أشباه الرجال 🫀مكتملة🫀

🫀الجزء 57🫀

🔏[مـمـنوعـة مـن الـنشـر]🔏
°○ الكاتبة: إكرام أوشريف(ي)○°

  #الفصل الثاني: إلتئام الجرح🫀
°●الجزء: 57●°

سمعات صوت تيليفونها تيصوني شافت رقم المتصل و رجعات شافت في زاينة ..

عائشة: .. مّا! (ناضت واقفة ) .. نروح نشوف البنت عرضاتي لاسواغي حشومة مانروحش! ندي لها غير الكادو بعدا ..

زاينة(مسحات يديها فالبابي): .. يديك عُمر ؟ ..

عائشة: .. واه هو لي صونالي دروك وكطع ! ..

خرجات من الصالون نازلة لتحت شادة قفطانها و كاتقاد زيفها سبقات الطواليت خدات بابي جينيك تاتنقص من ماكياجها عاد خرجات دايزة من الجردة حتى لقاته واقف متكي على طموبيلته قصداته سلمات عليه و هو عنقها كتفها عاد ركبات جنبه ..

عائشة(عطاته لوكاليزاسيون و قالت تتمسكن عليه): .. و كون شريتيلي لوطو خير من هك ! ..

عُمر ديمارا طموبيل بلا مايجاوبها و هي شافته سكت معاوداتش هضرات معاه من نهار دارت كسيدة و هو يمنع عليها طموبيل ماحبس حتى لقدام فيلا صغيرة من برا كاتسمع صوت الموسيقى يالاه بغات تحل الباب حتى قاطعها ..

عُمر: .. نصونلك تخرجي فيساع !

عائشة(حلات الباب): .. واخا ! ..

و دعاته و نزلات من طموبيل هازت الكادو لي شراليها تديه معاها .. كاتخطي بالطالون فوق الزليج لي داير بالفيلا دخلات حيت أصلا الباب كان محلول كانت عامرة بالبنات و الدراري ! .. عقدات حجبانها مكانش يحسابلها غاتكون هكا و المشروبات فوق الطبلة منهم لي بالكحول و لي بلا بيهوم .. تلاقات ليها مولات الحفلة فيديها كاس النبيذ الحمر عنقاتها و باستها من حنكها ..

***: تعطلتي ! ..

عائشة(عطاتها الكادو): .. مبروك النجاح !

***(جراتها من يديها): .. الله يبارك فيك .. اجي نعرفك على العائلة ! (غمزاتها) .. واحد ولد عمي من نهار شافك معايا فالتصويرة و هو كيسولني عليك !

عائشة(عقدات تعابيرها): .. واشابغاني أختي ؟

داتها لجيهة فين جالسة عائلتها و عائشة معاها كاتبتاسم ليهوم سلمات عليهوم كاملين ..

غمزات البنت ليومعاها واحد منهم لي كان بدوره عينيه الحادة و لونهم رمادي على عائشة نظراته مامفهومينش ! ..

***(نعتاته ليها): .. ولد عمي!!  .. (إبتسمت ليها) .. هو لي قلت ليك عليه قبيلة ..

.

عائشة(حولات أنظارها نحوه و إبتسمت ليه): .. متشرفين ! ..

بادلها الإبتسامة و عينيه مزاحوش عليها طول هاد المدة لي جالسين فيها .. الراحة ماحساتش بيها أبدا وسطهم رغم أنهم كيجبدو معاها الهضرة لكن هاد الأجواء مامناسبينهاش ! هي بعيدة كل البعد على بحال هاد الناس ! الشراب و الكارو عاين باين .. طاح فبالها عُمر لاجا يديها و يقدر كاع يدخل هنا مابعيدش !  مجرد التفكير فهادشي خلى قلبها يدق بخوف منه ! و خوفا لا تخسر ثقته فيها ..

عائشة(ناضت من مكانها و إبتسمت ليهوم بلباقة ): .. نخليكوم ! .. باقي تابعني شلا صوالح ! ..

***(رشف من كاسه و حطه على الطبلة و نطق مخاطبها): .. نوصلك ؟

عائشة(إبتلعت ريقها من كلامه): .. لا شكرا بلا ماتعذب راسك ! .. خويا جاي يديني ..

ودعاتهم و ودعات مولات الحفلة و خرجات من تما عاد بدات تنفس بإرتياح كانت مخنوقة و معاجبها حال ! .. تعصبات و توترات من داك الجو الغير لائم ليها .. حلات تيليفونها و دوزات رقمه يجي يديها ! .. بقات واقفة تما حتى سمعات صوت خطوات جايين وراها دارت بسرعة لقاته هو خارج و عينيه عليها و باين بلي جاي قاصدها فاش شافها واقفة بوحدهت و هي لي كيدور فبالها هو عُمر لي جاي فطريق لا لقاها واقفة معاه !! ..

- علاش واقفة بوحدك ؟ .. (أشاره ليها لرونج دياله مبلاصية فالجنب) .. زيدي نوصلك !

عائشة(متوثرة و كادعي فخاطرها مايلقاهاش معاه): .. نو ميغسي ! .. كانساين خويا يجي !

تيطلع و ينزل فيها و لي أثار إنتباهه أكتر هو الزيف لي لابسة و ساترة بيه شعرها ! .. طول ما فاش كايحضر لشي حفلة عمره صادف شي وحدة ساترة راسها ..

-داكوغ ! .. (مد ليها يديه كايصافحها) .. بالمناسبة سميتي ماجد ! ..

عائشة(بادلته المصافحة كاتسنى غير ايمتا امشي): .. و أنا عائشة متشرفين ! ..

ماجد : .. سميتك زوينة ! (إبتسم لجنب ) .. بحالك !

..