أشباه الرجال 🫀مكتملة🫀

🫀الجزء 62🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 62●°

عيونها الواسعة زادت وسعاتهم بصدمة و هي مراقبة لفعى مخرجة راسها و كاتشمشم بلسانها ! .. أفعى كحلة عيونها لي كايبانو كايبرقو من الفوق ! .. شافتها كاتخرج قاصداها على طولها و راسها لفوق .. مشات كاتجري خارجة من البيت كاتغوت بإسمه هو لي جا فبالها .. تصادفات مع زاينة و عائشة لي كانو طالعين فدروج .. مشات كاتجري و تنهج عند زاينة لي هي و عائشة تفزعو فاش شافوها وجها صفر و على شوية كانت غاتعكل فالدروج جاب الله شادة فمسمار حتى طاحت على زاينة معنقاها كاتنهج  ..

ياقوت( .. كاتشير ليها للفوق و عينيها خارجين): .. خالتو لفعة لفعة ! .. ( عينيها دمعو بالخوف) .. خالتو لفعة لقيتا فالكادو  ..

زاينة و عائشة تصعقو من كلامها كايشوفو و لسانهم تجمد ! مصدومين كتر منها ..

زاينة(بنبرة قوية مخاطبة عائشة و غواتهم كله مسموع): .. رووحيي عيطي لخووك دغيااا .. راهو عند رجاال روحي عيطي عليه !!

مشات عائشة و هي فحالة صدمة ! .. زاينة معنقة ياقوت كاتسكت فيها لي بقاليها شوية و تسخف بين يديها ! .. جا عُمر و داز من حداهوم كايزرب بخطواته طالع فدروج .. ياقوت شافته طالع لفوق زادت تخلعات خايفة عليه شافتها زاينة بغات تبعه حبساتها ..

زاينة(كاتمسح ليها دموعها): .. غايگتلو ماتهوليش عليه ابنتي ! ..

حركات ليها راسها و بقاو مدة قصيرة واقفين حتى جا طاهر كايسول على عُمر ..

طاهر(مخاطب زاينة): .. فين عُمر ؟

زاينة: .. راه فالبيت لفوك! ..

طلع عندو حتى كانت جات كلثوم و ياسمين و هند فاش سمعو الخبار من عائشة ايما حتى حليمة ماقالو ليها والو لحد الآن باقي ماتجاوزات بزاف الصدمة لي دازت منها مابغاوش يزيدو عليها هاد الخبار ..

كلثوم(جات كاتجري عند ياقوت كاتقلب فيها): .. بنتي باك ما طرات ليك شي حاجة ؟ .. (حطات يديها على راسها) .. حسبي الله ونعم الوكيل! ..

ياسمين(قبضات تعابيرها): .. ياقوت ! .. واش خرج ليك من شي قنط ولا شنو وقع  ؟ ..

ياقوت(حرمات راسها بالنفي و نبرة صوتها مبحبحة بالبكاء): .. لا جبرتو فالكادو ..

هند(وسعات عينيها بصدمة): .. ياربي السلامة ! .. (دوزات يديها على ظهرها بإطمئنان) .. ماتخافيش احبيبة ! ..

ياسمين(عضات لسانها من لداخل مغددة): .. شكون هاد الزمر لي حطو !! .. (يالاه غاتبدا تسب حتى منعات راسها حشمانة) .. ماعرفتوش شكون حطو ؟ ..

زاينة: .. ماعرفناش ابنتي ! .. حتا من لكادوات كتار مانعرفو لا ديالمن حتى لا ديال هادا ! ..

ياقوت(مسحات دموعها و شافت فكلثوم): .. خالتي فاينا خالتو حليمة ؟ .. (بصوت مرتعش) .. ماقلتولا والو ياك؟ ..