابنتي كاتعدبيني ..

مينة( بهستيرية) .. باش حسن مني هي باش ؟ علاش دارو ليا هكا علاش ؟ علاش فضلوها عليا علاش ؟ ياك انا لي كبرت وسطهم ماشي هي ياك ؟ ( .. غوتات لربي لي خلقها) .. غانتسطى اااا ماااماا غانتسطى .. بغيت نموووووت ولا تموووت هي يا نموووت انا يا تمووت هي مانقدرش نزيد نصبر و نشوفهااا معااه و كايعاملوووها هكاك   ..

حفيظة( .. شداتها كاتعنق و تبوس فيها و تشهق) .. حقك غتاخديه ابنتي حقك غايرجع ليك ! حقك مايضيعش غير هكك و بكاك مانخليهش يطيح بلا موجوب .. ( عضات على سنانها بحقد) .. الحرباية لي حطتها!! النهار اللول فاش جابها عندي و استقبلتها فداري كون عرفت هادشي غايوقع بيدي كنت نسممها و نموتها ولا دير ليك هكا و تحرق ليك قبلك ! ..

طلقات منها حفيظة و قلبها كايبكي الدم على بنتها ! .. الصبر مابقاش عندها ولات تبان ليها ياقوت قدامها و كاتجرب فيها كاع أنواع القتل .. جبدات تيليفونها من بزطامها و صونات للفيكس د الڤيلا و جاوباتها وحدة من الخدامات قالت ليها دوز ليها الحاجة حتى سمعات صوتها هاد هضرات ..

حفيظة: .. الحاجة غير سمحيلي ! ( .. طاحو دموعها من عينيها) .. رجلي انا وبنتي مغاتبقاش تحط فديك الدار من يومنا هادا ! ..

الحاجة فاطمة (بصدمة) .. شكاتقولي ا حفيظة ؟

حفيظة( شهقات) .. بنتي تحملات ذنب كبير عليها بنتي كاتعدب وانا مانقدرش نزيد نشوف فيها كاتبكي و تحرق كتر من هكا بسبب عروستكم !

الحاجة فاطمة : .. تقاي الله احفيظة ! نتي و مينة بناتي و حدايا بنتك كبرات و على يدي تربات و بغيتي تفرقوني عليكوم على قبل ماتسوا ماتصلاح ؟

حفيظة( مسحات دموعها) .. سمحيليا الحاجة مانقدرش نزيد نخلي بنتي فديك النار ! .. (شافت ف مينة لي ساهية فنقطة وحدة و كاتشهق ) .. تشوفي حالتها يضرك قلبك !

الحاجة فاطمة( بإبتسغراب ) .. هادا كلو حب فيه ؟ (تنهدات) .. ماراضياش بهادشي ا حفيظة بحالي بحالكوم راكي عارفاني مزيان البراني ماعنديش معاه نبغي الناس لي يكونو قراب ليا نكون كنعرفهم مزيان ! .. ولكن مانقدرش نبزز عليه بنتك درت لي عليا و دخلت بخيط بيض بيناتهوم .. ولكن ولدي عُمر صعيب يرجع صعيب بنتك لي تهورات و فسخات الخطبة .. باقي هادي ماتسرطات ليا و باقي كانحن فيك و فيها
واقفة فالكوزينة كاتمشي و تجي بعدما نصبات الغذاء و كلام ياسمين هو لي كايدور فبالها ! .. تلفات و ماعرفات مادير فهاد الحالة .. حتى من زاينة عرفاتها ضريفة معاها ولكن الحاجة فاطمة كانت كاتبان ليها عادية جدا حتى أنها عمرها لاحظات فيها شي حاجة ! ..طفات على الغذاء و جبدات تيليفونها من جيب الطابلية لي لابسة كاتقلب على نمرة زاينة حتى لقاتها و دوزات ليها أبيل ..

كلثوم( .. سمعات صوتها و إبتسمت) .. السلام عليكم ! لالة زاينة كي دايرا لباس ؟

زاينة: .. مليحة أختي كلثوم و نتي كيراك ؟

كلثوم: .. نحمدوه و نشكروه ! .. ياقوت كي دايرا حتى هي لباس عليها ؟

زاينة: .. حمد الله أختي! .. لگيتينا عاد غانتغذاو ..

كلثوم( .. صغرات عيونها) .. ااه وشكون وجدو ؟

زاينة( .. ضحكات) ..  الخدم أختي كلثوم لي راه يديرو !

كلثوم( .. تنهدات) .. يحسابلي ياقوت !

زاينة( .. بإستغراب) .. كيفاش اختي كلثوم؟

كلثوم ( .. بجدية) .. اشغانقوليك الالة زاينة ! .. عارفة معزة ياقوت عندي و بحالها بحال ياسمين و حسين مكانفرقش بيناتهم! .. وصلاتني الخبار بلي الحاجة فاطمة نوضات ياقوت مع الصباح توجد الفطور ! انا على مكانعرف العروسة مكاتحط يديها فالما حتى دوز سبعيام .. (سكتات و رجعات هضرات) .. و تبارك الله الدنيا عندكم عامرة بالخدم و منوضا العروسة تشقا ؟ شوفي اليوم اشدارت غذا يعلم الله اشدير !!

زاينة( .. بنبرة هادئة) .. سمحيلنا أختي كلثوم ! .. يآذيها حد ولا يمحنها حد ! هضرتي گلتها لك من النهار لول و الحاجة فاطمة راها تفاهمنا معاها !

كلثوم( .. إبتسمت) .. ديريها فعينيك الالة زاينة ربي يكتر خيرك مانحتاجش نوصيها عليك ! ..

زاينة( .. تنهدات) .. نخليك على خير ! ..

..