أشباه الرجال 🫀مكتملة🫀

🫀الجزء 99🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 99●°

عينيها مشاو نيشان لخنجر لشاداه فيديها زادت عقدات تعابيرها و قربات عندها بغات تحيده ليها لكن ياقوت مزيرة عليه و كاتشوف فيها بنظرات نارية ! ..

عائشة( .. طلعات فيها عينيها كاتخنزر) .. طلگي زمر ! شراه يدير عندك ؟

ياقوت( .. نترات ليها يديها بجهد) عامل راسك مكاتعرف والو ؟ .. (بإستهزاء) .. كونت غاتقتلني ! (عضات فمها بفقصة) .. وصلات فيك تقتليني ؟

عائشة( .. بعدات منها كاتشوف بعدم إستفهام) .. شراك تگولي نتيا ؟ .. بقالي غا نوسخ فيك يدي !

ياقوت: .. الموشكيلة الوسخ في فعايلك !

عائشة( .. جراتها من يديها باغا تخرجها) .. حطي داك الخنجر و خرجي بحالك !

ياقوت( .. دفعاتها) .. طلقي منييي ! ( لاحت الخنجر لأرض و قربات عندها) .. كيفاش تعطيك خاطرك تحاول تقتول مرت خاك كيفاش ؟ .. ( .. بللات شنايفها) .. لا نتينا لا غيرك غاتفرقني علو أنا و خاك ماتفرقنا غير الموت !

عائشة( .. تحنات و هزاته كاتشوف فيها و تعابيرها غضبانين) .. ياقوت سيري بحالك خيرلك ! راكي بديتي طلعيلي فوگ راسي !

ياقوت( .. بقات كاتشوف فيها بلا ماترمش) .. نخلي خاك هو لي يتفاهم معاك ! (طلعاتها و نزلاتها) .. مابغاشي نجبد معاك الصداع كتر من لي عملنا الصباح .. (هزات اصبعها بتحذير) .. والله و تحاول مزال تأديني مانصبرشيلك .. ( قلبات وجهها بنفور) الله ياخد فيك الحق !

قطعو حسهم فاش دخلات زاينة كاتشوف بإستغراب و عائشة مفاهمة والو و الأهم عندها هو الخنجر شكايدير عندها و فين لقاتو ؟ ..

زاينة( .. كاتبلق فعينيها) خير الله ؟ شكاديرو هنا بزوج ؟ ..

ياقوت( .. تنهدات و شافت فعائشة) .. ماعرفتشي شني غانقولك اخالتو ! .. (شافت جيهة زاينة و أشارت ليها لخنحر لي فيدين عائشة) .. العايلة كانت غاتقتلني !

زاينة( .. شهقات و حطات يديها على فمها) .. شراك تگولي اياقوت ؟ هبلتي ؟ .. (مشات عند عائشة شداتها و شافت فياقوت) .. بنتي ماتوصلش فيها تقتل روح !

ياقوت( .. خرجات تنهيدة عميقة) .. كونت جالسة فالخيمة سمعت حاس شي واحد و نوضت نطل و جاني هادا فيدي .. ( أشارت ليها لخنجر لي فيد عائشة و مدات يديها لخرى كاتحل فالفاصمة ) ..

زاينة( .. قربات عندها و شافت جرحة حسات بالخوف عليها و شداتها جلساتها على الناموسية ) .. احا مزال كاتوجعك ؟ ..

ياقوت( .. عضات فمها بالحر فاش حلات الفاصمة) .. شويوش ..

زاينة( .. دورات الفاصمة من جديد خافية الجرح) .. حسبي الله و نعم الوكيل ! .. ( طلعات فيها عينيها بخوف) .. متأكدة اياقوت ضربوك بيه !

ياقوت( .. حركات رأسهت بالإيجاب و عينيها دمعو ) .. مكانكدبشي اخالتو ! .. ( .. شهقات ) حتى من عُمر ماقلتلو والو !

زاينة( .. ضربات فخضها بفقصة ) .. علاش ماگلتي والو ؟ .. (ناضت و عقلها غايوقف ) .. وصلات بيهوم يصفيوهالك وسط دارك ووبيناتنا !

