أشباه الرجال 🫀مكتملة🫀

🫀الجزء 105🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 105●°

طلع هو وياها لفوق حيدات عبايتها و شالها و بقات غير بالقفطان مبغاتش تحيده جلسات على سريرها و هي حاسة بالسخفة وهو بدل حوايجه و جا جلس حداها معنقها عنده و حاط راسها على صدره ..

عُمر( .. نزل عيونه فيها بانت ليه كاتسد فعينيها و تحلهم ببطئ) .. كي راك تحسي براسك ؟

ياقوت( .. طلعات عينيها فيه و إبتسمت) .. مزيانة!

بقات ناعسة على صدره لمدة و الصمت بيناتهم أنفاسهم فقط لي كايتسمعو بدا الدقان فالباب و يالاه بغات تنوض رجعها بلاصتها ماخلاهاش وهي عيانة ناض هو حل الباب لقاها زاينة ..

زاينة( .. بإبتسامة) .. فيراها ياقوت ؟

عُمر( .. حك بصبعه حاجبه) .. راها لداخل ! واشا بغيتيها ؟

زاينة: .. واخا ندخل عندها ؟ ..

عُمر( .. ضحك) .. واه دخلي ا مّا علاه شكون هاد لي يريضك ؟ ..

زاينة: .. زعما نخاف ماتكونوش مساليين وصافي !

دخلات عندها لقاتها باقا بلاصتها مشات جلسات حداها ..

زاينة: .. ياقوت وليت دروك مليحة ابنتي ؟ الحاج و هند راهم يسولو عليك تهودي عندهم !

ياقوت( .. إبتسمت و تقدات بلاصتها واخا حاسة بالعيا ولكن بعات تنزل) .. واخا أنا نلبس ونزلو عاندوم ! ( .. شافت فيه) .. عُمر ننزل؟

حرك رأسه بالإيجاب و مشى هز ليها العباية و الشال ديالها لبساتهم و  ناضت مع زاينة نزلات معاها ولكن داتها نيشان لبيتها عكس داكشي لي قالت ليها .. سدات الباب و ياقوت كاتشوف فيها علاش جابتها لبيتها مشات جلسات على الناموسية كاتشوف كاتحل فالمجر حتا دارت عندها و جات كاتخطي عندها .. جلسات حداها و حلات الشاصية ..

ياقوت( .. عقدات تعابيرها فاش لمحات التيست دالحمل) .. خااالتوو !!

زاينة( .. بإبتسامة مداته ليها) .. سيري جربيه !!

قلبها بدا يخفق من الثوتر و إحساسها فشكل عمرها حسات بيه ناضت من بلاصتها و شداته عندها و خدات الورقة لي معاه كاتقراها كيفاش تدير ليه و تتبع خطواته دخلات نيشان لحمام بعده خرجات عندها وهو فيديها مشات جلسات حداها كايتسناو النتيجة تبان شحاال عاد لمحات خط أحمر لي ولاو جوج خطوطة حدا بعضهم  ..

ياقوت( .. هزاته فيديها و عيونها كايلمعو فيه ) .. طلااع بوسيتيف اخالتو !!

زاينة( .. ناضت بزربة من بلاصتها و ضحكة مبشورة على ثغرها) .. شكرتك ياربي و حمدتك ! ( .. مشات عندها عنقاتها) .. مبروك عليك ابنتي مبرووك !!

ياقوت( .. بادلاتها العناق و عينيها غرغرو) .. اوووف ماعرفتشي مالي !!

زاينة( .. كاتمسح ليها دموعها) .. الفرحة ولات فرحتين !!

يديها كايترعدو مامتيقاش بلي غاتولي أم و هي فهاد العمر ! .. فرحات حيت جنينها ايكبر معاها و هي فالعشرينات من ديما كايعجبوها الدراري الصغار و الحب و دفئ بين الأم و الإبن هي بنفسها عاشت هاد الشعور فحضور أمها واخا ماشبعاتش منه لكن بقا فبالها و بقا فقلبها ! ..

..

زاينة كانت كتر منها فرحانة بولادها ! .. ولي غايتزادو فالعائلة و كتر كاع فاش غايجي من ياقوت لي من نهار لول شافتها بغاتها لولدها و شحال وهي كاتمنى يجيبو شي وليد صغير و هاهي دابا تحققات أمنيتها .. و شكون مايتمناش وحدة مثلها الأداب و الصواب و الإحترام و طيبوبة قلبها و حنيتها !!

زاينة: .. عُمر فاش يسمع الخبار هادي ماتقدو فرحة !

ياقوت( .. كاتعض شنايفها و كاتبتاسم و الإختبار باقي فيديها كاتشو فيه) .. نعملالو مفاجأة !!

زاينة( .. كاتفكر) .. گعدي و نگادها لك!!

جلسات بلاصتها و زاينة مشات حلات المجر و جبدات منه بواطة صغيرة مزوقة بالألوان حيدات داكشي لي فيها لداخل و مشات جلسات حدا ياقوت ..

زاينة( .. شدات عندها الإختبار و دارته فديك البواطة و سداتها و قادات ليها الخيط و مداتها ليها) .. عطيها ليه ! و ماتگوليلوش راكي حاملة خليه يحليها و يشوفها !

ياقوت( .. إبتسمت ليها) .. هاتشي لي كون غانعمل اخالتو ! ..

خرجات من عندها ماقاداها فرحة ! .. خدات تيليفونها صونات ليه يطلع عندها لفوق لبيت يكونو بوحدهم و داكشي لي كان ماداز والو حتى طلع عندها مستغرب علاش عيطات عليه ..

ياقوت( .. خطات عندها و عنقاته) .. بغايت نعطيك واحيد الكادو! ..

عُمر( .. دوز يديه على ظهرها) .. واشتا ؟

ياقوت( .. مدات ليه البواطة) .. حلها وتشوفا بعينيك ..

عقد تعابيره و بدا يفتح فيها حتى حيد ليها غطاها لمح الإختبار و الخطوط الحمرة لي فيه إبتسم و طلع فيها عينيه ..

عُمر: .. حااملة ؟

ياقوت( .. حركات ليه رأسها و الدموع تحجرو فعينيها) .. اا ه !!

عُمر( .. حك ذقنه و رجع شاف فالإختبار بعده طلع فيها عينيه وجرها عندها عنقها) .. رااكي فرحتيني الياقوت بالخبار هادي !! ( .. مسح ليها دموعها) .. لاشتبكي ؟

ياقوت( .. إبتسمت فعز دموعها) .. دمووع الفارحة !

عُمر( .. باس جبينها و مسح ليها دموعها) .. لافامي فخبارها ؟

ياقوت( .. حركات رأسها بالنفي) .. لا مافخبارومشي ! نتينا و خالتو زاينة لي عرافتو ..

..