ياقوت( .. مسحات دموعها) .. هاتشي لي كاين اخالتو ! .. (شافت بنص عين فعائشة كاتمعني عليها) .. ماعرفتشي فاش ضريتوم حتا توصل فيوم يبغيو يقتلوني ! .. (بحرقة) .. ليرزيني اخالتو مانبقاشي نصبر لبنادم !! عييت نسكوت و نعطي لقلبي صبرت لكلام كايجراح و يبكي دم صبرت و زدت صبرت .. (كاتهضر بكل جوارحها ) .. ولكن توصال فيوم يحاولو يقتلوني هنا مانصبرشي !! ( تذكرات حادثة اللفعة لي حطوليها) .. صبرت فلول ولكن صبر ليو حدود !

زاينة عينيها برقو بالدموع عمرها شافتها هكا دائما كاتسكت على حقها و لكن حتى واحد معايزيد يسكت على حقو و على لي ضاير بيه ؟ .. ممكن أنه يسكت فلول ولكن لداخل ديالك غايعيى و قول حبس! .. و علاش غاتزيد تصبر ؟ واش هوما ديما لي يتعداو عليها ؟ .. داكشي لي دوزاته مع عائلتها كي والو مع هادشي لأنه فاتو حدودهم بزااف .. و مزال فاش كانت عند عائلتها كانو كايهضرو فيها و ف الأم ديالها و طلاقهم النفاق شيئ جاري بيه العمل وسط الناس اي واحد غايهضر فيك واخا الجد خيري كان قاسي معاها لكن عمره حاول يأذيها و كان قاسي مع كولشي ماشي غير هي حتى من بناته مكايحنش فيهوم و رغم القساوة و كلامه و غواته كان موفر ليهوم كولشي و كان مهلي فيهوم من ناحية الماديات و لي بغاوها كاتحضر فالحين واخا كان حابسهم و ممنوع يخرجو و يعتبو الباب لكن على الأقل كانت فأمان ! .. كانت ماعجباهاش العيشة لي كانت فيها بسباب خيري لي كلامه و خصاماته كايهرسو الحجر لكن هنا حبس مخها و توقف عندها الوقت و قالت ديك العيشة حسن من هادي !

..

الحاجات الوحيدة لي بانت ليها فالنور هي هاد العائلة بإستثناء الحاجة فاطمة و خاصة عائشة لي عرات نيابها و حاولات تأذيها .. مخها كايفكر غير فكيفاش تنجا و قلبها مع عُمر ! .. قلبها كايغوت ليه غير هو و مع راسها قالت علاش مانقولهاش ليه ؟ .. علاش مايعرفش شنو ضاير بيها ؟ .. خرجات بهدوء و خلات زاينة مع عائشة ..

زاينة( .. تنهدات ) الخنجر تضربات بيه ؟ .. (طلعات فيه عينيها) .. الخنجر ديالك ا عائشة !

عائشة( .. طاحت على السرير مصدومة) .. واش أنا نقتل امّا ؟

زاينة( .. تذكرات لي و قع فالصباح و عقدات تعابيرها فيها ) .. عايرتيها فالصباح بواليديها ! .. علاه هي واشا ذنبها لا ماتت مها و باها ماحنينش معاها ؟ ( .. طلعات بيديها) .. لا تنسايش بلي عندها عائلة تخاف عليها و جبناها بعزها و كرامتها من عندهم مالگيناهاش فالزنقة نهار لول فاش تلاگات بخوك كانت بمشاكيلها و عاونها و اي واحد يدير كيما دار خوك و گاع فوتنا المشاكيل فحياتنا ماشي غير هي ! و نتي كلامك كولو فالخوا !

عائشة( .. بلعات غصتها و دموع فعينيها) .. لهاد درجة معارفاش بنتك كي دايرا ؟ .. (حطات يديها على فمها كاتمة شهقاتها) .. باركاك غير خويا لي حبسني فالبيت و حيد ليا التيلفون و البيسيات و الطابليت !! .. بجوجكوم كاتغلطو فحقي ! .. ( طلعات فيها عينيها حمرين) .. هاد الظلم لي طيحتو عليا مانسمحلكمش عليه ! ..

..